2021 May Archive - People's Balita

Archive for May, 2021

Philippine rowers suportado ng PSC

Posted on: May 7th, 2021 by @peoplesbalita No Comments

Bukod sa tulong-pinansiyal ay suportado rin ng Philippine Sports Commission (PSC) ang mental health ng mga national rowers na tatarget ng Olympic Games berth sa Tokyo, Japan.

Ang Medical Scientific Athletes Services (MSAS) units ng PSC ang nagpapatibay sa pag-iisip ng five man-national rowing team na sasagwan sa 2021 World Rowing Asian-Oceanian Olympic Qualification Regatta sa Tokyo Bay.

“Diretso ang suporta at monitoring nila (PSC) sa amin. Hindi man naging madali ang preparations, motivated ang mga athletes natin,” ani national rowing coach Edgardo Maerina, ang kauna-unahang Pinoy na sumabak sa Olympics rowing event noong 1988 sa Seoul, Korea.

Tiniyak naman ni PSC chairman William “Butch” Ramirez ang kanilang suporta sa mga national rowers na pamumunuan nina 2019 Southeast Asian Games gold medalists Melcah Jen Caballero at Joanie Delgaco. “The PSC will give all-out support for our athletes no matter the present situation, for as long as we can,” ani Ramirez.

Sasabak sina Caballero at Delgaco sa women’s lightweight double sculls habang lalahok sina Zuriel Sumintac at Roque Abala sa men’s lightweight double sculls at lalaban si Cris Nievarez sa men’s single sculls.

“Salamat po sa PSC sa pagsuporta at pagtitiwala sa amin,” sabi ni Caballero. “Regular po ang online consultations namin sa sports psychology and sports physiology.”

Pacquiao may kausap na uli

Posted on: May 7th, 2021 by @peoplesbalita No Comments

Matapos gumuho ang plano sanang laban kontra kay World Boxing Organization (WBO) welterweight champion Terence Crawford, balik sa negosasyon ang kampo ni Manny Pacquiao para sa kanyang susunod na laban.

Mismong si Pacquiao na ang nagkumpirma na may gumugulong na negosasyon para tuluyan nang maikasa ang kanyang pagbabalik-aksiyon.

Ngunit tumanggi si Pacquiao na magbigay ng eksaktong detalye para hindi ito maudlot.

Nais rin ng eight-division world champion na ang Paradigm Sports ang mag-anunsiyo dahil ito ang humahawak sa kanyang boxing career.

“The negotiations are ongoing. I will not go into details so that there will not be any problems,” ani Pacquiao na wala ring inihayag pa na detalye sa usaping pagreretiro.

“We won’t answer that for now, because that is part of the negotiations. That will be included in the announcement,” dagdag ng Pinoy champion.

Balik sa hot spot si dating world champion Mikey Garcia na posibleng makaharap ni Pacquiao.

Nauna nang naglabas ng teaser ang business manager ni Pacquiao na si Arnold Vegafria sa kaniyang Instagram account para sa Pacquiao-Garcia fight. Napaulat na sa Agosto ito target ganapin kung saan mananatiling sa Dubai, United Arab Emi-rates ang target na maging venue ng laban.

Ngunit hindi rin isinasantabi ni Pacquiao ang posibilidad na sa Amerika ito ganapin.

Walang magawa ang boxing community kundi ang maghintay sa magi-ging anunsiyo ng kampo ni Pacquiao.

MAG-INA ARESTADO NG NBI DAHIL SA ROBBERY EXTORTION

Posted on: May 7th, 2021 by @peoplesbalita No Comments

ARESTADO ang dalawang indibidwal ng mga ahente ng NBI- National Capital Region (NBI-NCR) sa entrapment operation dahil sa kasong Robbery Extortion sa Sta. Mesa, Maynila.

Kinilala ang mga naaresto na si Jingky Joy Sena at kanyang ina na si Maricar Sena.

Ayon kay NBI Director Eric Distor, nagreklamo ang biktima sa NBI-Sarangani Districti Office (NBI-SARDO).

Ayon sa biktima, hinack ni Jingky ang kanyang Facebook account at pinalitan ang kanyang password .

Kasunod nito, nagpadala ng ilang sex videos ng biktima sa pamamagitan ng kanyang FB account sa kanyang mga kaibigan.

