PINADAPA ng Habagat ang ilang bahagi ng Luzon kabilang ang Metro Manila kung saan tatlo katao ang iniulat na nasawi sa lalawigan ng Batangas.

Sa report ni Batangas Provincial Disaster Risk Reduction and Management Office (PDRRMO) Chief Fe Fernandez ­nitong Linggo, Agosto 9, kabilang sa mga nasawi ay isang lalaking nakur­yente sa paglalakad sa tubig baha sa Lipa City.

Isa ang nalunod sa Brgy. San Jose Sico, Batangas City at isa naman ang nalibing ng buhay sa landslide sa Brgy. Kalumala, Sta. Teresita ng lalawigan.

Ayon sa opisyal, ang Lipa City ay dumanas ng grabeng pagbaha simula pa nitong Sabado ng gabi. Nasa 15 barangay ang pinaka matinding naapektuhan habang nasa 229 pamilya ang inilikas. Dahil sa matin­ding pagbaha ay nasira ang konkretong pader sa Fernando Air Base ng Philippine Air Force (PAF) sa Lipa City.

Ayon pa sa opisyal, hindi na makayanan ng drainage system sa lungsod ang mataas na tubig baha na rumagasa sa mga kabahayan.

Samantala sa report ng Office of Civil Defense (OCD), 182 lugar sa hilagang Luzon, CALABARZON (Cavite, Laguna, Batangas, Rizal, Quezon) MIMAROPA (Mindoro, Marinduque, Romblon at Palawan) ang lumubog sa baha.

Ayon kay OCD Deputy Administrator at Assistant Secretary Bernardo Rafaelito Alejando IV, nasa 110,000 pamilya o katumbas na 382,000 indibidwal ang apektado ng kalamidad sa Region I, II, III. V, IX, Cordillera Admi­nistrative Region (CAR) at CALABARZON (Cavite, Laguna, Batangas, Rizal, at Quezon. Sa nasabing bilang ay nasa 2,200 pamilya o 7,300 ang kinakanlong sa nasa 86 evacuation centers sa mga apektadong lugar.

Ang pitong nasugatan ay mula sa CAR partikular na sa Benguet habang wala namang iniulat na nawawala. Nasa 569 namang mga Local Go­vernment Units (LGUs) ang nag-anunsyo ng suspensiyon ng klase dulot ng masamang lagay ng panahon.

Sa report ng PAGASA, ang habagat ay patuloy na magpapaulan sa Metro Manila, malaking bahagi ng Luzon at Visayas Region. Inaasahandin ang mga pag-ulan sa Ilocos Sur, La Union, Abra, Be­nguet, Zambales, Bataan, at Occidental Mindoro.

 ( DARIS JOSE)

MAY kabuuang 2,424 silid-aralan ang napinsala dulot ng malakas na pag-ulan na bitbit ng southwest monsoon o habagat.

Batay sa paunang assessment mula sa Department of Education’s Disaster Risk Reduction and Management Service (DRRMS), ipinapakita na may 403 ng mga silid-aralan ang totally damaged, habang 505 ang nagtamo ng major damage, at 1,516 ang nagtamo ng minor damage.

Sinabi ng DepEd na kasalukuyang bina-validate ng Regional and Schools Division Offices ang data upang madetermina ang priority sites para sa agarang deployment ng emergency cleanup personnel. 

Sa kabilang dako, sinabi ni Education Secretary Sonny Angara na minamadali na ng DepEd at Department of Labor and Employment (DOLE) ang rehabilitasyon ng public schools na napinsala ng malakas na ulan.

Pinasalamatan ni Angara ang DOLE at ang Office of the Executive Secretary para sa pagbibigay ng mahalagang manpower at operational support para sa kahandaan ng mga paaralan at emergency cleanups.

“Ito ang tunay na diwa ng bayanihan—nagbibigay tayo ng pangkabuhayan sa ating mga manggagawa habang tinitiyak na ligtas at handa ang ating mga paaralan,” ang sinabi ni Angara.

