- June 3, 2026
Ang Diyaryong Pinagkakatiwalaan
Archive for June, 2026
Sen Jinggoy Estrada sumuko sa CIDG sa kasong plunder sa flood control
TUMANGGI si Sen. Jinggoy Estrada na humiling ng Senate custody matapos maglabas ang Sandiganbayan ng arrest warrant laban sa kanya kaugnay ng non-bailable plunder case na may kinalaman sa umano’y kickbacks mula sa flood control projects.
Sa isang press conference sa Senado, sinabi rin ni Estrada na isusuko niya ang kanyang suweldo bilang senador habang dinidinig ang kaso.
Ayon sa kanya, nais niyang mapanatili ang kanyang independensya at ipakitang wala siyang nakukuhang pakinabang mula sa pondo ng bayan habang nililinis niya ang kanyang pangalan.
Ang warrant ay kaugnay ng umano’y P573-milyong flood control projects na may bahid ng umano’y kickback schemes.
Ito na ang ikalawang warrant na inilabas laban kay Estrada sa loob lamang ng apat na araw.
Nauna nang nagbayad siya ng piyansa para sa kasong graft, ngunit ang bagong kasong plunder ay hindi pinapayagan ng batas na piyansahan.
Matapos ang briefing, nagtungo si Estrada sa police headquarters na Camp Crame para sa processing ng Criminal Investigation and Detection Group ng Philippine National Police.
Sa kanyang pahayag, iginiit ni Estrada na hindi niya gagamitin ang Senado bilang panangga laban sa mga alegasyon.
Aniya, karapatan niyang maghain ng motion for reconsideration dahil kamakailan lamang niya natanggap ang Ombudsman Resolution.
Dagdag pa ng senador, umaasa siya sa patas na pagtrato, due process, at pagiging walang kinikilingan sa pagdinig ng kaso.
Ito na ang ikatlong beses na nahaharap si Estrada sa kasong plunder.
Una noong jueteng case kasama ang kanyang ama, dating Pangulong Joseph Estrada, kung saan siya ay na-acquit noong 2007.
Ikalawa noong PDAF case kung saan siya ay naabsuwelto noong 2024.
Sa kasalukuyan, nakataya ang kalayaan ng Senado laban sa tinatawag ni Estrada na “political coercion.”
Samantala, ang muling pagsuko ng senador ay nagdadagdag sa kontrobersiya sa imahe ng mga mambabatas na nasasangkot sa malalaking kaso ng katiwalian.
(DARIS JOSE)
Valenzuela, sinimulan na ang pamamahagi ng libreng school kit
SINIMULAN na ng Pamahalaang Lungsod ng Valenzuela sa pangunguna ni Mayor Wes Gatchalian ang pamamahagi ng libreng school kit sa mga mag-aaral ng Marulas Central School at Malinta Elementary School, bilang bahagi ng paghahanda sa darating na pasukan.
Nasa 78,453 Kabataang Valenzuelano mula Kinder hanggang Grade 6, kabilang ang mga mag-aaral sa Special Needs Education, ang makatatanggap ng de-kalidad na school supplies na naglalaman ito ng mga pangunahing school supply gaya ng lapis, ballpen, notebook, ruler, at textbook, na may kasamang lunch box, tumbler, at backpack. (Richard Mesa)
Kapalit ng pagbasura sa kanyang mga kaso…Malakanyang, pinalagan ang pahayag ni Sen. Jinggoy na inalok siyang lumipat sa minority block
PINALAGAN ng Malakanyang ang pinalutang ni Senador Jinggoy Estrada na ilang beses siyang inalok na lumipat sa minority block kapalit ng pagbabasura sa kaniyang mga kaso gaya ng kasong graft o katiwalian, na isinampa laban sa kaniya dahil sa pagkakasangkot di umano sa anomalya sa flood control projects.
Sa isang ambush interview, sinabi ni Presidential Communications Office (PCO) Undersecretary at Palace Press Officer Claire Castro na sa kanyang pagkakaalam ay noong nakaraang taon pa nagkaroon ng imbestigasyon sa mga kasong kinasasangkutan ni Estrada kung saan ang pangalan ng senador ay nababanggit, hindi lamang sa pag-imbestiga sa Senado kundi maging sa Mababang Kapulungan ng Kongreso.
Bukod dito ay pinatawag din aniya si Estrada sa Commission for Infrastructure (ICI) at ang pangalan din aniya ni Estrada ay nabanggit sa partial report ni Senador Panfilo Lacson.
“Kaya hindi po masasabi na ito ay may patungkol sa pag-form ng majority na binubuo ng 13. So, hindi naman po masasabi na ang kaso ay dapat na ma-dismiss lang dahil lang sa pagpunta niya o paglipat niya sa minority,” anito.
“So, it would be unfair to all Filipino people kung ganyan ang magiging dahilan para hindi i-pursue yung kaso kung saan di umano siya ay involved sa flood control mess,” dagdag na wika ni Castro. ( DARIS JOSE)
NEWS 1
Boluntaryong pagsuko sa CIDG, magandang ginawa ni Sen.Jinggoy – Malakanyang
PARA sa Malakanyang maganda ang ginawa ni Senador Jinggoy Estrada na boluntaryong pagsuko sa Criminal Investigation and Detection Group (CIDG) base sa warrant of arrest na ipinalabas ng Sandiganbayan 5th Division sa kasong plunder kaugnay ng flood control projects.
