2025 September Archive - People's Balita

Archive for September, 2025

Sa harap ni PBBM: Vince Dizon, opisyal nang nanumpa bilang bagong DPWH Sec

Posted on: September 2nd, 2025 by @peoplesbalita No Comments

OPISYAL nang nanumpa sa harap ni Pangulong Ferdinand Marcos Jr., si dating Transportation Secretary Vince Dizon para sa kanyang bagong tungkulin bilang Kalihim ng Department of Public Works and Highways (DPWH).

Pinalitan ni Dizon si dating Sec. Manuel M. Bonoan, epektibo, Lunes, Setyembre 1, 2025.

Nauna rito, inatasan ni Pangulong Marcos si Dizon na magsagawa ng ganap na pagbabagong bihis ng departamento at tiyakin na ang pondo ng publiko ay gagamitin lamang para sa imprastraktura na tunay na magpoprotekta at mapakikinabangan ng mamamayang Filipino.

Upang igarantiya ang patuloy na service delivery sa Department of Transportation (DOTr), itinalaga ng Pangulo si Atty. Giovanni Z. Lopez bilang Acting Secretary.

Si Atty. Lopez ay nanumpa bilang Undersecretary for Administration, Finance, and Procurement noong February 2025. Nagsilbi siya bilang Chief of Staff sa Office of the Secretary mula 2020 hanggang 2022 at humawak ng senior positions na nangasiwa sa napakahalagang ‘railway, aviation, at maritime infrastructure projects.’

Bilang Acting Secretary, titiyakin ni Atty. Lopez na magpapatuloy at mapagtagumpayan ang mga sinimulan ng liderato ni Secretary Dizon partikular na ang pagsusulong sa transport modernization at suportahan ang inisyatiba na prayoridad ang ‘commuter safety, efficiency, at seamless project delivery.’

Upang mas palakasin ang pananagutan, itinatag ng Pangulo ang Independent Commission para imbestigahan ang Flood Control Anomalies. Ang body ay magsasagawa ng komprehensibong pagrerebisa ng proyekto, kilalanin ang mga iregularidad, at magrekomenda ng mga hakbang sa pananagutan upang tiyakin ang public trust sa infrastructure spending.

Ang mga desisyon na ito ay sumasalamin sa matatag na pagpapasya ng administrasyon na linisin ang korapsyon, palakasin ang institusyon at maghatid ng tapat at epektibong public service sa ilalim ng Bagong Pilipinas. ( Daris Jose)

PCAB, isasailalim sa malawakang pagbabago- Dizon

Posted on: September 2nd, 2025 by @peoplesbalita No Comments

MAGSASAGAWA si Department of Public Works and Highways Secretary Vince Dizon ng malawakang pagbabago sa loob ng Philippine Contractors Accreditation Board (PCAB) sa gitna ng imbestigasyon sa flood control projects ng bansa.

Inanunsyo ito ni Dizon sa press briefing sa Malakanyang matapos ang kanyang oath taking sa harap ni Pangulong Ferdinand Marcos Jr., araw ng Lunes.

Nauna rito, napaulat na sinabi ni Senador Panfilo Lacson na may isang kontratista ang ginatasan di umano ng Philippine Contractors Accreditation Board (PCAB) ng P7 milyon kapalit ng accreditation ng kanyang construction firm.

Ani Lacson, ang kontratista ay kabilang sa Top 15 contractor na pinangalanan ni Pangulong Marcos na sumungkit ng P100 bilyong flood control project mula 2022 hanggang 2025.

Hindi maalala ng senador kung anong taon ito nangyari pero madali lang itong maberipika sa PCAB.

“‘Yung isang contractor, ‘yung unang-unang accredi¬tation niya, P7 million ang binayad niya,” paglalahad ni Lacson sa isang radio interview nitong Linggo.

Nakatisod din ng impormasyon si Lacson na isa pang contractor ang kinikilan ng PCAB nang magkaroon naman ng problema sa construction company.

“Meron namang isang nagkaproblema, nakipag-settle sa PCAB, hiningan naman ng milyon din. ‘Yan extortion talaga iyon kasi bina-blackmail. Nag-cough-up talaga ang contractor kasi nagkaroon siya ng kaunting problema at gusto niyang i-settle. Tinakot siya at (sinabihang) ‘di ma-renew ang lisensiya mo,” dagdag ng senador.

