MAHIGPIT na mino-monitor ng Kamara ang sitwasyon sa Iran at kalapit na mga bansa sa Middle East lalo na sa isyu ng kaligtasan ng mga kabababayang Pilipino partikular na ang mga Overseas Filipino Workers na nagtatrabaho sa naturang rehiyon.

Ayon kay Speaker Faustino “Bojie” Dy III, “Ang ating mga OFW ay mahalagang bahagi ng ating bansa at ng ating ekonomiya. Mahalaga na matiyak ang kanilang kaligtasan at maibigay ang kinakailangang suporta sa oras ng pangangailangan.”

Kinilala at pinuri ni Dy ang naging aksyon at pag-utos ni Pangulong Marcos sa mga kaukulang ahensiya na alamin kung nasaan na ang Pilipino sa Middle East at gumawa ng agarang hakbang para masiguro ang kanilang kaligtasan at magpatupad ng mga contingency measures kung sakaling lumalala ang sitwasyon sa nasabing rehiyon.

Nanawagan din ang speaker sa Department of Foreign Affairs at Department of Migrant Workers na siguruhin na may contingency plans na nakalaan kapag kinakailangan, nakahandang assistance teams at bukas na komunikasyon para sa agarang aksyon.

Nananawagan pa ito sa mga kababayan sa mga apektadong lugar na manatiling mag-ingat at sumunod sa mga opisyal na abiso ng ating pamahalaan.

“We continue to hope for a peaceful resolution of tensions and firmly reaffirm that the safety and protection of our people will always be our foremost priority,” pagtatapos ni Dy.
(Vina de Guzman)

NAGWAKAS na ang maligayang araw ng isang lalaki na akusado sa patong-patong na panghahalay sa isang menor-de-edad nang matunton ng pulisya sa kanyang pinagtataguan sa Caloocan City.

Nakatanggap ng impormasyon ang mga tauhan ni Northern Police District (NPD) Acting Director P/BGen. Christopher Dela Cruz hinggil sa kinaroroonan ng 32-anyos na akusado.

Ang akusado ay nakatala umano bilang No. 1 Regional Top Most Wanted Person at No. 1 District Top Most Wanted dahil sa kasong Qualified Rape of a Minor (3 counts), Acts of Lasciviousness (4 counts), at Sexual Assault under Article 266-A(2) in relation to RA 7610.

Katuwang ang mga operatiba ng WSS–Caloocan Police at Northern District Intelligence Team – Regional Intelligence Unit (NDIT-RIU NCR), ikinasa ng mga operatiba ng NPD Special Operations Unit (DSOU) ang joint manhunt operation na nagresulta sa pagkakaaresto sa akusado sa Brgy., 171, ng lungsod.

Pansamantalang nakapiit ang akusado sa NPD Custodial Facility Unit habang hinihintay ang pagpapalabas ng commitment order mula sa korte para sa paglilipat sa kanya sa City Jail.

Pinuri naman ni Gen. Dela Cruz ang arresting team sa kanilang matagumpay na operation na binibigyang-diin na ang NPD ay nananatiling mapagbantay sa pagpapanatili ng kaligtasan ng publiko at pagtiyak na ang mga wanted persons ay papanagutin sa ilalim ng batas. (Richard Mesa)

INATASAN ni Pangulong Ferdinand R. Marcos Jr. ang mga pangunahing ahensya ng gobyerno na tiyaking maayos at agarang natutugunan ang kapakanan at proteksyon ng mga overseas Filipino sa gitna ng tumitinding tensyon sa Middle East.
Sa press briefing sa Malakanyang, sinabi ni Department of Migrant Workers Secretary Hans Leo Cacdac na ipinag-utos ng Pangulo ang interagency mobilization upang matiyak ang sapat na tulong at suporta sa mga Pilipino sa naturang rehiyon.
Ayon kay Cacdac, pinamumunuan ni DOH Secretary Ted Herbosa ang pagpupulong para pag-isahin ang mga medikal na tugon, kabilang ang online consultations at psychosocial support ng Department of Health.
“From the DICT, si Sec. Henry Aguda may direktiba mula sa kanya at sa DICT that all telcos will do everything to make sure connectivity with OFWs in the Middle East is maintained and instructed the regional offices to provide free connections to anyone who would like to reach out to their family members and loved ones in affected areas,” dagdag pa ni Cacdac.
Samantala, handa ang Department of Social Welfare and Development sa pamumuno ni Secretary Rex Gatchalian na tumulong sa mga Pilipinong uuwi sa bansa. Nakipagpulong din si Cacdac kay Trade Secretary Cristina Roque para sa mga programang pangkabuhayan at reintegration ng mga babalik na OFW.
Ayon pa sa DMW, may mga opsyon sa trabaho para sa mga maaapektuhan, kabilang ang redeployment sa ibang bansa at aplikasyon sa mga job orders na hawak ng ahensya.
Para sa lokal na trabaho, nakikipag-ugnayan din ang pamahalaan sa Department of Labor and Employment at sa sektor ng turismo sa pamumuno ni Secretary Christina Frasco.
Para naman sa pagsasanay, katuwang ang Technical Education and Skills Development Authority sa pamumuno ni Director Francisco Benitez sa pagbibigay ng reskilling at training vouchers sa mga OFW.
“May mga training vouchers na ibinilin sa amin si Sec. Kiko na puwede naming ibigay sa kanila. Puwede nilang piliin ‘yung kurso at saka ‘yung training institution parang blank ‘yung vouchers na ‘yun na ifi-fill up lang nila,” ayon kay Cacdac..
Suportado rin ng pribadong sektor ang mga programa sa kabuhayan at marketing ng produkto.
Samantala, sinabi naman ni Presidential Communications Office (PCO) Undersecretary at Palace Press Officer Claire Castro na nagpatawag ng emergency meeting si Energy Secretary Sharon Garin kasama ang mga oil companies upang suriin ang posibleng epekto ng sitwasyon sa Middle East sa presyo ng langis sa bansa.
(Daris Jose)

