NILINAW ng Department of Budget and Management na hindi awtomatikong maituturing ‘budget cut’ kung ang hinihinging pondo ng isang ahensiya ay mas mababa kaysa inaprubahan.

Ito binigyang diin ng DBM kasabay sa nagpapatuloy na pagbusisi ng kongreso sa pambansang pondo para sa susunod na taong 2027.

Nasa halos 12-trilyon piso umano ang pinagsamang budget proposals ng mga ahensya kung saan higit 643-bilyon piso ang nakalaan sa Department of Public Works and Highways sa ilalim ng 2027 National Expenditure Program.

Kabilang sa mga major infrastructure flagship projects ay ang parte ng Pasig-Marikina Channel Improvement Project at iba pa para sa mga lugar sa bansa.

Sa pagtalakay kamakailan ng Senate Committee on Finance, nabanggit ang ilang flood control projects sa Metro Manila na naging epektibo naman sa pagtugon ng problema sa baha.

Dito ibinahagi ni Sen. JV Ejercito ang kumentong naging epektibo ang pagtugon ni Navotas City Rep. Toby Tiangco sa pagbaha sa lungsod kahit na nasa 70% ng Navotas ay nasa below sea level.

Kung saan naipakita aniya ng Navotas City ang kahalagahan ng pangmatagalang pamumuhunan sa imprastruktura para sa flood control.

Kasama sa mga epektibong proyekto ay ang coastal dike, navigational gate at network ng mga pumping station sa lungsod para makontrol ang tubig-baha. ( DARIS JOSE)

IGINIIT ni Senate President Sherwin Gatchalian na walang epekto sa nagpapatuloy na impeachment trial ni Vice President Sara Duterte ang kasong grave threats na isinampa laban sa kanya sa Quezon City RTC, kahit pa may inilabas nang warrant of arrest.

Sa panayam sa radyo, binigyang-diin ni Gatchalian na magkaiba ang regular courts at impeachment court, kaya’t hindi maaaring iugnay ang proseso ng isa sa isa pa.

“Personal opinion ko ito. Walang effect sa akin at sa impeachment dahil iba naman kasi ‘yung sa korte at ‘yung sa impeachment,” aniya.

Nilinaw pa ng Senate President na ang probable cause na nakita ng korte ay hindi nangangahulugang guilty na ang hatol laban kay Duterte.

Kasabay nito, nanawagan si Gatchalian sa mga awtoridad na seryosohin ang mga pahayag ni Duterte hinggil sa mga banta at pangha-harass.

“Dapat kung meron man banta… dapat seryosohin ito,” ani Gatchalian, sabay panawagan sa kapulisan na imbestigahan kung saan nanggagaling ang mga banta.

Giit niya, mahalaga ang kaligtasan ng lahat — mula sa mataas na opisyal ng gobyerno hanggang sa ordinaryong mamamayan.

Nagpiyansa na si Duterte sa Quezon City court matapos lumabas ang warrant of arrest kaugnay ng kasong grave threats. Sa kanyang pahayag, sinabi ng bise presidente na may dokumentado siyang threats and harassment mula pa noong 2023, at iginiit na hindi siya ligtas maging ang kanyang mga anak. (DARIS JOSE)

PAYAPA at walang naitalang gulo ang Manila Police District (MPD) sa unang araw ng 2026 Bar Exam sa University of Sto. Tomas at San Beda University kahapon.

Ayon kay Manila Police District (MPD) Director PBGen. Arnold Santiago, nasa 348 na pulis ang naka-deploy sa testing sites—180 sa UST na ipinoste sa mga gate sa Padre Noval at Lacson Avenue at 168 naman sa San Beda University na may drop-off points sa Concepcion Aguila at J.P. Laurel Sts.

Bago ito, bandang alas-4:30 ng madaling araw nang mag-inspeksyon si Santiago kasama si Manila Mayor Francisco “Isko Moreno” Domagoso upang tiyakin ang inilatag na seguridad at paghahanda sa bar exams.

Sinabi ng alkalde na nakaantabay naman ang lahat ng resources ng pamahalaang lokal kabilang ang Manila City Disaster Risk Reduction and Management Department para sa emergency at medical assistance; Manila Traffic and Parking Bureau para sa pagsasaayos ng trapiko; Department of Engineering and Public Works (DEPW) na namamahala sa pagtatayo ng mga tents, nagkabit ng mga karagdagang ilaw at binawasan ang mga sanga ng mga puno at inayos ang mga drainage.

“I wish the bar examinees, sana pumasa silang lahat. Sa mga magulang naman na nag-aalala sa kani-kanilang tahanan, pumanatag kayo. The entire resources of the City Government and MPD is in place para maging panatag ang Bar Examination ngayon 2026 Everything is in place,” anang mayor. (Gene Adsuara)

(DA) Assistant Secretary at Tagapagsalita Arnel de Mesa ang tunay na sitwasyon ng mga lokal na magsasaka at ang mga pangunahing suliraning kinakaharap ng sektor ng agrikultura sa bansa. Isinagawa ang talakayan upang ilatag ang mga hakbang at tugon ng kagawaran para sa pagtataguyod ng seguridad sa pagkain at pagtiyak ng makatarungang presyo ng mga bilihin para sa mamamayan.

Binigyang-diin ni De Mesa na nakasalalay ang kinabukasan ng sambayanang Pilipino sa bawat butil ng palay at produktong inaani sa bansa. Gayunpaman, kinikilala ng opisyal na nananatiling malaking hamon ang pagtiyak ng sapat, masagana, at abot-kayang pagkain sa bawat hapag-kainan dahil sa epekto ng pabago-bagong panahon, patuloy na pagtaas ng presyo ng mga kagamitang pang-agrikultura, at mga suliranin sa supply chain.

 (SER MORALES Sr.)

ITO ang reaksyon ni Akbayan Partylist Rep. Perci Cendaña sa pahayag ni Vice President Sara Duterte na hindi niya nararamdamang ligtas siya matapos magtungo sa korte matapos pagpapalabas ng warrant of arrest laban sa kanya.

“Yung pamilya mo sanay na mang-EJK ng mahihirap at gamitin ang batas para i-harass ang mga kritiko nyo. Pero pag idinadaan sa due process ang pagpapanagot sa inyo, you “don’t feel safe?” Such an entitled brat!” ani Cendaña.

Nitong Agosto, naghain ang Department of Justice ng tatlong counts ng grave threats laban sa VP kaugnay sa pahayag niya na kumuha umano siya ng indibidwal para patayin sina President Ferdinand “Bongbong” Marcos Jr., First Lady Liza Araneta Marcos, at dating Speaker Martin Romualdez.

Kasunod nito, naghain ang kampo ni Duterte ng motion to quash on the ground of jurisdiction.

Sa kautusan ng QC Regional Trial Court Branch 98, nakitaan ito ng probable cause para paharapin sa trial si Duterte.

Ang piyansa ay itinakda sa P120,000 per count. (VINA de GUZMAN)