LUNGSOD NG CALAMBA — Personal na binisita ni Senador Risa Hontiveros ang Pamahalaang Lungsod ng Calamba upang dumalo bilang panauhin sa Liga ng mga Barangay Inter-Province Consultation and Congress 2026 na ginanap sa Jose Rizal Coliseum noong Miyerkules, Setyembre 9.

Malugod siyang tinanggap ni Mayor Roseller “Ross” H. Rizal sa pagtitipong dinaluhan ng mga opisyal at kawani mula sa mga lalawigan ng Laguna, Rizal, at Quezon. Kabilang din sa mga dumalo sa mahalagang kaganapan sina NBI Director Melvin A. Matibag, Board Member Lorenzo Zuniga Jr., at DILG Regional Director Ariel O. Iglesia, CESO III, kasama ang iba pang mga lokal at pambansang opisyal.

Sa kanyang pagharap sa mga Barangay Health Workers (BHWs) ng lungsod, pinasalamatan ni Hontiveros — na Chairperson din ng Senate Committee on Health at pangunahing may-akda ng Magna Carta of Barangay Health Workers — ang dedikasyon at sakripisyo ng mga BHW sa pagpapatupad ng mga programang pangkalusugan. Ipinahayag din niya ang buong suporta sa pagbubukas ng Calamba City Public Hospital na magbibigay ng mas malawak at abot-kayang serbisyong medikal sa mga residente.

Sa gitna naman ng mga usapin sa termino ng mga opisyal ng barangay at Sangguniang Kabataan (SK) pati na ang mga direksyon sa susunod na halalan, hinikayat ni Hontiveros ang mga lider ng barangay na unahin ang serbisyo sa komunidad at huwag hayaang maputol o maapektuhan ng mga usaping pulitikal ang paglilingkod sa taumbayan.

Nagpaabot ng pasasalamat si Mayor Ross Rizal sa pagbisita ng mga panauhin, at binigyang-diin ang kahalagahan ng pagtutulungan ng pambansa at lokal na pamahalaan para sa patuloy na pag-unlad ng mga health workers, opisyal ng barangay, at bawat Calambeño. 

(Jeremiah Solomon/ Boy Morales Sr.)

NAARESTO ng mga awtoridad ang tinaguriang Top 6 Most Wanted Person sa lalawigan ng Eastern Samar kasunod ng matagumpay na joint police operation sa Baseco Compound, Metro Manila, Martes ng hapon.

Pansamantalang nasa custody ng Northern NCR Maritime Police Station (MARPSTA) ang akusado na si alyas na “Jerald”, 50, habang hinihintay ang pagpapalabas ng commitment order mula sa hukuman.

Ikinasa ng mga tauhan ng Northern NCR MARPSTA/MLET Baseco katuwang ang iba’t ibang yunit ng pulisya, kabilang ang NDIT-RIU NCR, Eastern Samar Provincial Intelligence Unit (ESPPO-PIU), Taft MPS, MPD, at ESHPT-RHPU8 HPG ang joint operation na nagresulta sa matagumpay na pagkakaaresto sa akusado dakong alas-3:45 ng hapon sa Baseco Compound.

Hindi naman umano pumalag ang akusado nang isilbi sa kanya ang warrant of arrest para sa kasong Qualified Rape sa ilalim ng Article 266-A ng Revised Penal Code (na inamyendahan ng R.A 8353).

Ang naturang warrant ay inisyu noong Setyembre 10, 2026 ni Hon. Elvie Picardo Lim, Acting Presiding Judge ng Regional Trial Court Branch 1, Borongan City, Eastern Samar na walang inirekomendang piyansa para sa kanyang pansamantalang kalayaan. (Richard Mesa)

SA pagpasok ng ikalawang taon ng kanyang second term bilang alkalde ng Caloocan, patuloy na isinusulong ni Mayor Dale Gonzalo “Along” R. Malapitan ang pangako ng kanyang administrasyon sa pagtugon sa serbisyo-publiko, inklusibong pag-unlad, at mga programang direktang tumutugon sa mga pangangailangan ng mga mamamayan.

Sa kanyang State of the City Address, sinabi ni Malapitan na ang nakalipas na taon ay nakatuon hindi lamang sa pagpapanatili ng mga programang nagdulot na ng positibong epekto, kundi pati na rin sa pagpapalakas ng mga serbisyo at paglulunsad ng mga inisyatibong tumutugon sa nagbabagong pangangailangan ng lungsod.

“Isang taon na ang lumipas mula nang muli nating tanggapin ang responsibilidad na mamuno sa ating lungsod. Mas lalo nating nararamdaman ang bigat ng tiwalang ibinigay sa atin ng ating mga kababayan, kaya patuloy tayong kumikilos upang mapabuti ang serbisyo at buhay ng bawat Batang Kankaloo,” ani Mayor Along.

Sa nakalipas na taon, patuloy na inuna ng pamahalaang lungsod ang pangangalagang pangkalusugan, edukasyon, proteksyong panlipunan, kabuhayan at trabaho, kapayapaan at kaayusan, imprastraktura, mga programa sa kapaligiran at mahusay na paghahatid ng mga pangunahing serbisyo ng gobyerno.

Patuloy din na inilalapit ng administrasyon ang mga serbisyo sa mga komunidad sa pamamagitan ng mga inisyatibo na direktang nagbibigay ng tulong sa mga residente, lalo na sa mga higit na nangangailangan ng suporta ng gobyerno.

Para kay Malapitan, ang ikalawang termino ay isang pagkakataon upang palakasin ang pundasyong naitatag noong kanyang unang termino habang tumutugon sa mga bagong hamong kinakaharap ng lungsod.

Binigyang-diin din ng alkalde na ang pag-unlad ng Caloocan ay hindi lamang masusukat sa imprastraktura at pisikal na pag-unlad, kundi pati na rin sa pagiging madaling makuha ng mga serbisyo ng gobyerno at mga oportunidad na ibinibigay sa mga mamamayan nito.

Pinasalamatan din niya ang mga empleyado ng pamahalaang lungsod, mga opisyal ng barangay, mga pinuno ng komunidad, at iba pang mga kasosyo sa pagtulong na gawing konkretong serbisyo para sa mga residente ang mga programa ng administrasyon.

“Sa sama-sama nating pagsisikap, natutulungan natin ang bawat isa, dahil kapag umuunlad ang ating mga kababayan, umuunlad ang Caloocan” diin ng alkalde. (Richard Mesa)