ANG confidential funds ay ginagamit para protektahan ang sambayanang Pilipino, hindi para proteksyunan ang isang opisyal.

Ito ang iginiit ni Deputy Speaker Janette Garin ng Iloilo bilang pagtukoy sa testimonya ni Office of the Vice President (OVP) Assistant Secretary and Assistant Chief of Staff Lemuel Ortonio.

Sa impeachment court sa Senado, ipinaliwanag ni Ortonio ang paggamit ng confidential funds para sa protective intelligence operations kaugnay sa security ni Bise Presidente Sara Duterte. 

Ayon kay Garin, ang personal security ni Duterte at hiwalay at may sariling pondo. Aniya, ang confidential funds ay hindi dapat gamitin upang proteksyunan ang isang opisyal.

Sa ilalim ng Under Joint Circular No. 2015-01, ang confidential funds ay maaring gamitin kung may kailangan gastusin upang makakuha ng intelligence information, pananatili ng safe houses, o pambayad sa mga pabuya ng mga impormante.

Ayon kay Garin, dapat may kaakibat na resibo na nagpapakita kung nasaan napunta ang pondo.

“It’s as simple as that. Hindi na ito dapat pinapahaba. Marami nang tanong ang nasagot. Isa na lang ang hindi nasasagot: totoo ba ang pinaggamitan o hindi?” tanong ni Garin.

Kaugnay nito, tinukoy ni Garin ang tila walang kaalaman ni Ortonio at Gina Acosta, dating special disbursing officer (SDO) ni Duterte, kung sino talaga ang may pananagutan sa pondo.

 “Pero ang commonality at ang nakikita natin, hindi pababa, patagilid, pakaliwa o pakanan ang pinupuntahan ng direksyon. Ito ay paakyat sa taas,” sinabi ni Garin. 

“So again, bumabalik tayo, sino ba ’yung merong responsibility, sino ba ’yung nagsabi, sino ba ’yung nag-order na kung sino ’yung magdi-disburse,” dagdag ng kongresista. (VINA de GUZMAN)

KASABAY na rin sa imported na basura na nagpalala sa mga pagbaha at epekto sa kalinisan, isinulong ni Quezon City Rep. PM Vargas ang pagpapatupad ng total ban sa waste imports, mas mabigat na parusa at mandatory arrests sa mga violators.

“Nakita natin sa nakalipas na mga linggo ng Habagat kung paano umapaw ang basura sa ating mga ilog at estero. Mas mahihirapan tayong solusyunan ang problema natin sa waste management kung papayag pa tayong gawing tapunan ng basura ng ibang bansa ang Pilipinas,” ani Vargas.

Sa ilalim ng House Bill No. 6267, o “Total Ban on the Importation of Wastes Act,” idedeklarang iligal ang pagpasok ng lahat ng uri ng foreign waste, processed waste, at waste by-products sa loob ng teritoryo ng Pilipinas.

Binanggit nito ang isang ulat mula sa United Nations Environment Programme na tumutukoy sa Asia bilang major dumping ground para sa mga illegally traded waste, kung saan inihalimbawa nito ang naganap na insidente ng pagpasok sa Pilipinas ng toneladang toxic, household, at electronic garbage mula Canada, South Korea, Japan, at Hong Kong.

“Ang hindi maayos na pagtatapon ng basura ay lalong nagpapalala sa mga pagbaha at kalamidad tuwing may bagyo at habagat. Ayusin natin ang sariling atin. Let us close our doors to foreign wastes,” ani Vargas.

Upang maipatupad ang mas mahigpit na pagsunod, nakapaloob sa HB 6267 ang pagbuo ng 24/7 Environmental Protection Desks sa lahat ng national ports of entry. Ang mga misdeclared o waste cargo ay pagbabawalang i-offload at ipabalik agad sa port of origin na gastos ng shipper.

Bilang parusa, maaaring kumpiskahin ang sasakyang pandagat, permanenteng shipping bans para sa lumabag na foreign exporters, at agad na pagkaka-aresto sa opisyal, crew, at consignees na tumangging sumunod sa port departure orders.