Nauna rito ay sinabi ni Lacson sa speech sa Senado na binebenta ng P2 milyon ang accreditation sa PCAB pero sa bago niyang natuklasan ay kinikikilan din pala ang mga contractor na may problema.

Wala pang pahayag ang PCAB sa bagong pasabog ni Lacson pero dati na nilang itinanggi na mayroong accreditation for sale sa board. ( Daris Jose)

Mayor Jeannie, naghatid ng TulongKalusugan

Posted on: September 2nd, 2025 by @peoplesbalita No Comments

SAKAY ng mga bangka, personal na pinuntahan ni Mayor Jeannie Sandoval kasama si Dr. Lester Tan, Regional Director ng Department of Health (DOH) ang Artex Compound, sa Brgy. Panghulo, Malabon City matapos ang paglulunsad ng PuroKalusugan sa naturang barangay para maiabot ang tulong pang kalusugan lalo na sa mga residenting nasa liblib at mahirap puntahang lugar.

Aniya, ang matagumpay na programang ito ay patunay ng malasakit at pagkalinga ng Lokal na Pamahalaan upang masiguro na walang Malabueño ang maiiwan pagdating sa kalusugan at serbisyong panlipunan. (Richard Mesa)

BAGONG COURT ADMINISTRATOR, ITINALAGA NG KORTE SUPREMA

Posted on: September 2nd, 2025 by @peoplesbalita No Comments

ITINALAGA bilang bagong Court Administrator ng Korte Suprema si Sandiganbayan Associate Justice Ma. Theresa Dolores Gomez-Estoesta.

Si Associate Justice Gomez-Estoesta ang kapalit ni dating Court Ad Raul Villanueva na ngayon ay nagsisilbi nang Associate Justice ng Supreme Court.

Epektibo ang kanyang panunungkulan mula ngayong Lunes, unang araw ng Setyembre.

Bago maitalaga bilang Court Administrator ng SC, nanilbihan din si Estoesta sa Office of the Solicitor General, at naging hukom ng iba’t ibang Korte sa Maynila hanggang noong 2014 bago siya italaga sa Sandiganbayan kung saan pinamunuan niya ang Seventh Division. (Gene Adsuara)

Mayor WES, kasama sa mga pinangalanang Mayors para sa Good Governance

Posted on: September 2nd, 2025 by @peoplesbalita No Comments

IPINAGMALAKI ng Pamahalaang Lungsod ng Valenzuela si Mayor WES Gatchalian matapos itong opisyal na makasama sa mga pinangalanang Mayors para sa Good Governance (M4GG), isang kilusan ng local chief executives na nagsusulong ng integrity, accountability, at transparency.

Si Mayor Wes na kasalukuyang naglilingkod sa kanyang ikalawang termino ay naglunsad ng ilang mga programa para sa kapakanan ng Pamilyang Valenzuelano, mula sa quality at inclusive education, robust social welfare initiatives, peace and order advantage, housing projects, hanggang sa disaster preparedness, at flood resilience efforts.

Sa ilalim ng kanyang pamumuno, ang Valenzuela City ay patuloy na nagkamit ng pagkilala para sa mabuting pamamahala, kabilang ang natanggap na Seal of Good Local Governance para sa dalawang magkasunod na taon at pagpapanatili ng Unmodified Opinion mula Commission on Audit na isang malinaw na testamento ng transparency at accountability ng financial management nito.

Higit pa rito, champions din si Mayor WES sa child protection at ginawaran ng isa sa mga outstanding local governance programs sa 2024 ng Galing Pook Awards.

“Good governance is not a trend in Valenzuela – it has been our way of life for years. M4GG is a chance to bring the same fight for accountability and transparency to the national stage. ” ani Mayor WES.

Itinatampok ng inisyatiba ng Mayors for Good Governance ang mga mahuhusay na pinuno sa buong bansa na nagsilbing huwaran sa pagtataguyod ng mga pagpapahalaga, pagpapalaganap ng participatory leadership, at pagtiyak na ang bawat programa ay nararamdaman ng kanilang nasasakupan.

