Ang Diyaryong Pinagkakatiwalaan
WALA pang konkretong plano si 24-time Grand Slam tennis champion na si Novak Djokovic kung ito ay magreretiro na.
Sinabi ng 38-anyos Serbian tennis star na nananatiling hindi nawawala ang hilig niya sa tennis.
Target pa rin nitong makalahok sa 2028 Los Angeles Olympics.
Bagama’t nasa world ranked number 4 ito ay masaya pa rin ito sa paglalaro ng tennis.
Mas pinipili niyang makaharap sa torneo ang ilang mga batang tennis players para subukan ang kaniyang lakas sa paglalaro.
NAPILING maging host ang Pilipinas ng kauna-unahang Southeast Asian Plus Youth Games o SEA Plus YG sa taong 2028.
Ang nasabing torneo ay isang paghahanda sa mga atletang may edad 17 pababa para sa Asian Youth Games at ang Youth Olympic Games (YOG).
Ito ay binuo sa pamamagitan ni Philippine Olympic Committee (POC) president Abraham “Bambol” Tolentino kung saan siya rin ang founding president.
Nakakuha si Tolentino ng suporta mula sa siyam na national Olympic committee (NOC) presidents ng mga bansang Thailand, Indonesia, Malaysia, Laos, Cambodia, Myanmar, Vietnam at Timor Leste.
Tiniyak din sa kanila ng Olympic Council of Asia (OCA) ang tulong na ibibigay para sa ikakatagumpay ng nasabing torneo.
Dagdag pa ni Tolentino na ang SEA Plus YG ay siyang kasagutan sa Southeast Asia na humuhubog sa mga atleta.
Pagkatapos ng 2028 ay magiging kada dalawang taon na gaganapin ang SEA Plus YG.
INIHAYAG ni Philippine National Police (PNP) Acting Chief PLtGen. Jose Melencio Nartatez, Jr., na generally peaceful ang pagdiriwang ng pagsalubong sa Bagong Taon sa buong bansa.
Sinabi ni Nartatez na walang banta o anumang insidente ng karahasan ang naitala mula nitong Kapaskuhan hanggang sa New Year’s revelry.
“I commend all our personnel on the ground for successfully implementing our security plan which led to the peaceful and orderly New Year celebration across the country,” ani Nartatez.
Ayon kay Nartatez, malaki ang kanilang pasasalamat sa mga local government units na nanguna at nagpatupad mga regulasyon hinggil sa bentahan at pagpapaputok.
Bagama’t may iilang mga insidente ng pagpapaputok at biktima ng paputok, maituturing pa rin ligtas ang pagsalubong sa taong 2026
“The coordination with local government units and other agencies and stakeholders also played a key role in peace and order and in responding to all public safety concerns,”dagdag pa ng Acting PNP Chief.
Giit pa ni Nartatez, nakita sa publiko ang pagsunod sa mga awtoridad kabilang ang inspections, checkpoints, at kompiskasyon ng mga ipinagbabawal na paputok.
“Hindi kakayanin ng PNP mag-isa ang pagpapanatili ng kaayusan kung walang tulong ng mamamayan,” ani Nartatez.
( Daris Jose)
Ang pahayag ay ginawa ng DOH sa isang pulong balitaan sa Amang Rodriguez Memorial Medical Center kahapon, kasunod ng mga ulat na dumarami ang kaso ng super flu sa Estados Unidos at Europa.
Ayon kay DOH spokesperson and Assistant Secretary Albert Domingo, Agosto 6 hanggang Oktubre 24 pa nang huling makapagtala ang Pilipinas ng 41 kaso ng super flu AH3N o Subclade K.
Gayunman, nakarekober na ang mga naturang pasyente at sa ngayon ay wala silang naitatalang aktibong kaso ng sakit. Wala rin silang naitalang Subclade K cases bago ang Agosto 6.
Paliwanag ni Domingo, ang Subclade K ay kahalintulad ng seasonal flu at ang kasalukuyang 2025 influenza vaccines ay napatunayang epektibo laban dito.
