2020 February Archive - People's Balita

Archive for February, 2020

Truck driver na nakapatay sa mag-ina, inaming nakagamit ng droga

Posted on: February 20th, 2020 by @peoplesbalita No Comments

Patay ang isang vendor ng pakwan at ang sanggol niyang anak, habang 12 ang sugatan nang araruhin ng isang truck ang tatlong sasakyan at isang tindahan sa Quirino Highway sa Barangay Sto. Cristo, San Jose Del Monte, Bulacan, kamakalawa.

Ayon sa imbestigasyon ng San Jose Del Monte Police, nawalan umano ng kontrol sa manibela ang drayber ng truck na si Zander Herrere Sena sa pakurba at palusong na bahagi ng kalsada.

Dahilan ito para magdire-diretso ang sasakyan sa mga tindahan sa gilid ng kalsada.

Napuruhan ang namatay na si Michelle Ramos at ang 3 buwan pa lang na anak na nagbabantay lang ng tindahan nang mangyari ang aksidente.

Nahagip din ang bahagi ng bahay ng residenteng si Dang Abaloyan pero galos lang sa paa at kamay ang kanyang tinamo.

Samantala, inamin ng driver ng truck na umararo sa ilang mga kabahayan na nagbunsod sa pagkasawi ng mag-ina sa Bulacan na ito ay gumagamit ng iligal na droga.

Ayon sa driver na si Eliazar Lumawag, na bukod sa nakagamit ito ng droga ay nawalan ng preno ang minamaneho nitong truck na pinagkargahan ng backhoe.

Dahil dito ay iniwasan niya ang jeep sa harapan niya kaya namali ito sa kanyang napasukan sa Barangay Santo Cristo, San Jose del Monte, Bulacan. (Daris Jose)

BuCor officer itinumba sa Muntinlupa

Posted on: February 20th, 2020 by @peoplesbalita No Comments

POSIBLENG may kinalaman sa personal cases ang nangyaring pananambang sa isang suspendido at dating opisyal ng Bureau of Corrections (BuCor) na pinagbabaril sa lungsod ng Muntinlupa City, kahapon, Pebrero 19, Miyerkules ng hapon.

Kaya walang dapat na ika-alarma ang pamahalaan sa insidenteng ito.

“Siguro mga personal cases ‘yun, pag mga ganung tambangan puro personal ‘yun, kung may personal siyang atraso sa isang tao eh talagang tatambangan nga siya, ganun talaga pero hindi naman alarming,” ayon kay Presidential spokesperson Salvador Panelo.

Batay sa ulat ng Muntinlupa City police, tinambangan ng dalawang hindi pa nakikilalang lalaki ang biktimang si Fredric Anthony Santos sa harap ng Southernside Montessori School sa Katihan Street sa Barangay Poblacion dakong 1:50 ng hapon.

“ Susunduin na sana ng biktima ang anak niyang babae sa eskwelahan. Bago dumating sa lugar ng insidente, dalawang hindi pa kilalang lalaki ang bumulaga at pinagbabaril siya nang malapitan,” sabi ng isang witness.

Agad namatay si Santos matapos magtamo ng tama ng bala sa ulo, ayon sa Muntinlupa Rescue Team.

Matatandaang nailagay sa kontrobersiya ang pagpapatupad ng GCTA law, na nag-aawas ng sentensiya sa mga preso, matapos maisiwalat na ibinebenta ito ng ilang opisyal.

Karaniwang iginagawad ang GCTA sa mga inmate na nagpapakita ng magandang asal sa loob ng kulungan, ngunit hindi ito maaaring ibigay sa mga nakagawa ng karumal-dumal na krimen.

Setyembre taong 2019 nang masuspinde si Santos, kasama ng 27 BuCor officials, matapos sabihin ng Office of the Ombudsman na nakakita sila ng inisyal na ebidensya pagdating sa kwestyonableng pagpapalaya sa 1,914 heinous crime convicts sa pamamagitan ng Good Conduct Time Allowance (GCTA) law.

Dati nang umamin si Santos hinggil sa katiwaliang nangyayari sa loob ng Bilibid, ngunit nagtuturuan sila ng noo’y BuCor chief Nicanor Faeldon pagdating sa iligal na release ng mga inmates.

Ikino-connect ang isyu na si Santos ang sinasabing nag-hikayat kay dating Bureau of Corrections (BuCor) chief Nicanor Faeldon na dapat I report ‘yung mga, Chiong case.

“Irrelevant naman ‘yun eh. If you have a personal conflict with any person of a group of persons, yun lang naman ang problema mo,” ani Sec. Panelo.

