2021 April Archive - People's Balita

Archive for April, 2021

Tokyo Olympics organizers tiwala pa rin na matutuloy ang mga laro sa Hulyo

Posted on: April 16th, 2021 by @peoplesbalita No Comments

Tiwala pa rin ang organizers ng Tokyo Olympics na matutuloy pa rin ang mga laro kahit na nahaharap sila malaking pagsubok at ito ay ang patuloy na pagdami ng kaso ng COVID-19.

Sa natitirang 99 araw bago ang July 23 Olympics ay positibo pa rin ang mga organizers na matutuloy ang mga events.

Isa sa naging halimbawa na wala ng makakahadlang sa mga laro ay ang pagsisimula na ng Olympic torch relay na nag-umpisa sa Fukushima noong nakaraang buwan.

Bagamat hindi na kailangan na maturukan ng COVID-19 vaccines ang mga atleta ay hinihikayat pa rin sila ng International Olympic Committee ang pagpapabakuna at naglaan na rin sila ng Chinese-made vaccines para sa mga atleta na wala pang bakuna.

Ayon sa mga organizers, mapapawi at mawawala ang atensiyon ng mga tao sa COVID-19 kapag makita nila ang mga atleta sa entablado sa pagsisimula ng Olympics.

JUDY ANN, bagay na gumanap na bida sa ‘Doctor Foster’ at si JULIA naman ang ‘other woman’

Posted on: April 16th, 2021 by @peoplesbalita No Comments

MAINGAY na agad ang adaptation na gagawin ng ABS-CBN mula nang ianunsiyo nila na nakuha nila ang rights ng Doctor Foster na orihinal sa British Television at na-adapt na ng ibang bansa.

Ang pinakahuli na nag-adapt nito ay ang South Korea at puwede rin sigurong sabihing isa sa pinaka-successful adaptation noong 2020 at pinagbidahan ng South Korean actress na si Kim Hee-ae, kanya-kanya na rin ng suggestion ang netizens sa kung sino ang Kapamilya actress na gusto nilang gumanap.

Kilala sa bansa ang Doctor Foster na The World of the Married na ipinalabas sa VIU at Netflix. Ang actress na gumanap nito ay nanalo ng Best Actress award at Deasang award.

Mga pangalan nina Judy Ann Santos, Angel Aquino, Jodi Sta. Maria, Angelica Panganiban ang ilan sa nababasa naming bet ng netizen na gumanap.

Personally, nakikita namin si Judy Ann sa role ng bidang doctor na pinagtaksilan ng asawa, pero at the same time, sa process ng paghihiganti niya ay may nagawa rin na pinagsisihan nito.

Bold, daring ang role so tingin din namin, baka ito ang maging struggle, if not only sa pandemic at ayaw munang tumanggap ng serye ni Juday.

Kung hindi pwede si Juday, sa pagiging daring, pwede sina Jodi at Angelica. Pero again, babalik kami sa perfect choice sana rito si Juday.

At tulad ng wish ng netizens, kahit na kahawig ni Kylie Padilla ang gumanap na actress sa Korean adaptation, hands down, si Julia Barretto ang nag-iisa at bagay na bagay talaga sa role ng kabit.

Sina Judy Ann at Julia ay perfect sana para sa dalawang female lead. But since tingin namin, mahihirapang tanggapin ni Juday, pinaka-bonggang cast talaga at kung papayag na magsama, aba, Bea Alonzo at Julia Barretto!

***

NAPAPA-’sana all’ na lang ang netizens, lalo na ang mga K-Pop fans dahil sa pagmamahal pa rin talaga ng K-Pop Idol at kilala sa Pilipinas bilang Pambansang Krung-Krung na si Sandara Park sa mga kasama niya dati noong Star Magic artist pa siya.

Alam na, lalo na ng mga tagahanga ni Sandara all-over the world kung ano na ang mga nagawa, naibigay at pagpapahalaga talaga niya sa kanyang mga dating handlers sa Star Magic.

Kabilang na nga rito sina Ana Yambao at ate Eleina Rodriguez o mas kilala, lalo na ng mga international fans bilang si “Lola.”

Ito kasi ang tawag ni Sandara kay Ate Eleina. At nang malaman ni Sandara na ang dating walang kaalam-alam at kahilig-hilig sa anything K-entertainment ay biglang naging fan ng boy group na Super Junior lalo na ang miyembro nito na si Choi Siwon, hayun, nang makasama sila ni Sandara sa isang show, hiningan niya ng video greetings ang buong Super Junior para bumati ng Happy Birthday kay Lola.