Samantala, sinabi naman ni Health Secretary Teodoro Herbosa na ang pagdami ng Subclade K cases ay nagaganap sa panahon ng tag-lamig sa malalamig na lugar, gaya ng US at Europe.
NAKAPAGTALA ang Department of Health (DOH) ng 235 firework-related injuries (FWRI) sa bansa, matapos ang pagsalubong sa Bagong Taon.
Ayon sa DOH, ang naturang bilang ng mga taong nasugatan dahil sa paputok ay mula Disyembre 21, 2025 hanggang 4:00AM ng Enero 1, 2026.
Ito ay 42% na mas mababa kumpara sa 403 kaso na naitala sa kahalintulad na petsa ng nakaraang taon.
Nabatid na 62 sa mga naturang kaso ay naitala nitong bisperas ng Bagong Taon lamang.
Nasa 161 sa mga biktima ay nagkaka
edad ng 19-taong gulang pababa.
Sinabi ni DOH spokesperson Assistant Secretary Albert Domingo na maaaring madagdagan pa ang naturang bilang, sa pagpasok ng pinal na ulat sa tally ng FWRIs, sa unang linggo ng taon.
“Even as we see today a lower than last year count for fireworks related injuries, the DOH anticipates that late reports will come in from today Jan 1 all the way to Jan 5. We hope the lower count will stay,” ani Domingo.
Hinikayat din ni Domingo ang publiko na sakaling may mabiktima ng paputok sa kanilang pamilya ay kaagad na isugod sa pinakamalapit na pagamutan upang malunasan.
“Symptoms do not appear until around 8 days, some up to 21 days later, and they can be deadly. Vaccination against tetanus is available at hospitals,” dagdag pa niya.
Ang datos ay nakalap ng DOH mula sa binabantayang 62 sentinel hospitals ng ahensiya. (Daris Jose)
TANGGAP ng Pilipinas, bilang napipintong chairman ng Association of Southeast Asian Nations (ASEAN), ang kasunduan sa pagtigil ng labanan sa pagitan ng Cambodia at Thailand matapos ang ilang linggong bakbakan.
Sa ulat, nagkasundo ang Thailand at Cambodia para sa kapayapaan na nag-iwan ng 101 katao na nasawi.
“The Philippines fully supports the latest move by Cambodia and Thailand to return to a ceasefire and acknowledges the desire of both parties to return to dialogue and seek a peaceful and durable means to resolve the issue,” ayon kay Foreign Affairs Spokesperson Angelica Escalona.
Sa isang joint statement, ipinalabas araw ng Sabado, kapuwa sumang-ayon ang magkabilang panig na magpatupad ng de-escalation measures, kabilang ang payagan ang mga mamamayan na nakatira sa apektadong border areas na bumalik.
Napagkasunduan din ng dalawang estado na pakalmahin ang puwersa kasama ang buong Cambodia-Thailand border.
Samantala, kasunod ng two-day summit nito lamang Dec. 28 hanggang 29, Cambodia’s Foreign Minister, Prak Sokhonn, at kanyang Thai counterpart, Sihasak Phuangketkeow, nakapulong si Chinese Foreign Minister Wang Yi sa Yunnan, China, para pag-isahin ang ceasefire at pag-usapan ang mga hakbang para ipagpatuloy ang ‘normal exchanges’ at muling patatagin ang mutual trust. ( Daris Jose)
MAHIGIT sa kalahati ng mga pinoy ang pabor na mabuo ang isang “ fully empowered Independent Commission Against Infrastructure Corruption (ICAIC).”
Sa katunayan, lumabas sa “Ulat ng Bayan” Survey ng Pulse Asia na isinagawa mula Dec. 12 hanggang 15 na 52% ng mga pinoy ang sumang-ayon na dapat na ang Kongreso ay “immediately” na maipasa ang batas ukol sa paglikha ng nasabing body—taliwas sa 33% na “somewhat agree” na madaliin na maisabatas ang batas at 15% naman ang hindi nakikita ang pangangailangan ng agarang maipasa ang batas.
