MAYROONG “binding obligation” ang Pilipinas hinggil sa posibleng pagbili ng COVID-19 vaccine doses sa Sinovac ng China.

Ang pahayag na ito ni Presidential spokesperson Harry Roque ay tugon sa sinabi ni Finance Undersecretary Mark Joven sa Senate inquiry noong nakaraang Biyernes na ang term sheet na tinintahan ng gobyerno ng Pilipinas at Sinovac ay hindi nagpapataw ng kahit na anumang obligasyon para sa bansa para makakuha ng CoronaVac doses.

“Hindi daw done deal ang Sinovac. Well, mali po iyan,” ayon kay Sec. Roque.

Gayunpaman, nilinaw ni Sec. Roque na ang Sinovac ay kailangang mag-secure ng mahalagang regulatory approval bago pa pangasiwan ang bakuna sa Pilipinas.

Ang Sinovac ay nag-apply ng emergency use authorization sa Food and Drug Administration (FDA) noong nakaraang linggo.

“Ito ba po ay hindi kontrata? Hindi po, kontrata na po iyan. Kaya nga lang po, iyong pangalawang obligasyon, at ito po iyong talagang pagbibili, ay naka-subject po sa kundisyon na pinag-agree-han ng mga partido,” ang pahayag ni Sec. Roque.

“Ano po itong isa sa mga kundisyon na ito? Siyempre po, iyong approval ng FDA. But that is already a binding obligation,” dagdag na pahayag nito.

Sinabi naman ni Vaccine czar Carlito Galvez Jr. sa Senate hearing noong Enero 15 na “technically” ang pamahalaan ay indi pa bumibili ng Sinovac vaccine, at ang Pilipinas ay hindi pa naglalabas kahit na isang sentimo para sa produktong Sinovac.

Tinatayang 50,000 doses ng CoronaVac ang darating sa Pilipinas sa susunod na buwan.

Ang bilang ay maaaring madagdagan hanggang sa mai-deliver at makumpleto ang 25 million doses sa Disyembre.

Noong nakaraang Biyernes, inilarawan ni Sec. Roque ang mga kritiko ng Sinovac vaccine deal bilang mga “ignorante” sa gitna ng kinukuwestiyong pagiging epektibo at presyo nito ng Sinovac vaccine.

Sinabi ni Sec. Roque na ang halaga ng Sinovac vaccine ay hindi tataas o sosobra sa P700 per dose.

Aniya pa, nag-alok din ang China ng presyong pang-bff o best friends forever.

Ang bakuna ay kailangan na ibigay ng dalawang doses sa isang tao.  (Daris Jose)

IPINAG-UTOS ni Pangulong Rodrigo Roa Duterte kay vaccine czar Secretary Carlito Galvez Jr. na manatili sa kanyang “game plan” para sa pag- rollout ng coronavirus vaccines sa kabila ng pagdududa ng ilang mambabatas sa presyo at epektibo ng bakuna na bibilhin ng pamahalaan.

“I’m telling now General Galvez: ‘Yung game plan niya, sundin niya. With or without the investigation, proceed and implement what we plan to do,” ayon kay Pangulong Duterte sa kanyang public address, Lunes ng gabi.

“Nevermind about the investigations.  Kasi mas lalong matagalan tayo,” giit ng Pangulo.

Kasalukuyan kasing kapuwa nagsasagawa ang Dalawang Kapulungan ng Kongreso ng imbestigasyon hinggil sa ginagawang pagbili ng pamahalaan ng COVID-19 vaccines

Bukod dito, nag-desisyon ngayong Lunes ang Senado na magtakda ng dagdag na pagdinig sa Biyernes kaugnay sa COVID-19 vaccination program ng gobyerno.

Ito’y matapos magbigay ng privilege speech si Sen. Panfilo Lacson sa plenaryo hinggil sa pangangailangan na mabusisi ang ilang hindi pa umano malinaw na detalye sa pagbili ng mga bakuna kontra COVID-19.

Partikular na gustong usisain ni Lacson ang tila lumalabas na magkakaibang presyo ng Sinovac, na mas mura umanong nabibili sa ibang bansa tulad ng Indonesia at Thailand.

Gusto rin umanong talakayin ni Lacson ang hindi nagtutugmang pahayag ng mga opisyal ng gobyerno hinggil sa presyong alok ng Sinovac sa Pilipinas para sa mga bakuna.

Iminungkahi rin ni Lacson na magkaroon ng executive session para doon pag-usapan ang sinasabing mga detalyeng saklaw ng confidentiality agreement, na hindi maaaring isapubliko.

Nilinaw ni Lacson na wala siyang inaakusahan ng korapsyon pero nararapat lang aniya na busisiin ang mga detalyeng mahalaga sa pagbili ng bakuna, lalo’t pera ng taumbayan ang gagamitin dito.

“The long and short of it is that it was suggested that we proceed to the holding of an executive session as proposed by the majority leader, Migz Zubiri, in order for us to be able to get the responses to our unanswered questions… In sum, [vaccine czar Secretary] Galvez agreed to reveal the prices of the vaccines, among others, under certain conditions,” ani Lacson.

Ayon kay Lacson, tila nagkaroon ng double standard sa application ng confidentiality agreement dahil madali naman nasagot ni Presidential Adviser on Entrepreneurship Joey Concepcion ang presyo ng AstraZeneca vaccines na bibilhin ng pribadong sector samantalang tikom ang bibig ni Galvez pagdating sa Sinovac vaccine.

Pabor naman ang ilang senador sa dagdag na hearing.

Pero hindi umano pabor si Senate Minority Leader Franklin Drilon sa executive session dahil dapat mas matimbang umano ang karapatan ng publiko na malaman ang detalye ng vaccine procurement kaysa sa pagkilala confidentiality agreement na pakikinabangan lang ng vaccine suppliers.

“In my view, public interest is superior and should be higher than then confidentiality disclosure agreement which obviously for the benefit of the supplier,” ani Drilon.

Nagpaalala naman si Sen. Koko Pimental sa mga kapuwa senador na dapat hindi lang mag-focus ang pagdinig sa Sinovac vaccines. Dapat busisiin din umano ang iba pang bakuna.

“The standards that we impose on Sinovac, we should also impose on the other vaccines. For example nobody is questioning why we are interested in ordering 40 million doses from Novavax, eh mayroon bang EUA (emergency use authorization) ang Novavax in any country in the world?” ani Pimentel.

Dahil sa pagdinig, malalaman din kung mayroon bang nagpapatong ng presyo sa Sinovac vaccine, ani Senate President Vicente “Tito” Sotto III.

“Most probably it should be a warning to those who will insist on a higher price sa Sinovac,” ani Sotto.

Idinepensa naman ni Sen. Christopher “Bong” Go na may prosesong pinagdadaanan ang mga negosasyon para sa bakuna, kabilang ang non-disclosure agreements.

Nanawagan si Go sa mga ahensiya ng pamahalaan na tiyaking nagagmit ng tama ang pondo ng gobyerno sa pagbili ng bakuna. (Daris Jose)