NAGPAUNLAK ng isang panayam ang Bise Gobernador ng Lalawigan ng Laguna na si Vice Governor Atty JM Carait sa mga mamamahayag ng People’s Balita at Bagong Henerasyon News Tv Worldwide.
Ayon sa kanya ay di pa nakakarating sa kanyang tanggapan ang nasabing isyu sa Landfill na diumano’y itatayo sa Bayan ng Calauan, Laguna. Kung sakaling ito ay makarating na sa kanilang tanggapan ay kanilang masusing sisiyasatin, dahil may iba’t ibang klase ng landfill kung kaya’t wala pang pormal na komento dahil sa ito ay isang espikulasyon pa lamang kaya kung ito ay sakaling makarating sa kanila ay titignan ng Sangguniang Panlalawigan kung ito ay makakatulong o lubhang makakaapekto sa kalikasan at mga mamamayan at ito ay kanyang aaksyunan ng nasabing Bise Gobernador.

Nilinaw din niya na may sari-sariling komitiba kaya’t hindi ito basta basta na maipapasa dahil sa ito ay susuriin bago ito maipanukala, dahil ang kapakanan ng nakakarami ang kanyang tinitignan kayat kailangan na masusing pag-aaral ukol sa mga ipinapanukalang ordinansa sa naturang lalawigan.
(Yvonne Bagang/ Photos : Boy Morales Sr.)

MAHIGIT isang libong mag-asawa ang nagdiwang ng Araw ng mga Puso ngayong taon bilang mag-asawa sa taunang libreng Kasalan Bayan na idinaos ng Pamahalaang Lungsod ng Caloocan at Valenzuela.

Pinangunahan ni Caloocan City Mayor Dale Gonzalo “Along” Malapitan ang mass wedding ceremony ng mahigit 1000 couples na ginanap sa Caloocan City Sports complex na bahagi ng pagdiriwang ng ika-64th Cityhood Anniversary ng Caloocan.

Malugod na tinanggap ni Mayor Along ang mga bagong kasal sa isang bagong kabanata ng kanilang buhay at hinikayat silang manatiling matatag para sa isa’t isa lalo na sa mga mahirap na yugto ng kanilang pagsasama.

“Congratulations po sa inyong lahat! Ang paalala ko lang po, ang kasal ay hindi parang pagkain na isusubo at iluluwa kapag napaso,” paalala ni Mayor.

“Ito po ay commitment na panghabang-buhay, walang expiration date, at lalong hindi ito nagtatapos sa pagsasabi lang ng ‘I love you’. Sa bawat pagsasama, panatilihin ninyo ang respeto sa isa’t-isa at igalang ang inyong mga asawa,” dagdag niya.

Tiniyak din ng alkalde sa mga mag-asawa na may mga programa ang pamahalaang lungsod para suportahan sila at ang kanilang mga pamilya sa bawat hakbang.

Sa Valenzuela, umabot naman sa 178 Valenzuelano couples ang nagpalitan ng kanilang pinakamatamis na “I do” sa Kasalang Bayan 2026 na ginanap sa Valenzuela People’s Park Amphitheatre, bilang bahagi ng pagdiriwang ng ika-28th Charter Day ng ng lungsod

Pinangunahan ni Mayor WES Gatchalian, ang mass wedding ceremony at nagpaabot ng kanyang mainit na pagbati sa mga bagong kasal at naniniwala na ang Kasalang Bayan ay higit pa sa isang kaganapan sa kasal, ngunit ito rin ay naglalaman ng matatag na pangako ng pamahalaang lungsod sa pag-aalaga ng matatag na pamilya bilang pundasyon ng isang progresibong lipunan. Sa pamamagitan din nito, muli ring pinagtitibay ng lokal na pamahalaan ang kanilang dedikasyon sa pagtataguyod ng pagkakaisa, responsibilidad, at pakikiramay sa mga Valenzuelano.