Hindi naman naniniwala si Sec. Panelo na isa itong setback dahil sa pagnanais na ilabas ang katotohanan ay dumating naman ang pananambang kay Santos.

“No, because people will always reveal certain truths about their agencies/offices. Lalabas at lalabas yan. Di lahat ng tao kasama sa mga conspiracy on corruption,” anito.

Para sa Malakanyang ang insidenteng ito ay “Kung ano ang sabihin ng mga pulis, kung ano ang… syempre imbestigahan muna nila iyun. “

Samantala, mariing kinondena naman ng Malakanyang ang nangyaring pananambang kay Santos.

“We condemn any act of violence, palagi kaming ganyan. As a matter of policy, we condemn any transgressions of law, any violation inflicted on any person, any murder, we condemn that,” ayon kay Sec. Panelo. (Daris Jose)

GMRC, IBALIK

Posted on: February 20th, 2020 by @peoplesbalita No Comments

IBA na talaga ang kabataan ngayon. Ang dating madaling kausap, mahirap nang intindihin. Kung gaano kahirap pangaralan, ganu’n naman kadaling maimpluwensiyahan.

Bagama’t, hindi naman kailangang lahatin, pero meron talagang mga pasaway at nakalimutan na ang kagandahang-asal. Ito ang dahilan kung bakit isinusulong ang pagbabalik ng asignaturang Good Manners and Right Conduct (GMRC) sa elementarya at hayskul — sa pribado o pampublikong eskuwelahan man.

Sa ngayon, aprubado na sa ikatlong pagbasa sa Senado ang nasabing panukala. Sa ilalim ng Comprehensive Values Education Act, ang mga estudyante sa primary level ay obligadong dumalo sa 30-minutong klase kada araw para sa GMRC.

Habang ang mga junior at senior high school naman ay may isang oras na klase sa values education dalawang beses kada linggo.

Kaugnay nito, sana, bigyan din ng pansin ang kakulangan sa mga guidance counselor. Sila ang pinakatamang tao para magbigay-gabay sa mga estudyante. Ang guidance counselor ang bumubuo ng guidance program na ipalalaganap sa buong paaralan kung saan magpapatupad sila ng iba’t ibang guidance services.

Ito ang solusyon sa iba’t ibang suliranin ng mag-aaral mula sa absenteeism, cutting classes, iligal na gawain, mental at emosyunal na kalusugan.

Bagama’t, naniniwala tayong ang kagandahang-asal ay nagsisimula sa bahay, hindi naman lahat ng bahay ay maituturing na tahanan. Hindi lahat ay may mapagmahal at responsableng mga magulang kaya may mga anak na sa ibang lugar at ibang tao hinahanap ang masasabing pamilya.

At ang eskuwelahan, bilang isa sa maituturing na pangalawang tahanan ay may pagkakataon na matulungan at magabayan ang kabataang nalilihis ng landas.

Ang kalahati o isang oras na pagkilala at pakikinig sa kanila ay napakalaking tulong na.

Pagkakasama ni Espenido sa drug list, walang epekto sa anti-drug war – Palasyo

Posted on: February 19th, 2020 by @peoplesbalita No Comments

WALANG epekto sa anti-drug war ng administrasyon ang pagkakasama ni P/Col. Jovie Espenido sa narco-cops list ng PNP.

Matatandaang si Espenido ang isa sa mga pinagkakatiwalaan ni Pangulong Rodrigo Duterte sa kanyang anti-drug war matapos manguna sa mga operasyon laban sa mga sinasabing drug lords at protectors. Ayon kay Presidential Spokesperson Salvador Panelo, alam naman ng mga pulis ang kanilang trabaho at kilala naman nila ang kanilang mga kabarong tunay na sangkot sa iligal na drogal.

Ayon kay Sec. Panelo, hindi malayong pinag-iinitan lamang si Espenido ng mga nasagasaan sa anti-drug war.
Kaya posibleng biktima ng black propaganda si Espenido bagay na hindi kinakagat ni Pangulong Duterte. (Daris Jose)

Amsali, Sanchez, Ynot dagdag pangil ng Beda

Posted on: February 19th, 2020 by @peoplesbalita No Comments

MABANGIS pa rin ang San Beda University Red Lions sa darating na National Collegiate Athletic Association (NCAA) Season 96 men’s basketball tournament dahil may malulupit na bagong tatlong bagitong manlalaro.

Sinigurado na ng SBU na maisasalang sina Rhayyan Amsali, big man Justine Sanchez at ang defensive player Tony Ynot na itinaas na sa senior team mula sa juniors.