Hiningan din siya ng pera para tigilan na ang pagpapadala ng sex videos ng biktima sa ibang tao.

Dahil sa takot ng biktima sa mag-ina, nagpadala ito ng pera sa pamamagitan ng Palawan Express sa Maynila.

Pinayuhan naman ng NBI-SARDO sa General Santos City, ang biktima na maghain ng reklamo sa NBI-NCR kaya sila lumuwas .

Napag-alaman kasi na ang mga suspek ay nakatira sa Maynila.

Kasunod nito nakipag-ugnayan ang NBI-NCR sa tamang ahensya para sa entrapment operation.

Naaresto ang mag-inang habang kini-claim ni Maricar ang pera sa Palawan Express Pureza Branch, Sta. Mesa, Maynila na nagkakahalaga ng P1,500.00 at P500 na ipinadala mula sa Palawan Express Gen. Santos City Branch.

Matapos maaresto si Maricar, itinuro nito ang kinaroroonan ng kanyang anak na si Jingky kung saan naman ito naaresto.

Mahaharap sa kasong Robbery Extortion na may kaugnayan sa RA 10175 o Cyber Crime Prevention Act of 2012, at paglabag sa R.A. 9995, o “Anti-Photo and Video Voyeurism Act of 2009” ang mag-inang suspek. (GENE ADSUARA)

6 Pinoy galing India COVID-19 positive nang i-quarantine dahil sa ‘new variant’ scare

Posted on: May 7th, 2021 by @peoplesbalita No Comments

Kinumpirma ng Department of Health (DOH) na nagpositibo sa coronavirus disease (COVID-19) ang ilang kataong inooberbahan nila kaugnay ng kinatatakutang bagong variant ng sakit.

Hanggang ika-14 ng Mayo magpapatupad ng “travel ban” sa India matapos kumalat doon ang B.1.617 COVID-19 variant na sinasabing mas nakahahawa. India rin ang nakapagtatala ng may pinakamatataas na daily COVID-19 cases sa buong mundo nitong mga nakaraang araw.

“May mga dumating sa atin — katulad ng nabanggit namin sa inyo noong isang linggo — na merong mga pasaherong either [merong] touchpoint doon sa India, nag-pass through sila [roon] or galing sila talaga roon and they are currently quarantined,” ani Health Undersecretary Maria Rosario Vergeire, Lunes.

“So tinitingnan natin itong mga ito. Once may magpositive sa mga samples nila, we are going to subject this to the whole genome sequencing process.”

Sa kabila niyan, wala pa rin naman daw natutukoy sa mga samples noong nakaraang linggo na nakikitaan ng nasabing variant: “Kaya nga po we are trying to strengthen our border control implementation para ma-avoid po natin itong mangyayari sa atin,” dagdag ni Vergeire kanina.

Una nang sinabi ni Rontgene Solante, na nangunguna sa adult infectious diseases unit ng San Lazaro Hospital, na ilan lang ang mas nakahahawang B.1.617 at pagluluwag uli sa India ang mga dahilan kung bakit pumapalo uli ang mga kaso roon.

India rin sa ngayon ang ikalawa sa may pinakamataas na COVID-19 cases sa buong mundo sunod sa Estados Unidos sa bilang na 19,557,457, ayon sa World Health Organization (WHO).

Umano’y pagpasok ng India COVID-19 variant sa bansa, tunay na nakababahala – OCTA

Posted on: May 7th, 2021 by @peoplesbalita No Comments

Magiging malaking problema umano ng Pilipinas kung totoo ang mga ulat na nakapasok na sa bansa ang Indian variant ng coronavirus disease.

Ayon kat OCTA Research fellow Dr. Guido David, malaki ang magiging epekto ng nasabing variant kung kakalt ito sa National Capital Region (NCR) at mga kalapit na lugar dahil hindi raw malayo na muli na namang sumirit ang kaso ng nakamamatay na virus tulad sa mga nakalipas na buwan.

Kahit aniya nakakakita na ng pagbaba sa naitatalang COVID-19 case sa Metro Manila ay hindi pa rin ito garantiya na kakayanin ng NCR na muling tumaas ang kaso ng COVID-19 dahil nananatili pa ring mataas ang healthcare utilization rate.

Sa ngayon ay bumaba na ng 0.74 ang reproduction number sa NCR.

