PAGKAKALOOBAN ni Pangulong Ferdinand R. Marcos Jr. ng ‘subpoena power’ ang independent commission na mag-iimbestiga sa usapin ng flood control.

“Noon po ay sinasabi po natin na mukhang walang subpoena power. Pero ang nais po ng Pangulo sa nasabing independent commission ay mabigyan po ng lakas, mabigyan ng ngipin para po mas mapatupad kung ano ang mandato ng independent commission na ito,” ayon kay Presidential Communications Office Undersecretary at Palace Press Officer Claire Castro.

“At nais po ng Pangulo na magkaroon po ng subpoena power ang independent commission,” aniya pa rin.

Winika ni Castro na ang pagpapalabas ng executive order na magtatatag ng independent body ukol sa flood control probe ay isinasapinal na.

Sa ngayon, tanggap naman ni Castro na may ilang indibidwal kabilang na ang mga kontratista na iniuugnay sa tinatawag na “ghost” flood control projects, ay maaaring umalis ng bansa lalo pa’t wala pa namang kaso na isinasampa laban sa mga ito.

“Sa ngayon po, since wala naman kasing kaso pang naisasampa, hindi talaga natin mapipigilan ang sinumang lumabas ng bansa dahil may freedom of movement po tayo at ‘yun ay nire-respeto,” aniya pa rin.

Sa kabilang dako, inanunsyo ni Castro na kagyat na gumawa ng aksyon si Department of Public Works and Highways (DPWH) Secretary Vince Dizon, kabilang na rito ang hilingin ang immigration lookout bulletin order laban sa mga agency officials at mga kontratista na nauugna sa maanomalyang flood mitigation projects.

Sa katunayan, ipinag-utos ni Dizon ang perpetual blacklisting ng contractors Wawao Builders at SYMS Construction Trading kasunod ng natuklasan na non-existent flood control projects sa Bulacan province.

Ipinag-utos din ng Kalihim ang pagpapaalis sa puwesto at paghahain ng criminal charges laban kay DPWH Bulacan First District Engineer Henry Alcantara dahil sa pagkakasangkot nito sa maanomalyang flood control projects. ( Daris Jose)

NANAWAGAN ang Malakanyang sa mga ahensya ng gobyerno na muling bisitahin at tingnan ang kani-kanilang mga spending plans para sa 2026 para i- check kung may anumang posibleng budget insertions.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na dapat gumawa ng inisyatiba ang ibang ahensiya para rebisahin ang kanilang budget proposals sa 2026 National Expenditure Program upang itama ang anumang mga hindi pagkakaayon at pigilan ang pagsisingit.

Ang panawagan na ito ay matapos na ipag-utos ni Pangulong Ferdinand R. Marcos Jr. ang ‘sweeping review’ sa panukalang 2026 budget ng Department of Public Works and Highways (DPWH) upang magawan ng kaukulang pagwawasto, kasunod ng mga alalahanin ukol sa double entry at insertions o pagsisingit ng mga proyekto.

“Siguro sa ganitong klase na nakikita, mas maganda na rin na iyong ibang mga ahensiya tingnan din nila kung ano iyong nai-report nila at baka nga mayroong naisingit sa proposal nila na hindi na dapat maisingit,” ang pahayag ni Castro.

Tinuran pa ni Castro na ipinag-utos din ni Pangulong Marcos ang pagrerebisa ng spending plans ng iba pang ahensiya ng gobyerno kapag may nakitang inconsistencies.

“Maganda na rin po nakita rito para sa umpisa pa lamang ay maisaayos na ang budget. At nirirespeto rin po natin ang liderato ng House of Representatives at kung anuman ang mangyayari dito, dapat lamang ay kung ano iyong naaayon sa Konstitusyon,” aniya pa rin.

“So, kung may iba pang mga ahensiya na involved ay ganoon din po ang magiging utos ng Pangulo, kung mayroon po talaga. Kasi ngayon po ay kailangan lang tingnan. Hindi pa po natin masasabi na talagang mayroong mga anomalyang naisingit,” ang pahayag ng Pangulo.

Sa ulat, inirekomenda ng mga major party leaders sa House of Representatives na kanilang ibabalik ang 2026 National Expenditure Program (NEP) sa Department of Budget and Management (DBM).

Batay sa isinagawang pagrebyu ng House Leaders sa NEP kanilang nadiskubri ang seryoso at sistematikong anomalya sa 2026 NEP partikular sa DPWH, DILG, PNP at DA.

Ayon kay Deputy Speaker at Antipolo Representative Ronaldo Puno na hindi nila magawang simulan ang deliberasyon kung nababalot sa anomalya at mga kwestiyunableng budget allocations ang 2026 national budget.

Sinabi ni Puno na kabilang sa kanilang mga natuklasan ay ang “flood control projects with identical amounts, Double appropriations, Oversized lump sum nationwide allocations under DPWH, Reports of unsolicited proposals for billions worth of firearms sa ilalim ng DILG/ PNP, Reports of allocation for sale scheme sa budget ng DA para sa farm to market roads.”