Pagdating sa geographical areas, may 67% sa Metro Manila ang payag ng agarang maitatag ang ICAIC, kasunod ng 61% sa Visayas at 52% sa Luzon sa labas ng Maynila.
Ang mga tugon ay nahati sa Mindanao, na may 35% ang sumasang-ayon sa agarang paglikha ng ICAIC, 24% ang hindi sumasang-ayon at 41% ang undecided.
Pagdating naman sa social class, ang opinyon ay nahati sa Class C respondents, na may 40% ang sumasang-ayon, 20% ang hindi sumasang-ayon at 40% ang undecided.
Samantala, isinagawa ang survey na may face-to-face interviews sa 1,200 adults at mayroong margin of error na plus-o-minus 2.8%. ( Daris Jose)
IGINIIT ng Malakanyang na hindi nito hahadlangan ang anumang imbestigasyon na magsasangkot sa ilang cabinet officials sa kontrobersiyal na insertions o pagsisingit sa 2025 budget ng Department of Public Works and Highways (DPWH).
Muling inulit ni Presidential Communications Office (PCO) Undersecretary at Palace Press Officer Claire Castro na ‘no sacred cows’ sa imbestigasyon.
“Ang Pangulo naman po, in general, kung sinabi dapat managot, kung sinong sangkot, dapat mapanagot… Hayaan lang po natin na mag-imbestiga rito at kung anong tutumbukin ng ebidensya, edi sampahan po ng kaso,” ayon kay Castro.
Nauna rito, napaulat na ibinunyag ni Senate Pro Tempore Panfilo Lacson na may hindi bababa sa limang cabinet secretary at ilang undersecretary ang may allocables at non-allocables sa 2025 ok qnational budget, na umaabot umano sa bilyon-bilyong piso.
Ayon kay Lacson, batay sa dokumentong mula sa kampo ni dating Department of Public Works ang Highways (DPWH) Undersecretary Maria Catalina Cabral at mula mismo sa DPWH, kabilang sa may allocables si dating DPWH Secretary Manuel Bonoan at isa umanong “ES.”
“At least five. Tapos may undersecretaries. Nagulat din ako, isang nakalagay doon, ‘ES, P8 billion.’ Paano magkaroon ng allocable ang ‘ES’?” ani Lacson.
“Kay Sec. Bonoan, nakita ko ang kanyang allocables isang P5 billion, tapos may Batches 1-3 na nakakahalaga ng P25.5B – P10B, P8B, at P7.5B. Umaabot na siya ng P30.5 billion. Anong karapatan niya magkaroon ng allocables? Tapos meron ding Cabinet secretaries na meron ding tig-P2 billion. Bakit?” dagdag niya.
Ayon kay Lacson, may bilyon-bilyong allocables din para sa House leadership at ilang party-list groups. Gayundin, isa pang miyembro ng gabinete bukod kay Bonoan ang nakinabang sa kickback, batay sa pahayag ni dating DPWH Usec. Roberto Bernardo na naghatid umano ng pera sa opisyal.
Sinabi rin ng senador na posibleng imbitahan ang mga opisyal sa imbestigasyon ng Senate Blue Ribbon Committee kapag na-authenticate na ang mga dokumento, kabilang ang mga Special Allotment Release Orders (SARO) na may petsang Disyembre 27, 2024.
Ipinapakita aniya ng mga dokumentong mula sa kampo ni Cabral na may kinalaman ang mga SARO sa pagpapalabas ng P50 bilyong unprogrammed appropriations, kung saan P30 bilyon ang para sa flood control projects, at marami sa mga ito ang napatunayang “ghost projects.”
Bago pumanaw, inihayag din umano ni Cabral na handa siyang tumestigo hinggil sa mga SARO. Ngunit ayon kay Lacson, maaaring ipa-authenticate ang mga dokumento kay Budget Officer-in-Charge Rolando Toledo o sa DPWH mismo.
