NAKATAKDANG pangalanan ni Pangulong Ferdinand Marcos Jr. ang bagong Supreme Court (SC) chief justice ngayong linggo, papalitan nito si outgoing Chief Justice Alexander Gesmundo.

“Ang lahat naman ng kanditato para maging chief justice ng Supreme Court may kanya-kanyang kagalingan, kanya-kanyang integridad, at ina-announce naman ‘yung susunod na chief justice this week. Hindi na natin pangungunahan ang ating Pangulo,” ayon kay Presidential Communications Office Undersecretary at Palace Press Officer Claire Castro.

Nauna rito, inilabas ng Judicial and Bar Council (JBC), araw ng Huwebes, Oktubre 29, ang limang nominado para sa posisyon ng punong mahistrado ng Korte Suprema na papalit kay Gesmundo.

Kabilang sa shortlist sina Senior Associate Justice Marvic Leonen, Associate Justice Alfredo Benjamin Caguioa, Associate Justice Japar B. Dimaampao, Associate Justice Rodil V. Zalameda at Associate Justice Jose Midas P. Marquez.

Batay sa liham ng JBC kay Pangulong Marcos isinumite ang mga pangalan kasunod ng deliberasyon ng konseho noong Oktubre 29. Ang limang nominado ay kabilang sa mga aplikanteng sumailalim sa panayam para sa posisyon.

Si Gesmundo ay nakatakdang magretiro nang sapilitan sa Nobyembre 6, 2026, sa edad na itinakda para sa compulsory retirement ng mga mahistrado. 

(DARIS JOSE)

NAIS ni Pangulong Ferdinand Marcos Jr., na tiyakin na maabot sa bawat barangay ang serbisyo at oportunidad ng pamahalaan mula sa mga paaralan at kalsada hanggang sa trabaho at kabuhayan. 

Sinabi ni Presidential Communications Office Undersecretary at Palace Press Officer Claire Castro na ito ang malinaw na mensahe ni Pangulong sa NTF-ELCAC na nakatakdang magsagawa ng kanilang 10th Executive Meeting sa Palasyo ng Malakanyang.

Ani Castro, pangungunahan ng Pangulo ang naturang meeting kasama ang ibang miyembro ng gabinete at ng mga opisyal ng NTF-ELCAC. 

Umabot na sa 5,638 barangays ang nakatanggap ng aabot sa P44.90B na halaga ng mga proyekto kabilang ang 978 classrooms, 1,601 km na farm-to-market roads, 1,182 water and sanitation systems at 556 health stations.

Napabuti aniya nito ang buhay ng aabot sa 16.8 million Filipinos. Sa ngayon, aabot na rin sa 33,381 barangays sa 62 provinces at 9 regions ang mayroong stable internal peace and security status. 

Ang pangangalaga aniya sa kalikasan ay isang mahalagang paraan ng pangangalaga sa buhay, kabuhayan at kinabukasan ng mga tao. 

“Isang malaking halimbawa rito ang Balanga City na nagpamalas ng husay sa pagpapanumbalik ng kalikasan dahilan upang maging handa ang mga residente sa epekto ng pagbabago ng klima. 

Alinsunod na rin ito sa kautusan ni Pangulong Marcos na repasuhin at pagbutihin ang pagtugon sa Climate Change. 

“Noong nakaraan, malaking problema ng mga residente ang pagtaas ng tubig tuwing high tide, lalo na kapag may malakas na hangin o bagyo. Lumalala ang pagbaha dahil sa pagkasira at pagputol ng mga bakawan na dating nagsisilbing panangga ng baybayin,” ang sinabi ni Castro.

“Bukod dito, kumokonti na rin ang nahuhuling isda kaya naapektuhan ang kita ng mga pamilyang umaasa sa pangisda,” aniya pa rin.

Pero sa pamamagitan ng pagtutulungan ng Department of Environment and Natural Resources (DENR sa pangunguna ni Secretary Juan Miguel Cuna, lokal na pamahalaan at mga mamamayan muling napangalagaan at naparami ang bakawan. 

Nagsisilbi na aniya ngayon ang mga ito bilang natural na proteksyon laban sa malakas na alon, storm surge, pagbaha at pagguho ng baybayin.

“Malinaw ang nais na ipakita ni Pangulong Ferdinand R. Marcos Jr. na walang imposible kapag nagtutulungan ang nasyonal at lokal na pamahalaan katuwang ang taumbayan,” diing pahayag ni Castro.

( DARIS JOSE)

NAKABILI na ang Department of Education (DepEd) ng kabuuang 172,654 MacBook Neo laptops para sa mga public school teacher at administrative staff matapos makumpleto ang competitive bidding.

“For the longest time, our teachers have carried the heavy personal burden of buying their own laptops or maintaining outdated equipment just to keep up with lesson plans,” pahayag ni Education Secretary Sonny Angara. “Under the vision of President Marcos, we are changing the narrative.”

Ayon sa DepEd, kabilang sa nabili ang 169,008 unit para sa mga guro at 3,646 unit para sa administrative personnel. Nakuha ang bawat laptop package sa halagang P43,000, mas mababa ng P6,900 kaysa sa suggested retail price na P49,900.

May kasama ring limang taong warranty, built-in productivity tools, delivery at logistics services, at professional development training para sa mga tatanggap.

Nakatakdang simulan ngayong buwan ang distribusyon ng mga laptop at target itong makumpleto bago Marso 2027.

Samantala, plano pa ng DepEd na bumili ng mahigit 250,000 karag­dagang laptop para sa mga guro sa ilalim ng 2026 budget, bilang bahagi ng pangakong mabigyan ng laptop ang bawat public school teacher bago matapos ang termino ni Pangulong Ferdinand Marcos Jr. sa 2028.

 (DARIS JOSE)

ISINAGAWA ang orientation para sa Cyber Threat Monitoring Level 1 sa pangunguna ng Kaizen Tech at TESDA, katuwang si Caloocan City 2nd District Congressman Egay Erice.

Layunin nitong ipakilala ang kurso, talakayin ang mga bahagi ng pagsasanay, at bigyan ang mga interesadong kalahok ng gabay sa paglinang ng kasanayan sa cybersecurity.

Bahagi ito ng mga inisyatibong naglalayong maghatid ng dagdag na kaalaman at teknikal na kasanayan sa mga kabataan bilang paghahanda sa mga pangangailangan ng makabagong mundo ng trabaho. (Richard Mesa)

Photo 1 for Jemba in Action