NAGTAGUMPAY ang dalawang isinagawang buy-bust operation ng Philippine Drug Enforcement Agency Regional Office 4A sa mga lalawigan ng Cavite at Rizal noong Hulyo 29, 2025.

Bandang alas-8:30 ng gabi, binuwag ng pinagsanib na operatiba ng PDEA Cavite Provincial Office, Cavite Maritime Police Station at Bacoor City Police Station ang isang hinihinalang drug den at naaresto ang walong drug personalities sa Purok Silangan, Barangay Niog, Bacoor City, Cavite.

Kinilala ang mga suspek na sina alyas Fidel, 30, lalaki, binata, construction worker; alyas Jennifer, 38, babae, binata; alyas Alejandro, 28, lalaki, binata; alyas Angelica, 37, babae, binata; alyas Aubrey, 25, babae, binata; alyas Paciano, 60, lalaki, walang trabaho; alyas Bajie, 29, lalaki, binata; at alyas Henry, 29, lalaki, binata.

Nakumpiska mula sa mga suspek ang humigit-kumulang 10 gramo ng hinihinalang shabu, iba’t ibang drug paraphernalia at buy-bust money.

Bandang alas-11:40 ng gabi, dalawang high-value target ang naaresto ng magkasanib na operatiba ng PDEA Rizal Provincial Office at PNP RIU4A-PIT sa Lot 18, Block 4, Phase 3, Villa Montserrat Havilan, Barangay San Juan, Taytay, Rizal.

Nakuha mula sa mga suspek ang humigit-kumulang 100 gramo ng hinihinalang shabu, drug paraphernalia at buy-bust money.

Kinilala ng mga operatiba ang mga suspek na sina alyas Sarah, 52, babae, may asawa, negosyante at residente ng Maypajo, Caloocan City; at alyas Papabear, 59, lalaki, may asawa, bus driver at lokal ng Bagua, Cotabato City.

Mahaharap ang lahat ng mga suspek sa kasong paglabag sa Republic Act 9165 o Comprehensive Dangerous Drugs Act of 2002. (PAUL JOHN REYES)

GUSTONG ilipat ni Manila Mayor Isko Moreno Domagoso  sa lokal na pamahalaan ang pamamahala sa flood control system sa halip na sa national agency gaya ng  Department of Public Works and Highways (DPWH).

Kung ibibigay aniya sa alkalde ang kapangyarihan, may aksyon at pananagutan.

Sinabi ng alkalde na mas direktang humaharap ang mga LGU sa taumbayan kaya’t mas may accountability sa mga palpak na proyekto.

Binanggit ni Domagoso ang pumping station sa Sunog Apog na hindi gumagana na aniya’y “brand new pero inutil”—isang halimbawa umano ng sablay na konstruksiyon mula sa DPWH.

Ayon pa sa alkalde , kahit may P34 bilyong pondo ang DPWH para sa flood control sa NCR, sira naman ang karamihang proyekto nito o hindi pa natatapos tulad ng Estero de Abad, Remedios, at Padre Faura pumping stations.

Sa kabilang banda, pinuri ni Isko ang Metropolitan Manila Development Authority (MMDA) na may 72 operational pumping stations, 24 dito ay nasa Maynila, sa kabila ng mas maliit na P2 bilyong pondo.

Sinang-ayunan din ng alkalde ang sinabi ni Pangulong Bongbong Marcos na kastiguhin ang mga tiwaling opisyal at kontratista na responsable sa mga palpak at ghost projects kaugnay ng flood control. (Gene Adsuara)

IDINEKLARA ni Pangulong Ferdinand Marcos Jr., na special non-working day sa apat na munisipalidad at isang lungsod sa Luzon at Visayas para payagan ang mga residente na makiisa sa kanilang ‘commemorative events.’

Sa katunayan, nilagdaan ni Executive Secretary Lucas Bersamin, noong Hulyo 18, ang lahat ng proklamasyon na nagdedeklara ng holidays.