Ang siste, November last year pa ito ginawa ni Sandara. Nang magkasama nga sila sa docu-show na Archive kunsaan, tungkol sa evolution ng K-pop.

Para hindi ma-pre-empt ang show, itinago lang ni Sandara ang video at kailan lang inilabas at ipinost sa kanyang Instagram account.

Siyempre, tuwang-tuwa si Lola. Pero, magkahalong tuwa at inggit din ang nararamdaman ng ibang fans.

Nakausap namin si Ate Eleina at sabi nga niya, kung hindi raw dahil sa pandemic, usually ay nagse-celebrate sila ng birthday ng sabay sa Pilipinas. November 8 daw kasi siya at November 12 naman si Sandara.

At sigurado, kung walang pandemic, naka-ilang balik na sana muli sa bansa si Sandara na talagang second home at mahal niyang talaga ang Pilipinas.

Holmqvist apelyido ng ina gagamitin sa jersey

Posted on: April 16th, 2021 by @peoplesbalita No Comments

MAGPAPALIT ng surname si incoming Philippine Basketball Association (PBA) rookie Ken Holmqvist ng Barangay Ginebra San Miguel na ikakabit sa playing uniform niya sa mga game sa professional cage league.

Pinabatid na niya ang hakbang kay PBA Commissioner Wilfrido ‘Willie’ Marcial, ayon kay BGSM coach Earl Timothy ‘Tim’ Cone nitong isang araw lang.

Idinahilan ng Filipino-Norwegian na lubhang mahirap bigkasin at isulat ang Ken Holmqvist. Inaantay na lang ng Gin Kings ang sagot ng Office of the Commissioner.

Pero kapag pumayag ang liga, ang middle initial na S (Sagulo) ng dating University Athletic Association of the Philippines (UAAP) player mula sa Far Eastern University, na apelyido ng kanyang ina sa pagkadalaga ang makikita na sa jersey niya ng mga diehard fan ng crowd favorite.

Hinirit pa ni Cone na kasama sa layunin ng 25-year-old, 6-foot-8 baller ang pagtanaw ng utang na loob sa kanyang ina. Holmqvist ang gamit ng basketbolista sa UAAP at FEU playing years niya.

Maging nang maging kasapi ng national men’s basketball team na nagkampeon sa 3rd Souh East Asian Basketball Association (SEABA) Cup 2016 sa Bangkok, Thailand.

Sa tingin ng Opensa Depensa, aprub ito sa PBA.

Kasi si Jayson Castro ng TNT apelyido ng nanay niya rin ang dinadala sa PBA. Jayson William siya kapag mga kompetisyon naman ng International Basketball Federation (FIBA).

Paras, Torralba at Cuno makakatulong — Racela

Posted on: April 16th, 2021 by @peoplesbalita No Comments

KUMPIYANSA si Raoul Cesar ‘Nash’ Racela sa tatlong bagitong hinugot ng Blacwater sa 36th Philippine Basketball Association (PBA) Draft sa nakalipas lang na buwan.

Nilarawan ng Bossing coach sina Andre Nicholas Alonzo Paras, Joshua Torralba at Rey Mark Auno na mga batang palaban, masipag mag-hustle at hindi lang sa opensa uubra kundi maging sa depensa rin.

Maaasahan aniya sa magkabilang dulo ng court ang tatlong bagong salta para sa prangkisang Dioceldo Sy kaya pinapirma na ito bago mag-Enhanced Community Quarantine sa COVID-19 sa kasalukuyang buwan.

Lagas si Rey Mark ‘Mac’ Belo sanhi ng Baser Amer trade buhat sa Manila Electric Company o Meralco kaya ipapanalpak sa front court ng koponan ang 6-foot-4 na si Paras at 6-7 Acuno.

“Both are young bigs, utility guys,” panapos na hirit ng coach.

“They could give you different things.”

Isang guard naman ang 6-2 na si Torralba na magiging katuwang o kapalitan ni Amer sa backcourt pati nina Paul Desiderio at Diego Miguel Dario.

First pick ng koponang pabango sina Acuno at Torralba sa second round (14th at 15th overall) habang sa third round (27th overall), nadale ang ikalawang henerasyong Paras sa unang Asia’s play-for-pay hoop.

