2020 July Archive - People's Balita

Archive for July, 2020

MAG-ASAWA na BACKRIDING sa PRIVATELY USED MOTORCYCLE, PINAYAGAN NA

Posted on: July 16th, 2020 by @peoplesbalita No Comments

Pero mga safety experts hindi pabor sa paglagay ng metal barrier sa pagitan ng rider at angkas na pasahero.

Magandang balita na sana para sa mga may family-use motorcycles dahil sa wakas ay pinayagan na ang angkasan ng mag-asawa – kung kasal o hindi ay dapat bang linawin sa guidelines. Pero may dagdag gastos pa dito dahil kailangan daw ng metal barrier sa gitna ng driver at sakay nya, na pinaniniwalaan naman ng mga eksperto na mapanganib. Solusyon daw ang harang sa gitna sa social o physical distancing. Pero ang tanong nga ay kung safe ba. Ang design ng motor ay pinag-aralan ng mga dalubhasang inhinyero at hindi mga politiko tulad ng nagbigay ng suhestiyon na ganito. Sa palagay ng ilan, makakaapekto sa balanse ng rider at pasahero dahil parang nilagyan mo ng sariling manibela ang angkas na pasahero. Kailangan kasi sa pagmomotor, para mapanatili ng driver ang balanse ay nadadala nya ang bigat ng pasahero. Pag may aksidente ay maaring magdulot ng mas malalang sakuna ang metal barrier lalo na kapag natanggal ito at tumusok sa tao. Magastos na, mapanganib pa. Hindi rin kaya ma-monitor ng IATF kung gaano katibay ang installation ng mga metal barrier at maari pang makaapekto sa pag-claim ng insurance kapag may nangyaring aksidente. May mga ibang eksperto na sinasabing sapat na ang naka helmet ang rider at ang angkas nito at additional shield back pack tulad sa gamit sa Indonesia. Maging ang mga motorcycle manufacturers ay duda sa safety ng metal barriers na iminumungkahi. Nauunawaan naman natin na humahanap ang IATF ng mabisang paraan para mapanatili ang social distancing at iwasan ang hawaan. Pero kung ang papayagan lang na magka-angkas ay ang mag-asawa para saan pa ang metal barrier kung sa bahay naman ay magkasiping sila. Sana ay makita ng mga taga IATF ang katuturan ng mga opinyon dito bago ipatupad ang polisiya ng metal barrier. (Atty. Ariel Enrile-Inton)

MM mayors, patuloy na inihihirit ang GCQ

Posted on: July 16th, 2020 by @peoplesbalita No Comments

PATULOY na inihihirit ng mga Metro Manila Mayors na manatili sa ilalim ng General Community Quarantine (GCQ) ang kani-kanilang mga nasasakupan.

Ito ang sinabi ni National Task Force on COVID 19 Chief Implementer Secretary Carlito Galvez base na rin sa kanilang pakikipag- usap sa mga Mayor dito sa NCR.

Base sa inilatag na rekomendasyon ng mga Alkalde sa Kalakhang Maynila, sinabi ni Galvez na binabalanse rin kasi ng mga Local Chief Executives sa kabilang banda ang patungkol sa ekonomiya.

Naiintindihan din naman aniya ito ng national government gayung una na ring nabanggit ng Department of Finance na nasa tipping point na ang ekonomiya at mas mahirap na sitwasyon ang kakaharapin kapag hindi maka- recover ang kalakalan.

Magkagayon man ay inihayag ni Galvez na pag-uusapan pa nila sa IATF ang suhestiyon ng mga punong bayan sa Kamaynilaan na tila kumikilos “as one for all … all for one.”

Blackwater parurusahan ng PBA; iligal na nag-ensayo

Posted on: July 16th, 2020 by @peoplesbalita No Comments

Nabisuhan ni Philippine Basketball Association (PBA) Commissioner Willie Marcial ang management ng Blackwater upang magpaliwanag kaugnay sa sinabi sa interview ng may-ari ng team sa national television na sumabak na sa workout ang Elite noong nakaraang linggo.