Nanawagan si Puno sa mga kapwa house members na itigil muna ang pagdalo sa mga budget deliberations habang hindi nareresolba ang isyu. (Daris Jose)

BINASURA ng Malakanyang ang itinuturing nitong “wild imagination” ni Vice-President Sara Duterte na plano ng administrasyong Marcos na ipakulong siya at kanyang mga kaalyado bago pa ang 2028 presidential race.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na walang dapat ipag-alala si VP Sara at kanyang mga political allies, kabilang na rito si Senator Imee Marcos na may ganitong plano.

“They are just creations of fertile and wild imagination,” ang sinabi ni Castro.

Sa ulat, ipipilit umano ng administrasyong Marcos na italaga si Department of Justice Secretary Boying Remulla bilang Ombudsman upang maipakulong si VP Sara at ang mga kaalyado nito.

Ito ang iginiit ni Presidential Sister Imee Marcos na kilalang kaalyado ng pamilya Duterte.

Ayon kay Imee Marcos, malinaw ang hakbang laban kay VP Sara dahil sa sunod-sunod na plano umano upang alisin ito sa landas ng 2028 presidential race.

Dagdag pa ng senadora, dalawang kaso pa ang nakabinbin laban kay Remulla sa kasalukuyan sa Ombudsman, administrative at criminal cases, ngunit tila pinipilit umanong maibasura ang mga ito upang bigyang daan ang kanyang appointment.

Malinaw umano ang mga galaw para mapabilis ang proseso, kabilang ang biglaang pagpapalit kay Deputy OIC Ombudsman Ma. Flor Punzalan-Castillo na aniya’y kilalang “walang bahid” at independent-minded.

Dahil dito sinabi ni Marcos na tututulan nya ang planong pagtatalaga kay Remulla sa Ombudsman kung saan maghahain siya ng oppostion sa judical and bar council.

Hind aniya dapat na politiko ang maitalaga sa Ombudsman dahil may conflict of interest bukod pa sa mayroon itong dalawang nakabinbing kaso. ( Daris Jose)

NAGDARAOS ang China ng Grand Military Parade tuwing ika-3 ng Setyembre bilang pagpapakita ng kapangyarihan, ala-ala, sakripisyo at higit sa lahat, ay tungkol sa kapayapaan.

Noong ika-3 ng Setyembre 1945, ay nasaksihan ng mundo ang pagwawakas ng China peoples war of resilance, laban sa agresyon ng Japan.

Pagkatapos ng 14 taon ng brutal na pakikibaka ng China ay natakot ngunit walang patid ang araw na iyon, ay naging pambansang araw ng pag-alala.

Isang bansang nakakalimutan ang bahagi nito ay walang kinabukasan ang parada ay tungkol sa pagpupugay sa 35 milyong buhay na nawala.

Ang katatagan ng isang bansang tumangging sumuko at ang hindi matitinag na paniniwala na ang kapayapaan ay dapat ipagtanggol bawat pormasyon, bawat pagpupugay, bawat pag-ikot ng mga makina ay nagsabi ng isang bagay na malakas at malinaw.

Naalala natin ang mabilis, pinahahalagahan natin ang kapayapaan, at ipagtatanggol natin mula sa isang bansang minsang napunit tungo sa isang bansang naninirang-puri sa entablado ng mundo.

Nagpadala ang China ng mensahe sa mundo, “Ang kapayapaan ay mahalaga – ngunit ang kapayapaan ay hindi kailanman libre”.

Ito ang dahilan kung bakit mahalaga ang ika-3 ng Setyembre, ito ay isang araw ng pag-alala, isang araw ng pagmamalaki, isang araw kung kailan naaalala ng China ang kahapon upang protektahan ang bukas. (Richard Mesa)

NAGKAISA ang mga international na eksperto at bawat delegado ng bansa  sa panawagan sa World Health Organization- Framework Convention  on Tobacco Control (WHO-FCTC) na isama ang harm reduction sa pagkontrol ng tabako.

,

Sa isinagawang press briefing ay naglatag ng mga alternatibong paraan para mabawasan ang pinsalang dulot ng paninigarilyo  ang Consumers Choice Center na dinaluhan ng mga doktor, mananaliksik at consumer advocates mula sa iba’t ibang bansa, tinalakay nila ang mga mahahalagang aspeto ng WHO -FCTC.

Ayon kay Fred Roeder, Health Economist at Pangulo ng Consumer Choice Center na maraming bansa na nakakakita ng iba’t ibang resulta na nakatuon sa harm reduction kaya kinakailangan umano ang isang tapat na pag-uusap kung ano ang gumagana  at ano ang hindi sa pandaigdigang pagkontrol sa tabako.

Nagprisinta naman  si Christopher Cabuay, PhD, Associate Professor of Economics sa De La Salle University, ng datos na nagpapakita ng bigat ng gastusing dulot ng mga sakit na may kaugnayan sa paninigarilyo sa ekonomiya ng Pilipinas.

Ayon sa economic modeling ni Cabuay, may malaking potensyal na makatipid ang Pilipinas kung 10 porsiyento ng adult population na naninigarilyo ay sasailalim sa mga pagkilos na nakakabawas sa panganib ng tabako at lilipat sa harm reduction approaches.