“But at this point, the case level still significant and hospitals are still basically have high occupancies so we cannot really afford another surge at this point in time,” wika ni David.

Dagdag pa ng eksperto na ang bilang ng kaso sa Metro Manila ay nasa downward trend na pero nananatili itong “relatively unstable” sa mga lugar na wala pang pagbaba ng kaso sa mga nakalipas na linggo.

Magugunita na nagpatupad ang Pilipinas ng travel ban sa mga indibidwal na magpupunta o manggagaling sa India noong Abril 27. Ito ay bilang pag-iwas ng pamahalaan sa posibilidad na makapasok sa bansa ang Indian variant.

Diaz gusto pang sumabak sa Vietnam SEA Games

Posted on: May 7th, 2021 by @peoplesbalita No Comments

Hindi pa ang Tokyo Olympics ang huling hirit ni Hidilyn Diaz dahil nangako itong sasabak pa sa 2021 Southeast Asian Games sa Vietnam sa Nobyembre.

Orihinal sanang magreretiro ang RIo Olympics silver medalist pagkatapos ng Tokyo Olympics kung natuloy ito noong nakaraang taon.

Subalit dahil naurong ang Tokyo Olympics sa Hulyo ngayong taon, nagdesisyon si Diaz na tapusin na ang 2021 season bago tulu-yang magretiro.

“After Tokyo Olympics, talagang balak ko na mag-retire kung natuloy sana last year. ‘Yun na ang last tournament ko,” ani Diaz.

Ipinaliwanag ni Diaz na ang time frame ang naging dahilan niya para ituloy na ang huling laban sa Vietnam SEA Games.

“Pero dahil halos magkasunod na rin naman ‘yung Tokyo Olympics and SEA Games, itutuloy ko na para tuluy-tuloy ‘yung momentum kasi nandun na. Hindi tulad kung noong 2020 ‘yung Tokyo Olympics medyo malayo sa 2021 Vietnam SEA Games,” ani Diaz.

Ipagtatanggol ni Diaz ang korona nito sa wo-men’s 55-kg division sa SEA Games na idaraos sa Nobyembre sa Hanoi, Vietnam.

Ngunit bago ang SEA Games, nakasentro muna ang atensiyon ni Diaz sa Tokyo Olympics kung saan isa ito sa inaasahang mag-uuwi ng medalya para sa Pilipinas.

Pag-amin ni PDu30, walang garantiya na hindi siya mabibiktima ng Covid-19

Posted on: May 7th, 2021 by @peoplesbalita No Comments

SINABI ni Pangulong Rodrigo Roa Duterte na walang garantiya na hindi siya mabibiktima ng Covid- 19 kahit pa nabakunahan na siya laban dito.

“There is no way, guarantee that I will not be a victim of COVID,” ayon kay Pangulong Duterte sa kanyang Talk To The People, Miyerkules ng gabi.

“At no other time in my life did I have to contend with the fact that a lot of my friends, those of my age, have been dying,” ani Pangulong Duterte.

“I do not exclude myself from that reality. I’m old myself,” dagdag na pahayag nito.

Kamakalawa ay nagpabakuna na si Pangulong Duterte ng Sinopharm COVID-19 vaccine.

Sa video na inilabas sa Facebook page ni Senador Bong Go, makikita si Health Secretary Francisco Duque III na siyang nagturok ng bakuna sa Pangulo.

Bago ito tinurukan ay kinumusta muna ni Duque ang Pangulo na sinagot naman nito na maayos ito.

Sinabi naman ni Pangulong Duterte na matagal na niyang hinihintay na mabakunahan pero kinakailangan pa aniyang hintayin ang assessment ng kanyang doktor, na pinili ang Sinopharm vaccine.

Sa ngayon, wala pang Emergency Use Authorization (EUA) na inisyu ang Food and Drugs Administration para sa Sinopharm vaccine pero mayroon itong Compassionate Special Permit (CSP) na ibinigay sa Presidential Security Group (PSG). (Bishop Jesus “Jemba” M. Basco)

Philippine fencers paghahandaan ang Vietnam SEAG

Posted on: May 7th, 2021 by @peoplesbalita No Comments

Matinding preparasyon ang gagawin ng Philippine Fencing Association (PFA) para sa 31st Southeast Asian Games na iho-host ng Hanoi, Vietnam sa Nobyembre.