Sinabi ni Presidential Communications Office (PCO) Undersecretary at Palace Press Officer Claire Castro na maganda ang ginawa ni Senador Jinggoy na boluntaryong pagsuko dahil hindi na nya pinahirapan pa ang mga tagapagpatupad ng batas.
“Maganda ang ginawa ni Senador Jinggoy na siya ay boluntaryong sumuko. Hindi na niya pinahrapan ng mga law enforcers , hindi tulad ng nangyayari ngayon kay Senator Bato. Iyan po ang dapat na ginagawa ng isang tao, alam niya po na may valid warrant of arrest” aniya pa rin.
Nauna rito, pasado alas-tres ng hapon, araw ng Lunes, Hunyo 1, dumating ang court server ng Sandiganbayan kasama ang ilang pulisya na diretsong nagtungo sa tanggapan ni Estrada sa Senado upang isilbi ang warrant of arrest.
Hindi pumalag si Estrada at kusang tinanggap ang warrant of arrest saka nagsagawa ng press conference hinggil sa pagdakip. (DARIS JOSE)
Mahigit 28-M na mag-aaral inaasahan ngayong 2026-2027 school year – DepEd
TIWALA ang Department of Education (DepEd) na makakaabot ng mula 26 milyon hanggang 28 milyon ang mag-aaral na papasok ngayong school year 2026-2027.
Ayon kay Assistant Secretary Jocelyn Andaya , na mayroon silang sapat na teaching at non-teaching personnel sa public elementary at secondary schools para sa nasabing bilang ng mga mag-aaral.
May ilang paaralan na kulang ang mga guro habang mayroong iba naman ay mahigit pa.
Base sa kanilang teacher-to -studen ratio ay mayroon isang guro kada 35 na mag-aaral sa elementary habang sa sekondarya ay mayroong isang guro sa 45 na mag-aaral.
Habang ang mga classroom ratio ay mayroong isa kada 32 mag-aaral sa elementary; isang silid aralan sa kada 39 sa junior highschool at isa sa kada 36 para sa senior high school. (Gene Adsuara)
NAVOTAS, PINALAWAK ANG GRADUATION INCENTIVE PROGRAM
NAMAHAGI ang Pamahalaang Lungsod ng Navotas ng cash incentives sa Navoteño students na nagtapos sa mga pampublikong paaralan ng lungsod para sa taong panuruan 2025-2026, bilang bahagi ng patuloy na pangako nito sa pagsuporta sa edukasyon paa mapagaan ang pinansiyal na pasanin ng mga pamilya.
May kabuuang 3,776 Grade 6 completers ang nakatanggap ng P500 bawat isa, habang 1,986 Grade 12 completers ang nabigyan ng P1,000 bawat isa.
Simula ngayong taon, ang mga Grade 10 completers ay kasama na rin sa graduation incentive program ng lungsod sa bisa ng City Ordinance No. 2026-03. May 2,722 Grade 10 completers ang nakatanggap ng tig-P1,000.
Samantala, ang mga graduate ng Navotas Polytechnic College ay tatanggap ng P1,500 kasunod ng kanilang graduation ceremony sa huling bahagi ng taong ito.
Sinabi ni Mayor John Rey Tiangco na ang lungsod ay nananatiling nakatuon sa pamumuhunan sa edukasyon at pagkilala sa pagsusumikap ng mga mag-aaral.
“Education is one of the most important investments we can make for the future of our city. Through these incentives, we hope to encourage our students to continue striving for excellence and help ease the financial challenges faced by their families,” ani Mayor Tiangco.
Layunin aniya ng pamahalaang lungsod na matiyak na walang maiiwan na mag-aaral dahil sa kahirapan sa pananalapi.
“We want our students to focus on achieving their dreams and completing their studies. The city government will continue to provide programs that support their academic journey and overall development,” dagdag niya.
Ang pamamahagi ng mga insentibo ay bahagi ng patuloy na pagsisikap ng lungsod na hikayatin ang mga mag-aaral at palakasin ang mga programa sa suportang pang-edukasyon para sa mga nag-aaral ng Navoteño. (Richard Mesa)
BJMP inihanda na ang kulungan ni Sen. Jinggoy Estrada
INIHANDA na ng Bureau of Jail Management and Penelogy (BJMP) ang detention cell ni Senator Jinggoy Estrada sa New Quezon City Male Dormitory sa Payatas.
Sinabi ni Interior Secretary Jonvic Remulla na kaniyang tiniyak ang kahandaan nila sakaling lumabas na ang warrant of arrest ni Estrada sa kasong plunder mula sa Fifth Division ng Sandiganbayan.
Nahaharap ang Senador ng kasong plunder na may kinalaman sa P573 milyon na halaga ng umanoy kickbacks mula sa iba’t-ibang flood control projects.
Magugunitang nitong Biyernes ay naghain si Estrada ng piyansa na aabot sa P90,000 para sa kaso nitong graft kasama si dating Department of Public Works and Highways secretary Manuel Bonoan sa Sandiganbayan Second Division.
Subalit paglilinaw ni Remulla na nasa Sandiganbayan pa rin ang may pasya kung saan nila ilalagak si Estrada sakaling lumabas na ang warrant of arrest nito sa kasong plunder. ( DARIS JOSE)