IPINATAWAG ng Land Transportation Franchising and Regulatory Board (LTFRB), sa ilalim ng pamumuno ni DOTr Secretary Giovanni “Banoy” Z. Lopez, ang operator ng isang pampasaherong jeep na nahuling nag-counterflow sa isang mataong kalsada sa Quezon City.

Ayon kay Acting LTFRB Chairman Atty. Greg G. Pua, Jr., naglabas na ang LTFRB ng Show Cause Order (SCO) laban sa operator at nakatakda ang pagdinig sa kaso sa Setyembre 3.

Sa inilabas na SCO, inatasan ang operator na magsumite ng nakasulat na paliwanag kung bakit hindi dapat suspendihin o bawiin ang prangkisa ng pampasaherong jeepney dahil sa paglabag sa mga alituntunin at regulasyon sa kaligtasan sa kalsada.

Kabilang sa mga tinukoy na paglabag ang kabiguang magbigay ng ligtas at maayos na serbisyo sa mga commuter, alinsunod sa mga kondisyon sa pagkakaloob ng Certificate of Public Convenience (CPC), gayundin ang pagkuha ng isang reckless driver.

Batay sa monitoring ng LTFRB social media team, nakita ang viral video ng jeepney na nag-counterflow sa kahabaan ng Quirino Highway sa Quezon City.

Ayon kay Acting Chairman Pua, inilagay ng insidente sa panganib ang iba pang gumagamit ng kalsada, bagay na nais tugunan ng LTFRB.

“Nawa’y magsilbing malinaw na mensahe ang imbestigasyong ito sa mga PUV driver na hindi kukunsintihin ng LTFRB ang ganitong uri ng pag-uugali sa kalsada. Makakaasa ang publiko sa agarang aksyon ng LTFRB sa ganitong mga insidente,” ani Acting Chairman Pua.

Nagpasalamat din ang LTFRB sa mga netizen na patuloy na nag-uulat at naglalantad ng mga PUV driver na lumalabag sa mga patakaran, na malaking tulong sa pagpapatupad ng disiplina at paggalang sa kapwa motorista sa sektor ng pampublikong transportasyon.

Hinimok din ng LTFRB ang publiko na patuloy na iulat ang mga ganitong insidente sa pamamagitan ng LTFRB Hotline 1342 at mga social media account ng ahensya. (PAUL JOHN REYES)

KINILALA ang Pilipinas bilang nangungunang retirement destination para sa 2026, kasabay ng patuloy na paglago ng sektor ng turismo na nakapagtala ng P3.26 trilyong domestic ­tourism expenditure at 7.7 mil­yong trabaho.

Batay sa Retirement Abroad Index 2026 ng Expatriate Group, nanguna ang Pilipinas sa 20 bansa matapos makakuha ng 78 puntos dahil sa abot-kayang pamumuhay, accessible na visa requirements, healthcare system, at matatag na expat communities.

Ayon kay Tourism Secretary Dita Angara-Mathay, patunay ang pagkilalang ito sa pagsisikap ng bansa na maging mas ligtas, accessible, at kaaya-ayang destinasyon para sa mga turista at dayuhang retirado. Dahil dito, minamadali ng Bureau of Immigration ang mo­dernisasyon ng border systems upang ma­panatili ang seguridad habang tinatanggap ang pagdagsa ng mga dayuhang residente.

Pagsapit ng Hunyo 2026, umabot sa 86,292 foreign retirees mula sa mahigit 150 bansa ang pumili sa Pilipinas bilang kanilang ikalawang tahanan, kabilang ang humigit-kumulang 62,000 aktibong Special Resident Retiree’s Visa (SRRV) holders.

Sinabi ni Philippine Retirement Authority President Roberto Zozobrado, malaking ambag sa ekonomiya ang mga foreign retirees dahil nakatutulong sila sa retail, hospitality, at tourism sectors.

Samantala, ipinakita ng datos ng Philippine Statistics Authority na lumago ng 3 porsiyento ang domestic tourism spending noong 2025 sa P3.26 trilyon, habang bahagyang bumaba ang inbound tourism receipts. Gayunman, nanatiling matatag ang sektor dahil sa pagtaas ng foreign visitor arrivals at paglago ng tourism employment.