SINIMULAN na ng Department of Human Settlements and Urban Development (DHSUD) ang pamamahagi ng mahigit 1,000 housing units sa Santa Maria Highlands, Bulacan.
Sa katunayan ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na pinangunahan ni DHSUD Secretary Jose Ramon Aliling ang turnover bilang bahagi ng Pambansang Pabahay Para sa Pilipino Program (4PH).
Ang proyekto, na suportado ng Pag-IBIG Fund ay may 33 gusali at 11,016 unit, na inaasahang makikinabang ang humigit-kumulang 30,000 katao. Nakatanggap na ng sertipiko at susi ang mahigit isanlibong unang batch ng benepisyaryo.
Ayon sa DHSUD, simula pa lamang ito ng mas malawak na pamamahagi upang mas maraming pamilyang Pilipino ang magkaroon ng sariling tahanan.
( Daris Jose)

HINDI pa napapanahon ang pagtataas sa presyo ng mga pangunahing bilihin sa gitna ng krisis sa Gitnang Silangan.
Sinabi ni Presidential Communications Office (PCO) Undersecretary at Palace Press Officer Claire Castro Palace Press Officer Claire Castro na hindi ito ang tamang panahon para samantalahin at gamitin ng mga negosyante ang gulo sa Gitnang Silangan para itaas ang presyo ng kanilang produkto.
Sa katunayan nga aniya ay inutusan na ni Pangulong Ferdinand Marcos Jr., ang iba’t ibang ahensiya para hindi aniya magkaroon ng pang-aabuso at kasama na aniya rito ang Department of Trade and Industry (DTI).
Sa kabilang dako, sinabi ni Castro na pag-uusapan sa emergency meeting ni Energy Secretary Sharon Garin kasama ang mga oil companies ang posibilidad na pagsirit ng presyo ng langis dahil sa gulo sa Middle East.
Nauna rito, inihayag ng Department of Energy na magkakaroon lamang ng limited impact sa supply ng langis sa mundo ang kasalukuyang kaguluhan sa Middle East.
Sinabi ni Oil Management Bureau Director Rino Abad na wala namang reports ng nasirang oil production facilities sa Iran sa kabila ng mga pag-atake ng Estados Unidos at Israel.
Ipinaliwanag ni Abad na ang mga pag-atake sa Iran ay limitado lamang sa military at nuclear-related infrastructure at hindi umano apektado ang oil export capacity ng Middle East.
Gayunman, ipinunto ni Abad na ang takot ng mga shipping operator ang nagpapabagal sa oil deliveries.
Dahil sa pagkaantala ng shipment, inaasahan ang pagtaas ng presyo ng langis.
Tinataya ng DOE ang pagtaas na 5 hanggang 10 US dollars per barrel sa presyo ng langis, katumbas ng 30 centavos per liter sa bawat isang dolyar na pagtaas.
Kung magpapatuloy ang pagtaas ng presyo, mararamdaman ng consumers ang impact nito sa susunod na dalawa hanggang tatlong linggo, kung saan posibleng hanggang P3 per liter ang kabuuang pagtaas sa presyo ng langis sa bansa.
Sa kabila ng patuloy na pagtaas ng presyo ng langis, naniniwala ang DOE na ito ay magreresulta sa krisis sa supply sa mundo.
(DARIS JOSE)