Sa pagiging bahagi ng roster na ito, sumali si Mayor WES sa isang komunidad ng mga pinunong nagtataas ng pamantayan ng good governance sa bansa.

Itinuturing ng Pamahalaang Lungsod ng Valenzuela ang pagkilalang ito bilang isang matibay at matatag na pangako ni Mayor WES Gatchalian sa mabuting pamamahala at ang kanyang dedikasyon sa paghahatid ng mabilis, dekalidad, mahusay na public service at mga programa para sa bawat Pamilyang Valenzuelano.

(Richard Mesa)

MOA Signing with Aboitiz Navotas City Mayor John Rey Tiangco

Posted on: September 2nd, 2025 by @peoplesbalita No Comments

LUMAGDA si Navotas City Mayor John Rey Tiangco sa Memorandum of Agreement (MOA) kasama si DENR-EMB NCR Regional Director-in-Charge Engr. Divina C. Camarao at AboitizPower AVP for Corporate Services Engr. Lou Jason Deligencia na sinaksihan ng mga barangay officials at community stakeholders para sa pagsasaayos at pag-protekta sa isang bahagi ng Navotas River sa ilalim ng Adopt-an-Estero/Waterbody Program. (Richard Mesa)

BI MINO-MONITOR ANG GALAW NG MGA SANGKOT SA MISSING SABUNGERO

Posted on: September 2nd, 2025 by @peoplesbalita No Comments

BINABANTAYAN ng Bureau of Immigration ang galaw ng mga sangkot sa missing sabungeros.

Sinabi ni Immigration spokesperson Dana Sandoval na ipag-utos ni Immigration Commissioner Joel Anthony Viado na i-monitor ang lahat ng mga tauhan nito lalo na ang kanilang biyahe ng mga personalidad na sangkot .

Sinabi ni Sandoval na ang naturang utos ng komisyuner ay proactive measure pa lamang dahil wala pa silang natatanggap na kopya ng immigration look out bulletin order na inilabas ng department of justice laban kay Atong ang.

Matatandaang ipinag utos na ni Justice Sec. Remulla ang pag montior sa byahe ng mga sangkot sa nawawalang sabungero base na rin sa mga pahayag at impormasyong ibinhagi sa kanila ng whistleblower na si julie patidongan.

Ang immigration lookout bulletin order o ilbo ay hindi makakapigil sa mga indibidwal na makalabas ng bansa subalit ito ay magbibigay ng impormasyon sa mga otoridad hinggil sa pag alis ng bansa ng isang personalidad. (Gene Adsuara)

Walang lugar para sa maanomalyang proyekto sa 2026 budget- Malakanyang

Posted on: September 2nd, 2025 by @peoplesbalita No Comments

HINDI kailanman kukunsintihin ni Pangulong Ferdinand R. Marcos Jr. ang mga kuwestiyonableng “insertions” sa panukalang 2026 national budget.

Binigyang diin na ang pondo ay dapat lamang na mapunta sa lehitimong proyekto at hindi para ulitin ang alokasyon para sa natapos nang trabaho.

Ito’y matapos na isiwalat ng mga mambabatas na kabilang sa 2026 National Expenditure Program (NEP) na isinumite ng Department of Budget and Management (DBM) ang budget allocations para sa mga proyektong natapos na.

“Hindi po ito papayagan ng Pangulo. Nadinig po natin, galit na po ang Pangulo at ayaw po niya na may isinisingit pa sa budget dahil ang budget na ‘to ay para sa taumbayan at para sa proyekto para sa bayan,” ayon kay Presidential Communications Office Undersecretary at Palace Press Officer Claire Castro sa press briefing sa Malakanyang.

Sinabi pa ni Castro na dapat na makipag-ugnayan muna ang mga mambabatas sa mga ahensiya gaya ng Department of Public Works and Highways (DPWH) para iberipika kung ang napunang proyekto ay ‘truly finished’ o nagpapatuloy sa iba pang lokasyon.

Nauna rito, ikinalungkot ni Pangulong Marcos na nananatiling may “insertions” sa panukalang 2026 budget.

“Unfortunately, the more we look, the more we find. Kahit sa 2026 budget, marami pa ring siningit. So talagang — it really needs to be cleaned out properly,” aniya pa rin.

