TINIYAK ng Department of Budget and Management (DBM) sa mga public school teachers na walang pagkaantala sa paglalabas ng kanilang performance-based bonus (PBB) para sa fiscal year 2024.

Sa katunayan, minamadali na ng departamento ang proseso ng nasabing insentibo.

Ayon sa DBM, hinihintay lamang nito ang receipt ng report ng Department of Education’s (DepEd) ukol sa ranking ng mga officers o delivery units, na tumutukoy sa mga opisyal at empleyado na karapat-dapat para sa FY 2024 PBB.

“Upon receipt of DepEd’s complete and accurate submission, the DBM will immediately review and process the necessary Special Allotment Release Order and Notice of Cash Allocation, consistent with applicable rules and procedures,” ang sinabi ng DBM sa isang kalatas.

“We assure our beloved teachers that there will be no unnecessary delay on the part of the DBM,”ayon pa rin sa DBM.

Matatandaang, sinabi ni Presidential Communications Office Undersecretary at Palace Press Officer Claire Castro na matatanggap na ngayong taon ng mga kuwalipikadong kawani ng gobyerno ang kanilang 2024 Performance-Based Bonus (PBB) matapos aprubahan ni Pangulong Ferdinand R. Marcos Jr. ang pagpapalabas nito.

Sa katunayan, sisimulan na ang pagproseso ng bonus at maaaring mas maagang maipamahagi ito sa ilang ahensiya depende sa bilis ng kanilang proseso.

Sinabi rin ni Castro na nakalaan na ang pondo para rito sa 2026 General Appropriations Act (GAA).

Para maging kwalipikado sa PBB, kailangang makakuha ang isang ahensiya ng hindi bababa sa 70 puntos sa performance assessment.

Inaasahang maglalabas ng hiwalay na guidelines ang mga kinauukulang ahensiya para sa implementasyon at pagpapalabas ng bonus sa mga kwalipikadong empleyado. 

( DARIS JOSE)

NAKIISA si Pangulong Ferdinand R. Marcos Jr. sa pagdiriwang ng National Teachers’ Day nitong Lunes bilang pagkilala sa mga sakripisyo at mahalagang papel na ginagampanan ng mga guro, lalo na sa paghubog sa kinabukasan ng bansa.

Sa kanyang mensahe, sinabi ni Pangulong Marcos na nasa puso ng bawat silid-aralan ang mga guro na gumagabay sa mga kabataang Pilipino sa kanilang pag-aaral, pagtuklas sa sariling kakayahan, at pagtupad sa kanilang mga pangarap.

“Bawat silid-aralan ay naglalaman ng pangako para sa kinabukasan ng ating bansa. Dito natututo ang mga kabataan na magtanong, tumuklas, at mangarap sa mga bagay na maaari nilang makamit balang-araw,” pahayag ng Pangulo.

“Sa puso ng marangal na misyong ito ay ang ating mga guro, na may tungkuling paunlarin ang kakayahan ng ating mga mamamayan at gabayan sila tungo sa mas maraming oportunidad sa buhay,” dagdag pa ng Pangulo.

Sinabi ni Pangulong Marcos na hindi lamang nagtatapos sa mga araling itinuturo ng mga guro ang kanilang impluwensiya kundi sa kanilang pagtulong sa pagtuklas at paglinang ng mga bata ng kanilang kakayahan at paghubog ng uri ng lipunang nais itatag ng bansa.

Kinilala rin ng Pangulo ang mga sakripisyong kaakibat ng pagiging guro at nanawagan ng patuloy na pagsisikap upang matiyak na may maayos na kapaligiran ang mga guro sa pagtupad sa kanilang tungkulin at may kumpiyansa at pag-asa ang mga mag-aaral sa paghahanap ng kaalaman.

“Sa okasyong ito, kinikilala natin ang mga sakripisyong kaakibat ng propesyong ito at pinagtitibay ang ating responsibilidad na pahalagahan at itaguyod ang mga taong bahagi ng ating buhay,” ayon pa sa Pangulo.

Hinimok din ni Pangulong Marcos ang mga guro na patuloy na hubugin ang mga Pilipino para maging mas “mapanuri sa pag-iisip, may paninindigan sa pagkilos, at isinasaalang-alang ang kapakanan ng nakararami.

Tiniyak ng Pangulo na kaagapay ng mga guro ang kanyang administrasyon sa pagtugon sa nagbabagong pangangailangan sa edukasyon at sa paghahanda ng mga paaralan sa mga hamong kinakaharap ng susunod na henerasyon.

“Makatitiyak kayo na kasama ninyo ang pamahalaang ito sa paghubog ng Bagong Pilipinas kung saan binibigyan ang bawat guro ng kakayahang maging bukal ng pag-asa at lakas para sa ating mga anak at sa ating bansa,” aniya pa rin sabay sabing “Sa lahat ng ating mga guro, nawa’y manatiling pinakamahalagang pamana sa sambayanang Pilipino ang mga buhay na inyong nahuhubog.” ( DARIS JOSE)