BINITBIT sa selda ang 22-anyos na estudyante na wanted sa kasong Rape matapos maaresto ng pulisya sa ikinasang manhunt operation sa Caloocan City.

Sa ulat, nakatanggap ng impormasyon ang mga tauhan ni Northern Police District (NPD) Acting Director P/BGen. Benliner Capili hinggil sa kinaroroonan ng akusado na residente ng Brgy., 11 ng lungsod.

Sa koordinasyon sa District Women and Children Protection Desk (DWCPD), kaagad nagkasa ang mga operatiba ng District Anti-Carnapping Unit (NPD-DACU) hanggang masukol ang akusado sa Brgy., 14 ng lungsod.

Isinilbi ng pulisya sa akusado ang arrest warrant na inisyu ng Regional Trial Court, Branch 232, Caloocan City, para sa kasong Rape under Article 266-A, Paragraphs 1 and 2 of the Revised Penal Code na walang inirekomendang piyansa para sa kanyang pansamantalang paglaya.

Pansamantalang nakapiit ang akusado sa Custodial Facility Unit ng NPD-DACU habang hinihintay ang utos ng hukuman para sa paglilipat sa kanya sa Caloocan City Jail.

Ayon kay BGen. Capili, ang operasyon ay bahagi ng pinaigting na kampanya ng NPD laban sa mga wanted na indibidwal at sa patuloy na pagsusulong ng kapayapaan, kaayusan at hustisya sa buong lugar ng CaMaNaVa. (Richard Mesa)

SINABI ng Malakanyang na pinag-aaralan pang mabuti ng gobyerno ng Pilipinas ang kahilingan ng gobyerno ng Estados Unidos na extradition ng lider ng Kingdom of Jesus Christ (KOJC) na si Apollo Quiboloy na kasaluku­yang nakakulong sa Pasig City Jail.

Nahaharap kasi si Quiboloy sa mga kasong child sex trafficking, malawakang pagpupuslit ng malaking halaga ng salapi (bulk cash smuggling), at iba pang mga kaso sa Amerika bukod pa sa mga lokal na kaso rito sa Pilipinas na qualified human trafficking at child abuse.

“Sinabi po niya (Pangulong Ferdinand Marcos Jr.) na kailangan ‘tong pag-aralang mabuti. Pero in a couple of weeks ay magbibigay po sila ng anunsyo kung ano ang magiging desisyon para dito,” ayon kay Presidential Communications Office (PCO) Undersecretary at Palace Press Officer Claire Castro.

Ani Castro, ang extradition ay isang opsyon sa ilalim ng Philippines-US Extradition Treaty, nagbibigay nagbibigay para sa pansamantalang pagsuko ng isang tao na inuusig o nagse-serve na ng sentensiya sa requested country.

Sinasabing pormal nang ipinadala ng US Department of State ang extradition request sa Department of Justice (DOJ).

Sa ulat, sinabi ni Philippine Ambassador to the US Jose Manuel Romualdez, naipadala na ang pormal na kahilingan ng gobyerno ng Amerika sa Department of Justice.

Nagpalabas ang isang pederal na hukuman sa US ng warrant of arrest laban kay Quiboloy noong Nobyembre 10, 2021 matapos siyang kasuhan ng conspiracy to engage in sex trafficking by force, fraud and coercion at sex trafficking of children.

Inaakusahan si Quiboloy ng pakikilahok sa isang labor trafficking scheme kung saan dinala sa Estados Unidos ang mga miyembro ng simbahan gamit ang mga visa na umano’y nakuha sa pamamagitan ng panlilinlang, at pagkatapos ay pinilit silang ­mangalap ng donasyon para sa isang huwad na charity.

Ang mga donasyong ito ay sinasabing ginamit upang “finance church operations and the lavish lifestyles of its leaders.”

Inaresto si Quiboloy sa Davao City noong ­Setyembre 8, 2024 at mula noon ay naghain na siya ng not guilty na plea sa kasong qualified human trafficking. ( DARIS JOSE)

NATAWA na lang ang Malakanyang sa alegasyon ni Vice President Sara Duterte na maaring kabilang si Pangulong Ferdinand R. Marcos Jr. sa mga opisyal ng gobyerno na pinaghihinalaang pro-China kung ang listahan ng di umano’y ‘sympathizers’ ay hindi ilalabas.

Sinabi ni Presidential Communications Office (PCO) Undersecretary at Palace Press Officer Claire Castro na ang pahayag ni VP Sara ay katawa-tawa dahil walang katotohanan lalo pa’t kung ang pagbabasehan ay ang rekord ni Pangulong Marcos sa pagdepensa sa soberanya ng Pilipinas at karapatan sa West Philippine Sea (WPS).

“Nakita po natin kung paano ipaglaban ng Pangulo ang interes ng bansang Pilipinas at interes ng ating mga kababayan,” ang sinabi ni Castro.

“Marami na ang humanga at ipinakita na sang-ayon sila kung anong instance ng Pangulo, patungkol sa ating soberanya, kung papaano natin ipaglalaban, poproteksyunan, especially ang ating karapatan sa West Philippine Sea,” dagdag na wika nito.