Ayon kay team manager Jude Roque, kuntento ang Beda sa naging desisyon ng tatlo dahil sila ang mga kapalit sa mga nawalang key player sa nakaraang taon.

“They will surely add more depth to our team, which as you all know lost key players from last season,” salamysay ni Roque sa pitak na ito.

“They will also add championship experience to our young roster, having won the NCAA Juniors title last year,” panapos niyang pahayag.

Nasa magaan pang preparasyon ang Mendiola-based squad para sa nakatakdang magsimulang NCAA seniors hoops sa darating na Agosto 1.

Pinangunahan nina Amsali, Sanchez at Ynot ang SBU Red Cubs upang talunin sakmalin ang Lyceum of the Philippine University-Cavite sa finals at kopoin ang titulo sa juniors division sa nagdaan taon.

May taas na 6-foot-3, nag average si Amsali ng 16.6 points, 9.0 rebounds, 4.1 rebounds at 1.6 steals para sa San Beda jrs.

Sige abangan natin kung may angas pa ang koponan.

Ads February 19, 2020

Posted on: February 19th, 2020 by @peoplesbalita No Comments

Ex-Taguig Mayoral at Congressional bet, nahaharap sa kaso

Posted on: February 19th, 2020 by @peoplesbalita No Comments

NAGSAMPA ng kasong sedition o panggugulo ang isang grupo sa magkapatid na Arnel at Allan Cerefica, pawang mga talunang kandidato sa pagka-Mayor at Congressman noon 2019 midterm election.

Bukod sa kasong sedition, iba pang mga kasong kriminal kagaya ng inciting to sedition, illegal assemblies, public disorder, at violation of BP No. 880 ang isinampa laban sa magkapatid ng mga miyembro ng Jeepney Operators and Drivers Association (JODA) at Taguig taxpayer sa Taguig City Prosecutor’s Office kaugnay sa serye ng “illegal assemblies and public and tumultuous uprisings” na naganap noong May 14 at 23, 2019.

Ang mga umano’y illegal assembly ay nangyari matapos lumabas ang resulta ng eleksyon kung saan nanguna sina dating Senator Alan Peter Cayetano at Congressman and filmaker Lino Cayetano ng malaking puntos kontra sa Cerafica brothers.

Parehong mga kaso rin ang isinampa laban kay Andre Polo alias Dre Guez Polo, Gloria Polo, Maria Luisa Roja, Oliver Dinco, Atty. Glenn Chong, Theresa Estanislao Reyes, Jheny Perey Orellana, Karen Mercado, Yolly Lacsaron, Daniel Galmarin, Baby Celso, alias Annie Marie, alias Ma. Fatima, alias Florinda at ilan pang mga John at Jane Does.

Sa pagsampa ng kaso, sinabi ng mga complainant na ang magkapatid na Cerafica at ang kanilang grupo ay iligal na pinagbawalan ang Taguig City officials na gampanan ang kanilang mga trabaho nang magkaroon ng iligal na pagtitipon sa mismong kahabaan ng Pedro Cayetano Boulevard, na isang public road, noong Mayo 14. Pawang walang permit ang mga naturang pagtitipon na ikinainis ng mga na-stranded na residente.

Ayon pa sa reklamong isinampa, ang Cerafica brothers ay nagtawag umano ng pagkilos upang ipakita ang galit o “infliction of acts of hate” sa mga public officers, at meron pang mga binitawang mga libelous na salita laban sa gobyerno dahil umano sa dayaan sa 2019 elections.

“The tumultuous nature of the illegal assemblies is readily apparent from the use of loud speakers, blaring of music, honking of horns and loud shouts of respondents John and Jane Does,” ayon sa isang complainant.

“Respondents have committed a series of actual overt acts showing a concerted and systematic criminal design and purpose to perpetrate the crimes charged…,” dagdag pa sa reklamo.

“We understand that where the acts collectively and individually demonstrate the existence of a common design towards the accomplishment of the same unlawful purpose, conspiracy is evident and all the perpetrators will be liable as principals,” saad pa sa kasong isinampa. (Gene Adsuara)

TALAMAK NG DROGA, PUGAD SA PROSTI

Posted on: February 19th, 2020 by @peoplesbalita No Comments

SA bansang may sariling gobyerno at sinusunod na batas, lahat ay pantay-pantay.

Hindi sinusukat ang yaman o posisyon sa lipunan. Higit sa lahat, walang kinikilalang lahi, basta nakatapak sa teritoryo, obligadong sumunod sa batas at kung may nilabag man ay dapat managot.