Inihayag ito ng Pangulo matapos bigyang-diin ang paglikha ng independent commission na mag-iimbestiga sa di umano’y anomalya sa DPWH. ( Daris Jose)

Mga kontratista na nasa likod ng ‘ghost projects’, magiging ‘blacklisted for life’- Dizon

Posted on: September 2nd, 2025 by @peoplesbalita No Comments

MAGIGING ‘blacklisted for life’ ang mga kontratista na mapatutunayang sangkot sa ghost projects.

Ito ang tiniyak ni DPWH Secretary Vince Dizon matapos na humingi ng permiso kay Pangulong Ferdinand R. Marcos, Jr. na pagbabawalan na niya magpakailanman at tuluyang iba-blacklist ang mga pribadong kompanya na mapatutunayang sangkot sa illegal government projects.

“…These ghost projects and substandard projects, I have also cleared it with our President that the contractors of these ghost projects, first of all, I will impose a lifetime blacklisting, ban, immediately,” ang sinabi ng Kalihim.

Idinagdag pa ni Dizon na wala nang gagawing imbestigasyon laban sa mga mga huwad na kontratista, kapag napatunayan na sangkot sila sa ilegal na aktibidad.

“When a project of a contractor is (a) ghost (project) or proven to be substandard, there is no more process, no more investigation, that contractor is automatically blacklisted for life,” anito.

Iniulat din ni Dizon na nakatakdang bumuo si Pangulong Marcos ng isang independent body na magi-imbestiga sa mga ilegal na proyekto na may kaugnayan sa isinasagawang flood control.

“And of course, there is also an associated case, and we will forward everything we get to the independent commission that our President will establish,” ang pahayag ni Dizon.

“They will investigate and file appropriate cases against DPWH staff, contractors and others involved in these projects that were really ‘thrown into the river,’ to use the words of our President,” aniya pa rin.

Araw ng Lunes, Setyembre 1, nanumpa sa kanyang tungkulin bilang bagong DPWH Secretary si Dizon, sa harap ni Pangulong Marcos. Pinalitan niya si Manuel Bonoan na nagbitiw sa kanyang posisyon, araw ng Linggo.

Bago pa ang kanyang bagong posisyon bilang DPWH Secretary, pinamunuan ni Dizon ang Department of Transportation sa loob ng anim na buwan. ( Daris Jose)

Para linisin ang departamento sa gitna ng anomalya sa multibillion-peso flood control projects… Dizon, ipinag-utos ang courtesy resignations sa lahat ng mga opisyal ng DPWH

Posted on: September 2nd, 2025 by @peoplesbalita No Comments

IPINAG-UTOS ni Department of Public Works and Highways (DPWH) Secretary Vince Dizon ang pagsusumite ng courtesy resignation sa lahat ng opisyal ng DPWH.

Kasunod ito ng direktiba ni Pangulong Ferdinand R. Marcos Jr. na linisin ang departamento sa gitna ng di umano’y iregularidad sa multibillion-peso flood control projects.

Ang nasabing hakbang ani Dizon ay simula ng gagawin niyang pamumurga sa departamento upang maibalik ang tiwala ng publiko, tiyakin ang transparency, at igarantiya na ang bawat piso na gagastusin sa imprastraktura ay tunay na maisisilbi sa mga mamamayang Filipino.

“Ang unang-una ko pong order na ilalabas ay ang pag-order ng courtesy resignations top to bottom: usec, asec, division head, regional director, hanggang district engineer ng buong bansa,” ang sinabi ni Dizon sa press briefing sa Malakanyang.

“Iyan po ang unang-unang direktiba ng ating Pangulo. Nag-usap po kami nang matagal kaninang umaga at ang sabi niya ‘linisin’ ang DPWH at ito po ang simula,” aniya pa rin.

Winika pa ni Dizon na ipatutupad niya ang malawakang balasahan sa loob ng 30 hanggang 60 araw.

Samantala, pinalitan ni Dizon si Manuel Bonoan, na bumaba sa puwesto sa ilalim ng “principle of command responsibility”matapos na lumutang ang anomalya sa flood control projects.

(Daris Jose)