IBINUNYAG ni House impeachment prosecutor at Bicol Saro Party-list Rep. Terry Ridon na hindi bababa sa 50 baril ang umano’y nakarehistro sa pangalan ni Vice President Sara Duterte at ng kanyang asawang si Manases “Mans” Carpio, na maaaring magpataas sa kanilang aktuwal na net worth kumpara sa nakasaad sa mga Statement of Assets, Liabilities and Net Worth (SALN) ng Bise Presidente.

Ayon kay Ridon, hihilingin ng prosecution panel sa Philippine National Police (PNP) ang mga rekord ng pagmamay-ari ng mga baril at maaaring ipatawag ang mga firearms dealer at valuation expert sa impeachment trial upang matukoy ang halaga ng mga ito.

Iginiit ni Ridon na dapat naideklara sa SALN ang mga baril dahil kabilang ito sa mga rehistradong personal na ari-arian na kailangang isa-isang ilista ng mga opisyal ng gobyerno.

Sinabi rin ni Ridon ang mga nasabing armas ay binubuo umano ng mga rifle, revolver, shotgun, at pistol na nakalista sa pangalan ng mag-asawang Duterte-Carpio. 

Aniya, posibleng umabot sa milyun-milyong piso ang kabuuang halaga ng mga ito.

Nilinaw naman ng mambabatas na hindi pinag-uusapan ng prosecution kung paano ginagamit ang mga baril, kundi kung bakit hindi umano ito naideklara sa SALN ni Duterte.

Bahagi ang isyu ng mga baril sa mga ebidensyang inihain ng prosecution sa impeachment case laban sa Bise Presidente. 

Nakatakdang magsimula ang paglilitis sa Hulyo 6. (Vina de Guzman)

NASA kustodiya na ng Philippine National Police (PNP) ang 20 sa 117 baril na nakarehistro kay Senador Ronald “Bato” dela Rosa.

Ayon sa PNP Civil Security Group (CSG), isinuko ng kampo ni Dela Rosa ang mga baril sa Regional Civil Security Unit sa Davao City noong Hunyo 11 kung saan dumaan ang mga ito sa karaniwang proseso bago tanggapin ng pulisya, kabilang ang inventory, beripikasyon ng serial numbers, at pisikal na inspeksyon.

Sinabi ni PNP chief Gen. Jose Melencio Nartatez Jr. na ipinapakita ng hakbang na ito ang patuloy na pagsisikap ng organisasyon na tiyaking propesyonal, transparent, at naaa­yon sa tamang proseso ang pagpapatupad ng batas. Aniya, patuloy na pinalalakas ng PNP ang mga internal system nito upang matiyak ang pare-pareho at maayos na pagpapatupad ng mga batas hinggil sa mga baril.

Samantala, hinimok din ni National Bureau of Investigation (NBI) Director Melvin Matibag si Dela Rosa na isuko rin ang sarili, kasunod ng pagsuko ng 20 armas nito. Sinabi pa ni Matibag na dapat ay lahat ng 117 nakarehistrong baril ni Dela Rosa ang iturn-over na niya sa PNP.

Si Dela Rosa ay may warrant of arrest mula sa International Criminal Court (ICC) dahil sa umano’y pagkakasangkot sa extrajudicial killings noong war on drugs ng administrasyong Duterte. (DARIS JOSE)

INIHAYAG ni Deputy Speaker Paolo Ortega V na maaaring 15 boto na lamang ang kailangan upang mahatulan si Vice President Sara Duterte sa impeachment trial kung 22 senador lamang ang aktuwal na makakalahok sa paglilitis.

Ayon kay Ortega, dapat pag-aralan ng Senado kung ang two-thirds vote requirement ay ibabatay sa bilang ng mga senador na aktibong nakagaganap ng kanilang tungkulin.

Lumitaw ang usapin matapos ang mga argumento na hindi dapat isama sa bilang ang mga senador na hindi makadalo o hindi makapagampan ng kanilang tungkulin.

Sinabi ni Ortega, mahalagang malinaw na matukoy ang kinakailangang bilang ng boto bago umabot sa yugto ng paghatol ang impeachment court upang maiwasan ang mga legal na usapin at dagdag na pagkaantala sa paglilitis. (Vina de Guzman)

MINO-MONITOR ng Philippine Coast Guard (PCG) ang isang hindi pa matukoy na debris na may mga dayuhang marka na natagpuan sa baybayin ng Sitio Talim, Barangay Luyahan, Lian, Batangas.