Upang mas maging espesyal ang once-in-a-lifetime na okasyon, nagbigay ang pamahalaang lungsod ng buffet para sa mga bagong kasal at kanilang mga bisita, hotel gift certificate para sa kanilang unang gabing magkasama bilang mag-asawa, photobooth na may mga souvenir photos upang makuha at mapanatili ang mahahalagang sandali, at mga bridal bouquet para sa mga ikakasal. (Richard Mesa)

SINABI ng Malakanyang na haharap sina Senator Ronald “Bato” dela Rosa at Christopher “Bong” Go sa kaparehong legal process na naranasan ni dating Pangulong Rodrigo “Digong” R. Duterte sa International Criminal Court (ICC).
Binigyang diin ng Malakanyang na susunod ang gobyerno sa batas kapag ipinalabas na ang arrest warrants.
Sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na ang pagkakasama ng pangalan nina Dela Rosa, Go at iba pang dating opisyal bilang di umano’y co-perpetrators sa ICC case ay nag-ugat mula sa proceedings na pinasimulan noong 2017.
“Kung ito naman ay legal process na nanggagaling po sa ICC, hindi naman po natin ito maaaring pakialaman dahil ang kasong iyan ay naisampa noon pa, 2017, at hindi pa po pangulo si Pangulong Marcos Jr.,” ayon kay Castro.
Nauna rito, pinangalanan ng International Criminal Court (ICC) sa isang dokumento nitong Biyernes (oras sa The Hague) ang mga umano’y co-perpetrator o kasabwat ni Digong Duterte kaugnay ng kasong kinahaharap nito.
Ayon sa Document Containing the Charges (DCC) na isinumite ng Prosecution, ang mga kasabwat umano ni Duterte sa “common plan” para mapuksa ang mga kriminal sa pamamagitan ng “violent crimes including murder” ay ang mga sumusunod:
Senador Ronald “Bato” dela Rosa, hepe ng Davao City Police mula Enero 2012 hanggang Oktubre 2013, at hepe ng Philippine National Police (PNP) mula Hulyo 2016 hanggang Abril 2018;
– Vicente Danao, hepe ng Davao City Police mula Oktubre 2013 hanggang Hunyo 2016; counterintelligence chief, PNP Directorate for Intelligence mula Hulyo 2016 hanggang Pebrero 2017; hepe ng Directorial Staff and Deputy Director for Operations ng PNP Criminal Investigation and Detection Group (CIDG) mula Pebrero 2017 hanggang Nobyembre 2018; at Manila Police District director mula Nobyembre 2018 hanggang Oktubre 2019
Camilo Cascolan, finance chief ng Davao Region Police Office mula 2011-2012; hepe ng PNP Directorate for Operations mula Hulyo 2016 hanggang Abril 2018; regional director ng National Capital Region Police Office (NCRPO) mula Abril hanggang Mayo 2018; at chief of staff ng PNP Office ng PNP Office of the Chief of Directorial Staff mula Setyembre 2018 hanggang Oktubre 2019
– Oscar Albayalde, regional director ng NCRPO mula Hulyo 2016 hanggang Abril 2018, at hepe ng PNP mula Abril 2018 hanggang Oktubre 2019
Senador Bong Go, personal aide at special assistant ni Duterte mula 1998 hanggang 2016; special assistant at chief ng Presidential Management Staff ni Duterte mula Hunyo 2016 hanggang Oktubre 2018
– Dante Gierran, Davao regional director ng National Bureau of Investigation (NBI) mula 2013 hanggang 2016; NBI director mula 2016 hanggang 2020;
– Isidro Lapeña, Davao City Police chief mula 1996 hanggang 1998; hepe ng Philippine Drug Enforcement Agency (PDEA) mula 2016 hanggang 2017
Vitaliano Aguirre II, abogado ni Duterte at iba pang miyembro ng Davao Death Squad (DDS); secretary ng Department of Justice mula Hulyo 2016 hanggang Abril 2018
-iba pang miyembro ng PNP at matataas na opisyal
Sinabi ni Castro na susunod ang administrasyong Marcos sa “due process.”
“Kung dadaan sa proseso, iyon naman po ang nais ng pamahalaang ito. Ang ginagawa ng pamahalaang ito ay dumadaan lahat sa proseso,” aniya pa rin.
Samantala, sa posibleng implementasyon ng arrest warrants sa pamamagitan ng International Criminal Police Organization (Interpol), winika ni Castro na ang kahalintulad na procedure ay sinundan sa nakaraan.
“’Yun po ang nangyari before at ‘yan din po ang mangyayari ngayon,” anito.
Consistent naman ang Malakanyang sa posisyon nito na ang pag-aresto kay Digong Duterte ay nag-ugat mula sa Philippines commitment sa Interpol, at hindi ang ICC.
Subalit, nilinaw naman ni Castro na pinanatili naman ng gobyerno ang posisyon nito na ang ICC ay kasalukuyang walang hurisdiskyon sa Pilipinas, di umano’y krimen na nagawa nang ang bansa ay nananatiling miyembro pa na maaaring iba ang pagtrato.
Hindi naman mino-monitor ng gobyerno kung nasaan ngayon ang mga pinangalanan, sabay sabing wala pang arrest warrants ang natatanggap.
“Kapag ka may warrant of arrest na na-issue na po, kailangan i-implement… sa ngayon, wala pa pong dahilan para sila i-bantayan,”a nito. (DARIS JOSE)