Isiniwalat kahapon ni national fencing head coach Rolando ‘Amat’ Canlas sa Philippine Sportswriters Association (PSA) Forum online edition ang plano ng PFA na training sa Korea at Hong Kong.

Ngunit nagdadala-wang-isip si Canlas dahil sa quarantine restrictions sa dalawang bansa.

“Iyong Plan B is mag-send na lang ng mga Korean fencers sa Ormoc City para may makalaban kaming malalakas. Siguro mga 12 fencers iyon,” ani Canlas. “Iyon ang second option na gagawin namin.”

Magtatakda ang fen-cing association ng national tryout para sa dele-gasyong ilalaban sa 2021 Vietnam SEA Games sa Nobyembre 21 hanggang Disyembre 2.

Isasabak din ng PFA, pinamumunuan ni Ormoc City Mayor Richard Gomez, ang mabubuong national team sa under-23 at open tournament sa Chinese-Taipei bukod pa sa pag-imbita sa mga fo-reign fencers.

Noong 2019 Philippine SEA Games ay sumikwat ang mga national fencers ng dalawang gold, dalawang silver at pitong bronze medals.

Nanggaling ang national team sa nakaraang Asia Oceania Olympic Qualifiers sa Tashkent, Uzbekistan kung saan walang nakakuha ng tiket para sa 2021 Olympic Games sa Tokyo, Japan sa Hulyo.

Tanging si national fencer Samantha Ca-tantan ang nakakuha ng bronze medal matapos matalo kay top seed Yana Alborova ng Uzbekistan sa semifinals ng women’s individual foil.

“Siyempre, nanghihinayang ako pero ganoon talaga ang competition na hindi lahat makakapasok (sa Olympics),” ani Catantan mula sa Pennsylvania. “Learning experience na lang para mag-training pa ako nang maige.”

Ang 19-anyos na si Catantan ay miyembro ng Penn State University fencing team sa US NCAA.

Inalat naman sa kani-kanilang events sa Olympic qualifier sina 2019 Southeast Asian Games gold medalist Jylyn Nicanor, Hanniel Abella, Nathaniel Perez, Noelito Jose at CJ Concepcion.

Si Walter Torres ang pinakahuling Pinoy fencer na nakalaro sa Olympics noong 1992 sa Barcelona, Spain.

Ads May 7, 2021

Posted on: May 7th, 2021 by @peoplesbalita No Comments

Service contracting ng PUVs tinaasan ang per kilometer incentive

Posted on: May 7th, 2021 by @peoplesbalita No Comments

Tinaasan ng Land Transportation Franchising and Regulatory Board (LTFRB) ang per kilometer incentive na binibigay sa mga public utility drivers (PUVs) sa ilalim ng programang service contracting ng pamahalaan.

Sa isang LTFRB memorandum circular ng nilabas, ang per kilometer incentive para sa traditional at modernized jeepneys kasama ang public utility buses ay bibigyan ng dobleng rate.

Ang programang service contracting ay ang pabibigay ng subsidies sa mga PUVs base sa nilakbay at tinakbo ng kanilang sasakyan.

“The memorandum signed on April 16 increased the per kilometer incentive to P27 for traditional and modernized jeepneys ang P45.50 for public utility buses from the previous rate of P11 and P23.10, respectively,” wika ng LTFRB.

Inilungsad ang service contracting dahil na rin sa pagbabawas ng kapasidad ng pasahero sa mga sasakyan dahil sa pagpapatupad ng social distancing na nakaapekto sa take-home pay ng mga drivers at operators. Kung kaya’t kinakailangan dagdagan ang financial assistance sa mga mangagagawa sa pampubliko transportasyon.

Halos may 35,000 na PUV drivers ang lumahok at nagparehistro sa program samantalang may 25,000 pa na patapos pa lamang sa kanilang orientation seminar.

Sa kabuohan, may 60,000 ang makakakuha ng subsidies base sa kilometrong tatakbuhin ng kanilang sasakyan.

Nakapagtala ang LTFRB ng halos P46.1 million na subsidies ang kanilang napamimigay sa 11,000 ng drivers at operators ng mga PUVs.

Ang programa ay may nakalaang P5 billion na pondo mula sa Department of Transportation (DOTr). (LASACMAR)