OPISYAL na binuksan ng Pamahalaang Lungsod ng Valenzuela, sa pangunguna ni Mayor Wes Gatchalian, ang 2026 Business One-Stop Shop (BOSS) pagkatapos ng unang seremonya ng pagtataas ng watawat ngayong taon na siyang pagsisimula ng taunang pag-renew ng business permit at pagbabayad ng buwis sa lungsod.
Sa seremonya, ginawaran ni Mayor Wes ng Loyalty Awards ang 285 empleyado ng pamahalaang lungsod na tapat na naglingkod sa lungsod sa loob ng 10, 15, 20, 25, 30, 40, at 45 taon. Kinilala rin niya ang mga rescue personnel ng Valenzuela City Disaster Risk Reduction and Management Office (VCDRRMO) ang napakahalaga nilang pagsagip at tulong humanitarian na ibinigay sa Cebu at Catanduanes noong mga Bagyong Tino at Uwan noong huling bahagi ng 2025.
Kasunod nito, pormal na inilunsad ng Pamahalaang Lungsod ang ilang BOSS sa buong Valenzuela, kasabay ng malawakang promosyon ng Paspas Permit Online system, upang makapagbigay ng mas mabilis, mas ligtas, at mas maginhawang serbisyo sa mga may-ari ng negosyo at mga nagbabayad ng buwis.
Hinihikayat din ng lungsod ang lahat ng mga entidad ng negosyo at mga nagbabayad ng buwis na iproseso ang kanilang mga transaksyon online upang matiyak ang kaginhawahan at kahusayan, para higit pang mabawasan ang pangangailangan para sa mga manu-manong transaksyon sa City Hall.
Maaaring ma-access ang Paspas Permit sa pamamagitan ng pagbisita sa opisyal website ng Valenzuela City sa www.valenzuela.gov.ph at pag-click sa button na Paspas Permit.
Ang mga bagong user ay maaaring lumikha ng kanilang mga account upang magsagawa ng iba’t ibang online na serbisyo mula sa Business Permit and Licensing Office (BPLO), City Assessor’s Office, City Treasurer’s Office, Office of the Building Official (OBO), Local Civil Registry, City Health Office, at City Zoning Office.
Pinapaalalahanan ang mga nagbabayad ng buwis na bayaran ang kanilang mga obligasyon sa tamang oras sa pamamagitan ng iba’t ibang paraan ng pagbabayad na inaalok ng lungsod upang maiwasan ang 25% na surcharge at 2% na buwanang interes.
Para sa mga hindi makapagbayad online, ang Pamahalaang Lungsod ay nagtatag ng ilang BOSS sa ALERT Multi-purpose Center Hall, Brgy. Malinta, 3S Center Ugong, 3S Center Punturin, 3S Center Karuhatan, 3S Center Gen. T. De Leon, 3S Center Marulas at 3S Center Canumay West.
Pinapaalalahanan din ang mga korporasyon sa lungsod tungkol sa mandatoryong paggamit ng Paspas Permit system, gaya ng hinihingi sa ilalim ng City Ordinance No. 726, Series of 2020, o ang “Mandatory Use of Paspas Permit System for Corporations Ordinance.” (Richard Mesa)

