CALOOCAN CITY — Kinikilala ngayon ang liderato ni Sangguniang Kabataan (SK) Chairwoman Mary Joyce Francisco ng Barangay 156, Zone-14, Distrito 1, matapos maghatid ng mga agarang solusyon sa gitna ng mga krisis pang-ekonomiya at panlipunan sa kanyang nasasakupan.

Sa gitna ng nagdaang tensyon sa Middle East na nagbunsod ng sunud-sunod na pagtaas sa presyo ng petrolyo, nagpaabot ng subsidiya sa gasolina si Francisco para sa mga lokal na drayber ng jeepney. Layunin ng nasabing hakbang na maibsan ang epekto ng krisis sa sektor ng transportasyon sa abot ng kakayahan ng kanyang tanggapan.

Bukod sa tulong-pangkabuhayan, nakatuon din ang administrasyon ni Francisco sa paggabay sa mga kabataan. Katuwang ang kanyang mga SK Kagawad, regular na naglulunsad ang konseho ng pamamahagi ng mga kagamitang pang-eskwela at mga programang pampalakasan. Ayon sa pamunuan, estratehiya ito upang mailayo ang mga kabataan sa illegal na droga at iba pang masasamang bisyo.

Si Francisco ay nagtapos ng kursong Bachelor of Arts in Political Science at kasalukuyang nagpapatuloy ng kanyang Master’s Degree.

Binigyang-diin ng opisyal na hindi hadlang ang estado sa buhay upang magtagumpay at makapaglingkod. 

“Hindi hadlang ang kahirapan sa tagumpay ng tao hangga’t may ambisyon siyang inaabot. Wala sa edad o anumang katayuan sa buhay hangga’t makakatulong ka para sa kabutihan ng lahat,” aniya. 

(SONNY ASIGNACION)

KALABOSO ang limang indibidwal kabilang ang 17-anyos na binatilyo matapos mahuli sa akto ng mga pulis na sumisinghot umano ng shabu sa loob ng isang bahay sa Valenzuela City, Huwebes ng hating gabi.

Kinilala ni Valenzuela Police Chief P/Col. Joseph Talento ang mga suspek na sina alyas “John”, 21, alyas “RJ”, 32, alyas “Jed”, 26, alyas “Rone”, 32, at isang binatilyo na pawang mahaharap sa kasong paglabag sa R.A 9165 o ang Comprehensive Dangerous Drug Act of 2002.

Sa kanyang ulat kay Northern Police District (NPD) Acting Director P/BGen. Beliner Capili, sinabi ni Col. Talento na nakatanggap ng telephone call mula sa isang concerned citizen ang mga tauhan ng Police Sub-Station 3 hinggil nagaganap umanong pot-session sa No. 174 Del Rosario Street, Barangay Marulas.

Kaagad namang inutusan ni SS3 Commander P/Capt. Joan Dorado ang sina PCpl Ledrick Bacuran, PCpl John Melo De Paz, PCpl Inglis Balagtas, at Pat Robert Regalado na magsagawa ng validation sa nasabing lugar.

Pagdating sa lugar, naaktuhan ng mga pulis ang mga suspek na abala umano sa pagsinghot ng shabu sa loob ng isang bahay na nagresulta sa pagkakaaresto sa kanila dakong alas-12:15 ng hating gabi.

Ayon kay P/MSg Carlito Nerit Jr, nakumpiska sa mga suspek ang isang plastic sachet na naglalaman ng nasa 5.43 grams ng hinihinalang shabu na nagkakahalaga ng P36,924, dalawang nakabukas na plastic sachets na may bahid ng umano’y shabu at drug paraphernalias. (Richard Mesa)

AABOT sa mahigit P.1 milyong halaga ng shabu ang nasamsam sa isang hinihinalang tulak ng illegal na droga matapos maaresto ng pulisya sa ikinasang buy bust operation sa Valenzuela City, Huwebes ng umaga.