UPANG palakasin ang emergency healthcare services sa Valenzuela City, pormal na ibinigay nina Mayor Wes Gatchalian at Senator Win Gatchalian ang 33 bagong ambulansya para sa bawat barangay, bilang bahagi ng pagdiriwang ng ika-28 Charter Day ng lungsod.

Ang mga ambulansya ay may mga makabagong pang-emerhensiyang medikal, kabilang ang mga stretcher bed na may mga safety restraints, spinal boards, at trauma kits. Mayroon din ang mga ito ng panloob LED na medical lighting at two-way radio communication system device upang matiyak ang mahusay na koordinasyon sa central command center ng lungsod.

Mataas rin ang bubong ng mga ito upang kumportable na makagalaw ang mga paramedic habang nagbibigay ng pangangalaga at nilagyan ng mga sirena at high-visibility emergency lighting para sa ligtas at mabilis na transportasyon lalo na pagtrapik.

Sa kanyang pahayag, binigyang-diin ni Mayor WES na ang inisyatiba ay sumasalamin sa proactive at people-centered na pamamahala ng lungsod. Nabanggit din niya na ang pamumuhunan sa emergency medical infrastructure ay mahalaga sa isang mabilis na lumalagong sentro ng lungsod, kung saan ang napapanahong pagtugon sa medikal ay maaaring mangahulugan ng pagkakaiba sa pagitan ng buhay at kamatayan.

Binigyang-diin pa ng alkalde na ang deployment ng mga dedikadong ambulansya bawat barangay ay nagbibigay ng kapangyarihan sa mga lokal na opisyal at frontline responders na kumilos nang mabilis.

“Ito pong programa natin ay bilang suporta sa ating programang pangkalusugan, ang mabili at efficient po na service sa ating mga constituents sa pamamagitan po ng mga brand new ambulance natin. ‘Wag po kayong mag-alala, pinapaalam ko rin sa inyo na ang LGU rin po ay patuloy pong sumusuporta sa ating mga barangay… Kaya sa ating mga kapitan at barangay officials na nandito, suklian po natin ng magandang serbisyo ang ating mga mamamayan,” ani Mayor Gatchailan.

Sa kabilang banda, muling pinagtibay ni Senator WIN ang kanyang pangako na tulungan ang mga lokal na pamahalaan na palakasin ang kanilang mga kakayahan sa pangangalagang pangkalusugan. Pinuri din niya ang pamunuan ng Valenzuela City sa pagbibigay prayoridad sa kalusugan at kaligtasan ng publiko.

Dumalo rin sa kaganapan sina Vice Mayor Marlon Alejandrino, 2nd District Congressman Gerald Galang, mga konsihal ng lungsod, at mga kapitan ng 33 Barangay. (Richard Mesa)