HINDI pa tapos ang termino ni Pangulong Ferdinand Marcos Jr., kaya’t marami pang bagay ang asahan na mangyayari sa imbestigasyon ng malawakang flood control anomaly.
“Hindi pa po natatapos ang termino ng Pangulo, marami pa po ang mangyayari at magaganap,” ayon kay Presidential Communications Office (PCO) Undersecretary at Palace Press Officer Claire Castro.
Tugon ito ng Malakanyang sa kritisismo na hindi nagkatotoo ang sinabi ng Pangulo na marami itong mapakukulong na sangkot sa flood control anomaly bago mag-Pasko, lumalabas kasi na ang kontratista na si Sarah Discaya lamang ang naaresto.
“Ang binanggit po ng Pangulo doon sa kanyang report ay sa mga taong nabanggit niya, marami ang hindi magiging merry ang Christmas. Wala naman siyang binanggit kung sinong pangalan,” ani Castro.
“Pero tandaan natin, sa higit na apat na buwan may mga nakulong, may mga warrants of arrest na na-issue, may mga nagtago, mayroong nakikipag-usap at nagsi-settle at ibinibigay—rather restitution, isinusoli ang karamihan sa kanilang mga kickbacks na hindi naganap, never nangyari sa anumang administrasyon. Sa administrasyon lang po ni Pangulong Marcos nangyayari ang mga ito,” aniya pa rin.
Todo-paliwanag pa rin si Castro sa naging pangako ng Pangulo hinggil pagpapakulong sa mga sangkot sa flood control mess.
“Ang pagsabi po niya ng mayroong mga taong hindi magiging merry ang Christmas, iyong mga nakulong po definitely hindi naging merry ang Christmas. Pero hindi pa naman po natatapos ito. Kung mayroon pang inaabangan ang mga tao, mayroon din pong inaabangan ang Pangulo,” anito.
Hinihintay din aniya ng Pangulo ang mabilisang resolusyon na magmumula sa Ombudsman at Department of Justice (DoJ).
“Kung lahat ng maaaring sangkot ay matibay ang ebidensiya at iyon naman ang gusto ng Pangulo, due process ay inoobserba. Hindi pa po natatapos ang termino ng Pangulo, marami pa po ang mangyayari at magaganap,” ang sinabi ni Castro.
Samantala, wala pang updates si Castro hinggil naman sa kung papalitan ni Pangulong Marcos ang mga nagbitiw na miyembro ng Independent Commission for Infrastructure (ICI).
“Sa ngayon ay wala pa po tayong—hindi po tayo nabibigyan ng update kung magkakaroon po ng replacement,” anito.
Ginarantiya naman ni Castro na bagaman isa na lamang ang naiwang miyembro ng ICI, nananatili namang committed ang komisyon na ipagpatuloy ang imbestigasyon sa flood control corruption issues.
“At sa kasalukuyan po ay nagtatrabaho pa rin po ang mga nasa ICI at nandiyan din po ang Ombudsman na nangako na magpapatuloy po sila at nandiyan pa rin po ang enthusiasm na pabilisin ang pag-iimbestiga sa mga nasampahan na ng kaso,” dagdag na wika nito.
“So, hindi naman po titigil kahit po sabihin natin na isa na lang ang miyembro ng ICI, nandiyan pa rin naman ang executive director. Patuloy pa rin po ang pag-iimbestiga so hindi po titigil sa pag-iimbestiga,” aniya pa rin.
( Daris Jose)

DALAWANG araw na namahagi ang butihing Kongresista ng Unang Distrito ng Batangas na si Congressman Leandro Legarda Leviste kasama ang kanyang ina na si Senator Loren Legarda sa mga Bayan ng Nasugbu, Balayan, Lian at Taal na may kasamang Noche Buena Package para sa bawat mamamayan ng Distrito.

Bukod pa rito ay nagsagawa rin ng isang simpleng Christmas Salu-salo para sa mga mamamayan nito na mula sa sariling bulsa na hindi galing sa pondo ng gobyerno.

Labis ang kanyang pasasalamat ng Kongresista sa patuloy na pagsuporta ng mga kababayan nito sa Unang Distrito ng Batangas. Gayundin sa dedikasyon ng mga opisyales ng mga barangay para walang patid na pagseserbisyo sa kanilang mga kadistrito.

Ang nasabing halagang Php 50,000 pesos sa bawat barangay ay para sa mga gawain at mga aktibidad nila nitong Kapaskuhan para sa kani-kanilang nasasakupan.
(Boy Morales Sr.)

