2021 January Archive - People's Balita

Archive for January, 2021

Layong i-institutionalize ang kasunduan sa pagitan nng DND at UP, reasonable proposal- Sec. Roque

Posted on: January 26th, 2021 by @peoplesbalita No Comments

ITINUTURING ng Malakanyang na “reasonable proposal” ang paghahain ng batas na naglalayong i-institutionalize ang kasunduan sa pagitan ng Department of National Defense at ng University of the Philippines (UP) na nagbabawal sa presensiya ng mga sundalo at pulis sa nasabing campus.

“We’ve always respected the prerogative of our legislators to legislate national policies. Sa akin po, that seems to be a reasonable proposal but that has to be enacted po into law,” ayon kay Presidential Spokesperson Harry Roque, isang UP alumnus, at dating professor ng UP.

Sa ulat, isang panukalang batas ang inihain sa Senado na layong amyendahan ang republic act 9500 o ang University of the Philippines (UP) charter para maisama na ang mga probisyon sa 1989 deal ng UP at ng Department of National Defense (DND).

Matatandaang sa ilalim ng naturang kasunduan ay hindi maaaring pumasok ang mga pulis at militar sa loob ng UP campus.

Sina Senador Joel Villanueva, Sonny Angara, Sendora Nancy Binay at Grace Poe ang nagsulong ng senate bill 2002.

Ayon kay Villanueva, sa panukalang ito ay nakapaloob ang ilang mekanismo para matiyak na hindi magiging hadlang ang naturang kasunduan sa pagpapatupad ng ating mga batas kabilang na dito ang pagpapaalam sa mga kinauukulan ng UP lalo na kung may lehitimong operasyon ang ating mga mga kapulisan o militar.

Nabatid na miyembro ng UP board of regeants si Villanueva habang sina Angara, Binay at Poe naman ay nag-aral rin sa naturang unibersidad.

Samantala, nag-alok naman si Sec. Roque na pumagitna kina Defense Secretary Delfin Lorenzana at UP president Danilo Concepcion para pag-usapan ang isyu.

Iyon nga lamang, tanging si Lorenzana lamang ang tumanggap ng kanyang alok na pag-usapan ang naturang isyu. (Daris Jose)

Colossians 3:23

Posted on: January 26th, 2021 by @peoplesbalita No Comments

Whatever you do, do from the heart, as for the Lord and not for others.

Eala napasakamay ang unang korona sa professional tennis

Posted on: January 26th, 2021 by @peoplesbalita No Comments

BUMUWELTA sa makupad na umpisa si Alexandra ‘Alex’ Eala upang tagpasin si Yvone Cavalle-Reimers, 5-7, 6-1, 6-2, at sorpresang kopoin ang korona ng International Tennis Federation (ITF) W15 Manacor Tournament sa Spain nitong Linggo ng gabi.

Ang pananalasa ng 15-anyos na Pinay tennis sensation ang nagkaloob sa kanya ng unang professional career title at $15,000 cash prize (P720K).

Bumalikwas ang Globe Ambassador at Rafael Nadal Academy scholar sa second set at pinagpatuloy ang bangis sa decider sa pagkumpletong pagsilat sa 28-anyos na Kastilang karibal.

Mas may edad at matataas din ang ranking na unang apat na mga karibal niyang tinagpas sa torneo. (REC)

McGregor, ‘di na umaasang tuloy ang Pacquiao showdown

Posted on: January 26th, 2021 by @peoplesbalita No Comments

Hindi na umano umaasa pa si MMA superstar Conor McGregor na matutuloy pa ang nilulutong laban sa pagitan nila ni Pinoy ring icon Sen. Manny Pacquiao.

Pahayag ito ni McGregor matapos itong masilat ni Dustin Poirier sa ikalawang round ng bakbakan nila sa UFC 257 na idinaos sa Abu Dhabi kahapon.

Ayon kay McGregor, bagama’t hindi nito isinasara ang pintuan sa nasabing posibilidad, maaaring hindi na raw ito matuloy ngayong taon.

“I wanted to focus on the MMA career but I’m also… Let’s just see what happens. That Manny fight was happening. It was as good as done. [Now] I don’t know,” wika ni McGregor.

