SUPORTADO ng Philippine National Police (PNP) ang panawagan na amyendahan ang Juvenile Justice and Welfare Act at mas ibaba ang edad ng criminal liability sa 12 taong gulang.

Tugon ito ni PNP Information Chief at spokesperson Police Colonel Allen Rae Co sa naging panawagan ni Sen. Robin Padilla na dapat ibaba sa 10 taong gulang ang edad na maaa­ring sampahan ng kaso matapos ang insidente ng pamamaril sa isang paaralan sa Tacloban City.

” The PNP is supporting the lowering the age of criminal responsibility po,” ayon kay Co.

At nang tanungin kung anong edad ang sinusuportahan ng PNP, ang tugon ni Co ay “We are thinking 12 years old po.”

Sa ulat, naniniwala kasi si Padilla na panahon na para amyendahan ang Juvenile Justice and Welfare Act dahil dumarami na ang krimen na kinasasangkutan ng mga kabataan na hindi naman basta-basta puwedeng ikulong dahil sa batas.

Ipinaliwanag ng senador nais niyang ibaba sa 10 ang edad ng criminal liability dahil ito ang sinusunod ng mga bansa sa Europa.

Aniya, sa Europe mismo na sinasabing nandoon ang “human rights” ay 10 taong gulang ang sinusunod na edad para sampahan ng kasong kriminal ang isang nagkasala.

Idinagdag ni Padilla na sunud-sunod na ang mga naitatalang krimen na kinasasangkutan ng mga kabataan kaya panahon na upang aksiyunan ng Kongreso ang kanyang panukala. ( DARIS JOSE)

KAISA si Speaker Faustino “Bojie” G. Dy III sa pakikiramay ng publiko sa mga biktima ng pamamaril sa San Jose National High School sa Tacloban City na ikinasawi ng tatlong estudyante at ikinasugat ng iba pa.

“The House of Representatives joins the nation in mourning the students who lost their lives in this tragic incident. We extend our deepest sympathies to their families and loved ones, and we pray for the recovery of those who were injured,” anang Speaker. “Any act of violence that claims the lives of young people and disrupts the safety of our schools is a matter of grave concern. Schools must remain places of learning, security and opportunity for every Filipino child.”

Sinabi ni Dy na ang trahedya ay nagpapakita ng pangangailangan para sa mga government institutions, eskuwelahan, pamilya at komunidad na magtulungan upang maiwasan na maulit ang ganitong trahedya at mas maprotektahan ang mga bata.

“Ang paaralan ay dapat kanlungan ng kaalaman at pag-asa, hindi pugad ng takot at karahasan. Ito ang lugar kung saan nabubuo ang mga pangarap, hindi kung saan nagwawakas ang mga ito. Kapag may batang nasaktan o nasawi sa loob ng silid-aralan, hindi lamang isang buhay ang nawawala—may bahagi ng kinabukasan ng ating bansa ang nawawala kasama niya,” pahayag nito.

Suportado din ng lider ng kamara ang pagsasagawa ng masusing at walang kinikilingang imbestigasyon sa insidente.

“The House supports efforts to establish the facts, ensure accountability under the law, and determine what measures may be necessary to prevent similar incidents in the future,” ani Dy.

“Hindi sapat na alamin kung sino ang may kasalanan. Kailangan din nating suriin kung anu-anong mga senyales ang hindi natin napansin, at kung paano natin mas mapapalakas ang mga sistemang magpoprotekta sa ating mga kabataan bago pa sila tuluyang maligaw sa landas ng karahasan,” dagdag pa nito.

Nanawagan naman si Dy sa mga kaukulang government agencies, educators, parents, at local communities na palakasin ang mga inisyatibo para sa student welfare, mental health, conflict resolution at early intervention.