IPINAG-UTOS ng Department of Transportation (DOTr) sa mga operators na dagdagan ang mga buses na tumatakbo sa Edsa Busway upang mas madaming pasahero ang makasakay habang ginagawa ang rehabilitasyon ng Edsa.
“The move was meant to reduce waiting times and ease congestion, particularly during peak hours. At the DOTr, we are deploying more bus units so that our fellow commuters can board more quickly,” wika ni DOTr Secretary Giovanni Lopez.
Upang masuportahan naman ang traffic management habang ginagawa ang EDSA, naglagay ng 80 personnel mula sa DOTr-Special Action and Intelligence Committee for Transportation (Saict) na magbabantay sa loob ng 24 na oras.
Sila ang tutulong sa Metropolitan Manila Development Authority (MMDA) at Philippine National Police (PNP) sa pag-aayos ng daloy trapiko sa EDSA Busway.
“As part of our preventive measures to mitigate the effects of the construction on EDSA, we deployed personnel, particularly from Saict to assist in traffic management,” ayon kay DOTr Usec Mark Pastor.Sa ngayon at ayon sa Department of Public Works and Highways (DPWH) ay natapos na ang reblocking at asphalt overlaying works sa estasyon ng EDSA at inaayos na ang access papuntang istasyon ng Buendia upang masimulan na ang operasyon sa nasabing istasyon.
Magkakaroon pa rin ng mga malawakang pag-aayos sa EDSA Busway ngayon taon. Sisimulan ngayon unang quarter ang pagdaragdag ng tatlong (3) istasyon na ilalagay sa Cubao, Magallanes, at Paranaque Integrated Terminal Exchange at inaasahang matatapos sa huling quarter ng taon. Habang ang bagong EDSA Busway sa istasyon ng Kamuning ay magkakaroon ng paglulunsad sa unang quarter ng 2026. Ang bagong istasyon ay mayroong elevators at escalators upang maging maayos ang access para sa mga persons with disabilities, senior citizens, at pregnant women.
“A new footbridge, separate from the MRT 3, is also being built in the area to provide safer and more convenient access for commuters,” dagdag ni Pastor.

Ayon sa DOTr ay daragdagan rin ang kapasidad ng MRT 3 kung saan lalagyan ito ng dagdag na Dalian trains upang makapagsakay pa ng mas maraming pasahero lalo na kung peak hours. LASACMAR

AYON sa LTO ang istriktong panghuhuli at pag -impound ng mga e-trikes at e-bikes sa mga piling lansangan ay “for road safety considerations” and not for “business or revenue purposes”.
Ayon sa ahensya malaki ang “speedy discrepancy” ng mga e-trikes at four wheel vehicles kaya sa mga major roads ay mas malaki ang posibilidad ng aksidente at abala sa usad ng trapiko. Idagdag pa dito na ang mga drivers nito ay walang lisensya o rehistro.

Sa kabilang panig naman ay may mga economic at legal issues na dapat ikonsidera. Maraming masang Pilipino na gumagamit ng mga sasakyang ito para makatipid sa pasahe at umalwan ang kanilang byahe dahil sa hirap ng pagsakay sa public transport. Hindi rin daw naaayon sa Electric Vehicle Industry Development Act ( EVIDA law) and aksyon ng LTO dahil sa malabnaw at malabo ang polisiya. Ayon daw sa batas REGULATION AT HINDI PROHIBITION ang kailangan upang mabalanse ang safety concerns sa economic at legal concerns.

Ayon sa ‘MAKE IT SAFER MOVEMENT”, “it did not see the ban reducing road crashes and traffic” ( MOTORING TODAY).

Pero bakit kapag masa ang gumagamit at may pakinabang sa kanilang pamumuhay ay laging may reklamo sa paggamit nila?

Kaligtasan lang ba o may mas malalim pang dahilan?

Mahalaga maibalanse ang mga issues sa paggamit ng mga e-trikes at e-bikes. Hindi pwede na puro bawal, multa at huli lang.

Noon ay hinuhuli at ibinawal ang motorcycle taxi. Pero dahil sa pakikipaglaban ng sector ay na regulate ito at ngayon ay bahagi na ng public transport.

Noon ay bawal ang mga ride hailing app dahil mga colorum daw ito. Pero ngayon ay regulated na at libu-libo ang mga tumatangkilik dito at nagkahanap buhay ang mga TNVS.

Hindi safety lamang ang issue sa usaping ito. Buhay ng masang Pilipino ang apektado dito. ( Atty. Ariel Inton)