Sa kanyang ulat kay Northern Police District (NPD) Acting Director P/BGen. Beliner Capili, kinilala ni Valenzuela Police Chief P/Col. Joseph Talento ang suspek na si alyas “Kulog”, 52, at residente ng Brgy., Lingunan.

Base imbestigasyon ni P/MSg Ana Liza Antonio, nakatanggap ng impormasyon ang mga operartiba ng Station Drug Enforcement Unit (SDEU) hinggil sa umano’y pagtutulak ng illegal na droga ni alyas Kulog sa kanilang lugar at kalapit na mga barangay.

Nang magawang makipagtransaksyon sa suspek ng isa sa mga operatiba ng SDEU, kaagad bumuo ng team si SDEU chief P/Lt. Sherwin Dascil bago ikinasa ang buy bust operation laban sa suspek sa koordinasyon sa PDEA.

Dakong alas-5:40 ng umaga nang makipagtransaksyon umano si alyas Kulog sa isang pulis na nagpanggap na buyer sa kanto ng F. Dulalia St., at F. Dulalia Extension, Brgy., Lingunan, na nagresulta sa pagkakaaresto sa kanya.

Nakumpiska sa suspek ang humigi’t kumulang 20 grams ng hinihinalang shabu na nagkakahalaga ng P136,000, buy bust money na binubuo ng isang tunay na P500 bill at walong PP1,000 boodle money, coin purse at P200 cash.

Ayon sa pulisya, kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 ang isasampa nila laban sa suspek sa Valenzuela City Prosecutors Office. 

(Richard Mesa)

MASAYA o “very happy” ang House prosecution team sa galaw at progreso ng impeachment trial kay Vice President Sara Duterte, ayon kay Lanao del Sur Rep. Zia Alonto Adiong, spokesman ng grupo.

“We have finally come to a point na assured na tayo that the ball is rolling, ‘ika nga. Tuloy-tuloy. We are very happy that now, ‘yung tinatawag po nating accountability mechanism ng ating Constitution ay gumugulong na,” sinabi ni Adiong sa isang interview.

Bagama’t hindi agad nagkasundo ang prosecution at ang defense panel sa naganap na pre-trial conference sa Senado, sinabi ni Adiong lahat na ito ay pangkaraniwan at inaasahang may tension na mangyayari.

 “I would not even call it tension kasi that’s expected, that’s expected and it’s a usual occurrence naman talaga in a pre-trial conference. (Pero) overall, maganda. We are very happy,” ani Adiong.

Sinabi ni Adiong na inaasahan ng House prosecution team na matutuloy pa ang pre trial conference sa Lunes, June 22.

Ayon kay Adiong, naging dismayado ang prosecution team sa ipinakitang sagot ng depensa sa naganap na pre trial conference. Aniya, imbes na sagutin ang mga akusasyon laban kay Duterte, nakatutok ang depensa sa pagkwestyon sa proseso.

“We are way, way past that stage. Even the Senate, by way of assuming jurisdiction over the Articles of Impeachment, they have already convened as an impeachment court. It only proves to say that that’s already something that is already done, that is already settled,” sinabi ni Adiong.

Ayon kay Adiong, inaasahan ng publiko ang isasagot ni Duterte sa mga akusasyon laban sa kanya sa apat na Articles of Impeachment.

Ito ay ang di wastong paggamit ng confidential funds, di maipaliwanag na yaman, panunuhol o bribery at pagbabanta sa buhay ni Pangulong Ferdinand R. Marcos Jr., unang ginang Liza Araneta Marcos at dating Speaker Martin Romualdez.

“We were expecting, ang taong bayan, inaasahan ‘yung kasagutan. Ultimately, the people really deserve to know,” sinabi ni Adiong.

Pero ang nangyari, dumikit ang depensa sa kanilang naunang posisyon na kwestyunin ang proseso na sa tingin nila ay may pagkukulang.

“Unfortunately, wala. Mostly, ‘yung kanilang pre-trial brief is again going back to their old narrative na everything is sham because the process by which it was initiated is already questionable,” aniya.