Sa sulat na pirmado ni Marcial na may petsang July 14 at naka-address kay team governor Silliman Sy, tinatanong ng liga kung ano ang tunay na nangyari sa umano’y isinagawa nilang iligal na practice session.

Kahit pa binigyan ng Inter-Agency Task Force (IATF) ng go-signal ang PBA na magbalik sa ensayo, sinisilip pa umano ng liga na simulan ang pormal na ensayo sa July 22 kapag sumailalim na ang lahat ng manlalaro at personnel sa swab testing procedure base na rin sa isinumiteng health protocols.

Nakalulungkot umano na agad nang sumabak ang Elite sa ensayo base sa sinabi ng may-ari ng koponan na si Dioceldo Sy sa isang television interview.

Ayon sa interview, sinabi ni Sy na kasama niya sina Phoenix coach Louie Alas at NorthPort team governor Eric Arejola na nagsagawa ng ensayo noong Sabado kungsaan hinati umano ang walong manlalaro sa tig-apat at kada session ay tumatagal ng isang oras kasama ang shootaround at conditioning.

Sa ilalim nang inaprubahang IATF protocols na ibinigay ng liga, tanging apat na manlalaro kasama ng kanilang coach at safety officers ang papayagan sa loob ng training facility.

Kahit umano sinunod ng Elite sa ilang mga protocol, nais pa rin umanong kuhanin ni Marcial ang paliwanag ng koponan sa pagsasagawa nito ng training ng mas maaga kumpara sa ibang teams.

Matatandaang pinarusahan ng liga si Ginebra center Japeth Aguilar dahil sa pagsabak nito sa ensayo kasama ang ilan pang sikat ng manlalaro sa gym sa San Juan City, Metro Manila.

NCR hospitals nasa ‘danger zone’ na

Posted on: July 16th, 2020 by @peoplesbalita No Comments

Inamin ng Department of Health (DOH) na nasa 70-percent na ng isolation at ward beds para sa COVID-19 patients ng mga ospital sa National Capital Region (NCR) ang okupado na ng confirmed cases.

Ayon kay Health Usec. Maria Rosario Vergeire, 73.7-percent ng isolation beds sa Metro Manila ang may COVID-19 patients na naka-admit. Sa ward beds namang nakalaan sa nasabing mga pasyente, 77.4-percent ang okupado.

“This means that the health system is not yet overwhelmed ngunit isa itong trigger point upang mag-signal na kailangan may karampatang kilos na upang makapaghanda tayo kung tumataas man ang demand,” ani Vergeire.

Ang higit sa 70-percent na utilization rate ay katumbas na raw ng level na “danger zone.”

“‘Safe zone’ kung nasa 0 to 30 percent pa lang ng COVID-19-dedicated facilities ang nagagamit. ‘Warning zone’ naman kung nasa 30-70 percent na ang nagagamit at ‘danger zone’ kung 70 to 100 percent na ang nagagamit,” dagdag na paliwanag ng opisyal.

Sa ngayon may 61-percent na ring utilization rate sa ICU beds at 36.3-percent sa mechanical ventilators ng COVID-19 allocated facilities ng rehiyon.

Mula sa 107,508 beds ng 1,312 hospitals sa bansa, 14-percent o 14,945 daw ang nakalaan para sa COVID-19 patients.

Binubuo ito ng 20-percent mula sa public hospitals, at 9-percent galing naman sa private hospitals.

Kahapon, pumalo na sa 57,545 ang kabuuang bilang ng confirmed cases sa Pilipinas at lalo pa itong tumataas bawat araw. (Daris Jose)

Pdu30, ibebenta ang mga ari-arian ng pamahalaan na walang pakinabang

Posted on: July 16th, 2020 by @peoplesbalita No Comments

TALAGANG ibebenta ni Pangulong Rodrigo Roa Duterte ang mga ari-arian ng gobyerno na wala namang pakinabang.