Ang tanong, ito ba talaga ang nangyayari? ‘Yung mga bawal, bawal ba talaga? Silang mga pasaway, naparurusahan nga ba?

Bukod sa iligal na droga, isa sa mga pangunahin at paulit-ulit na problema ngayon ng bansa ay ang prostitusyon. Nadadalas ang pagkakatuklas sa mga hotel, bar pati SPA na ginagamit bilang sex den — at karamihan sa mga sangkot, ibang lahi, partikular ang mga Chinese.

Bagay na iniuugnay naman sa operasyon ng Philippine Offshore Gaming Operators (POGO) sa bansa dahil sila umano ang sinasabing parukyano ng mga ibinubugaw na sex workers.

Sa isyung ito, nabuking din ang tila espesyal na trato sa mga dayuhan kapalit umano ng pera. Sinasabing hiwalay na ipinoproseso ng Immigration officials sa Ninoy Aquino International Airport (NAIA) ang pagpasok ng mga Chinese — kabilang ang mga POGO worker.

Ito ba ang tamang proseso? Dumaraan ba sa legal ang pagpasok ng mga dayuhan? Hindi maitatangging sa ganitong senaryo nakalulusot ang human trafficking. Isa na sa kinahahantungan ay ang pagdagsa ng mga sex worker at paglaganap ng prostitusyon.

Kailangan nang kumilos ng pamahalan na ang mga kalaban ay nasa loob din ng gobyerno.

Halos wala itong ipinagkaiba sa ilegal na droga, ‘pag may “padulas”, walang kahirap-hirap na nakapapasok at winawasak ang ating bayan.

Tuloy ang imbestigasyon ng Senado sa ABS-CBN

Posted on: February 19th, 2020 by @peoplesbalita No Comments

ITUTULOY pa rin ng Senado ang planong pag-imbestiga sa prangkisa ng ABS-CBN Corporation sa kabila ng paghahain ng gag order motion ng Office of the Solicitor General sa Korte Suprema.

“A motion for a gag order is what it is. Just a motion. The Supreme Court will still have to decide on it under existing laws and all the cases it has decided before recognizing the jurisdiction of its co-equal branch,” sabi ni Senator Grace Poe, chair ng Senate public services committee.

“Whether it will apply the gag order on our hearings is up to the Court to decide but our hearing will push through according to our Constitutional mandate,” dagdag pa nito.

Inihalimbawa ni Poe ang pagbasura ng Korte Suprema sa kahalintulad na ‘motion for a gag order’ sa co-equal branch – ang Executive branch – sa Disbursement Acceleration Program (DAP) cases noong 2013.

Ang tinutukoy nito ay ang desisyon ng Korte Suprema na binasura ang manifestation na inihain ni dating Iloilo Rep. Augusto Syjuco Jr. na humiling na ipahinto sina Pangulong Benigno Aquino III at mga alter-ego nito mula sa pagdepensa ng stimulus program habang nakabinbin pa ang petisyon.

Ginawa ni Poe ang pahayag matapos hilingin ni Solicitor General Jose Calida sa Korte Suprema na mag-isyu ng gag order na pumipigil sa ABS-CBN na pag-usapan ang quo warranto petition na nauna niyang inihain sa korte para ipawalang-bisa ang prangkisa ng nasabing network.

“Tuloy ang pagdinig natin base sa mandatong ibinigay sa atin ng Konstitusyon. Korte Suprema na ang bahalang magpasya sa kanilang mosyon sang-ayon sa umiiral na batas at naunang pagpapasya kung saan kinilala nito ang hurisdiksiyon ng kapantay na sangay ng pamahalaan,” sabi ni Poe.

20 pamilya, nawalan ng tirahan sa sunog sa Taguig

Posted on: February 19th, 2020 by @peoplesbalita No Comments

Aabot sa 20 pamilya ang nawalan ng tirahan sa sunog na tumama sa isang residential area sa Taguig City kahapon, Martes.

Pasado alas-7:30 ng umaga nang sumiklab umano ang sunog sa may Lawton Avenue sa Barangay Fort Bonifacio, kung saan natupok ang 10 bahay at nag-iwan ng P150,000 halaga ng pinsala sa ari-arian, ayon sa Taguig City Fire Station.

Halos isang oras ang inabot bago tuluyang naapula ang apoy.

Nagmula ang sunog sa bahay ng isang George Peling at hinihinalang may kinalaman sa kuryente ang sanhi nito, ayon kay Fire Senior Insp. Demetrio Sablan Jr. ng Taguig City Fire Station.