“This tragedy should compel all sectors to work together to strengthen school safety, promote the well-being of our youth, and address the conditions that can lead to violence. The House of Representatives stands ready to support policies and programs that advance these goals.” (Vina de Guzman)

PINIRMAHAN ng Pamahalaang Lungsod ng Navotas sa pangunguna ni Mayor John Rey Tiangco noong Lunes ang isang memorandum of agreement na nagbibigay ng scholarship sa 177 Navoteño students at teachers para sa school year 2026-2027, bilang bahagi ng pagdiriwang ng 19th Navotas Cityhood Anniversary. Sa bilang na ito, 23 ang Academic scholars, 144 ang Athletic scholars, at 10 ang Ulirang Pamilyang Mangingisda Scholarship beneficiaries. (Richard Mesa)

ISINUSULONG ni Speaker Faustino “Bojie” G. Dy III na siguruhing mababantayan at mapigilan ang mga political dynasties, maiwasan ang conflicts of interest, at maimpluwensiyahan ng pulitika ang party-list system.

Sa inihaing House Bill (HB) No. 9906, o panukalang New Party-List System Act, nakapaloob sa probisyon na magbabawal sa sinumang indibidwal na konektado sa incumbent members ng kongreso, government contractors, at dating elective officials mula sa pagsisilbi bilang party-list nominees.

Ang panukala ay isa sa Legislative-Executive Development Advisory Council (LEDAC) priority bill at bahagi ng legislative reform measures.

Ang panukala ay inihain ni Speaker kasama ang mga miyembro ng Party-List Coalition Foundation, Inc. (PCFI), sa pangunguna nina Rep. Jose “Bong” Teves Jr. ng TGP Party-list, Rep. Jude Acidre ng Tingog Party-list, Rep. Raymond Democrito Mendoza ng TUCP Party-list, Rep. Terry Ridon ng Bicol Saro Partylist, Rep. Brian Poe of FPJ Panday Bayanihan Party-list, Rep. JC Abalos of 4Ps Party-list, at Minority Leader Marcelino Libanan ng 4Ps Party-list.

“Ang party-list system ay nilikha upang palawakin ang representasyon, hindi upang palawakin ang kapangyarihan ng iilang pamilya,” ani Dy. Kung tunay tayong naninindigan para sa isang mas bukas, mas patas, at mas inklusibong demokrasya, dapat nating tiyakin na ang party-list system ay nananatiling tapat sa orihinal nitong layunin na bigyan ng boses at pagkakataong makilahok sa paggawa ng batas ang mga sektor at komunidad na kulang sa representasyon.”

Sa ilalim ng panukala, ang sinumang indibidwal na may relasyon hanggang second degree of consanguinity o affinity na nakaluklok bilang senador ay diskuwalipikado na manomina o magsilbing party-list representative.

Pinadidiskuwalipika rin ang mga incumbent elective officials, mga indibidwal na nabigyan ng government contracts, concessions, franchises, o public-private partnership agreements sa loob ng limang taon bago ang eleksyon. Mga opisyal at controlling shareholders ng corporations na may government contracts ay pinagbabawalan ding magsilbing nominees.

Nire-require naman sa mga dating elective officials at kandidato na palagpasin ang isang halalan bago maging party-list nominees.

Dagdag pa, na kailangang sertipikahan ng mga party-list organizations na hindi sila direkta o indirectly na binuo ng political dynasties at wala ring kaugnayan sa mga indibidwal na may beneficial interests sa government contracts.

Sinusuportahan ng panukalang New Party-List System Act ang Anti-Political Dynasty Act, na inaprubahan kamakailan ng Kamara sa ikatlong pagdinig.

“Ang tiwala ng taumbayan ay nakasalalay sa paniniwalang ang mga kinatawan ay tunay na nagsisilbi sa kanilang sektor at hindi sa pansariling interes. Ito ang nais nating tiyakin sa panukalang ito.”

(Vina de Guzman)

PARUSAHAN din ang mga nagi-impluwensya na magsinungaling ang mga testigo.

Ito ay ayon sa inihaing panukala ni Akbayan Party-list Rep. Chel Diokno na naglalayong bigyan ng karampatang parusa ang mga taong nagi-impluwensya o nananakot sa isang testigo na magsinungaling sa korte o sa anumang opisyal na pagsisiyasat o pagdinig.

Ayon kay Diokno, ito ay bukod sa perjury, o boluntaryong pagpapahayag ng testigo na magsinungaling o magbigay ng maling pahayag sa korte.