“By establishing a total ban, we send a clear message to the international community that the Philippines is not a dumping ground. Unahin at ayusin muna natin ang kalinisan at kaligtasan ng Pilipinas,” pagtatapos ni Vargas. (VINA de GUZMAN)

SINABI ng Malakanyang na hindi nito huhusgahan at hahayaan na lamang nito ang publiko na humusga kaugnay sa ginawang paghahambing ni Senator-Judge Robin Padilla sa paggamit ng aliases ng bayani noong panahon ng himagsikan at sa paggamit ng aliases sa OVP confidential fund receipts.

“Hindi tayo huhusga at hahayaan natin ang mga kababayan at ang mga senador ang siyang humusga rito,” ang sinabi ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.

Subalit, para aniya bigyan ng kaalaman ang mga kabataan at mga kababayan, sinabi ni Castro na ang pagkakaiba sa paggamit ng mga aliases ng bayani noong panahon ng himagsikan at sa paggamit ng aliases sa OVP confidential fund receipts ay “Siguro ang mga bayani noon ay lumalaban para sa bayan nang walang bayad. Pero iyong mga tumutulong na mga informant, informer sa kasalukuyan ay mukhang hindi kikilos nang walang bayad.”

“At ang mga bayani noon, kahit gumamit ng pseudonym ay alam nating totoong tao. Sa ngayon, ang mga resibong naipakita, hindi natin alam kung totoong tao o sila ay multo or mga ghost beneficiaries,” aniya pa rin.

Kaya nga aniya, para sa kaalaman ng mga kabataan, kung ito ang pagkukumparahin, ang mga bayani noon ay lumalaban para sa bayan, itinatago ang pagkakakilanlan para sa bayan pero iba aniya ngayon, dahil ngayon aniya ay itinatago ang pagkakakilanlan para sa bayad.

At nang hingan si Castro ng mensahe para kay Padilla kaugnay ng kanyang paghahambing sa mga bayani at kasalukuyang isyu sa confidential funds ay sinabi ni Castro na karapatan ng senador na ihayag ang kanyang saloobin at wala aniyang balak ang administrasyon na panghimasukan ito.

“Karapatan po niya, kung ano po ang nasaloobin ni Senator Robin Padilla, hindi po ito panghihimasukan ng administrasyon, hindi po ito panghihimasukan ng Palasyo. Karapatan po niya kung ano ang nais niyang ipahiwatig pero kinakailangan din po nating maipakita kung ano ba ang katotohanan para hindi rin po maligaw ang ating mga kabataan kung ano ba ang talagang naging papel ng ating mga bayani noon – gumagamit ng pseudonym pero hindi para itago ang bayad,” winika ni Castro.

Nauna rito, sa ulat, iginiit ni Padilla ang kahalagahan ng paggamit ng alyas sa mga panahong may banta sa seguridad matapos niyang tanungin ang House prosecution counsel na si Atty. Mae Divinagracia tungkol sa mga bayaning Pilipino na gumamit din ng mga alyas.

Sa ika-19 na araw ng impeachment trial laban kay Vice President Sara Duterte, araw ng Miyerkules, Agosto 26, isa-isang binanggit ni Padilla ang ilang alyas na iniuugnay sa mga personalidad noong panahon ng Katipunan.

“Ito po ang pinakamagandang panahon para maipaalala po sa inyo na ang ating mga bayani ay gumamit ng mga alyas: Dimasalang, Siling Labuyo, Tikbalang, Taga-ilog, Maypag-asa, Buwan, Magdalo, Liyon Kilat, Vibora, Lakambini, Paralitiko, Dimas, Alipato, Liwanag, Balite, at marami pa pong iba,” ani Padilla.

Tinanong niya si Divinagracia kung ano ang kahalagahan ng paggamit ng alyas.

Ipinaliwanag naman ng prosecution counsel na hindi siya maaaring magkomento rito dahil hindi siya tiyak sa mga dahilan ng paggamit ng alyas ng mga nabanggit na personalidad.

Pero aniya, sa ilalim ng Anti-Alias Law, pinahihintulutan ang paggamit ng alyas basta’t nakasaad o naibubunyag ang tunay na pangalan.

“So it’s not completely prohibited provided they also provide the real name,” ani Divinagracia.
(DARIS JOSE)