Sinabi naman ni Anton Israel ng Nicotne Consumers Union Philippines na mahalaga ang  pananaw ng mga konsumer at pagkakaugnay sa pagitan ng pagbuo ng  polisya .

Nakakaapekto naman sa ekonomiya ng rehiyon ang mga restriktibong polisiya para naman kay  Nancy Loucas ng CAPHRA New Zealand habang sinabi naman ni  Dr. Rohan Savio Sequeira, ng India na kung  ipatutupad ang mga polisiya sa tobacco harm reduction, maaaring mailigtas ang 35–40 milyong buhay sa loob ng 30 taon sa India pa lang — na kumakatawan sa napakalaking potensyal na halaga sa ekonomiya mula sa napreserbang human capital.

Ipinakita naman ni Michael Landl mula sa World Vapers’ Alliance kung paano lumilikha ang risk-based taxation economic incentives para sa pagbabago ng gawi habang napapanatili ang kita ng pamahalaan.

Dagdag pa nito na sa Sweden, ang pagbubuwis batay sa antas ng panganib ng produkto ay nagbunga ng pagbaba ng smoking rates sa mas mababa sa 6%, habang nananatiling kapantay ng ibang bansa Europa ang kabuuang pagkonsumo ng nikotina. (Gene Adsuara)

BINAWI ng Philippine Contractors Accreditation Board (PCAB) na ng lisensya ng siyam na kumpanya na pag-aari ng flood control projects contractor na si Sara Discaya.

Kinabibilangan ito ng mga sumusunod: St. Matthew General Contractor & Development Corporation; Great Pacific Builders And General Contractor, Inc.; YPR General Contractor And Construction Supply, Inc.; Waymaker OPC; Elite General Contractor And Development Corp. ; St. Gerrard Construction Gen. Contractor & Dev’t Corporation; Alpha & Omega Gen. Contractor & Dev’t Corporation; St. Timothy Construction Corporation at Amethyst Horizon Builders And Gen. Contractor & Dev’t Corp.

Sa inilabas na resolution ng PCAB, na ang pagpapatuloy ng accreditation ng nasabing mga kumpanya ay nakakasama sa interest ng publiko, integridad ng industriya at sa transparency sa government procurement.

Ang pag-amin aniya ni Discaya sa Senate hearing na pag-aari niya ang siyam na kumpanya na lumahok sa bidding sa mga proyekto ng gobyerno ay nakaka-impluwensiya sa kinakalabasan ng public bidding, minamanipula nito ang resulta at hinaharang ang mga pampublikong proyekto.

Samantala, kahapon ng tanghali ay kinalampag at nag-rally ang militanteng grupo na Anak Bayan ang bahay at opisina ng St. Gerrard Construction sa Pasig na pag -aari ng mag-asawang Curlee at Sarah Discaya . (Daris Jose)

TININTAHAN ni Pangulong Ferdinand R. Marcos Jr. araw ng Huwebes ang Republic Act (RA) 12253 o ang Enhanced Fiscal Regime for Large-Scale Metallic Mining Act sa isang seremonya sa Palasyo ng Malakanyang.

Layon nito na tiyakin ang equitable share ng mining revenues para sa gobyerno.

Sinabi ni Pangulong Marcos na ang pinasimpleng fiscal regime para sa large-scale mining ay maaaring mas makapagpalakas sa mining infrastructure at bigyan ang gobyerno ng ‘fair share’ mula sa extra profit.

“Around the world, the demand for minerals is surging. These minerals are needed to service the new technologies, for batteries, solar panels, other vital components of clean energy. Some even call these resources as the building blocks of a green and digital economy. We are blessed because the Philippines is resources in such resources,” ayon sa Pangulo.

“With the signing of the Enhanced Fiscal Regime for Large-Scale Metallic Mining Act, we are putting into place a system that is fairer, that is clearer and more responsive to the needs of both our people and the environment,” dagdag na wika ni Pangulong Marcos.

Hangad ng RA 12253 na gawing simple at i-rationalize ang fiscal regime para sa large-scale metallic mining, habang pinanindigan ang ‘principles of transparency, accountability at good governance’ sa mining industry.

Sa paglagda sa batas, tinatantiya na ang epekto ng kita mula 2026 hanggang 2029 ay P25.08 billion sa kabuuan o may average na P6.26 billion taun-taon.

“Key salient features of the law include the imposition of a 5-tier, margin-based royalty at rates ranging from 1 percent to 5 percent on income from metallic mining operations outside mineral reservations, and a minimum royalty rate of 0.1 percent on gross output for mines below the margin threshold,” ayon sa ulat.

Ipinakilala rin ng bagong batas ang isang 5-tier, margin-based windfall profits tax sa mga rates mula 1% hanggang 10% sa kita mula sa metallic mining operations.

At upang malimitahan ang tax-deductible borrowing costs mula sa pagkakautang, nagpatupad ang RA 12253 ng isang 2:1 debt-to-equity ratio o thin capitalization rule na applicable sa related-party debt. (Daris Jose)