Wala pang bagong petsa ang 46th PBA Philippine Cup 2021 opening na kinansela sa Ynares Center sa Antipolo sa buwang ito. Pagpapasyahan pa sa PBA Board of Governors meeting sa darating na Lunes, Abril 19 ang bagay. (REC)

DINGDONG, ‘di pa rin makapaniwala na kaybilis ng panahon at two years old na si SIXTO

Posted on: April 16th, 2021 by @peoplesbalita No Comments

MAY throwback post si Kapuso Primetime King Dingdong Dantes kasama ang kanyang bunsong anak na si Jose Sixto Dantes IV, na nagsi-celebrate today, April 16 nang ikalawa niyang kaarawan.

Sa IG post ni Dingdong noong April 14, ibinahagi nga niya ang larawan nilang mag-ama na kuha noong nakaraang taon.

May caption ito ng, “I was going through old photos, when I came across this picture that I had taken around the same time last year (bago kita tuluyang kinalbo).

“I couldn’t believe how time flies so fast that in a couple of days, you’ll be turning two.

“So many things had happened, so many realizations, and so many challenges such as this pandemic that we have to fight as a nation.

“It may not be an ideal world to live in, but we, your parents, will do our best to inculcate in you and your Ate Z the renewed (and strengthen) version of values and principles of humanity.”

Katulad ng mga naging post ni Dingdong sa kanyang dalawang anak, nakaka-touch o heartwarming kaya naman palaging pinupusuan ng netizens.

Sa araw na ito, tiyak na kahit paano ay pinaghandaan nina Dingdong at Marian Rivera-Dantes kasama ang panganay na anak na si Zia na maging memorable pa rin celebration ni Sixto, na kinagigiliwan ng netizens dahil lalo pa itong gumaguwapo.

Samantala, last year sa unang kaarawan ni Sixto, gumawa nga si Dingdong ng isang ‘open letter’ para sa kanyang anak, na hindi nakapag-celebrate kasama ng buong angkan at mga kaibigan dahil nga sa nag-ECQ sa pagtaas ng Covid-19 cases sa bansa.

Hindi na nga malilimutan ang naka-aantig na mensahe na nais ipahiwatig ni Dingdong sa kanyang anak na ating balikan:

“Dear Son,

“It is day 33 for us here on lockdown and day 365 for you on Earth.

“Normally, we would gather all our relatives and friends to celebrate this special day with you, just like how your mother and I had done it when we reached the same milestone.

“Though as toddlers, we never really remembered anything— thanks to the pictures that reminded us how we are loved by the people around us.

“But today, it’s just going to be us, Buddy— You, me, your Mother, your Ate Z, Ate Cecile, Ate Glenda and Kuya Emerson.

“But please know that there are many people like your cousins, grandparents, godparents and relatives who wish to see you and be with you today, probably to give a gift, a cake, or a simple tight warm hug.

“But not now…maybe when this is all over. When? I really don’t know, son.

“To be honest with you, i fear the day that you would be marching towards this new world, this new normal, that we had created for your generation.

“What’s happening now is a clear manifestation of our actions and inactions— and we are reaping its effects which could benefit a few, but for most…just hard learnings about humanity, the planet and spirituality.

“But i guess as parents, that’s what we are here for.

“We are here to prepare you for that jungle out there.

“Though there is fear, it is also you (and your sister) who give me courage to carry on and strive to make this world a sustainable place to live in.

“You give me the drive to make me want to be a better version of myself.

“And so, in as much as it should be you who should receive gifts, please know that you are the gift for us— a living reminder that we should get our acts together and ensure that when the time comes, you can freely walk the streets, breathe all the air that you want, play ball with your friends even at close distance, ride a bike, and return the hug to all your well-wishers today.

“This picture will always be my reminder that in times of fear and uncertainty, i had found hope—through you.

“Happy first birthday, Sixto.

“Love,

“Dad 161000hAPR20”

“PS. I hope you like your haircut. Don’t worry when the time comes, you can cut mine too!” (ROHN ROMULO)

MINI-PUFTS ARE OUT OF THE BAG IN THE CHARACTER-REVEAL VIDEO OF “GHOSTBUSTERS: AFTERLIFE”

Posted on: April 16th, 2021 by @peoplesbalita No Comments

SWEET. Mischievous. Savage.

Mini-Pufts are out of the bag, in the recently released video that introduces the new characters in Columbia Pictures’ upcoming adventure comedy Ghostbusters: Afterlife.

Check out the character-reveal video below and watch Ghostbusters: Afterlife in Philippine cinemas this 2021.

