TUMANGGI ang House Prosecution team sa paratang ni Bise Presidente Sara Duterte na mahina ang presentasyon ng kaso laban sa kanya sa impeachment trial sa Senado.

Ayon kina House impeachment team adviser at spokesperson Robert Ace Barbers at Zambales Rep. Jefferson Khonghun, naiprisinta na nang husto ang mga ebidensiya at madadagan pa sa mga susunod na pagdinig.

Pinasinungalingan din nina Barbers at Khonghun ang sinabi ni Duterte na ang mga prosecutors ay “fishing for evidence.”

“Sa aming paniniwala sa prosecution panel ay nailatag namin ’yung mga nararapat na makitang ebidensya at marinig na ebidensya ng ating mga senator-judges,” sinabi ni Barbers sa isang press briefing. 

“And there are still several witnesses and documentary evidence that we will present as the trial moves forward,” dagdag ng dating kongresista.

Ayon kay Barbers, paninindigan ng prosecution ang mga ebidensya sa mga alegasyon na misuse and irregular liquidation of confidential funds ni Duterte.

“Pero sa ngayon, sinasabi natin, ang nakita na ebidensya, mga documentary evidence na ipinresenta ng prosecution panel, siguro sa paniniwala ng marami, lalo na sa paniniwala ng prosecution panel, ito ay matibay na mga ebidensya na aming inilalatag,” sabi ni Barbers. 

Ayon naman kay Khonghun, ang mga testimonya ng mga testigo ay malinaw na pinuntuhan ang pagwaldas ni Duterte sa confidential funds.

“Malinaw sa inilatag ng prosecution, kasama ng mga witnesses, na talagang itinuturo ng ebidensya na ang mayroong kinalaman, lalo-lalo na sa pag-utos, sa pagsasagawa, at talagang ang puno’t dulo ng pagdi-disburse ng confidential fund ay ang Vice President,” sabi ni Khonghun.

“So nakikita ’yun, at talagang maliwanag naman sa sinasabi ng mga witnesses,” dagdag ng kongresista.

Naiprisinta ng prosecution ang Commission on Audit officials at Office of the Vice President personnel bilang mga testigo.

Si dating OVP special disbursing officer Gina Acosta ay tumestigo na ibinigay niya ang apat na P125-million tranches totaling P500 million in confidential funds kay dating security chief Col. Raymund Dante Lachica sa utos ni Duterte.

Si OVP Assistant Secretary Lemuel Ortonio ay tumestigo at sinabi na si Lachica hindi organic OVP employee. 

Ayon kay Ortonio, sa kanyang kaalaman, alam nila Duterte at Lachica kung papaano gastusin ang confidential fund. 

(VINA de GUZMAN)

KINATIGAN ng mga mambabatas ang panukalang palawakin ang termino ng mga barangay at Sangguniang Kabataan officials nang hanggang limang taon.

Ayon kay Aklan Rep. Florencio Miraflores, chairman ng House Committee on Local Government, pabor ang mga miyembro ng nasabing komite na itakda ang termino ng mga barangay officials sa limang taon.

Aniya, mas mabibigyan panahon ang mga barangay officials na sustentuhan at ipagpatuloy ang kanilang mga programa at proyekto sa mas mahabang pagkakataon.

“Our task, therefore, is to find the right balance and establish a term that will ultimately strengthen, rather than weaken, grassroots governance,” sabi ni Miraflores.

Sinabi ni Sorsogon Rep. Marie Bernadette Escudero, may akda ng House Bill 10656, ang panukala na five-year term sa mga barangay officials ay tutugma sa five-year comprehensive development plan, na magbibigay pagkakataon na isakatuparan ang kanilang mga programa.

“This is particularly important for barangays with very limited resources, where the time and capacity to implement development programs can be a significant challenge,” sinabi ni Escudero.

Pinaliwanag ni Liga ng mga Barangay sa Pilipinas (LnB) National President Maria Katrina Jessica Dy na mahigit 70 porsiyento ng mga barangay ay annual budget na P5 million o mas mababa. Dito kadalasan ay maiksi lamang ang ipinapatupad na programa dahil sa kakulangan ng budget. 

Kung mas mahaba ang termino ng mga barangay official, mas mahaba ang panahon at pagkakataon na ipatupad ang kanilang programa.