 “Which by the way, is a direct opposite of what they have been saying to the public na ‘ready na kami (defense). We are waiting for the right opportunity, the right forum. We are ready to answer this at the proper forum.’ So, sorry pero frustrated ang taong bayan,” dagdag ni Adiong. 

(Vina de Guzman)

HINIKAYAT ng isang mambabatas ang Pag-IBIG Fund na bilisan ang pagproseso sa housing insurance payouts at renovation loans para sa mga pamilyang naapektuhan ng naganap na lindol sa General Santos City at Sarangani province.

“I laud the efforts of Pag-IBIG Fund to remind the public of programs they can avail in times of emergency. Ang hiling natin ay magkaroon ng express lane sa mga affected areas sa Mindanao para maging mabilis ang pag-grant ng insurance at renovation loans. Malaking ginhawa ito para sa mga apektadong pamilya para makabangon agad,” ayon kay Akbayan Partylist Rep. Dadah Kiram Ismula.

“Ramdam natin ang bigat ng pinagdaraanan ng ating mga kababayan na nawalan or nasira ang mga tahanan kaya sana ay huwag na natin silang pag-antayin nang matagal para sa tulong.” 

Hiniling din nito sa Pag-IBIG na palawigin ang one-month payment moratorium nito sa tatlong buwan na non-accruing payment moratorium na may zero penalties at zero deferred interest sa housing loans sa mga pinaka-apektadong lugar.

“Sa gitna ng ganitong pagsubok, unahin natin ang kapakanan ng bawat pamilya. Aside sa urgent necessities, magagamit ng mga pamilya ang pera nila para sa pag-rebuild ng kanilang mga bahay at kabuhayan” pagtatapos ni Ismula.

 (Vina de Guzman)

NAGWAKAS na ang maligayang araw ng dalawang most wanted persons kabilang ang isang bus driver na wanted sa kaso ng Qualified Rape of a Minor matapos masukol ng pulisya sa isinagawang manhunt operation sa Malabon City.

Sa ulat ng tanggapan ni Northern Police District (NPD) Acting Director P/BGen. Benliner Capili, ang akusado ay 37-anyos na buys driver na residente ng Brgy. 191, Pasay City ay pansamantalang nakapiit ngayon sa Malabon City Police Station.

Lumabas sa imbestigasyon na nakatanggap ng impormasyon ang mga operatiba ng Warrant and Subpoena Section (WSS) ng Malabon CPS na naispatan sa lungsod ang presensya ng akusado na kabilang sa kanilang talaan bilang No. 5 sa Top Ten Most Wanted Person.

Bitbit ang warrant of arrest na inisyu ng Regional Trial Court (RTC) Branch 289, Malabon City para sa Qualified Rape of a Minor, ikinasa ng mga operatiba ng WSS, kasama ang WCPD personnel at SIDMS unit operation hanggang sa masukol nila ang akusado sa Brgy., Catmon.

Hindi naman umano pumalag ang akusado nang arestuhin ng mga pulis sa bisa ng nasabing warrant na walang inirekomendang piyansa para sa kanyang pansamantalang paglaya.

Nauna rito, dinakip naman ng mga tauhan ng Malabon Police Sub-Station 1 sa Brgy., Potrero ang 21-anyos na kelot na wanted sa kaso ng Lascivious Conduct under R.A 7610 sa bisa ng arrest warrant na inisyu ng Family Court, Branch 4, Malabon City na may inirekomendang piyansa na P120,000. (Richard Mesa)

SIYAM na personnel, 8 dito ay lalaki at isang babae ang nagpositibo mula sa 280 na sumailalim sa isinagawang random drug testing ng Philippine Coast Guard (PCG) sa koordinasyon sa Philippine Drug Enforcement Agency (PDEA) bilang bahagi ng kampanya ng kanilang organisasyon para mapanatili ang disiplina at drugpfree workforce na isinagawa sa Barangay Calindagan, Dumaguete City.

