Pinay star Alex Eala tuluyan ng nagtapos ang kampanya sa 2026 US Open

NAGTAPOS na ang kampanya ni Pinay tennis star Alex Eala sa 2026 US Open matapos siyang talunin ng American player na si Iva Jovic sa isang mahigpit na laban sa Round 3.

Maganda ang naging simula ng laban para sa dalawang manlalaro, na kapwa nagpakita agresibong mga atake. Matapos ang dikit na palitan at mahahabang rally, unang nakuha ni Jovic ang unang set, 7-5.

Agad namang bumawi si Eala sa ikalawang set, mas naging agresibo ang Pinay star at nakuha ang momentum, dahilan upang kontrolin niya ang laro at kunin ang set, 6-3, para itabla ang laban sa tig-isang set.

Sa deciding set, muling nagpakita ng magandang laro si Eala at nakakuha ng maagang 2-0 na kalamangan, ngunit mabilis na nakabawi si Jovic at naitabla ang laban sa 2-2.

Muling umangat si Eala at nakalamang ng 4-2, ngunit hindi sumuko ang American player, lalong naging dikit ang laban habang kapwa nagpalitan ng malalakas na tira at mahahabang rally ang dalawang manlalaro.

Nanguna si Jovic, 5-4, at nagkaroon ng pagkakataong isara ang laban, ngunit nakipaglaban si Eala at naitabla ito sa 5-5

Sa mga huling laro, naging matatag si Jovic at tuluyang isinara ang deciding set sa 7-5, para makuha ang panalo at makausad sa susunod na round.

Bigo si Eala na makausad sa round of 16 ng torneyo at tuluyan nang nagtapos ang kanyang kampanya sa 2026 US Open.

Bago ang Round 3, matagumpay na nalampasan ni Eala ang kanyang unang dalawang kalaban upang makausad sa torneo. Sa kanyang pagtakbo sa New York, muli niyang ipinakita ang kanyang kakayahan, composure, at fighting spirit laban sa mga nangungunang manlalaro.