Sa ilalim ng TUPAD-Brigada Eskwela initiative, ‘as of July 30, 2026’, pinondohan ng DOLE ang deployment ng 168,517 temporary workers para sa 9,186 public schools sa buong bansa, nagbigay ng P 1.07 bilyon na financial assistance para suportahan ang school opening operations.

Pinuri naman ni Angara ang DOLE para sa commitment nito na magbigay ng emergency labor assistance para tulungan ang habagat-affected schools na kagyat na makabangon.

“Ngayong hinaharap natin ang pinsala ng habagat, muli tayong nagpapasalamat sa DOLE sa kanilang mabilis na pagtugon. Sa tulong ng ating emergency labor augmentation, mas mabilis nating malilinis at maipapaayos ang ating mga silid-aralan upang maiwasan ang anumang abala sa pag-aaral ng ating mga kabataan,” ayon sa Kalihim. (DARIS JOSE)

IPINAG-UTOS ni Pangulong Ferdinand Marcos Jr. sa lahat ng mga kinauukulang ahensiya ng gobyerno na manatiling nasa ‘heightened alert’ sa gitna ng epekto ng Habagat.

Ito’y bunsod ng pagbaha sa Metro Manila at ilang bahagi ng Luzon dulot ng malakas na ulan, araw ng Linggo.

“The President is closely monitoring the impact of the Habagat, particularly the situation in flood-prone areas and the rising water levels in dams and reservoirs,” ang sinabi ng Malakanyang.

“He has directed concerned agencies to remain on heightened alert, closely coordinate on water releases, and take the necessary preventive measures to protect communities and critical infrastructure,” ayon pa rin sa Malakanyang.

Sa kabilang dako, sinabi ni Presidential Communications Office (PCO) Undersecretary at Palace Press Officer Claire Castro na ipinag utos naman ng Pangulo sa Department of Health (DoH) na maging maagap sa magiging sakit dulot ng walang tigil na pag-ulan. 

Ang Department of Health aniya ay laging maagap sa sitwasyong ganito. 

Kaya ang paalala ni Castro sa publiko na “basta nadikit o napalusong sa tubig baha, sinasadya man o hindi, agad na hugasan ng malinis na tubig at sabon ang katawan. “

“Kailangan din pong kumonsulta sa pinakamalapit na health center. Ito ay kahit walang nararamdaman o kahit walang sugat, sapagkat hindi agad lumalabas ang sintomas ng Leptospirosis. Maaari ring dumaan ang mikrobyo ng Lepto sa mga talsik ng tubig baha sa mata o bibig,” ayon kay Castro.

“Libre po ang konsultasyon at gamot (Doxycycline) sa lahat ng health centers. Kumonsulta po dahil hindi pwede sa buntis o sa batang 12 years old pababa ang Doxycycline. Mayroon ring mga Dengue Fast Lane sa mga DOH hospitals sa buong bansa,” ang sinabi pa rin ni Castro.

Handa rin ang Department of Health sa mga malilinis na lalagyan ng tubig (jerry cans) at chlorine tablets para siguraduhing ligtas ang iinuming tubig. At kung hindi sigurado sa inuming tubig, pakuluin ito ng dalawang buong minuto simula sa pagkulo.

“Wag na po nating antaying magkalagnat, manilaw ang mata o balat, o mawalan ng ihi dahil sa Lepto. Kumonsulta na agad basta napalusong, kahit walang sugat o nararamdaman,” ang winika ni Castro. 

(DARIS JOSE)

INARESTO ng Bureau of Immigration (BI) ang isang 38-anyos na Japanese national na pinaghahanap ng mga awtoridad sa Japan.

Kinilala ni Immigration Commissioner Joel Anthony Viado ang suspek na si Koizumi Haruki, na inaresto sa loob ng punong tanggapan ng BI sa Intramuros Maynila habang nagpo-proseso ng kanyang visa extension. 

