- October 20, 2026
Ang Diyaryong Pinagkakatiwalaan
Archive for October 20th, 2026
Gobyerno, patuloy na isinusulong ang mga hakbang para matugunan ang kakapusan ng mga nars sa bansa
PATULOY na isinusulong ng pamahalaan ang mga hakbang upang matugunan ang kakulangan ng mga nars sa bansa, mapabuti ang kanilang kalagayan sa trabaho, at mabigyan ng mas maraming pagkakataon ang mga Pilipinong nais pumasok at umunlad sa propesyon ng nursing.
Sa Philippine Nurses Association (PNA) National Annual Convention 2026, na dinaluhan ng tinatayang 2,500 nurses at iba pang healthcare professionals bilang bahagi ng pagdiriwang ng ika-104 na anibersaryo ng PNA at ika-69 na Nurses’ Week, binigyang-diin ni Pangulong Ferdinand R. Marcos Jr. ang mga hakbang ng pamahalaan upang mapalawak ang oportunidad para sa mga nurse at mas maraming Pilipino ang mahikayat na pumasok sa propesyon.
Kabilang dito ang pagtaas ng alokasyon para sa Health Emergency Allowance mula ₱6.8 bilyon noong 2022 na umabot sa ₱110.11 bilyon ngayong 2026, at ang Clinical Care Associates Program na nagbibigay ng pagkakataon sa mga nursing graduate na makapagtrabaho sa mga ospital habang naghahanda para sa licensure examination. Pinalawak din ang pagkakataong makapag-aral ng nursing matapos alisin ang moratorium sa pagbubukas ng mga bagong Bachelor of Science in Nursing program noong 2022.
Mula 354 noong Hulyo 2022, umabot sa 425 ang mga paaralang nag-aalok ng programang ito noong Hunyo 2026.
Samantala, kasalukuyang sinusubukan sa piling paaralan ang isang taong master’s degree program na naglalayong makapagsanay ng mas maraming nursing instructor.
Sa pamamagitan ng mga hakbang na ito, layunin ng pamahalaan na mas maraming Pilipino ang magkaroon ng pagkakataong maging nurse, mas maraming nurse ang makapaglingkod sa mga ospital, at higit na mapabuti ang kanilang kalagayan habang patuloy silang nangangalaga sa kalusugan ng bawat Pilipino. (DARIS JOSE)
Hinggil sa naging pahayag ng Chinese ambassador…Tsina, hangad ang mas mabuting ugnayan sa Pinas sa gitna ng ‘war of words’
NAGPAHAYAG ng kahandaan ang Tsina na gawing mas maayos at mabuti ang relasyon nito sa Pilipinas, at pangasiwaan ang hindi pagkakaunawaan at pagkakaiba sa pamamagitan ng dayalogo.
Ito’y sa gitna ng ‘war of words’ sa pagitan ng Chinese ambassador at ilang opisyal ng Pilipinas.
Inilabas ng Chinese Embassy sa Maynila ang naging tugon ni Chinese Foreign Ministry spokesperson Mao Ning sa isang news conference noong Oct. 16, nang hingan ito ng komento sa naging pahayag ni Chinese Ambassador to the Philippines Jing Quan na ang Tsina ay maaarng “easily win” sa isang military conflict sa pagitan ng dalawang bansa kung gagamit ng puwersa laban sa Pilipinas.
“China’s position on improving and growing its ties with the Philippines is clear. It is hoped that the Philippines side will have a full and accurate understanding of it,” ang sinabi ni Mao.
Umigting ang ‘war of words’ kasunod ng paglalarawan ni Defense Secretary Gilbert Teodoro sa Tsina bilang nag-iisang “troublemaker in the region,” matapos na ibasura ng Beijing ang naging pahayag ni Vice President Sara Duterte na ang Pilipinas ay nagiging isang “troublemaker of Southeast Asia.”
Tinukoy din ng Chinese embassy ang naging pahayag ni Pangulong Ferdinand Marcos Jr. na ang pahayag ni Jing ay tila isang pagbabanta.
Sa kabilang dako, muling inakusahan ng Chinese embassy ng “anti-China” ang mga pulitiko ng “maliciously distorting the facts for political gain,” tinukoy ang naging pahayag ni Jing sa Second Diliman Dialogue sa Maynila noong Oct. 15, hindi naman tinukoy ng embahada ang mga pulitiko.
Kinondena naman ng ilang mambabatas, Department of Foreign Affairs at ni Philippine Coast Guard spokesperson for the West Philippine Sea Rear Adm. Jay Tarriela ang kamakailan lamang na pahayag ni Jing.
Sa gitna ng kontrobersiya, sinabi ng Chinese embassy na kinokonsidera nito ang Pilipinas bilang isang “close neighbor and friend with deep historical and cultural ties.” winika rin nito na hindi kailangan na mamili ang Pilipinas sa pagitan ng Tsina at Estados Unidos.
“Differences should be managed through dialogue; outside forces should not be allowed to steer bilateral relations toward confrontation. China is ready to work with all sectors of Philippine society to promote dialogue, deepen trust, and expand mutually beneficial cooperation,” ang winika ng embahada. (DARIS JOSE)