Sinabi ni Philippine Coast Guard (PCG) Spokesperson, Commodore Noemie Cayabyab, na ang mga nagpositibo ay inilagay sa restriction habang inaantay ang release ng confirmatory laboratory results.

“Based on the directive of PCG Commandant, Admiral Ronnie Gil L Gavan, we continue to implement regular and unannounced drug testing as part of our commitment to ensuring that all personnel remain physically and mentally fit to perform their duties,” ayon kay Commodore Cayabyab.

“In accordance with existing rules, those who will be confirmed to be positive will face appropriate disciplinary actions, which include dismissal from the Coast Guard service,” dagdag pa ng PCG Spokesperson.

Naka-angkla sa Intensified Community Assistance, Awareness, Response, and Enforcement (iCARE) na kanilang kampanya, ang PCG ay nananatili sa pagpapatupad ng accountability measures at pagpo-promote ng mataas na anats ng propesyunalismo sa loob ng organisasyon. (Gene Adsuara)

DALAWAMPU’T APAT na Pilipinong nakadetine sa Russia ang pinalaya na at nakatakdang makauwi sa Pilipinas ngayong Biyernes matapos ang bilateral meeting nina Pangulong Ferdinand R. Marcos Jr. at Pangulong Vladimir Putin sa Kazan.

Inihayag ni Pangulong Marcos ang magandang balita sa panayam ng mga mamamahayag sa Kazan, Russia, matapos dumalo sa ASEAN-Russia Commemorative Summit.

“Hindi ko alam kung alam ito ng publiko, pero may 24 na Pilipinong nakadetine sa Irkutsk sa loob ng ilang buwan na. Ilang buwan na ba? Siyam na buwan,” ayon sa Pangulo.

“Wala tayong balita. Hindi natin malaman kung ano na ang kalagayan nila. Sa pagkakaalam natin, hindi naman sila nakasuhan,” dagdag ng Pangulo.

Sinabi ng Pangulo na binanggit niya kay Pangulong Putin ang kalagayan ng 24 na Pilipinong nakadetine sa Russia sa kanilang bilateral meeting. Sinabi umano ni Putin na hindi siya naabisuhan ukol sa usapin.

“Noong nag-bilateral meeting kami ni President Putin, binanggit ko ito. At nagulat din siya. Sabi niya, hindi ko alam ’yan. Pag-aaralan namin. Titingnan namin ang nangyayari,” ani Pangulong Marcos.

Ikinuwento rin ng Pangulo na muli siyang kinausap ni Putin sa hapunan kasama ang iba pang mga lider at nagbigay ito ng update hinggil sa kalagayan ng mga Pilipino.

“Noong dinner kagabi, kinausap niya ako, sabi niya, nakita na namin ’yung sitwasyon. We found out where the 24 Filipinos are. We found out what the problem is with their case, with their situation,” ang winika ng Pangulo.

Binigyang-diin ng Pangulo na sinabi rin ni Putin na hindi kinasuhan ng anumang paglabag ang mga Pilipino ngunit nanatili silang naka-detine sa loob ng siyam na buwan.

Ayon kay Pangulong Marcos, hiniling niya kay Putin na mabigyan ng impormasyon ang mga pamilya ng mga Pilipino at matulungan silang maresolba ang kanilang sitwasyon.

“So, I said as a request, especially speaking for the families, kung puwede naman, we can find a way that we get some information about them,” ayon sa Pangulo.

“Siyempre, respetado natin ang batas ng Russia. Respetado natin ang kanilang pamahalaan. Ngunit kung may paraan, sana magawan natin. At nagkaroon ng paraan,” dagdag pa niya.

“At ngayon, ang 24 na Pilipino ay palalayain na. Handa na silang i-deport bukas ng alas-5 ng hapon. Kaya ang 24 na Pilipinong ito ay makakauwi na sa Pilipinas at makababalik na sa kanilang mga pamilya,” ang pahayag pa ng Pangulo. ( DARIS JOSE)