KULUNGAN ang kinasadlakan ng tatlong hinihinalang drug personalities matapos mahuli sa aktong sumisinghot umano ng shabu sa magkahiwalay na lugar sa Valenzuela City.

Sa ulat, nagsasagawa ng ‘Oplan Galugad’ ang mga tauhan ng Valenzuela Police Sub-Station 9 sa Phase 1, Milestone Subdivision, Brgy., Karuhatan nang maaktuhan nila si alyas “Jerry”, 36, na gumagamit umano ng droga sa gilid ng isang bahay dakong alas-11 ng umaga.

Kaagad siyang nilapitan nina PCpl Jerome Siquig at Pat Christopher Mercado saka nagpakilala bilang mga pulis bago inaresto.

Alas-2:15 ng madaling araw nang mahuli din sa akto nina Pat John Michael Macalla at Pat Blairwayne Jason Teniola, kapwa nakatalaga sa Police Sub-Station 6 si alyas “Miguel” na abala umano sa pagbatak ng shabu sa tabi ng KADIWA Market sa Brgy., Malanday.

Habang naaresto naman nina Pat Dominic Dela Cruz at Pat Juluis Cesar Demition, kapwa nakatalaga sa Police Sub-Station 2 si alyas “Arnel” na sumisinghot umano ng shabu sa loob ng isang bahay sa Lower Tibagan Compound, Brgy., Gen T De Leon pasado alas-6:40 ng gabi.

Nasamsam sa mga naarestong suspek ang tatlong nakabukas na plastic sachets na may laman ng bahid ng hinihinalang shabu at ilang drug paraphernalias.

Pinasampahan na ni Valenzuela Police Chief P/Col. Joseph Talento ang mga suspek ng kasong paglabag sa Sections 12 at 15 ng R.A 9165 o ang Comprehensive Dangerous Drug Act of 2002 sa piskalya ng Valenzuela City. (Richard Mesa)

TIKLO ang isa sa dalawang kawatan na lumimas sa halos lahat ng gamit ng kanilang kapitbahay na lingguhan lang kung umuwi sa Malabon City, Huwebes ng madaling araw.

Natuklasan lang ng biktimang si alyas “Anne”, 42, na nasimot na ang halos lahat ng gamit sa kanyang bahay sa Aracity St. Brgy. Tinajeros nang umuwi siya ng ala-1:00 ng Biyernes ng madaling araw mula sa inuupahang tirahan sa Paranaque City kung saan siya nagta-trabaho at magulat nang makitang bukas at puwersahang binuksan ang pintuan ng kanyang bahay.

Humingi ng tulong si alyas Anne sa mga tauhan ni Malabon police chief P/Col. Kenneth Mission nang madiskubre na wala na ang kanyang mga alahas, damit, sapatos, bag, television, welding machine, tangke ng LPG, mga kasirola, stainless na shower at gripo, tsinelas, at maging mga switch ng ilaw, light décors, na may tinatayang kabuuang halagang P196,750.00.

Nang rebisahin nina P/MSg. Diego Ngipol, MSg. Ernie Baroy, at P/SSg. John Francisco ang mga kuha ng CCTV sa lugar, katuwang ang testigong si alyas “Rose” na kapitbahay din ng biktima, nakilala ang dalawang kanila ring kapitbahay habang inilalabas ang mga ninenok na gamit ng biktima.

Kaagad namang nagtungo sa bahay ng mga suspek sa Aracity St. sina P/SSg Denes Dela Cruz at Pat. Leonardo Reylana, kasama ang iba pang tauhan ng Malabon Police Sub-Station 2, na nagresulta sa pagkakadakip kay alyas “Ferdinand”, 57, habang nakatakas naman sa kasamang si alyas “Bryan”, 30, nang matunugan ang paparating na mga pulis.

Nabawi sa nadakip na suspek ang P8,000 na halaga ng relos, dalawang shower heater, light décor, at electric kettle na may kabuuang halagang P30,250.00 habang tinutugis pa si alyas Bryan para hanapin ang iba pang hindi pa nababawing gamit ng biktima, kabilang ang anim na mamahaling relos. (Richard Mesa)