YouTube: https://youtu.be/x-Mjfs9zRH4

About Ghostbusters: Afterlife

From director Jason Reitman and producer Ivan Reitman, comes Columbia Pictures’ Ghostbusters: Afterlife, the next chapter in the original Ghostbusters universe.

In Ghostbusters: Afterlife, when a single mom and her two kids arrive in a small town, they begin to discover their connection to the original ghostbusters and the secret legacy their grandfather left behind. The film is written by Jason Reitman & Gil Kenan. Based on the 1984 film Ghostbusters, an Ivan Reitman film written by Dan Aykroyd and Harold Ramis.

Starring Carrie Coon, Finn Wolfhard, Mckenna Grace and Paul Rudd, Ghostbusters: Afterlife’s executive producers are Dan Aykroyd, Gil Kenan, Jason Blumenfeld, Michael Beugg.

Ghostbusters: Afterlife will be distributed by Columbia Pictures, local office of Sony Pictures Releasing International. Use the hashtag #Ghostbusters

Tanggapan ng Radio Veritas, isinailalim sa “pansamantalang lockdown”.

Posted on: April 16th, 2021 by @peoplesbalita No Comments

Tiniyak ng himpilan ng Radio Veritas 846-ang Radyo ng Simbahan na patuloy na mapakikinggan sa himpapawid at mapapanood sa pamamagitan ng video streaming at Veritas 846 Facebook page ang mga misa at mga programa ng himpilan.

Ito ay kaugnay sa ipatutupad na ‘pansamantalang lockdown’ o pagsasarado ng Radio Veritas main studio na matatagpuan sa 162 West avenue corner Edsa Quezon City dulot na rin ng pagpositibo ng ilang kawani ng Covid-19 simula April 14.

Ang hakbang ay bilang pagtugon sa panuntunan ng Inter-Agency Task Force at bigyang daan ang isasagawang ‘disinfection’ ng buong gusali na bahagi ng pag-iingat ng higit pang pagkalat ng nakakahawang sakit.

Humingi rin ng pang-unawa at panalangin ang Radio Veritas sa mga Kapanalig dahil sa pansamantala pagsasara ng tanggapan kung saan hindi muna pinahihintulutan ang pagtanggap ng mga ‘walk in’ Kapanalig members at application, gayundin ang Truth Shop at mga hihingi ng tulong sa programang Caritas in Action.

Pansamantalang ginagamit ng Radyo Veritas ang transmitter sa Taliptip Bulacan, upang patuloy na makapaglingkod at mapakinggan ang mga inihandang mga programa.

Kabilang sa mapakikinggan ang mga banal misa, pagninilay ng mga pari at obispo gayundn ang mga gawain ng simbahan para sa pagdiriwang ng ika-500 taon ng Kristiyanismo sa Pilipinas.

Sa kasalukuyan ay sumasailalim sa swab testings at contact tracing ang Radio Veritas upang malaman ang kalagayan ng iba pang mga kawani kasabay na rin ng isasagawang paglilinis sa buong gusali upang matiyak ang kaligtasan ng lahat.

Para sa mga kapanalig na nais na magbigay ng kanilang ‘pledge’ at donasyon ay maari itong isagawa online na makikita sa veritas846.ph website.

Maglalabas ng karagdagang pahayag ang himpilan sa lalung madaling panahon.

5 nalambat sa P241K droga sa Malabon

Posted on: April 16th, 2021 by @peoplesbalita No Comments

Limang hinihinalang sangkot sa ilegal na droga kabilang ang dalawang babae ang arestado sa isinagawang magkahiwalay na buy bust operation ng pulisya sa Malabon City.

Sa ulat, alas-3:30 ng hapon nang masagawa ng buy bust operation NPD District Drug Enforcement Unit (DDEU) sa pangunguna ni PLTCOL Macario Loteyro at PMAJ Jerry Garces sa harap ng isang bahay sa No. 2A MacArthur Highway, Brgy. Potrero Malabon City na nagresulta sa pagkakaaresto kina Mikel Pucio alyas “Manila Dead Drop” , 25, Kian Earl Bonifacio, 20, at Rochelle Alday, 24, pawang ng Caloocan city.

Narekober sa mga suspek ang nasa 1000 gramo ng hinihinalang pinatuyong dahon ng marijuana na may standard drug price P120,000, buy-bust money na binubuo ng isang tunay na P1,000 at 19 pirasong P1,000 boodle money, transparent glass pipe na naglalaman ng marijuana, 2 cellphones at brown eco bag.