Ayon sa mga awtoridad ng Japan, si Koizumi ay may nakabinbin na warrant of arrest sa kanya dahil sa paglabag sa Law on the Prevention of Transfer of Criminal Proceeds ng Japan. Kinumpirma rin ng talaan ng BI na siya ay naka-blacklist dahil sa pagiging undesirable foreign national.

Matapos arestuhin ng BI Fugitive Search Unit (FSU), dinala si Koizumi sa BI holding facility, kung saan siya mananatili habang isinasailalim sa deportation proceedings.

“Muling napatunayan ng pagiging mapagmatyag ng ating mga frontline personnel ang kanilang mahalagang papel sa pagprotekta sa ating bansa laban sa mga dayuhang pugante. Ipinakita rin ng pag-arestong ito ang mahusay na koordinasyon ng ating mga yunit at ng ating matatag na pakikipagtulungan sa mga dayuhang law enforcement agencies,” ayon kay Commissioner Viado. (Gene Adsuara)

SI Vice President Sara Duterte ang may pananagutan sa P612.5 million confidential funds ng Office of the Vice President (OVP) at bilang naging Kalihim ng Department of Education (DepEd), ayon kay Kabataan Party-list Rep. Renee Louise Co, tagapagsalita ng House prosecution.

Iginiit ni Co na ang mga special disbursing officers (SDOs) na nangangalaga at namamahagi ng pondo ay ginagampanan lamang ang kanilang tungkulin sa ilalim ng awtoridad ng Duterte.

Ipinaliwanag ni Co ang “command responsibility” ni Duterte sa kilos ng kanyang mga subordinate.

“Pag may pagkakamali ho anuman sa isang document, ‘yung isang inferior government official, meron pa ring responsibility ang supervisor, ang superior officer,” sabi ni Co.

 “Hindi natin pwedeng masabi that the buck stops at just the special disbursing officer. Meron at meron pong responsibility ‘yung higher commanding officer,” dagdag ng kongresista.

Tinukoy naman ni Robert Ace Barbers, adviser at tagapagsalita ng House impeachment team, na sina dating OVP SDO Gina Acosta and dating DepEd SDO Edward Fajarda ay ginampanan lamang ang kanilang tungkulin sa utos ni Duterte.

 “Yes, the head of the agency appoints the SDOs, ito si Fajarda and si Acosta. But to me, they are just mere pawns,” sinabi ni Barbers. 

“Sila lang ‘yung magdi-disburse, at sila ‘yung may authority given by the head of the agency to disburse these funds and make sure that the funds are properly used and properly spent on items that are allowable under the Joint Circular,” dagdag ng dating kongresista.

Pinaliwanag ni Barbers na ang responsibilidad ng mga SDOs ay hindi maiaalis ang pananagutan ng hepe ng ahensiya sa usapin ng confidential funds.

“Kasi nga, siya ang pumipirma sa physical and financial plans, siya ang pumipirma sa liquidation, siya ang pumipirma sa mga iba pang certification,” sabi ni Barbers.

Ayon kay Atty. Benjamin “Jay” Tolosa Jr., legal spokesperson at counsel ng House prosecutors, naging parehas ang posisyon ng prosecution team sa testimonya ni COA auditor Roderick Wamil sa Senate impeachment court.

“His (Wamil) position is, liability’s not on the special disbursement officer alone. In fact, higher responsibility and accountability is placed on the head of agency,” sabi ni Tolosa.

Sa kanyang testimonya, binanggit ni Wamil ang Section 102 ng Government Auditing Code, kung saan ang head of the agency ay “directly and primarily responsible for all funds and properties pertaining to his or her office.”

Idinagdag ni Wamil ang Joint Circular No. 2015-01, kung saan nakalagay na mayroon direktang pananagutan ang hepe ng ahensiya sa paggamit ng confidential funds.

“At makikita rin natin dun sa mga napakadaming certifications and different liquidation reports, documents na pinirmahan ng Bise Presidente, nakalagay doon she is accountable for the use of those confidential funds,” sabi ni Tolosa. 

(VINA de GUZMAN)