AABOT sa 14 na hinihinalang biktima ng human trafficking ang nasagip sa Ninoy Aquino International Airport (NAIA) Terminal 3 at Clark International Airport (CIA) Terminal 2 noong Agosto 8 matapos umanong ma-recruit para magtrabaho sa Russia.

Ayon sa mga opisyal ng Bureau of Immigration (BI) sa NAIA at CIA, nasagip ang 14 na biktima at dalawang hinihinalang recruiter matapos silang tangkaing bumiyahe palabas ng bansa sa magkahiwalay na insidente sa dalawang paliparan.

Anim na lalaki, na nasa edad 40 hanggang 50, ang nasagip sa CIA matapos tangkaing bumiyahe patungong Hong Kong sakay ng Cebu Pacific.

Una nilang sinabi na magbabakasyon sila kasama ang mga dati nilang kasamahan sa militar, ngunit nagkakasalungat ang kanilang mga pahayag tungkol sa detalye ng biyahe. Kalaunan, inamin nilang patungong Russia sila, kung saan sila na-recruit upang magtrabaho at inalok ng buwanang sahod na USD 3,000.

Samantala, walong iba pang biktima ang nasagip sa NAIA matapos tangkaing bumiyahe patungong Singapore sakay din ng Cebu Pacific.

Binubuo ang grupo ng anim na lalaki at dalawang babae na nasa edad 30 hanggang 50. Una rin nilang sinabi na business trip ang kanilang pakay, ngunit kalaunan ay napag-alamang patungong Russia sila upang magtrabaho kapalit ng mataas na sahod at alok na Russian citizenship.

Inamin ng walong biktima na kasama rin nila sa parehong flight ang kanilang mga facilitator—isang lalaki at isang babae—na iginiit na business trip lamang ang kanilang biyahe.

Ipinasa sa Inter-Agency Council Against Trafficking (IACAT) ang lahat ng 14 na biktima at dalawang hinihinalang facilitator para sa karagdagang imbestigasyon at pagsasampa ng kaukulang kaso laban sa mga recruiter.

Nagbabala naman si BI Commissioner Joel Anthony Viado sa mga nagnanais magtrabaho sa ibang bansa na huwag mabiktima ng ganitong mga recruitment scheme.

Ayon kay Viado, nangangako ang mga recruiter ng mataas na sahod at maging citizenship, ngunit kadalasan ay napapahamak ang mga biktima sa kanilang mga pinapasukang sitwasyon.

Hinimok niya ang mga Pilipino na protektahan ang kanilang sarili laban sa mga recruiter na aniya’y ginagamit lamang ang mga kababayan para sa sariling pakinabang at hindi magdadalawang-isip na ilagay sa panganib ang kanilang buhay at kaligtasan kapag nasa ibang bansa na. (Gene Adsuara)

BINITBIT sa selda ang 36-anyos na tambay nang maaktuhan ng pulisya habang tinatakot ng hawak na baril ang kausap na bebot sa Malabon City.

Sa ulat ng tanggapan ni Northern Police District (NPD) Director P/BGen. Benliner Capili, nagpapatrolya ang mga tauhan ni Malabon Police Chief P/Col. Kenneth Mission sa Barangay Catmon dakong alas-12:10 ng tanghali nang lapitan sila ng isang lalaki at ipinabatid ang ginagawang pananakot ng armadong suspek sa bebot na kanyang kinompronta.

Kaagad namang nadis-armahan ng mga pulis ang suspek at nang suriin ang hawak na baril, nadiskubreng isa lamang itong replica ng kalibre .38 revolver.

Hindi naman tinukoy sa ulat ng pulisya kung ano ang motibo sa pananakot ng suspek sa biktima na naghain na ng reklamong Grave Threat laban sa kanya.

Bukod dito, sinampahan din siya ng pulisya ng kasong paglabag sa R.A. 10591 o ang Comprehensive Firearms and Ammunition Regulation Act sa Malabon City Prosecutor’s Office. (Richard Mesa)

TIMBOG ang limang indibidwal kabilang ang dalawang hinihinalang drug personalities nang maaktuhan naglalaro umano ng iligal na sugal sa magkahiwalay na lugar sa Valenzuela City.

Sa ulat, nagsasagawa ng Anti Criminality operation ‘Oplan Galugad’ ang mga tauhan ni Valenzuela Police Chief P/Col. Joseph Talento nang maaktuhan ang dalawang kelot na nagsusugal umano ng ‘cara y cruz’ sa Pinagpala St., Area 4, Sitio Pinalagad, Brgy., Malinta dakong alas-5 ng hapon.

Kaagad nilapitan nina Pat. Jonathan San Pedro at Pat. Roval Labawan ang dalawa sabay nagpakilala bilang mga pulis na nakatalaga sa Valenzuela Police Sub-Station 4 bago inaresto. Nasamsam sa kanila ang bet money, pangara at isang plastic sachet na naglalaman ng hinihinalang shabu na nakuha umano sa mekaniko na si alyas “Jonard”, 34.

Nauna rito, naaresto naman ng mga operatiba ng Police Sub-Station 5 ang tatlong indibidwal habang nagsusugal din umano ng ‘cara y cru’ sa isang bakanteng lote sa Sagip St., Brgy., Arkong Bato pasado alas-9:34 ng gabi.

Nakumpiska nina PSMS Israel Gutierrez at Pat Joshua Capiral sa kaila ang perang pantaya, pangara at isang plastic sachet na naglalaman ng umano’y shabu na nakuha umano kay alyas “Aljon”, 22.

Sinampahan na ng pulisya ng mga kasong paglabag sa PD 1602 (Anti-Gamling Law) at R.A 9165 (Comprehensive Dangerous Drug Act of 2002 sina ‘Jonard’ at ‘Aljon’ sa Valenzuela City Prosecutor’s Office. 

(Richard Mesa)

UMABOT sa mahigit P1.7 milyong halaga ng shabu ang nasamsam sa dalawang hinihinalang high‑value drug personalities matapos matiklo ng pulisya sa ikinasang buy bust operation sa Caloocan City, Martes ng gabi.

Mahaharap sa kasong paglabag sa Sections 5 at 11 ng Article II ng R.A 9165 o ang Comprehensive Dangerous Drug Act of 2002 ang mga suspek na isang 24-anyos na lalaking courier rider at 26-anyos na babaeng make-up artist.

Ikinasa ng mga tauhan ni Caloocan Police Chief P/Col. Joey Goforth ang buy bust operation sa koordinasyon sa PDEA, kasunod ng natanggap na impormasyon ng mga operatiba Station Drug Enforcement Unit (SDEU) hinggil sa umano’y illegal drug activities ng mga suspek.

Nang matanggap ang signal mula sa isa nilang kasama na nagpanggap na poseur-buyer na hudyat na positibo na ang transaksyon, kaagad lumusob ang mga operatiba ng SDEU saka inaresto ang mga suspek dakong alas-10:19 ng gabi sa loob ng isang housing project sa Barangay 188.

Sa ulat ni Northern Police District (NPD) Acting Director P/BGen. Benliner Capili kay NCRPO Regional Director PMGEN Anthony Aberin, nakumpiska sa mga suspek ang humigi’t kumulang 252.2 grams ng suspected shabu na may standard drug price na P1,714,960.00, buy bust money at isang pulang handbag.

“Every gram of illegal drugs seized means lives protected and families spared from the devastating effects of drug abuse. We will remain relentless in strengthening intelligence‑driven operations and working with partner agencies and communities to keep Metro Manila safe and secure.” pahayag ni MGen. Aberin. (Richard Mesa)