Sa ngayon, magpopokus daw muna ang Irish fighter sa pagpapagaling mula sa knee injury na natamo nito sa laban.

“I don’t know. It’s all muscle and deep into the muscle. It’s a dead leg. But it is what it is. Fair play. I should’ve pressed him in the fence and kept pounding on him,” ani McGregor.

“Maybe, I’ll switch up my game when me and Dustin face again. I have to go through the disciplines and make the good decisions.”

Samantala, kung si Paradigm Sports president Audie Attar naman ang tatanungin, dahil sa pagkatalo ni McGregor ay tiyak umanong hindi na papatok ang pinaplantsang sagupaan nila ng Fighting Senator.

Ads January 26, 2021

Posted on: January 26th, 2021 by @peoplesbalita No Comments

Tricycle drivers sa Malabon at Navotas, balik-operasyon

Posted on: January 26th, 2021 by @peoplesbalita No Comments

Balik-operasyon na ang mga tricycle drivers sa lungsod ng Malabon at Navotas matapos pagbawalan noon dahil sa COVID-19 pandemic.

Ito’y matapos inanunsyo ni Malabon Rep. Jaye Lacson-Noel na pinirmahan na ang memorandum of agreement (MOA) sa pagitan nina Navotas Mayor Toby Tiangco at Malabon Mayor Lenlen Oreta na nagpapahintulot sa balik-operasyon ng mga tricycle drivers.

“Para sa ating mga commuters at tricycle drivers mula sa lungsod ng Malabon at Navotas, good news po dahil pirmado na ang MOA sa pagitan ng dalawang lungsod kung saan pinahihintulutan na ang balik-operasyon at pamamasada ng mga tricycle drivers,” ani Congresswoman Lacson-Noel.

Ayon sa kongresista, sadyang naapektuhan ang napakaraming tricycle drivers at commuters na rin mula sa dalawang magkapitbahay na lungsod nang ipagbawal ang pamamasada ng mga ito sa gitna ng Covid-19 pandemic.

Bukod sa mas mapapadali ang pagku-commute ng mga manggagawa mula sa Malabon at Navotas, magbabalik na rin ang kabuhayan ng ating mga tricyle drivers, ayon pa kay Congw. Jaye na hindi tumigil katuwang ang alkalde ng lungsod at ang kanyang lifetime-mate na m’yembro rin ng Kongreso, si An-Waray Party-list Rep. Bem Noel, sa pagbibigay ng ayuda at trabaho sa mga maralitang taga-lungsod.

“Thank you sa ama ng ating lungsod Lenlen Oreta at ama ng Navotas Toby Tiangco! Patunay ito na kasunod ng ating pagkakaisa ay kaginhawaan para sa ating mga nasasakupan!” sabi ni Congw. Jaye.

Sa ilalim ng MOA, mahalagang may permit at sticker ng magkabilang lungsod ang mga pampasadang tricycle units upang maayos silang maka-byahe. (Richard Mesa)

P270-P300 price freeze sa baboy

Posted on: January 26th, 2021 by @peoplesbalita No Comments

Inirerekomenda kay Pangulong Rodrigo Duterte ng Department of Agriculture (DA) ang pagpapatupad ng price freeze sa karne ng baboy sa merkado, kasunod na rin nang pagsirit ng presyo nito dahil sa African swine fever (ASF).

Ayon kay DA Spokesperson at Assistant Secretary Noel Reyes, iaapela ni DA Secretary William Dar kay Pangulong Duterte ang pagpapatupad ng mula P270 hanggang P300 na price freeze.

“’Yun na nga ang inirerekomenda ng DA kay Presidente, tapos na po ‘yung consultation, suporta na lang ng ating stakeholders ang tinitingnan,” ayon kay DA spokesperson Assistant Secretary Noel Reyes, sa panayam sa radyo. “Ang sina-suggest ni Secretary ay P270 to P300 ang price freeze natin sa baboy.”

Sinabi ni Reyes na naglaan na rin ang DA ng inisyal na P400 milyon para sa repopulation ng mga baboy sa mga lugar na nagkaroon ng outbreak ng ASF.

Nabatid na ngayong linggong ito, ang kilo ng baboy ay umaabot ng mula P400 hanggang P420.

