ISANG prestihiyosong Gawad Pagkilala ang ipagkakaloob ng Taiwan kay House Secretary-General Atty. Cheloy Velicaria-Garafil na nagsilbing kinatawan ng Pilipinas sa Manila Economic and Cultural Office (MECO).

Kasunod ito ng natanggap na imbitasyon ni Garafil na nagsasabing siya ay gagawaran ng Order of Brilliant Star with Grand Cordon.
Ito ay isa sa pinakamataas na gawad kung saan ang mismong magkakaloob nito ay Foreign Minister H.E, Lin Cia-lung bilang kinatawan naman ng Republic of China (Taiwan).

Nakasaad sa imbitasyon ang, “cordially invited to a ceremony and reception in which H.E. Lin Cia-lung, Minister of Foreign Affairs, will confer, on behalf of the government of the Republic of China (Taiwan), the Order of Brilliant Star with Grand Cordon upon Honorable Cheloy E. Velicaria-Garafil, former Chairperson and Resident Representative of the Manila Economic and Cultural Office, Republic of the Philippines.”

Isasagawa ang pagbibigay Gawad sa Enero 23 sa Grand Hall, ng Ministry of Foreign Affairs, Ketagalan Boulevard, Taipei ng alas 11:00 ng umaga.

Si Garafil bago maging Secretary-General ng Kamara ngayong 20th Congress ay naging kinatawan ng Pilipinas sa MECO.

“With humility, I share this honor with our colleagues and partners who worked tirelessly during my service. This recognition reflects the work done to strengthen professional and constructive engagement between the Philippines and Taiwan,” ani Garafil.

Ang Order of Brilliant Star with Grand Cordon ay kilalang Gawad pagkilala na ipinagkakaloob ng Taiwan sa mga foreign officials at envoys dahil sa mga naiambag sa diplomatic relations. (Vina de Guzman)

MAINIT na sinalubong ng mga Navoteño sina Miss Universe 2025 3rd runner-up Ms. Ahtisa Manalo at actress na Ms. Max Collins na nakasama nina Mayor John Rey Tiangco at Cong. Toby Tiangco sa Grand Parade ng pagdiriwang ng ika-120th anibersayo ng Navotas. Pumarada rin ang mga kawani at opisyal ng pamahalaang lungsod at mga barangay, national government agencies, mga kawani ng sektor ng edukasyon, mga negosyo sa Navotas, civil society groups, Mutya ng Navotas 2026 at Gandang Lola at Astig na Lolo 2026. (Richard Mesa)

NAGHAIN ng kanyang counter affidavit sa Department of Justice ( DOJ) si Cavite 4th District Representative Kiko Barzaga kaugnay ng inihaing reklamo ng PNP-CIDG na may kinalaman sa anti-Marcos protest at online post.

Sa panayam ng mga mamamahayag , naging kumpiyansa si Barzaga na ibabasura ng panel of prosecutors ang reklamong inciting to sedition at inciting to rebellion na inihain laban sa kanya ng PNP-Criminal Investigation and Detection Group.

Nag-ugat ang reklamo kay Barzaga kasunod ng kanyang post sa social media na may kinalaman sa panawagang
ihiwalay ang Mindanao sa Pilipinas.

Isa rin sa basehan ng reklamo ng PNP-CIDG ang pangunguna ni Barzaga sa Anti-Marcos protest sa Forbes Park sa Makati City, October 12 noong nakaraang taon o public protest na walang permit.

Sa kanyang counter-affidavit iginiit ni Barzaga na bahagi lamang ng freedom of speech ang kanyang post online at wala naman umanong karahasang nangyari noong protesta.

Umaasa rin ang mambabatas na mareresolba ang kanyang ethics complaint bago siya bumalik sa Kongreso sa Pebrero.

Pagdating naman sa kanyang trabaho at pagseserbisyo sa kanyang distrito bilang mambabatas, sinabi ni Barzaga na hindi naman nakaapekto ang kinakaharap niyang ethics complaint. (Gene Adsuara)

INATASAN ng Land Transportation Franchising and Regulatory Board (LTFRB), sa ilalim ng pamumuno ni DOTr Secretary Giovanni Z. Lopez, ang Regional Director ng Cagayan Valley Region na pabilisin ang pagproseso at pag-release ng insurance payment para sa lahat ng biktima ng banggaan ng isang truck at pampasaherong jeepney sa Luna, Isabela nitong Miyerkules, Enero 21.Tatlong katao ang unang naiulat na nasawi dahil sa malakas na impact. Binigyang-diin ni LTFRB Chairperson Atty. Vigor D. Mendoza II na dapat agad na maipaabot ang tulong sa kanilang mga pamilya, gayundin sa mga nasugatan.“Sa ngalan ng mga kawani ng LTFRB, ipinapaabot namin ang taos-pusong pakikiramay sa mga pamilya ng mga biktima na nawalan ng mahal sa buhay dahil sa malungkot na pangyayaring ito,” ani Chairperson Mendoza.“Alam naming hindi mapapalitan ang buhay at walang anumang tulong ang makakabawas sa sakit ng pagkawala ng isang kapamilya. Ngunit ang magagawa natin ngayon ay tiyakin na ang karapatan ng mga biktima sa insurance payment ay maprotektahan at mapabilis.”Ayon kay LTFRB Region 2 Regional Director Atty. Richard Dayag, agad silang kumilos matapos mamonitor ang kumalat na video ng aksidente na iniulat ng isang lokal na news agency sa social media. Agad na nag-deploy ng mga tauhan upang magsagawa ng imbestigasyon at kumuha ng kopya ng police report. Batay sa paunang ulat, naganap ang aksidente sa kahabaan ng national highway nang mawalan ng kontrol ang driver ng dump truck dahil sa bilis at madulas na kalsada, dahilan upang bumangga ito sa jeepney na paparating mula sa kabilang direksyon.Dahil sa matinding impact, tumaob ang jeepney, na nagresulta sa pagkahulog ng ilang pasahero at pagkakahiwalay ng bubong ng sasakyan.Alinsunod sa utos ni Chairperson Mendoza, sinabi ni RD Dayag na nagsimula na silang makipag-ugnayan sa transport cooperative na may-ari at nagpapatakbo ng jeepney, gayundin sa Passenger Accident Management & Insurance Agency, Inc. (PAMI), upang mapabilis ang pagproseso ng insurance claims.Bilang bahagi ng protocol, naglabas din ng show cause order laban sa operator ng jeepney upang matukoy ang road worthiness ng naturang sasakyan.(PAUL JOHN REYES)