“Ang pinagbabasehan ko lang ang hawak bigay sa akin ng lawyer ni Usec Cabral at ibang documents nakuha ko sa DPWH. Pwede ko pa-authenticate sa kanila ‘yan. Bakit magkaroon ng allocable ang Cabinet secretary? ‘Pag allocable, patungkol ito sa mambabatas na naghihiling ng proyekto na hindi rin dapat para sa akin… ang NEP is exclusive domain ng executive branch,” ani Lacson.
( Daris Jose)
HINARANG ng mga tauhan ng Bureau of Immigration (BI) Advance Passenger Information System (APIS) ang dalawang dayuhang takas na sinubukang maghanap ng kanlungan sa Pilipinas noong madaling araw ng Enero 1 sa NAIA Terminal 1.
Ang mga paghaharang ay isinagawa alinsunod sa diretiba ni Pangulong Ferdinand R. Marcos Jr. na palakasin ang seguridad ng hangganan ng Pilipinas sa pamamagitan ng epektibong paggamit ng teknolohiya.
Ang APIS ay patuloy na nagbibigay ng maagang impormasyong pantala na nagpapahintulot sa mga awtoridad na makilala ang mga pasaherong may mataas na panganib bago pa man sila dumating.
Sa ulat Melvin Mabulac, Punong Tagapamahala ng APOC at Pangalawang Tagapagsalita ng Bureau, kay BI Commissioner Joel Anthony Viado, kinilala ang unang indibidwal na si Battulga Ganbold, isang 30-anyos na mamamayan ng Mongolya na dumating mula sa Vietnam, ay tinanggihan ng pasok matapos makita sa mga talaan na mayroon siyang nakabinbing utos ng pag-aresto sa South Korea para sa isang kasong kaugnay ng droga. Ang pangalawang indibidwal na si Ercan Mutlu, isang 37-anyos na mamamayan ng Turkiya na dumating mula sa Hapon, ay hindi rin pinapasukang muli matapos makumpirmang siya ay isang takas sa batas na hinahanap sa Turkiya para sa mga kasong pang-aabuso sa sekswal at prostitusyon.
Pinuri at binati ni Viado ang BI para sa kanilang propesyonalismo, dedikasyon, at patuloy na serbisyo sa bansa.
(Gene Adsuara)
MAGPAPATUPAD ng zero vendor policy sa paligid ng Quiapo Church sa gagawing pagbabasbas ng mga replica ng Poong Jesus Nazareno sa Enero 3.
Upang mapanatili ang kaayusan, kapayapaan at kaligtasan ng mga makikibahagi ng pagbabasbas , ang Manila Police District (MPD) ay maglalatag nang mahigpit na seguridad .
Ang pagbabasbas sa mga replica ng Poong Jesus Nazareno ay bahagi ng mahabang aktibidad ng Kapistahan ng Quiapo tuwing Enero.
Nauna na ring sinabi ng pamunuan ng Quiapo na ilang mga kalsada ang kailangang isara upang bigyang daan ang gaganapin mga aktibidad.
Dahil dito, asahan na ang pagbagal ng usad ng trapiko sa paligid ng simbahan ng Quiapo bukas lalo na’t inaasahan na mananatili ang mga may bitbit na replica sa Carriedo, Villalobos, Carlos Palanca, Quezon Blvd., Mc Arthur Bridge, Avenida at Recto Avenue.
Ayon naman sa HAWKERS Manila, ang polisiya na zero vendor policy ay ikakasa sa kabahagi ng Villalobos Street at Estero Cegado sa Brgy.306.
Magsasagawa rin ng clearing operations para matanggal ng lahat ng sagabal sa kahabaan ng Carlos Palanca malapit sa simbahan.
Bukod dito, maaga rin isasagawa ang flushing activity sa Villalobos Street at Plaza Miranda upang masiguro ang kalinisan sa pagsisimula ng aktibidad. (Gene Adsuara)