Sa ilalim ng Proclamation No. 977, idineklara ang Agosto 4 bilang special non-working day sa San Pascual, Batangas sa pagdiriwang ng founding anniversary ng munisipalidad.

Idineklara rin ang special non-working day sa Bayombong, Nueva Vizcaya sa Agosto 8 upang ipagdiwang ang kapistahan ng bayan, gaya ng nakasaad sa Proclamation No. 978.

Sa kabilang dako, nakasaad naman sa Proclamation No. 979 na special non-working day sa darating na Agosto 12 sa Candoni, Negros Occidental para ipagdiwang ang 64th founding anniversary ng munisipalidad.

Special non-working day din ang idineklara ng Malakanyang sa Tuguegarao City, Cagayan sa darating na Agosto 15 upang magawa ng mga residente na makapagartisipa sa Pavvulurun Afi Festival, gaya ng nakasaad sa Proclamation No. 980.

Sa ilalim naman ng Proclamation No. 981, idineklara ng Malakanyang ang Setyembre 16 bilang special non-working day sa Piddig, Ilocos Norte upang bigyan ng pagkakatoan ang mga residente na gunitain ang makasaysayang Basi Revolt of 1807.

Ang Basi Revolt of 1807 ay isang protesta laban sa monopolya ng Spanish colonial government sa basi (sugarcane wine) produksyon at kalakalan. ( Daris Jose)

NAARESTO ng Bureau of Immigration (BI) ang apat na puganteng Korean national  naa sangkot sa online fraud sa Angeles City,Pampanga.

Kinilala ang mga suspek na sina Ham Seong Hwan, Kim Jongbaek, Kim Taekyeong, at Park Jinhyung—na naaktuhan sa isang bahay sa loob ng Clark Freeport Zone habang nagsasagawa ng panloloko gamit ang mga pekeng travel sites, bogus flights, at pekeng hotel bookings.

Isinagawa ang operasyon katuwang ang Korean authorities, Philippine Air Force at Clark Development Corporation , ayon kay BI Commissioner Joel Viado.

Itinuturing na utak ng operasyon si Park Jinhyung, na lumalabas na overstaying na mula pa noong 2024.

Samantala, naaresto rin sa parehong araw ang isa pang Koreanong si Park Youngjun, sa bisa ng Interpol red notice para sa kasong fraud sa South Korea.

Sa ulat, gumamit si Park ng pekeng account para manloko ng viewers sa isang sikat na live-streaming platform sa Korea, kung saan kumita siya ng ₩4.6 million o mahigit ₱190,000.

Nasa kustodiya na ng BI ang mga suspek habang isinasailalim sa deportation proceedings.

(Gene Adsuara)

LABING-TATLONG sugarol, kabilang ang apat na hinihimalang drug personalities ang nalambat ng pulisya sa magkahiwalay na anti-gambling operations ng pulisya sa Valenzuela City.

Batay sa ulat ni PSSg Pamela Joy Catalla, kay Valenzuela police chief P/Col. Gerson Bisayas, naaktuhan ng mga tauhan ni Ugong Police Patrol Base-8 Commander P/Capt. Joan Dorado ang anim na lalaki na naglalaro ng sugal na cara y cruz sa magkahiwalay na lugar sa Brgy. Ugong dakong ala-1:30 ng Martes ng madaling araw.

Nakuha sa mga nadakip ang peso-coins na gamit bilang pangara at bet money habang ang isang plastic sachet ng umano’y shabu ay nasamsam kay alyas “Ronel”, 38, ng Brgy. Ugong.

Nauna rito, huli din sa akto ng mga tauha ng Malinta Police Patrol Base-4 ang dalawang kelot na nagka-cara y cruz sa Area 4, Flooring Dumpsite Pinalagad, Brgy., Malinta dakong alas-6:30 ng Martes ng gabi at nakumpiska sa kanila ang tatlong peso-coins ‘pangara’, bet money at isang plastic sachet ng hinihinalang shabu na nakuha kay alyas “Win”, 27.