Ito’y makaraang makatanggap ng ulat mula sa isang concerned citizen tungkol sa presensya ng metal na debris malapit sa dalampasigan, agad namang bineripeka ng mga tauhan ng Coast Guard at sa isinagawang inspeksyon, natuklasang ang bagay ay may habang humigit-kumulang 20 talampakan at lapad na 10.5 talampakan, at tila gawa sa aluminyo na may nakikitang mga banyagang karakter o marka.

Batay sa paunang pagsusuri gamit ang mga available na translation tool, ang mga nakasulat na marka ay maaaring tumutukoy sa “Antenna Transmission Window 5.” Gayunman, hindi pa matukoy ang pinagmulan ng nasabing debris.

Kasalukuyang nasa kustodiya ng PCG ang debris para sa wastong dokumentasyon, pagmamanman, at karagdagang pagsusuri. Patuloy din ang pakikipag-ugnayan sa mga kaukulang ahensya upang matukoy ang pinagmulan at kahalagahan nito. 

(Gene Adsuara)

MATAGUMPAY na idinaos ng Pamahalaang Lungsod ng Imus ang paggunita sa ika-128 Anibersaryo ng Araw ng Kalayaan ngayong araw, Hunyo 12, upang ipagdiwang ang kasarinlan ng bansa mula sa pananakop ng mga Kastila.

Ang makasaysayang seremonya ay pinangunahan ng Ama ng Lungsod, Mayor Alex Advincula, kasama sina Vice Mayor Homer Saquilayan at ang mga miyembro ng Sangguniang Panlungsod.

Narito ang mahahalagang bahagi ng naging pagdiriwang:

Karugtong ng Flag Day: Ang aktibidad ay kasunod ng naging pagdiriwang ng National Flag Day noong nakaraang Mayo 28 na ginanap sa Battle of Alapan Heritage Park—ang makasaysayang pook kung saan unang iwinagayway ang watawat ng Pilipinas noong 1898.

Pagpupugay sa mga Bayani: Sentro rin ng okasyon ang pag-alala sa kadakilaan at sakripisyo ng mga pambansang bayani na sina Gat Jose Rizal, Andres Bonifacio, at ang dating Pangulong Manuel Luis Quezon.

Layunin ng Lungsod: Ayon sa pamunuan, layon ng pagtitipon na muling buhayin ang diwa ng nasyonalismo at pagkakaisa sa bawat puso ng mga Imuseño sa makabagong panahon.

Naging mapayapa at puno ng pagkakaisa ang pagtatapos ng programa na dinaluhan ng iba’t ibang kawani ng pamahalaan at mga sektor ng komunidad.

 (Jeremiah Solomon/ Boy Morales Sr.)

NANANAWAGAN si Bohol 3rd District Rep. Kristine Alexie B. Tutor sa House Committee on Natural Resources na balangkasin ang House Bill No. 831 o “Chocolate Hills Geological Monument Act” sa lalong madaling panahon dahil sa naapektuhan ang kabuhayan ng mga residente na naninirahan sa paligid at loob Chocolate Hills Natural Monument. 

Ayon kay Tutor, natapos na ng Technical Working Group na balangkasin ang HB 831 at hinihintay na lamang ang konsiderasyon ng House Committee on Natural Resources.

 “Batid ko pong inabutan na ng sine die adjournment ang House Bill 831. Ngunit maaari pa rin naman itong talakayin ng Committee on Natural Resources kahit naka-recess kung gugustuhin. Tapos na ang Technical Working Group noong Abril.    Umaasa tayo na mabibigyan ito ng pagkakataong umusad dahil libu-libong Boholano ang matagal nang naghihintay ng malinaw, makatarungan, at pangmatagalang solusyon sa mga usaping may kinalaman sa kanilang lupa at kabuhayan,” pahayag ni Tutor. 

Sa ilalim ng HB 831, palalawakin ang framework ng Chocolate Hills Natural Monument habang environmental protection ito at tinutugunan ang concerns ng mga residente, landowners, local communities at local government units sa isyu ng lupain at kabuhayan sa lugar.

Maraming residente sa lugar ay may titulo ang kanilang lupain na sakop ng Chocolate Hills Natural Monument, ayon kay Tutor.

 “Hindi natin kailangang mamili sa pagitan ng pangangalaga sa Chocolate Hills at kapakanan ng ating mga kababayan. Kaya nating protektahan ang ating likas na yaman habang binibigyan ng makatarungan at praktikal na solusyon ang mga apektadong residente at komunidad,” sinabi ni Tutor. 

(Vina de Guzman)