ISA ang nasawi habang dalawa ang sugatan at mahigit 50 pamilya naman ang nawalan ng tirahan sa nangyaring magkahiwalay na sunog sa Navotas City.

Sa ulat, nagsimulang sumiklab ang apoy sa bahay ni alyas “Paeng” sa North Bay Boulevard South (NBBS) alas-9:56 ng Martes ng gabi na mabilis na kumalat sa may 13 pang kabahayan na pawang gawa sa light materials na dahilan upang mawalan ng tirahan ang may 57 pamilya.

Inaakusahan ng kanyang mga nasunugang kapitbahay si ‘Paeng’ na sinadyang silaban ang kanyang bahay bunga ng pagkahumaling umano sa illegal na droga kaya binitbit siya ng pulisya sa presinto para sa imbestigasyon.

Nagsasagawa na rin ng hiwalay na imbestigasyon ang Navotas Bureau of Fire Protection (BFP) na silang may karapatang magsiyasat sa mga nagaganap na sunog kaya hihintayin ng pulisya ang pinal na ulat bago magpasiya sa kahihinatnan ng suspek.

Nagpadala naman kaagad ng mga pangunahing pangangailangan sa mga pamilyang nasunugan si Navotas Mayor John Rey Tiangco at personal niya rin binisita ang mga ito para kamustahin ang kanilang kalagayan. Tiniyak niya rin na makakatanggap sila ng kaukulang ayuda para sa muli nilang pagbangon sa trahedya.

Nauna rito, alas-12:17 ng tanghali nang sumiklab din ang sunog sa isang bodegang imbakan ng pang-dekorasyon at muwebles sa Encarnacion St. Brgy. Sa Rafael Village, kung saan nasawi ang 20-anyos na trabahador na taga-Cavite matapos ma-trap habang dalawa pa ang sugatan.

Ayon kay arson investigator SFO2 Junibert Mendoza, posibleng electrical overload o tumalsik na baga mula sa pagwe-welding ang dahilan ng sunog dahil inamin ng welder na gumamit siya ng extension wire habang nagwe-welding.

Inabot ng halos apat na oras ang sunog na itinaas sa ikalawang alarma bago tuluyang naapula alas-4 na ng hapon habang tinatayang aabot sa P5.2 milyong halaga ng ari-arian ang tinupok ng apoy.
(Richard Mesa)

UMAABOT na sa 15 freeze order na kinapapalooban ng P22.869 bilyong mga ari-arian ang na-freeze na ngayon ng Anti-Money Laundering Council (AMLC) may kinalaman sa ghost flood control projects sa bansa.

Ang hakbang ay ­alinsunod sa Anti-Money Laundering Act na nagbibigay kapangyarihan sa AMLC na mai-freeze ang mga kwestyonableng transaksiyon sa pamahalaan.
Ang naturang freeze orders ay mula sa assets ng 724 indibidwal at 537 kompanya tulad ng mga companies.

Ang P22.8 bilyong assets ay kapapalooban ng P14 billion (6,692 bank accounts), P4.8 billion (10 air assets), P2.1 billion (161 real estate properties), P902.1 million (other investments), P490 million (394 insurance accounts), P445.2 million (229 motor vehicles) at P400,639 (16 e-wallet accounts).

Iniulat ng AMLC na handa na silang magsampa ng forfeiture case makaraan ang anim na buwan para maibalik ang mga assets sa kaban ng pamahalaan.

Una nang napaulat na na-freeze na ang ilang yaman ni dating Ako Bicol Rep. Zaldy Co at contractor na si Sarah Discaya matapos akusahan na nagkaroon umano ng kickback sa flood control projects sa gobyerno.
Nang ibunyag ni Pangulong Ferdinand Marcos Jr. sa kanyang SONA noong nakaraang taon ang 15 contractor na kakutsaba ng ilang opisyal ng gobyerno ay isa-isa nang nabuko ang umano’y limpak na salapi na nakuha umano ng mga engineer ng DPWH at contractor dahil sa pakikipagkutsabahan sa ilang Congressman at Senador.