Subalit, nilinaw ni Presidential spokesperson Harry Roque na gagawin ito ng Pangulo kung kinakailangan na ng taumbayan.

“Uulitin ko lang po ang sinabi ng Presidente, talagang ibebenta niya ang lahat kung kinakailangan ng taumbayan,” ayon kay Sec. Roque.

Batid aniya niya na tutol si Finance Secretary Carlos Dominguez III sa pahayag na ito ng Pangulo subalit iyon aniya ang posisyon ng Chief Executive.

“I know that Sec. Dominguez has expressed a different view but as a Spokesperson, i just have to repeat what the President has said. Iyon po ang sinabi ng Presidente, kung kinakailangan ibenta iyong mga ari-arian na iyan, ibebenta para sa taumbayan, doon na lang po iyon,” aniya pa rin.

Nauna rito, umapela si Senador Imee Marcos sa pamahalaan na ibenta na lamang ang mga ari-arian ng gobyerno na wala namang pakinabang upang makalikom ng dagdag na pondo pantugon sa pandemyang coronavirus disease 2019 (COVID-19).

Kulang daw aniya kasi ang P140-bilyong inilaan ng mga economic manager sa ikalawang stimulus package.

Mas mabuti na aniya ang magbenta ng mga ari-arian ng pamahalaan na wala namang pakinabang kaysa mangutang.

Batay sa inihain nitong Senate Bill 1646 na Financial Institutions Strategic Transfer (FIST) act, nais nitong bumuo ng specialized asset management corporation na siyang maglilinis sa mga pagkakautang at hindi mapakinabangang mga ari-arian ng mga lending institutions.

Aniya, makakatulong ang mga fist corporations na dagdagan ang pondo ng gobyerno sa pagtugon sa crisis bunsod ng COVID-19.

Giit pa nito na tila virus ang mga hindi nababayarang utang at iba pang non-performing asset na nakaaapekto sa ekonomiya ng bansa. (Daris Jose)

Pogoy kinilala ng FIBA

Posted on: July 16th, 2020 by @peoplesbalita No Comments

Ikinatuwa ni Gilas Pilipinas player Roger Ray Pogoy na napansin ito sa international arena at nabigyan pa ng titulo bilang most improved players ng FIBA.com.

Ayon sa FIBA, hinirang nila si Pogoy base sa statistic record nito sa FIBA Asia Cup 2017 hanggang 2021 FIBA Asia Cup qualifiers first window noong Pebrero.

Base sa record ng FIBA, sa unang windows ay kumamada ito ng average na 16 points at anim na rebounds sa loob ng 22.8 minutes na paglalaro.

Nagpakita umano ito ng improvement mula sa average na 7.0 points at 3.5 rebounds sa 2017 FIBA Asia Cup.
Sinabi ng FIBA na isa si Pogoy sa itinuturing na malaking tulong sa depensa na kayang magpuntos at mahalaga sa Gilas at maikukumpara sa kapwa Gilas player na si Jayson Castro.

Bukod kay Pogoy, hinirang din most improved players sa Asya sina Muin Bek Hafeez ng India, Hassan Abdullah ng Iraq, Maxim Marchuk ng Kazakhstan, Jordan Ngatai ng New Zealand, Abdelrahman Yehia Abdelhaleem ng Qatar at Abdulwahab Alhamwi ng Syria.

Motorcycle experts, ikinababahala ang prototype design

Posted on: July 13th, 2020 by @peoplesbalita No Comments

Posible umanong makaapekto ang protective shield na nakalagay sa inilabas na prototype design ng Ainter-Angency Task Force (IATF) para sa mga motorsiklong papayagan mag-angkas simula noong Biyernes, July 10.