“By expressly defining and penalizing subornation of perjury as a separate crime, the State strengthens its ability to deter witness manipulation, protect the integrity of judicial proceedings, and hold accountable those who seek to corrupt the truth-finding process,” sinabi ni Diokno.

Sa inihaing House Bill No. 9851, nais ni Diokno na parusahan ang sinuman pwersahin o takutin ang testigo na magsinungaling o magbigay ng maling testimonya.

“Any person who procures, coerces, or otherwise induces another to commit any perjury will be punished under the Revised Penal Code as though they themselves had given the false testimony,” paliwanag ni Diokno. 

“The individual who orchestrates, procures, or pressures another to provide false testimony is the principal architect of the deception and poses a direct threat to the administration of justice,” dagdag ng kongresista.

Kung ang offender ay isang public official o employee, ang penalty ay ipapataw sa maximum period na perpetual absolute disqualification sa anumang posisyon sa gobyerno o mga sangay nito.

“When a public officer uses the powers or prestige of public office to induce another to testify falsely, the resulting harm extends beyond a particular case and undermines public trust in government institutions,” paliwanag ni Diokno. 

“Our justice system can only work when people can testify freely and truthfully. By holding accountable those who pressure others to lie, we are able to restore public trust in our institutions and protect every Filipino’s right to fair justice,” dagdag ng kongresista. (Vina de Guzman)

IBINIDA ng Malabueño young filmmakers ang kanilang pagkamalikhain, hilig, at kasanayan sa pagkukuwento sa Ahon Kabataan Film Festival (AKFF), na itinampok ang mga boses, karanasan, at adhikain ng mga kabataan sa lungsod sa pamamagitan ng art of filmmaking.

Ang pagdiriwang, na may temang “1998 to Present: The Vision and Legacy from Municipality to Cityhood and Beyond,” ay inilunsad ng organisasyong Ahon Kabataan bilang bahagi ng kanyang 3rd Anniversary Celebration sa suporta ng lokal na pamahalaan.

Nagsilbi itong plataporma para sa mga naghahangad na kabataang Malabueno filmmakers na magtanghal ng mga orihinal na maikling pelikula na tumatalakay sa paglalakbay ng Malabon mula sa pagiging isang munisipalidad tungo sa isang masiglang lungsod na mayaman sa kultura, pagkakakilanlan, tradisyon, katatagan, gayundin sa mga pag-unlad bilang isang lungsod sa pamamagitan ng Republic Act 9019 o ang Malabon City Charter na inakda ng noo’y congressman, First Gentleman Ricky Sandoval.

Ang AKFF na bahagi ng pagdiriwang ng ika-25 Cityhood Anniversary ng Malabon noong Abril 21, ay nagtampok ng sampung orihinal na short film entries na ginawa ng mga batang Malabueño filmmakers at creative teams.

Pinuri ni Mayor Jeannie Sandoval ang mga kabataang gumagawa ng pelikula para sa kanilang dedikasyon at pagkamalikhain, na binibigyang-diin ang kahalagahan ng pagbibigay kapangyarihan sa mga kabataan na ibahagi ang kanilang mga pananaw at mag-ambag nang makabuluhan sa lipunan.

“Ipinagmamalaki natin ang ating mga kabataang Malabueño na patuloy na nagpapakita ng kanilang talento, pagkamalikhain, at malasakit sa komunidad sa pamamagitan ng pelikula. Ang Ahon Kabataan Film Festival ay patunay na ang kabataan ay may mahalagang boses at kakayahang magbigay-inspirasyon at positibong pagbabago sa ating lungsod,” ani Mayor Jeannie.

Higit pa sa kompetisyon, ang kaganapan ay nagtaguyod ng pagtutulungan, pagkatuto, at pagpapahalaga para sa lumalagong kultura ng pelikula sa mga kabataan ng Malabueño.

Nangako naman si Mayor Jeannie na patuloy na suportahan ang mga programa tulad ng AKFF na nagpapalaki ng pagkamalikhain, nagpapaunlad ng mga kasanayan, at nagbibigay ng mga pagkakataon para sa mga kabataan na maging mahusay sa sining at iba pang larangan. (Richard Mesa)