Panauhing pandangal sina Asia’s first grandmaster Eugene Torre at National Chess Federation of the Philippines (NCFP) executive director Atty. Cliburn Orbe sa muling pagsiklab bukas (Thursday) ng Tabloids Organization in Philippine Sports (TOPS) Usapang Sport Forum via Zoom.

Sa kasalukuyan, si Torre ang nagsisilbing head coach ng 12-player Philippine team na sasabak sa unang FIDE Online Chess Olympiad na nakatakda sa July 22 hanggang Aug. 30.

Tatalakayin ng 68-year-old chess legend ang tsansa ng mga Pinoy sa prestihiyosong kompetisyon na inorganisa ng FIDE bilang paraan para labanan ang nakamamatay na coronavirus  pandemic.

Samantala, iuulat naman ni Orbe ang tungkol sa World Chess Day celebrations at programa ng NCFP sa paglinang ng maraming bata at talentadong manlalaro.

Bukod sa dalawa, panauhin din sa 10 a.m. public service sports  program na inisponsoran ng Philippine Sports Commission (PSC) at Philippine Amusement and Gaming Corporation (PAGCOR) si University of the East at Tanduay-sponsored Batangas Team sa MPBL coach Jean Alabanza.

Inaanyayahan ni TOPS President Ed Andaya ang mga opisyal, miyembro at kaibigan sa sports community na lumahok sa forum.

Tikom ang bibig ni Blackwater team owner Dioceldo Sy sa detalye ng kanilang meeting ni Philippine Basketball Association (PBA)  commissioner Willie Marcial.

Tanging sinabi lang ni Sy ay “satisfied” ito matapos humingi ng paumanhin sa kanyang nasabi noong isang Linggo matapos silang  (Blackwater Elite) patawan ng parusa at multa ng PBA dahil sa pag-eensayo.

“It’s beyond me already because I’ve humbled down and apologized to the PBA. That’s just about it,” ani Sy pagkatapos ng meeting.

“Not much explanation. But I can’t disclose anything,” wika nito. “Actually, it’s better that you talk with (PBA) chairman Ricky (Vargas) and vice chair (Bobby) Rosales (of Terra Firma).”

Ayaw ring magsalita ni Marcial sa mga detalye kaugnay sa pag-uusap nila ni Sy, pero sinabi nitong sinabihan siya ni Vargas na sulatan si Sy.

“Sinabi ko sa kanya may letter na pinagawa si chairman (Vargas) sa akin. May mga tanong si chairman sa kanya. Hindi ko pwede i-disclose,” ani Marcial.

Nakipag-meeting si Sy kay Marcial isang araw matapos itong humingi ng paumanhin kay Games and Amusement Board (GAB) chairman Abraham Mitra dahil sa ginawang iligal na team praktis ng koponan.

Tinanggap naman ni Mitra ang paghingi ng sorry ni Sy, pero sinabi ng GAB na pag-aaralan pa nila nang husto ang sitwasyon.

Umaasa pa rin ang kampo ni Sen. Manny Pacquiao na makakalahok pa rin sa kahit isang laban ang 8-division world champion bago matapos ang taong kasalukuyan.

Pero aminado si Sean Gibbons, presidente ng MP Promotions, malabo pa rin sa ngayon na makapagsagawa sila ng laban bunsod ng patuloy na pagtaas ng mga kaso ng coronavirus disease 2019 (COVID-19) sa Estados Unidos.

“You got to remember there are a lot of things that have to happen. And first off all, COVID-19 rapidly needs to slow down,” wika ni Gibbons.

Inamin din ni Gibbons na nananatiling top market ang US para sa isang Pacquiao fight, kahit na naghayag ng interes ang Saudi Arabia na mag-host ng laban ng Fighting Senator bago pa man ang pandemya.

“If they (Saudi Arabia) would come around, that would be good for the senator because he really wouldn’t have to miss that much time like he does when he comes to the U.S.,” anang matchmaker.

Maliban dito, isa rin sa kanilang mga konsiderasyon ang schedule ng senador.

“His time to fight is generally July-January, July-January due to his schedule in the Senate,” ani Gibbons.

Huling nakipagbakbakan si Pacquiao noong nakaraang taon nang magwagi ito sa pamamagitan ng split decision kontra sa dating walang talo na si Keith Thurman.

Nanganganib na matatagalan bago makapaglaro si Sacramento Kings center Marvin Bagley III dahil sa injury.

Nagtamo kasi ito ng injury sa kanang paa noong kasagsagan ng ensayo sa Florida.

Agad na itong sumailalim sa MRI at hinihintay pa ng koponan ang resulta nito.

Ito na ang pangalawang injury ni Bagley dahil noong Disyembre ay nagtamo ng left midfoot sprain sa laban nila ng Phoenix na nagdulot sa hindi niya paglalaro ng 21 laro.

Mayroong average ito ng 14.2 points at 7.5 rebounds sa Kings at naging number 2 overall pick sa 2018 NBA Rookie Draft.

Kilala si dating six division world champion Oscar de la Hoya na hindi umaatras sa hamon, mentalidad na dala pa rin nito hanggang ngayon sa edad na 47.

Nagpahayag si De la Hoya na muling babalik sa boksing upang lumaban at target umano nitong makasagupa ang tigasin nitong alagang si Saul “Canelo” Alvarez.

Hindi ko aatrasan ang pagkakataon na makasagupa sa aking planong pagbabalik sa ring si Alvarez,” ani De la Hoya.
Matatandaang huling lumaban si De la Hoya noong 2008 nang talunin ito ni eight division world champion Manny Pacquiao via technical knockout sa eight round na nagresulta sa kanyang pagreretiro.

Naengganyo umanong bumalik sa ring si De la Hoya matapos makita ang magandang kondisyon ni dating heavyweight champion Mike Tyson na lalabang muli sa isang exhibition fight sa edad na 54.

“Pakiramdam ko kaya  ko pang lumaban matapos mamahinga ng 12 years,” ani De la Hoya.

NAKAILANG sesyon na po ang inyong lingkod sa jog-run na sinimulan ko noong Mayo.

Kahapon ng umaga, naka-30 minutes ako.

May kahirapan ang may nakakabit na face mask kapag nag-i-sprint ka, run o kahit jog lang.

Kaya ang ginagawa ko po kung walang katabi, kasalubong o masasalubong na tao sa tinatahak kong lansangan, binababa ko nang kaunti mask hanggang sa lumabas ang kapirasong butas sa ilong.

Pero binabalik ko agad ang face mask kapag may nakikita na akong makakasalubog na tao, kahit sasakyan pa para masiguradong proteksyon sa coronavirus disease 2019.

Kakambal na dear marathoners, runners ang face mask sa ating training at kapag nagbalik na ang mga road race.

Kahit po mahirap mag-face mask para iwas Coronavrus Disease 2019.

***

Kagaya po ninyo, dinadalangin kong matapos na ang Covid-19 hindi lang sa ating bansa, kundi sa sandaigdigan para mabalik na sa normal ang lahat, kabilang na ang sports events.

Mag-ingat po tayo araw-araw, panatilihin pong malakas ang ating katawan at kalusugan.

***

Kung may itatanong o reaksiyon po kayo, mag-email lang po sa jeffersonogriman@gmail.com.

Hanggang bukas uli mga ka-People’s BALITA. (REC)