Guinto napasakamay ng RoS; Onwubere, Doliguez NP na

Posted on: January 26th, 2021 by @peoplesbalita No Comments

PINAKAWALAN ng Rain or Shine ang dalawang malaki para sa isa lang.

Aprubado na kay Philippine Basketball Association (PBA) Commissioner Wilfrido Marcial ang pakikipagpalitan ng RoS sa NorthPort.

Ibinigay ng Elasto Painters sina Sidney Onwubere at Clint Doliguez sa Batang Pier para mabingwit si Bradwyin Guinto.

Sasama si Guinto sa dalawang pangunahing panggitna ng koponang pintura ni coach Carlos ‘Caloy’ Garcia na sina Beau Michael Vincent Belga at Norberto Brian ‘Norbert’ Torres.

Naisasalpak na si Onwubere sa rotation sa 45th PBA 2020 Philippine Cup sa Angeles, Pampanga bubble, kumakain na rin ng ilang minuto si Doliguez na incoming sophomore sa parating na ika-46 na edisyon ng propesyonal na liga sa Abril 9.

Dagdag pangrelyebo pa ni GP coach Alfredo Lorenzo ‘Pido’ Jarencio kina Christian Standhardinger at Kelly Nabong si Onwubere.(REC)

Kabayanihan ng SAF44 inalala sa paggunita ng Nat’l Day of Remembrance

Posted on: January 26th, 2021 by @peoplesbalita No Comments

Ginugunita kahapon January 25, ang araw ng National Day of Remembrance para sa mga bayaning SAF44, inalala din ng Philippine National Police (PNP) ang kabayanihan ng mga nasawing police commando sa madugong enkwentro laban sa MILF nuong January 25,2015 sa Barangay Tukanalipao,Mamasapo,Maguindanao.

Target ng nasabing operasyon na tinwag na Oplan Exodus ang International Terrorists at bomb maker na si Zulkifli Bin Hir alias Marwan at Basit Usman.

Napatay ng mga SAF troopers ang most wanted international terrorists na si Marwan pero ang kapalit nito ay ang 44 na buhay din ng SAF troopers.

Pinangunahan ni PNP Chief P/Gen. Debold Sinas, DPWH Sec Mark Villar at NCRPO Chief BGen. Vicente Danao ang pag-aalay ng bulaklak sa bantayog ng Gallant 44.

Maliban kay Sinas, nag alay din ng bulaklak sina NCRPO Dir. P/MGen. Vicente Danao Jr, SAF Dir. P/BGen. Bernabe Balba, DPWH Sec. Mark Villar at ang kapatid ng nasawing SAF Commando Cpl. Romeo Cempron na si Richard.

Nagpaabot naman ng kaniyang pasasalamat si Ginang Rocelle Nacino, biyuda ni P/Cpl. Nicky Nacino sa ngalan ng mga naulilang pamilya ng SAF 44 sa patuloy na suporta na ibinibigay ng gobyerno para sa kanila.

Ayon naman kay PNP SAF Director, MGen. Bernabe Balba, ang kabayanihan ng Gallant SAF44 ay mananatili at magsisilbing inspirasyon sa mga future generations.

Ang paggunita sa National Day of Remembrance para sa SAF44 ay batay sa inilabas na Presidential Proclamation ni Pang. Duterte nuong 2017 para i commemorate ang gallantry and bravery ng SAF44.

” Hanggang ngayon pinatutupad at ginagawa pa rin ibig sabihin hindi po nawawala ang tapang at saka yung dedication ng SAF natin yung SAF44 kasi yun yung nagpapakita talaga sila ng tapang nila courage at gallantry in combat, so ito po ang nagpapatunay na yung SAF po ninyo ay laging handang bumuwis ng buhay para sa kalayaan ng bayan natin,” pahayag ni Gen. Sinas.

Militar nag-sorry sa UP alumni na inilistang NPA

Posted on: January 26th, 2021 by @peoplesbalita No Comments

Humingi ng tawad ang isang unit ng Armed Forces of the Philippines (AFP) sa mali-maling impormasyon na inilabas na nagtuturo sa ilang graduates ng Unibersidad ng Pilipinas na diumano’y naging New People’s Army (NPA) member kahit walang katotohanan.