Ayon sa ilang eksperto sa motorsiklo. lubha raw kasing delikado ang protective shield na ito para sa aerodynamics ng motorsiklo lalo na kapag malakas ang hangin. May tsansa raw kasi na itulak ng hangin ang motor at mararamdaman din umano ng driver na pumapalag ito dahil pipigilan ng protective shield ang maayos na pagdaloy ng hangin.

Nagpahayag naman ng pagtutol ang Motorcycle Philippines Federation sa protective barrier na ilalagay sa gitna ng rider at driver para maiwasan ang lalo pang pagkalat ng COVID-19.

Sinabi ni Director for Administration ngMotorcycle Philippines Federation Atoy Sta. Cruz na posible pa umano itong maging dahilan na maaksidente ang magka-angkas.

Aniya sapat na raw ang pagsusuot ng facemask, faceshield at full face helmet sa kadahalinang mag-asawa naman ang nakasakay sa motorsiklo.

Hiniling din ng grupo kay DILG Sec. Eduardo Ano na obligahin ang lahat ng mag-asawa o live-in partner na kumuha ng ID o certification na magpapatunay na nakatira sila sa iisang bahay upang mapabilis ang gagawing checkpoint. (Daris Jose)

Dickel, mananatiling coach pa rin ng Gilas – SBP

Posted on: July 13th, 2020 by @peoplesbalita No Comments

Mananantili pa ring interim head coach ng Gilas Pilipinas si TNT active consultant Mark Dickel.

Ito ay matapos na pagdedesisyunan pa ng Samahang Basketball ng Pilipinas (SBP) kung sino ang ilalagay nilang permanenteng coach ng national basketball team.

Sinabi ni SBP executive director Sonny Barrios, na mananatili pa rin si Dickel hanggang wala pang mga bagong anunsiyo.

Ang 43-anyos na si Dickel kasi ay siyang namuno sa Gilas ng talunin nila ang Indonesia 100-70 sa unang window ng FIBA Asia Cup 2021 qualifiers noong Pebrero.

Pagtitiyak ni Barrios na maaaring sa katapusan ng taon ay makakapili na ang SBP ng permanenteng itatalaga bilang coach ng Gilas Pilipinas.

ERC, may refund order para sa bill ng ilang Meralco consumers

Posted on: July 13th, 2020 by @peoplesbalita No Comments

Naglabas na ang Energy Regulatory Commission (ERC) ng refund order para ibalik ng Meralco ang sobrang nasingil sa kanilang consumers para sa panahon ng enhanced community quarantine (ECQ).

Kasunod ito ng pagdami ng mga reklamo laban sa napakataas na bayarin ng mga residente ng Metro Manila at mga karatig na lugar.

Ayon kay ERC Chairperson Agnes Devanadera, inoobliga nila ang Meralco na magkaroon ng pagsasa-ayos sa meter reading at magsauli ng mga sumobrang bayad.

Ngayong araw, umaabot na sa 50,000 ang mga nagsumite ng reklamo ukol sa usaping ito.

Maging si Devanadera ay aminadong nagulat nang makita ang kaniyang power bill, dahil sa labis na itinaas nito kumpara sa dati niyang binabayaran.

Ilang tauhan din ng ERC ang umaming naging biktima sila ng sobra-sobrang paniningil ng Meralco. (Ara Romero)

Boxing, horse racing pinayagan na ng IATF

Posted on: July 13th, 2020 by @peoplesbalita No Comments

Pinayagan nang makabalik sa paglalaro ang professional boxers at horse racing, maging ang mga lisensyadong individual sa industriya mula sa Games and Amusements Board (GAB), habang inaasahang darami pa ang sports na posibleng payagan sa mga lugar na pinapatupad ang mas pinagaan na General Community Quarantine.