Kinuwestiyon naman ni Castro kung bakit si VP Sara at kapatid nitong si Davao City Rep. Paolo Duterte, ang mga tanging tumutol sa panawagan ni Defense Secretary Gilbert Teodoro para sa opisyal na magbitiw sa puwesto kung hindi mapaninindigan ang interest ng Pilipinas sa WPS.

“Hindi natin alam bakit silang dalawa lamang na magkapatid ang umaalma,” ani Castro.

“Minsan kasi kapag ikaw ay natutumbok, kahit hindi ka pinangangalanan, most probably ikaw ay nare-react,” dagdag na wika nito.

Sa ulat, hinamon ni VP Sara si Teodoro na pangalanan ang mga opisyal ng gobyerno na sinasabi niyang tagapagtanggol ng posisyon ng China sa isyu ng West Philippine Sea.

“Dapat pangalanan kung sino ‘yung mga officials na tinutukoy niya na nananati­ling nagde-defend sa China over the West Philippine issue,” ang sinabi ni VP Sara.

Iginiit ni VP Sara na ang paggawa ng malawak na akusasyon nang hindi pinapangalanan ang mga indibidwal ay maaring lumikha ng mga hindi kinakailangang haka-haka, kabilang ang mga pagsasangkot sa mga opisyal na hindi naman tinukoy ang pagkaka­kilanlan.

Idinagdag pa niya na maging si Pangulong Marcos ay maaaring isa sa paghinalaan kung walang babanggiting mga pangalan.

“Kasi hindi puwedeng magbitaw ka ng ganung salita, hindi mo naman pangalanan ‘yung mga official,” aniya.

Una nang nanawagan si Teodoro sa mga opisyal ng gobyerno na tumatangging suportahan ang polisiya ng Pilipinas sa WPS at sa halip ay pumapanig sa Tsina, na magbitiw sa kanilang mga posisyon.

 (DARIS JOSE)

BINEBERIPIKA pa ng Office of Civil Defense (OCD) ang napaulat na may 12 katao ang nasawi sanhi ng serye ng tropical cyclones at malakas na southwest monsoon, o habagat sa nakalipas na araw.

Sa press briefing sa Malakanyang, sinabi ni Office of Civil Defense (OCD) Deputy Administrator for Operations Lawrence Mina na bineberipika pa rin nila ang ulat na may 12 katao ang nasugatan habang 8 naman ang nawawala dahil sa tropical cyclones Luis at Maymay at ulan na dala ng habagat.

Aniya, ang report ay mula sa Region 1 (Ilocos Region), Cordillera Administrative Region at Region 4A (Calabarzon).

Ang mga apektadong pamilya ay 384,520, may katumbas na 1,310,000 indibiduwal.

“Of these, 16,130 families or 58,650 persons or individuals were served inside 624 evacuation centers. While there are 11,360 families or 39,290 individuals being served outside ECs (evacuation centers). These are in regions NCR (National Capital Region) 1, 2, CAR, 3, Calabarzon, Mimaropa, 5, 6, and Region 9,” ang sinabi ni Mina. ( DARIS JOSE)

KALIGTASAN ng mga bata online at pangangalaga sa kabundukan ng Sierra Madre ang ilan sa mga panukala sa Kamara na inangat sa “priority status” ng Legislative-Executive Development Advisory Council (LEDAC), ayon kay House Speaker Faustino “Bojie” G. Dy III.

“These proposals are intended to complement existing priority legislation to respond to the evolving needs of our people and advancing the nation’s long-term development goals,” sinabi ni Dy sa kanyang presentasyon ng dalawang panukala sa LEDAC meeting na pinangunahan ni Pangulong Ferdinand R. Marcos Jr.

Kabilang sa priority bills sa LEDAC ay ang House Bill No. 9965, o Children’s Social Media Safety Act, na inakda nila Dy, Senior Deputy Speaker Ferdinand Hernandez at House Majority Leader Ferdinand Alexander “Sandro” A. Marcos.

Ang nasabing panukala ay magtatag ng isang komprehensibong regulatory framework sa pag-access ng mga bata sa social media sa pamamagitan ng age verification, mas estriktong parental controls, enhanced platform accountability, at digital safety standards. 

“Today, our children are growing up in a digital world that exposes them to cyber bullying, online exploitation, harmful content, addictive platform design, and algorithm-driven manipulation,” paliwanag ni Dy sa LEDAC meeting. 

“The law we propose seeks to establish clear safety standards, strengthen parental controls, improve platform accountability, and promote responsible digital citizenship while protecting the best interests of every Filipino child.” 

Kasama sa mga priority na panukala ang Sierra Madre Conservation and Development Act, kung saan magtatatag ng unified governance framework para sa pangangalaga at konserbasyon ng Sierra Madre Mountain Range.

“The Sierra Madre is not only a bastion of biodiversity but also a vital natural defense against typhoons, a cornerstone of water security, and an indispensable ally in combating climate change. By adopting a unified governance approach and a long-term development strategy, we aim to safeguard this national treasure while fostering sustainable livelihoods for the communities that rely upon it,” pahayag ni Dy. (VINA de GUZMAN)