ILLEGAL MINING OPERATION NAPIGILAN NG PNP AT DENR, ₱7.1-M HALAGA NG EQUIPMENT, ORES NAKUMPISKA

NAPIGILAN ng Philippine National Police (PNP) ang isang ilegal na operasyon ng pagmimina sa Barobo, Surigao del Sur noong Hunyo 28, 2026 na nagresulta sa pag-aresto sa tatlong suspek at pagkumpiska ng mga kagamitan sa pagmimina at mga mineral ores na nagkakahalaga ng humigit-kumulang ₱7,109,900.00.

Ang operasyon ay isinagawa ng mga tauhan ng Regional Mobile Force Battalion 13, kasama ang Barobo Municipal Police Station at ang Department of Environment and Natural Resources (DENR). Ang mga suspek ay nahuling nagmimina ng yamang mineral ng walang necessary permit, na paglabag sa Republic Act No. 7942 o ang Philippine Mining Act of 1995.

Pinuri ni PNP Chief, Police General Jose Melencio C. Nartatez Jr., ang mga tauhan ng operasyon para sa kanilang mabilis at koordinado na aksyon.

“Hindi lang ito tungkol sa pagpapatupad ng batas. Responsibilidad din nating pangalagaan ang ating kalikasan para sa kapakinabangan ng mga susunod na henerasyon. I commend our operating teams for carrying out this operation professionally and in close coordination with our partner agencies,” sabi ni PGen Nartatez.

Hinikayat din niya ang publiko na manatiling mapagmatyag at iulat ang mga ilegal na aktibidad na nakakaapekto sa kapaligiran.

“Malaki ang maitutulong ng pakikiisa ng ating mga kababayan. Kapag nagtutulungan tayo, mas napoprotektahan natin ang ating likas na yaman at ang ating mga komunidad,” dagdag pa ni PGen Nartatez. (PAUL JOHN REYES)