Dakong 11:30 naman ng gabi nang madamba ng mga operatiba ng Malabon Police Station Drug Enforcement Unit (SDEU) sa pangunguna ni PLT Joseph Alcazar sa ilalim ng pangangasiwa ni P/Col. Joel Villanueva si Marvin Diolazo, 45, at Irene Flores, 41, kapwa ng ng Bisig ng Kabataan, Brgy. 2, Caloocan City matapos bentahan ng P500 halaga ng shabu ang isang pulis na nagpanggap na buyer.

Nakumpiska sa mga suspek ang 21 pirasong plastic sachets na naglalaman ng nasa 17.83 gramo ng hinihinalang shabu na tinatayang nasa P121,244 at buy bust money.

Kasong paglabag sa R.A 9165 o ang Comprehensive Dangerous Drug Act of 2002 ang isinampa ng pulisya kontra sa mga suspek sa Malabon City Prosecutors Office. (Richard Mesa)

Limitadong vaccine doses, inirekomenda ng OCTA na i-focus sa NCR

Posted on: April 16th, 2021 by @peoplesbalita No Comments

Hinikayat ng mga eksperto mula sa OCTA Research Team ang gobyerno na mag-focus na lang sa pamamahagi ng limitadong suplay ng coronavirus vaccines sa mga lugar na may mataas na coronavirus cases, partikular na rito ang Metro Manila at Calabarzon.

Ayon kay OCTA Research fellow Prof. Ranjit Rye, nakatakda silang magsumite ngayong linggo ng kanilang sariling vaccine model. Mas makabubuti aniya kung gagamitin ng pamahalaan ang risk-based approach.

Ibig sabihin lang nito ay uunahing mabakunahan ang lahat ng health care workers, matatanda at mga indibidwal na may comorbidities.

Kailangan aniya na pagtuunan na rin ng pansin ang NCR at Calabarzon kung saan naitatala ang karamihan ng COVID-19 cases. Kung gagawin daw ito ay naniniwala ang OCTA na hindi lang maaabot ng Pilipinas ang herd immunity subalit pati na rin ang posibilidad na bumaba ang mga kaso ng nakamamatay na virus.

Suportado rin ng grupo ang risk-based approach para sa alokasyon ng mga bakuna ngunit dahil na rin sa kakulangan ng suplay nito at pamimilit na muling nang buksan ang ekonomiya, ayon kay Rye maaari raw aralin ng pamahalaan ang pag-reallocate ng spaces.

Posible raw na magreklamo rito ang ibang rehiyon pero naniniwala ang grupo na maihahalintulad ang pandemic sa isang ahas. Kung uunahin aniya na putulin ang ulo nito, ay malaki ang tsansa na magkaroon ito ng malawakang epekto sa laban kontra COVID-19.

Dagdag pa ni Rye na malayo pa ang landas na tatahakin ng bansa para magapi ang coronavirus pandemic kahit pa nakakakita na sila ng pagbaba sa COVID-19 reproduction number. (Daris Jose)

PRESYO NG KARNE NG BABOY SA MGA PALENGKE MULING SUMIPA SA P400 BAWAT KILO

Posted on: April 16th, 2021 by @peoplesbalita No Comments

MULING sumipa ang presyo ng karne ng baboy sa P400 bawat kilo sa ilang palengke sa Metro Manila.

Ito ay sa mga palengke ng Commonwealth Market sa QC, Mega Q-Mart, Trabajo Market sa Sampaloc, Manila at Acacia Market sa Malabon.

Habang sa Blumentritt Market ay P380 kada kilo ng liempo at P360 sa kasim at pigue.

Ayon naman sa Pork Producers Federation of the Philippines na posible pa itong tumaas pa sa mga susunod na araw.

Ayon naman sa Farmers group na Samahang Industriya ng Agrikultura (SINAG) na dapat hindi aabot ng P400 ang baboy dahil P230 lamang ang farm gate price nito. Malinaw umano na mistulang may nagmamanipula sa presyo ng mga ito upang sumipa ang presyo ng karne ng baboy sa P400/kilo.

Anila dapat maglalaro lamang sa P340 hanggang P350 ang presyo ng karne ng baboy. Tugon naman ng DA sa isyung ito ay pataasin ang importasyon ng karne ng babaoy lalo na sa Metro Manila upnag bumagsak ang presyo nito.

Pangunahing sanhi ng kakulangan ng karne ng baboy sa Luzon ay ang mababang produksyon nito dahil sa African Swine Fever na halos lumipol sa populasyon ng baboy sa Luzon (RONALDO QUINIO)