IPINAG-UTOS ni Northern Police District (NPD) Director P/BGen. Benliner Capili ang imbestigasyon sa naganap na pagnanakaw ng hindi pa kilalang mga armadong kawatan sa mga kable ng Navotas Navigational Gate sa Navotas City.

Mismong si Metropolitan Manila Development Authority (MMDA) General Manager Nicolas Torre III ang nag-post sa kanyang opisyal na Facebook account ng naganap na pagnenok ng mga hindi pa kilalang armadong suspek sa halos 10-metrong grounding cable ng NavGate pumping station.

Nahagip pa sa kuha ng CCTV ang paglalakad ng mga armadong suspek na hindi na nasita ng nakatalagang guwardiya sa pangambang malagay sa panganib ang kanyang buhay.

Ang NavGate na may pumping station sa Navotas-Malabon River malapit sa Barangays Tangos at Tanza na karaniwang tinatawag na North Navotas Pumping Station ang kumokontrol sa umaapaw na tubig mula sa Manila Bay at nagpo-protekta sa mababang lugar sa magkatabing lungsod ng Malabon at Navotas.

Kinondena ni GM Torre ang ginawang pagnanakaw ng mga kawatan na aniya ay maliit na halaga lamang kumpara sa paglalagay sa panganib ng maraming residente sa Lungsod ng Navotas at Malabon.

Hinigpitan na rin ng mga awtoridad ang pagbabantay sa mga pumping stations habang patuloy na tinutugis ng kapulisan ang mga nakatakas na kawatan. (Richard Mesa)

PORMAL nang sinimulan ng Kamara ang pagtalakay sa panukalang ₱7.2-trillion 2027 National Expenditure Program sa pamamagitan ng briefing ng Development Budget Coordination Committee (DBCC).

Ang briefing ay dinaluhan nina Speaker Faustino “Bojie” Dy III, House Committee on Appropriations Chairperson Rep. Mikaela Angela Suansing, Senior Deputy Speaker Ferdinand Hernandez, Majority Leader Ferdinand Alexander “Sandro” Marcos, at iba pang lider ng Kamara.

Sa ginanap na NEP turnover noong nakalipas na linggo, sinabi ni Dy na bubusisiin ng Kamara ang mga budget proposals ng iba’t ibang ahensiya, na tutuon hindi lamang sa funding levels kundi kung papaano ipatutupad ang mga programa at inaasahang resulta sa pagbibihgay serbisyo sa publiko.

“Sa dulo, iisa ang ating sukatan: isang budget na tunay na para sa tao at nararamdaman ng tao,” ani Suansing. (VINA de GUZMAN)

BINIGYANG-DIIN ni Pangulong Ferdinand R. Marcos Jr. ang mahalagang papel ng 302nd Infantry Brigade ng Philippine Army sa pagpapanatili ng kapayapaan at seguridad, gayundin sa pagtugon sa iba’t ibang hamon sa mga komunidad na kanilang nasasakupan.

Kinilala ng Pangulo ang mga pagsisikap ng 302nd Infantry Brigade sa kanilang internal security operations, pakikipag-ugnayan sa mga lokal na pamahalaan at iba pang security partners, gayundin sa humanitarian assistance at disaster response.

Muli namang hinikayat ni Pangulong Marcos ang mga sundalo na patuloy na paigtingin ang kanilang civil-military operations, kakayahan sa pagtugon sa mga hamon sa seguridad, at koordinasyon sa mga ahensya ng pamahalaan at lokal na pamahalaan. 

Siniguro rin ng Chief Executive ang patuloy na suporta ng pamahalaan sa Armed Forces of the Philippines (AFP) upang maisakatuparan ang kanilang misyon para sa kapayapaan, seguridad, at kapakanan ng mga Filipino. ( DARIS JOSE)

ARESTADO ng Tanza Municipal Police Station(MPS) ang labingpitong hinihinalang tulak at nasamsam ang tinatayang P.4 milyon halaga ng shabu at mga baril sa isinagawang police operation sa Tanza, Cavite Linggo ng umaga.

Kasong paglabag sa RA 10591 (Comprehensive Firearms and Ammuniation Regulation Act) ang kinakaharap ng naarestong suspek na si alyas Riel, 49 ng Brgy Molino, Naic, Cavite, alyas Mar, 25 ng Brgy Bagtas, Tanza, Cavite, alyas Nard, 21 ng Bgry Bagtas, Tanza, Cavite, alyas Jandro, 47, at alyas Charile ng Brgy Bagtas, Tanza, Cavite habang kasong paglabag sa RA 9165 (Comprehensive Dangerous Drus Act of 2022) ang kinakaharap nina alyas Rus, 35, alyas Jhon, 27, alyas Ian, 22, alyas Chris, 24, alyas Cial, 20, alyas Lloyd, 17, alyas Ruel, 37, alyas Lei, 30, alyas Nardo, 47, alyas JPee, 40, alyas Mario, 58 at alyas Ben, 42, pawang residente ng Brgy Bagtas, Tanza, Cavite.

Sa ulat, dakong alas-8:30 ng umaga nang magsagawa ng Continuos Police Operation and Recovery of Illegal Drugs ang mga operatiba ng Tanza, Municipal Police Station sa pamumuno ni PLtCol Chester Borlongan, COP sa Pabahay, Brgy Bagtas, Tanza, Cavite na nagresulta sa pagkakaaresto sa mga suspek at pagkakarekober ng 27 sachet ng hinihinalang shabu na may Standard Drug Price na P442,000.00 , tatlong kalibre ng 45 na may 16 rounds na bala, isang kalibre 38 na baril na may 5 rounds na bala.

Ang mga naarestong suspek ay nasa kustodiya ng PFU SOCO habang ang mga nakumpiskang baril at mga sachets ng hinihinalang shabu ay nai-turn over sa Crime Laboratory para sa eksaminasyon at beripikasyon. (Gene Adsuara)