Sa Brgy. Malanday, laglag sa mga tauhan ng Dalandanan Police Patrol Base-6 ang dalawang lalaki matapos maaktuhang nagsusugal ng cara y cruz alas-6 ng Miyerkules ng gabi at nasamsam sa kanila ang peso-coins na gamit sa ‘pangara’, bet money at isang plastic sachet ng umano’y shabu ay nakuha kay alyas “Rafy”.

Sa iba pang operation, naaktuhan din ng mga tauhan ng Paso De Blas Police Patrol Base-1 ang tatlong lalaki na nagka-cara y cruz sa Brgy. Canumay West alas-2:00 ng Huwebes ng madaling araw at narekober ng pulisya ang peso-coins ‘pangara’, bet money at isang plastic sachet ng shabu na nakuha sa isa sa kanila.

Ayon kina P/MSgt Carlito Nerit Jr., mahaharap ang mga suspek sa kasong paglabag sa PD 1602 habang karagdagan na kasong paglabag sa R.A 9165 o ang Comprehensive Dangerous Drug Act of 2002 ang kakaharapin pa ng apat sa kanila. (Richard Mesa)

SA KABILA na bukas ang ilang mambabatas sa pagsasagawa ng imbestigasyon at audit sa flood control projects matapos ang matinding pagbaha sa Metro Manila at kalapit na probinsiya kamakailan sa kanila ng bilyong pisong halaga ng alokasyon para sa flood mitigation ay hindi naman sila pabor na ipaubaya sa Department of Public Works and Highways (DPWH) na magsagawa ng sarili nitong pagbusisi.

“The DPWH cannot be trusted to investigate itself when it is neck-deep in these anomalies. This is like asking the fox to guard the henhouse,” ayon kay House Deputy Minority Leader at ACT Teachers Rep. Antonio Tinio.

“Ang DPWH ay kasama sa problema, hindi bahagi ng solusyon. Paano nila i-audit ang sarili nilang kapalpakan? It would be a whitewash, pure and simple,” dagdag naman ni Assistant Minority Leader at Kabataan Rep. Renee Louise Co.

Nanawagan naman sila sa Commission on Audit (COA) namagsagawa ng isang komprehensibong audit sa lahat ng flood control projects, kahalintulad sa pork barrel scam at confidential funds ni VP Sara Duterte.

Napatunayan anila ng ang pagiging independent at kapasidad na magbunyag ng government anomalies.

May technical expertise, independence, at constitutional mandate ang coa para magsasgawa ng masusing audits.

“They exposed the PDAF scam, they questioned the confidential funds—they can certainly uncover the truth behind these flood control failures even by just baimg.from their previous audit reports,” giit ni Tinio.

(Vina de Guzman)

NAGLABAS ng kanyang pahayag si Navotas Representative Toby Tiangco hinggil sa pagbuo ng maliit na committee at budget transparency at sinagot din nito ang tanong ng Spokesperson ni Speaker Romualdez; “Bakit ngayon ka lang nagsalita tungkol sa Small Committee sa budget?”

          “Sinubukan ko na yan noong una akong pumasok sa Kongreso, pero hindi umobra. Ngayong malinaw ang panawagan mismo ni President Bongbong Marcos sa SONA—transparency, lalo na sa budget—baka may pag-asa na,” sagot ni Tiangco.

Ayon sa Spokesperson ni Speaker Martin Romuladez, gusto rin daw nila ng open bicam, pero ako daw ang gumawa ng motion na gawin ang individual amendments sa plenary at wag sa Small Committee.

          Sinabi naman ni Cong. Tiangco na dalawang beses ang pagpasok ng budget amendments; una sa Small Committee, pangalawa sa bicam.