Tinukoy ni Dy ang ginagampanang papel ng mga barangay officials, particular sa mga kalamidad at emergencies, kung saan kinakailan ang matatag na barangay governance.

Sa parte naman ng Commission on Elections (COMELEC), nakahanda na ang lahat sa gagawing Barangay and Sangguniang Kabataan Election (BSKE) na gaganapin sa November 2, 2026.

“Sa katunayan po ready na, meron na tayong final list of voters, nakapag-print na rin tayo ng mga balota, nakapag-procure na rin po tayo ng mga ballot boxes, mga forms and other supplies na gagamitin,” sinabi ni COMELEC Deputy Executive Director for Operations Rafael Olaño. 

Aniya, nakahanda rin tanggapin ng COMELEC kung ano man ang maging desisyon ng Kongreso kung ipagpapaliban ang BSKE at palalawakin ang termino ng mga barangay at SK officials. (VINA de GUZMAN)

BUKAS si Pangulong Ferdinand R. Marcos Jr. sa pagpapataw ng mas mabigat na parusa para sa illegal possession ng lose firearms kasunod ng fatal shooting incidents sa loob ng school premises sangkot ang mga menor de edad.

Inilarawan naman ni Presidential Communications Office (PCO) Undersecretary at Palace Press Officer Claire Castro bilang “good” ang ginagawang pagsusulong ni Department of the Interior and Local Government (DILG) Secretary Jonvic Remulla na gawing non-bailable offense ang ilegal na pagmamay-ari ng loose firearms at pagpapataw ng hanggang 20 taong pagkakakulong.

“Ito ay naging magandang suggestion ni Secretary Jonvic Remulla. Ito naman din po ay para sa mas protektadong bansa at mas protektadong mga kababayan natin,” anito.

Sinabi pa ni Castro na hindi kokontrahin ni Pangulong Marcos ang hakbang na naglalayong protektahan ang publiko.

Gayunman, kailangang rebisahing mabuti ng Pangulo ang panukalang batas at ang specific provisions nito bago pa gumawa ng posisyon sa nasabing usapin.

“So, kung ano po talaga ang maaring maging magandang batas, para ito po ay mas mabigyan ng malaking parusa, ang Pangulo po ay open,” aniya pa rin.

“But we have to wait for the versions of the bills so that the President could make his stance on such issue. So, ngayon wala pa po,” aniya pa rin.

Binigyang diin pa ni Castro na mapipigilan sana ang mga nakamamatay na shooting incidents kung ang mga gun owners ay responsable sa pangangalaga sa kanilang mga armas, bagaman kinilala naman niya na ang illegal possession ng loose firearms ay hiwalay na usapin.

Wika ni Castro na gagawa ng pinal na desisyon si Pangulong Marcos sa oras na ipasa ng Kongreso ang panukalang batas na naglalayong magpataw ng mas mabigat na parusa para sa possession ng loose firearms.

“Sa totoo lang kung ang tao naman ay maingat talaga na humawak ng kanyang mga baril, hindi maaaring magkaroon ng negligence nasasapit sa ganitong mga klaseng pagkatataon o sitwasyon,” ang tinuran ni Castro.

“Muli, kung anuman ang ikagaganda ng ating bansa at sa interes ng ating mga kababayan, hindi po iyan hahadlangan ng ating Pangulo,” dagdag na pahayag nito.

Nauna rito, hinikayat naman ni Remulla ang Kongreso na amiyendahan ang Republic Act 11766 o ang Comprehensive Firearms and Ammunition Regulation Act upang gawing non-bailable offense ang ilegal na pagmamay-ari ng loose firearms at pagpapataw ng hanggang 20 taong pagkakakulong. (DARIS JOSE)

INAPRUBAHAN ng Kamara sa ikatlo at pinal na pagbasa ang panukalang magdedeklara tuwing Setyembre kada taon bilang National Bullying Awareness and Prevention Month o House Bill No. 10134 sa botong 245 pabor, zero negative votes, at no abstentions.

Sinabi ni Speaker Faustino “Bojie” G. Dy III isinusulong ng panukala na palakasin ang public awareness ng bullying at imobolisa ang mga eskuwelahan, pamilya, komunidad at government institutions na magtulung-tulong para maiwasan ang anumang aksyon na makakasakit sa mga bata.

