PERSONAL na nakibahagi si National Housing Authority (NHA) General Manager Joeben A. Tai kasama ang mga pinuno ng Key Shelter Agencies (KSA) sa paggawad ng Certificates of Unit Allocation (CUA) sa limang (5) pamilyang benepisyaryo ng NHA units sa pagbubukas ng Ikalawang National Housing Expo sa SMX Convention Center, Pasay City.

Kinatawan ni Department of Human Settlements and Urban Development (DHSUD) Secretary Jose Ramon P. Aliling si Pangulong Ferdinand “Bongbong” R. Marcos Jr. sa nasabing okasyon. Kasama rin ni NHA GM Tai ang iba pang mga pinuno ng key shelter agencies, kabilang sina Home Development Mutual Fund (Pag-IBIG Fund) CEO Marilene C. Acosta; Human Settlements Adjudication Commission (HSAC) Executive Commissioner Atty. Avelino D. Tolentino III; Social Housing Finance Corporation (SHFC) President at CEO Federico A. Laxa; at National Home Mortgage Finance Corporation (NHMFC) President at CEO Renato L. Tobias.

Ang limang pamilyang tumanggap ng CUA ay mga residente ng NHA Navotaas Homes 3 sa Brgy. NBBS-Kaunlaran, Navotas City, isang proyektong nakalaan para sa mga informal settler families (ISFs) na naninirahan sa mga delikadong lugar at mataas na panganib na daluyan ng tubig.

Ang paggawad ng mga CUA ay bahagi ng two-day expo na inorganisa ng DHSUD at Pag-IBIG Fund na parte ng pagdiriwang ng National Shelter Month ngayong buwan ng Oktubre. Layon nito na ipakita ang whole-of-nation approach ng pamahalaan sa usaping pabahay—na pinapakita na ng Expanded Pambansang Pabahay para sa Pilipino Housing (4PH) program. 

“Sapagkat batid natin na ang tunay na halaga ng sariling tahanan ay nasusukat sa kaligtasan, kapayapaan at kalidad na nadudulot nito sa bawat pamilyang Pilipino,” wika ni Pangulong Marcos Jr.

Bukod sa pamamahagi ng mga titulo, naglagay din ang NHA ng isang information booth upang tugunan ang mga katanungan ng publiko kaugnay sa pabahay. Tampok din ang exhibit ng mga scale model ng kasalukuyang nakatayong proyektong pabahay ng ahensya.

“Sa pamamagitan ng housing expo na ito, nagkakaisa ang mga pangunahing ahensya sa pabahay at mahigit 80 kilalang pribadong developers upang tugunan ang lumalaking kakulangan sa pabahay at magbigay ng mga oportunidad sa pabahay para sa mga Pilipino. Kaya naman, inaanyayahan ko ang mga indibidwal at pamilya na samantalahin ang pagkakataong ito upang magtanong at alamin ang mga abot-kayang programa sa pabahay,” pahayag naman ni GM Tai. 

Naka-angkla sa temang, “Tahanan. Pamayanan. Kinabukasan.,” binibigyang-diin ng kaganapang ito ang pagsisikap ng pamahalaan na magkaloob ng disente, ligtas, at murang pabahay, tungo sa pagbuo ng mga matatag at sustenableng komunidad para sa mas magandang kinabukasan.
(PAUL JOHN REYES)

IBINUNYAG ni Interior and Local Government Secretary Jonvic Remulla ang bagong sistema ng mga scammer na “micro hub” upang itago ang kanilang operasyon.

Ayon kay Remulla, nangungupahan na lamang sa maliliit na bahay ang mga sindikato kaya tinatawag na “micro hub” kung saan 10 hanggang 20 katao lamang ang kapasidad at hindi tulad noon na libu-libong scammer ang nagtatrabaho sa iisang gusali.

Nabatid na tinututukan ng mga awtoridad ang tatlong aktibong micro scam hub sa Metro Manila na umano’y may kaugnayan sa mga sinibak na pulis at sundalo. Hindi pa tinukoy ng kalihim ang pagkakakilanlan at bilang ng mga dating pulis at sundalong hinihinalang sangkot, habang nagpapatuloy ang imbestigasyon.

Patuloy din ang pagtugis sa mga naturang­ hub kasunod ng pagsalakay sa isang hinihinalang scam hub sa Zamboanga Sibugay noong Oktubre 2, na nagresulta sa pag-aresto at pagsagip sa 244 na dayuhan, karamihan ay Chinese.

Kinumpirma rin ni Remulla na mga dayuhan ang nagpapatakbo sa mga micro hub, ngunit may mga Pilipinong katuwang ang mga ito. Aniya, kabilang sa umano’y ginagamit na tauhan ng mga operator ang mga sinibak na pulis at sundalo.

Binigyang-diin ni Remulla na hindi malawakan ang mga naturang operasyon at nakapokus lamang sa ilang lugar.