Nais din niya ipaalala ang Section 56 ng House Rules Amendments: “After the close of debate, the House shall proceed to the consideration of committee amendments subject to the five-minute rule. A Member who desires to speak against a committee amendment shall also have five (5) minutes. AFTER THE COMMITTEE AMENDMENTS, INDIVIDUAL AMENDMENTS SHALL BE CONSIDERED AND SHALL LIKEWISE BE SUBJECT TO THE FIVE-MINUTE RULE. THE FIVE-MINUTE RULE SHALL ALSO APPLY IN THE CONSIDERATION OF AN AMENDMENT TO AN AMENDMENT, OR OF AN AMENDMENT BY SUBSTITUTION.”

“Ang ibig sabihin ay base sa aming Rules, ang individual amendments ay talagang ginagawa sa plenary session. Sa lahat ng nakaraang budget, ang mayorya ang naghahain ng motion na amyendahan ang rules para gumawa ng Small Committee na binubuo ng apat na tao lamang. At sa lahat ng ipinapasang batas, sa General Appropriations Bill o budget lang ito ginagawa. Sa lahat ng ibang batas, walang Small Committee,” ani Tiangco.

“Hindi naman lahat ng amendment masama. Meron talagang mga amendment na kailangan para mapabuti ang batas. Ang problema, ang budget insertion ay isang anyo ng amendment, at nangyayari ang budget insertions sa Small Committee. Kaya kung walang tinatago, anong ikinatatakot nilang pag-usapan ito nang hayagan sa open session? Ang matatakot lang sa public discussion ng individual amendments ay yung may itinatago. Kung maganda ang intensyon, bakit ayaw nilang gawin din ito sa harap ng taumbayan sa Plenary Session?” dagdag niya.

“Halos isang buwan pinag-uusapan ang budget. Bakit dedesisyonan ng apat na tao sa tagong paraan ang amendments dito kung puwedeng lantaran itong pag-usapan? Apat na tao lang ang bumubuo ng Small Committee, sila na lang ba ang Kongreso?” sabi pa niya.

Sinabi rin ni Tiangco na kung seryoso talaga sa transparency, i-post sa website ng House of Representatives ang minutes ng Small Committee sa 2025 Budget. Kung walang minutes, anong transparency ang sinasabi nila at bakit pa nila ito ipagpapatuloy sa 2026 Budget? Anong klaseng proseso ang hindi pwedeng i-record o i-review ng publiko?

Tanong pa niya, gusto ba talaga nilang sundin ang panawagan ng Pangulo para sa reporma sa budget? O nagkukunwari lang? (Richard Mesa)

ISANG bagong  testigo ang posibleng  isailalim sa Witness Protection Program  sa kaso ng nawawalang mga sabungero.

Sinabi ni Justice Secretary Crispin Remulla na sa ngayon ay binubuo o tinatapos na lang ang affidavit ng hindi muna pinangalanang testigo.

Ayon pa kay Remulla, tinitignan pa ng kagawaran kung kwalipikado ang bagong testigo lalo na’t marami pa siyang kailangang pagdaanang proseso.

Batay din aniya sa batas, kailangan munang makasuhan ang testigo at kailangang makapasa sa evaluation ang kanyang salaysay para matanggal siya bilang akusado para maging testigo.

Kumpiyansa ang DOJ na maisasampa nila sa korte ang reklamo sa mga suspek sa lalong madaling panahon.

Umaasa rin ang DOJ na maaresto ang itinuturong utak ng krimen at tuluyan na ring lulutang ang iba pang sangkot o may kinalaman sa missing sabungeros.

Sinabi ni Remulla na kasong murder , kidnapping with murder at paglabag sa international humanitarian law ang kanilang ihahain sa korte laban sa mga suspek.

Kinumpirma rin ng DoJ na nasa kustodiya na ng Philippine National Police ang bagong testigo na magpapatibay din sa mga pahayag ni Julie Patindogan o Alyas Totoy.

(Gene Adsuara)