“Every child deserves to go to school feeling safe, respected, and accepted. Walang batang dapat matakot pumasok sa eskwela dahil sa pang-aapi, pananakot, o anumang uri ng bullying,” ani Speaker Dy. 

“Bullying is not something we should dismiss as a normal part of growing up. It can leave wounds that we may not immediately see, but which a child can carry for many years. Kaya mahalaga ang prevention, awareness, at maagang pagkilos.”

Sa ilalim ng HB 10134, ang Setyembre kada taon ay idedeklarang National Bullying Awareness and Prevention Month upang mapalawak at mapalakas ang public awareness ukol sa bullying prevention at importansiya ng proteksyon sa mga bata at kabataan laban sa pang-aabuso, kalupitan, eksploytasyon at iba pang iba pang nakakapinsalang kondisyon.

Nakapaloob pa sa panukala ang mandato sa Department of Education (DepEd), kasama ang National Youth Commission (NYC) at Council for the Welfare of Children (CWC), na magprepara at magpatupad ng taunang programa ng mga aktibidad na gagawin.

Ang DepEd din ang mangangasiwa sa awareness-raising activities on bullying prevention, at prevention ng iba pang uri ng pang-aabuso, kalupitan at ekspolytasyon laban sa mga bata, sa lahat ng public at private elementary at high schools sa buong bansa.

Habang ang Philippine Information Agency (PIA), kasama ang DepEd, NYC at CWC ang magsisiguro sa epektibong pagpapakalat ng impormasyon ukol sa batas.

Sinabi pa ng speaker na “ang laban kontra bullying ay responsibilidad nating lahat—ng mga guro, magulang, paaralan, pamahalaan, at ng mismong mga kabataan. We need to teach our children not only to stand up for themselves, but also to stand up for others who may be afraid to speak.”

(VINA de GUZMAN)

PINAGANA ng gobyerno ang network ng mga ospital at ginawang aktibo ang coordinated referral system para mapigilan ang pagtaas ng bilang ng mga pasyente na mayroong leptospirosis mula sa nag-uumpaw na bilang sa mga health facilities.

Ang pahayag na ito ng Malakanyang ay tugon sa napaulat na matinding presyur sa kanilang emergency rooms kasunod ng malawakang pagbaha. Sinasabing dumagsa ang mga pasyente sa San Lazaro Hospital at Ospital ng Maynila sabay anunsyo na umabot na sa ‘full capacity’ ang emergency room.

Habang iniulat naman ng National Kidney Transplant Institute na umabot na ito sa full bed capacity sanhi ng pagsirit ng leptospirosis cases.

Sinabi ni Presidential Communications Office (PCO) Undersecretary at Palace Press Officer Claire Castro na nais ni Pangulong Ferdinand Marcos Jr., na makipag-ugnayan ang mga ospital at i-redistribute ang mga pasyente sa halip na payagan ang overcrowding sa individual facilities dahilan ng pagkaantala ng paggagamot.

“Totoo po iyan, at iyan din po ang nais ng Pangulo kaya po tumugon agad ang DOH,” ayon kay Castro.

Tinukoy ang Department of Health (DOH), sinabi ni Castro na may 33 DOH hospitals sa Metro Manila, Regions 1 (Ilocos Region), 2 (Cagayan Valley), 3 (Central Luzon) at Cordillera Administrative Region ang pinagana ang leptospirosis express lanes para sa mga pasyente na nangangailangan ng agarang assessment at posibleng hospitalization.

Ginagamit din ng gobyerno ang surge capacity management upang matiyak ang availability ng hospital beds at mga gamot para sa mga pasyente na kinakailangang i-admit.

“Acting Health Secretary Edwin Mercado has also convened a command conference involving DOH hospitals to strengthen coordination on patient navigation and referrals,” ayon kay Castro.

Kasalukuyan nang nakikipag-ugnayan ang DOH Operations Center sa San Lazaro Hospital para i-refer ang mga pasyente sa ibang ospital sa Metro Manila.

Winika ni Castro na “all DOH hospitals, health centers and PhilHealth YAKAP clinics are also ready to receive patients seeking consultation after exposure to floodwaters.”

Aniya pa, ang karagdagang updates ay ipalalabas sa karagdagang ospital na gagamitin habang patuloy na naka-monitor ang gobyerno sa pagsirit ng leptospirosis. 

( DARIS JOSE)