ISANG retired Sandiganbayan presiding justice at opisyal mula sa Office of the Ombudsman at Securities and Exchange Commission (SEC), kasama sa nakapilang magsisilbing saksi sa pagbubukas ng House prosecution sa kaso ng unexplained wealth laban kay Vice President Sara Z. Duterte sa Setyembre 14.

“We had submitted already our request to subpoena these three personalities for next week. So we will wait for the order para ma-subpoena po sila,” pahayag ni House impeachment prosecutor Bicol Saro Party-list Rep. Terry Ridon sa isang press briefing nitong Huwebes.

Hiniling ng prosekusyon sa Senate impeachment court na ipa-subpoena sina retired Sandiganbayan Presiding Justice Amparo Cabotaje-Tang, Ombudsman Records Division Officer-in-Charge Atty. Karen Batu at SEC Company Registration and Monitoring Department Director Atty. Gerardo del Rosario.

Sinabi ni Ridon na inaasahan na ipapaliwanag ni Cabotaje-Tang ang prinsipyo kaugnay sa public accountability, integrity in public office at mekanismo sa usapin ng undisclosed and unexplained wealth and prohibited business interests.

Si Batu ay inaasahang tetestigo kaugnay sa Statements of Assets, Liabilities and Net Worth ni Duterte na isinumite sa Ombudsman habang si Del Rosario ang siyang maga-authenticate at tutukoy sa records ng kumpanyang may kaugnayan kina Vice President at kanyang asawang si Atty. Manases “Mans” Carpio.

Inaasahan ng prosekusyon na ang presentasyon sa tatlong saksi ay ayon sa nasabing listahan, depende sa magiging aksyon ng impeachment court action sa subpoena requests at final arrangements sa araw ng presentasyon.

Sinabi pa ni Ridon na inihahanda na ng prosekusyon ang mga karagdagang dokumento para sa presentasyon ng ebidensiya ukol sa kasong unexplained wealth.

“So hopefully by Monday, handang-handa na po kami sa lahat po ng mga documentary evidence at paglalahad po ng mga testigo,” ani Ridon.

Nakapaloob sa Article II ang akusasyon ng betrayal of public trust laban kay Duterte ukol sa alegasyon ng umano’y unexplained wealth na hindi tugna sa kanyang lawful income at kabiguang mailagay umano ito sa kanyang assets and liabilities.

Mahigit sa 1,800 financial documents kabilang na ang bank and tax records ang inihahanda ng prosekusyon laban sa mag-asawang Duterte at kanilang kumpanya.

Nanatiling isa sa listahan ng mga saksi ng prosekusyon si dating Sen. Antonio Trillanes IV na inaasahang ipiprisinta sa mga susunod na linggo.

Gayunman, posibleng bawasan ng prosekusyon ang listahan ng mga saksi sa sandaling nadetermina na sapat na ang ebidensiyang naiprisinta.

 (VINA de GUZMAN)

BALAK taasan ng mga mambabatas ang ₱643.95-billion budget ng Department of Public Works and Highways (DPWH) sa susunod na taon upang makatulong sa paglago ng ekonomiya, mas maraming trabaho at bilang suporta sa ibang mga proyekto ng gobyerno.

Ayon kay House Committee on Public Works and Highways Chairperson at Appropriations Vice Chair Surigao del Sur Rep. Romeo Momo Sr. ginawan ng konsiderasyon ng mga mambabatas na taasan ang budget ng DPWH dahil sa paghina ng takbo ng ekonomiya at ang implikasyon nito sa trabaho at sahod ng mga manggagawa.

Sinabi ni Momo na ang pagtaas ng investment sa mga imprastraktura tulad ng mga tulay at farm-to-market roads ay magbibigay buhay sa paglago ng ekonomiya ng bansa.

“Of course, ’yung national highways, bridges ng DPWH, as well as ’yung mga inter-provincial at saka inter-island connectivity projects po that link municipalities and improve the movement of people and goods,” sinabi ni Momo.

Aniya, dapat madagdagan ang pondo ng DPWH, dahil ang ahensiya ang tagapagpatupad ng mga proyekto ng gobyerno.

Dinagdag ng kongresista na dapat bilisan ng gobyerno ang pag-release ng pondo para mga imprastraktura.

“May mga pondo tayong appropriated na in the previous General Appropriations Act na hindi pa nare-release. Kung ma-speed up sana natin ang release nito, and at the same time, ang implementation nito, it’s better po para mapadali ang disbursement na kailangan natin,” sabi ni Momo.

 (VINA de GUZMAN)

POSIBLENG naglabas ng Lookout Bulletin Order o LBO laban sa ilang personalidad na iniuugnay sa umano’y “honey trap” plot laban kay Executive Secretary Ralph Recto.

Ayon kay DOJ Secretary Fredderick Vida, sinusuri na ito ngayon at kasama sa mga iisyuhan ng ILBO sina Batangas Representative Leandro Leviste at dating Negros Oriental Representative Jacinto “Jing” Paras.

Aniya , naipasa sa DOJ ang kahilingan ng National Bureau of Investigation (NBI) at bahagi ito ngayon ng evaluation process.

Nang tanungin kung posible ang pag-isyu ng ILBO, sinabi ni Vida na posible, ngunit kailangan munang pag-aralan ang basehan at mga dokumento.

Si Leviste ay nauna nang napaulat na umalis ng bansa at umano’y nagtungo sa Europa kasama ang kanyang ina na si Senator Loren Legarda. (Gene Adsuara)