2026 August 22 Archive - People's Balita

Archive for August 22nd, 2026

Pangulo ng HOA sa Caloocan, todas sa pamamaril, treasurer sugatan

Posted on: August 22nd, 2026 by Francis Paolo Torres No Comments

NASAWI ang 51-anyos na babaeng pangulo ng Home Owners Association (HOA) habang sugatan ang kanyang Treasurer nang pagbabarilin ng hindi pa kilalang salarin sa loob ng kanilang tanggapan sa Caloocan City, Huwebes ng hapon.

Dead-on-the-spot sanhi ng tinamong mga tama ng bala sa iba’t ibang parte ng katawan ang biktimang si alyas “Gina” pangulo ng Brilliant Stone Village HOA at residente sa naturang village sa Bagumbong Dulo, Brgy. 171 habang ginagamot naman sa isang pagamutan sa Quezon City ang 45-anyos na treasurer na si alyas “Cely” sanhi rin ng tama ng bala sa katawan.

Sa ulat ni ni Caloocan police chief P/Col. Joey Goforth kay Northern Police District (NPD) Director P/BGen. Benliner Capili, nasa loob ng kanilang tanggapan sa Brilliant Stone Village ang mga biktima para tumanggap ng buwanang bayad sa lupa nang pumasok ang suspek na nakasuot ng itim na jacket, itim na helmet, at maong na short pants alas-3:30 ng hapon.

Kaagad umanong naglabas ng baril ang suspek at pinagbabaril ang mga biktima bago mabilis na tumakas patungo sa hindi matukoy na direksyon sakay ng walang plakang itim na Yamaha Mio motorcycle na minamaneho ng kanyang kasabwat.

Sa inisyal na ulat ng Caloocan police, bilang pangulo ng HOA ay may mga pagbabanta na natatanggap sa kanyang buhay ang biktima noon pa man na may kaugnayan umano sa away sa lupa.

Noong taong 2020, pinagbabaril ang bahay ng biktima ng hindi nakilalang suspek kaya’t minabuti niyang umuwi muna ng probinsiya at ng inaakalang wala ng banta sa kanyang buhay ay bumalik na muli sa kanyang tirahan.

Nakuha ng pulisya sa crime scene ang limang basyo ng bala, isang depormadong bala, isang tingga, isang bala at dalawang metallic fragment na pawang nagmula sa kalibre .45 pistola habang patuloy ang follow-up operation ng mga tauhan ni Col. Goforth para sa posibleng pagkakilanlan at pagkakaaresto sa mga suspek.

(Richard Mesa)

PILIPINAS AT ICELAND, NILAGDAAN ANG UNANG AIR SERVICES AGREEMENT PARA PALAKASIN ANG AIR CONNECTIVITY

Posted on: August 22nd, 2026 by Francis Paolo Torres No Comments

MAS mapapadali na ang pagbiyahe ng mga pasahero at pagpapadala ng mga kargamento sa pagitan ng Pilipinas at Iceland matapos lagdaan ang Initial Air Services Agreement (ASA) kasunod ng matagumpay na Philippines–Iceland Air Negotiation Talks na dinaos noong August 18–19, 2026 sa Reykjavik, Iceland.

Ang nasabing kasunduan ay nilagdaan nina Assistant Secretary Edgar Badajos ng Department of Foreign Affairs (DFA) ng Pilipinas at ni Sigríður Eysteinsdóttir, Director and Chief negotiator for Air Services Agreements, Ministry for Foreign Affairs ng Iceland.

Ito’y alinsunod sa utos ni Pangulong Ferdinand Marcos Jr., na palawakin ang international partnerships ng Pilipinas para mas mapalakas ang transportation system sa bansa at mapakinabangan ng milyun-milyong Pilipino.

Binigyang diin ni Transportation Secretary Banoy Lopez na mahalaga ang nilagdaang kasunduan upang patatagin ang ugnayan at pagtutulungan ng dalawang bansa.

“This Agreement will serve as the foundation for our future air transportation relationship and will provide our airlines with a framework to explore new opportunities for connectivity between our two countries and, ultimately, between our respective regions. Today, we are not simply concluding our first air negotiations. We are opening a new chapter in Philippine-Iceland relations in the field of civil aviation,” ayon kay Sec. Lopez.

Sa ilalim ng kasunduan, magkakaroon ang Pilipinas at Iceland ng tig-pitong (7) flights kada linggo o isang flight kada araw para sa passenger at cargo flights. Ang mga traffic rights na ito ay magbibigay ng mas malaking flexibility sa mga airline ng dalawang bansa na magtatag at mag-develop ng serbisyong panghimpapawid batay sa demand at commercial viability.

Sa pamamagitan ng kasunduang ito, inaasahang magkakaroon ng mas malawak na oportunidad para sa pagtatatag ng air services na mag-uugnay sa Pilipinas at Iceland, direkta man o sa pamamagitan ng connecting flights, na makatutulong sa pagpapalakas ng tourism, trade, investment, at people-to-people exchanges.

Patuloy na makikipag-ugnayan ang DOTr sa Icelandic counterpart nito at iba pang aviation stakeholders para maisulong ang epektibong implementasyon ng kasunduan at pagpapalawig ng air services sa pagitan ng Pilipinas at Iceland.

“May this agreement serve as the beginning of a long and productive partnership, one that will create opportunities for our airlines, benefit our traveling public, and bring our peoples closer together,” ani Sec. Lopez.

Ang kasunduan ay bahagi ng patuloy na pagsisikap ng Pilipinas na palawakin ang international air connectivity at magbukas ng mga bagong aviation markets, partikular sa Nordic region, para sa kapakinabangan ng mga pasahero, gayundin pagdating sa negosyo, turismo, at ekonomiya ng bansa. (PAUL JOHN REYES)

Nationwide active attack drills sa mga paaralan, inutos ng DepEd

Posted on: August 22nd, 2026 by Francis Paolo Torres No Comments

Inatasan ng Department of Education (DepEd) ang lahat ng public at private elementary at secondary schools sa bansa na magsagawa ng sabayang safety drill para sa active attack incidents sa Agosto 25, alas-9 ng umaga.

Batay sa memorandum na may petsang Agosto 12, inaatasan ang mga paaralan na gamitin ang kanilang localized contingency plans para sa active attack scenarios.

Ayon sa DepEd, may mga designated ceremonial venues sa bawat rehiyon, ngunit mahigpit ding hinihikayat ang lahat ng paaralan na magsagawa ng sariling drills sa nasabing araw o sa isang adjusted schedule.

Ang direktiba ay kasunod ng lumalaking pangamba ng publiko sa kaligtasan ng mga mag-aaral, matapos ang ilang insidente ng karahasan sa loob ng mga eskwelahan.

Tiniyak ng DepEd na patuloy nilang pinalalakas ang kahandaan ng mga paaralan sa pamamagitan ng school contingency planning at emergency response measures.