Ika-21 ng Enero, 2021 kasi nang maglabas ang Facebook page na AFP Information Exchange ng listahan diumano ng UP alumni na naaresto at napatay daw bilang NPA.

Nasa 28 katao ang tinukoy ng AFP bilang NPA sa nasabing paskil, kasama na ang ilang opisyal ng gobyerno, abogado, mamamahayag, negosyante at artista.

“We sincerely apologize for those who were inadvertently affected by inconsistencies regarding the List of Students who joined the NPA (Died or Captured) that was posted in the AFP Information Exchange Facebook account,” ayon sa page, Linggo.

“That article has since been immediately taken down or deleted from our social media accounts. The Office of the J7, AFP is already conducting an internal investigation as to how the list got published. Personnel who are responsible will be held to account.”

Ang J7 ay ang code para sa Civil-Military Operations Office.

Inilabas ng AFP Information Exchange ang paumanhin matapos kilalanin ni Defense Secretary Delfin Lorenzana na mali-mali ang listahan, dahilan para tawagin niya itong “unpardonable gaffe.”

Nangyayari ang lahat ng ito ilang araw pagkaraang buwagin ng Department of National Defense (DND) and UP-DND Accord — isang kasunduang nagbabawal sa basta-bastang pagpasok ng AFP at Philippine National Police (PNP) sa UP nang walang pahintulot ng unibersidad.

Kasama sa mga tinukoy na “NPA members” kuno sina dating Department of Health (DOH) undersecretary at PhilHealth president Alex Padilla, Institute for Social Entrepreneurship in Asia president Marie Liza Dacanay, playwright na si Liza Magtoto, business journalist na si Roel Landingin at dating Environment Undersecretary Elmer Mercado — na pare-parehong kumundena sa listahan.

“I find this ‘yung ginawa ng AFP information management center as despicable,” ani Padilla, na dating government peace negotiator, sa media conference ng Right to Know Right Now Coalition.

“I’ve never been with the NPA. I have been with the government for 20 years or more . . . Kaya talagang nakakatawa kung hindi naman nakakalungkot itong listahan ng AFP.”

Nag-iisip nang magkaso ang marami sa mga mali-maling inakusahan sa ngayon, gaya na lang ni Raffy Aquino, miyembro ng Free Legal Assistance Group (FLAG).

“It is unthinkable that despite the millions of taxpayers’ money poured into military intelligence, the AFP is making such baseless accusations, in the process violating the civil liberties and putting at risk the lives of responsible citizens who are actively contributing to nation-building in their chosen professions,” sambit ni Fidel Nemenzo, chancellor ng UP Diliman, sa isang statement.

“We are worried that a military database that is riddled with factual errors may unduly become the basis for overt and covert military action against our students and alumni across four decades or more.”

Binanatan naman ng Bayan Muna party-list ang kasundaluhan sa kanilang ginawa, habang sinasabing hindi sapat ang pagso-sorry sa kapinsalaang naidulot.

“A public apology is good but this red tagging practice of the Duterte administration has to stop and cases should be filed for those responsible for these continued spreading of wrong information and fake news,” ani House Deputy Minority leader at Bayan Muna Rep. Carlos Isagani Zarate, Lunes.

“They are putting the lives, limbs and liberties of those they are falsely naming and they should be taken to account for that.”

Kinastigo naman ni Bayan Muna Rep. Ferdinand Gaite ang nasabing listahan, lalo na’t “truth-tagging” at hindi “red-tagging” ang tawag ng gobyerno sa pag-uugnay ng mga progresibo sa NPA at Communist Party of the Philippines (CPP).

Dagdag pa niya, tila nagiging “oxymoron” na ang pariralang military intelligence dahil sa mga ganitong kamaliang pwedeng magharap sa marami sa panganib.

“Iyan ang gagawin nila kapag hinayaan silang mag-militarisa ng mga paaralan—with impunity silang magtututuro ng kung sinu-sino, lalaganap ang kaliwa’t kanang pangha-harass sa mga guro, mag-aaral, at kawani, at maaaring maulit ang mga pagdukot o arbitraryong pag-aresto sa kampus kagaya noong panahon ng Martial Law,” ani Gaite.

“Hindi pwedeng paikot-ikot tayo sa cycle na yan, ang kailangan ay tuldukan na itong red-tagging nila.” (Daris Jose)