Ito ang ginawang paglilinaw ng GAB sa mga naunang pahayag ng Inter-Agency Task Force (IATF) kung saan kinatigan nito ang naunang desisyon nina DILG Secretary Eduardo Ano at DOLE chief Silvestre Bello sa pagbibigay ng ‘go-signal’ sa boxing batay sa ipinapatupad na health protocol.

“Aprubado na rin po ang pagbiyahe ng ating mga boxer para makalaban sa abroad. Ipinaliwanag naman namin na tulad ng mga OFW (Overseas Filipino Worker) kabuhayan ang nakataya sa ating mga boxer sa paglaban sa ring lalo na sa abroad,” pahayag ni GAB Chairman Abraham ‘Baham’ Mitra sa ‘Usapang Sports’ ng Tabloids Organization in Philippine Sports (TOPS) via zoom at live streaming ng Sports on Air sa YouTube at Facebook.

“For more than three months, talagang kawawa ang ating mga boksingero. No fight, No pay ang mga ‘yan. Pareho namang ite-test ang magkalabang boxers at papayagan lamang ang laban after lumabas ang resulta ng COVID-19 test,” ayon kay Mitra.

Sa panig ng horse racing, opisyal nang magbabalik ang industriya sa Hulyo 19 sa Manila Turf.

“Actually talagang sakripisyo ang industriya ng karera, patalo itong mangyayari sa Metro Turf dahil hindi pa rin pinapayagan ang mga OTB ( Off-Track Betting) na pinagmumulan nang pondo ng karera. Pero, atleast napayagan na tiyaga lang tayo,” pahayag ni Mitra.

Batay sa health protocol, ipinagbabawal ang Inter-Island boxing promotions at nililimitahan lamang sa 10 ang manonood sakaling ang lugar na pagdarausan ay nasa ilalim ng ECQ.

“I’m calling and pleading with our boxing promoters, matchmakers at organizers. Mga kaibigan natin silang lahat, huwag muna tayong dumayo. Pinayagan na tayo, stay put lang. Kung sa GenSan, mga taga-GenSan lang ang maglalaban, bawal ang mula sa Davao o anomang panig ng bansa,” sambit ni Mitra sa programa na itinataguyod ng Philippine Sports Commission (PSC) at PAGCOR.

Nilinaw naman ni Mitra na nakabinbin na rin ang request ng Mixed Martial Arts, gayundin ng iba pang contact sports para sa kanilang pagbabalik.

“Nagpapasalamat tayo at unti-unti pinapayagan na tayong magbalik sa ‘new normal’. ‘Yung talagang rules before ay ‘No vaccine, No sports’, kaya bantayan natin ito at agad na i-report ‘yung mga abusado para naman hindi maapektuhan ang buong organisasyon,” sambit ni Mitra, patungkol sa sabong na tila nahihirapan sa planong makabalik bunsod ng serye ng mga iligal na tupada na nagaganap sa bansa.

“Actually, ‘yung walong gaffer (mananari) na kabilang sa 49 na nahuli sa illegal na tupada sa Batangas, recently, ay binawian na namin ng lisensya. Konting tiis po sa ating mga kaibigan sa sabong para naman hindi maapektuhan ang buong industriya.

Inaasahang mas maraming sports organization na rin ang mapapayagan dahil sa mas pinalawak na Joint Administrative Order (JAO) na isinumite ng GAB-PSAC at DOH sa IATF Technical Working Group.

“Yung MPBL, PVL at Superliga, SBP parang nagkukumpara bakit daw sila ay hindi isinama sa JAP. Tanging PBA at Football League lang. Ang tanong ko sa kanila, sanctioned ba kayo ng GAB? Nagsumite ba kayo ng request sa amin. Siyembre hindi namin kayo dedepensahan dahil hindi naman kayo under jurisdiction ng ahensya,” pahayag ni Mitra.

Nakatakda ang pagpupulong ngayon ng GAB sa IATF kasama ang iba’t ibang sports organization tulad ng MPBL, PVL, Superliga at collegiate league NCAA at UAAP.