NIRATIPIKAHAN ng Kamara sa pamamagitan ng viva voce vote ang conference committee report ng bicameral conference committee ng House Bill (HB) 4058 o 2026 General Appropriations Bill (GAB).

Ang hakbang, kasabay ng ratipikasyon ng Senado ay nagbigay daan para sa
pormal na pagsusumite nito sa presidente para rebyuhin at ipasa.

Nakatakdang lagdaan ng pangulo ang panukalang 2026 budget bilang batas sa unang linggo ng Enero 2026.

Para kay Speaker Faustino “Bojie” Dy III, ang pagkakapasa ng GAB ay isa sa pinakaimportanteng tungkulin ng Kamara sa ilalim ng Constitution.

“Isa sa pinaka-mabigat ngunit pinakamahalagang tungkulin (na) ipinagkatiwala sa atin sa Saligang Batas – ang pagpasa ng pambansang budget,” ani Dy.

Nakapaloob sa P6.7 trillion 2026 GAB ang pondo sa edukasyon na katumbas sa 4.1% ng gross domestic product (GDP).

Kabilang sa sector na binigyang prayoritasyon ay ang health at agriculture.

INIHAYAG ni Speaker Faustino “Bojie” Dy III na maglilipat sa paperless system at magpapatupad ng blockchain technology simula 2026.
Sa pamamagitan ng hakbang ay magiging kauna-unahang
legislative body sa Asya ang Philippine Congress na gagamit sa teknolohiya para palakasin ang transparency at public trust.
Ginawa ni Dy ang pahayag sa isang video message sa social media platforms ng Kamara isang araw matapos itong mag-adjourned makaraang ratipikahan ang P6.793-trillion 2026 national budget.

Sinabi ni Dy na ang reporma ay nagpapakita sa posisyon ng kamara na dapat anihin nito ang kumpiyansa ng publiko sa pamahalaan.

“As your Speaker, I have always said that trust in government is built not by words alone, but by actions,” ani Dy.

Sinabi nito na ang transition ay nagsisilbing susi sa mas malawak na hakbang para sa reporma at modernisasyon ng kongreso.

Ang inisyatibo ay isasagawa sa tulong at suporta ng Department of Information and Communications Technology.

“Once the transition is completed, we will be the first legislative body in Asia to adopt this technology,” saad nito.
(Vina de Guzman)

PINANGUNAHAN ni Pangulong Ferdinand R. Marcos Jr., araw ng Martes, ang paggunita ng sambayanang Pilipino sa ika-129 anibersaryo ng kabayanihan at pagiging martir ng pambansang bayani na si Dr. Jose Rizal sa Luneta.
Kasama ng Pangulo ang Unang Ginang Louise Araneta-Marcos at kanilang mga anak, National Historical Commission of the Philippines (NHCP) Chair Regalado Trota Jose Jr., Manila Mayor Francisco “Isko” Domagoso, Armed Forces Vice Chief of Staff Lt. General Jimmy Larida, Supreme Commander ng Knights of Rizal na si Raymundo del Rosario, at iba pang mga opisyal at kawani mula sa pambansang pamahalaan, lokal na pamahalaan, unipormadong serbisyo, mga organisasyong sibiko, at mga kasapi ng Diplomatic Corps.
Sa isinagawang flag-raising at wreath-laying rites sa Monumento ni Rizal, sabay-sabay ding nagdaos ng mga programa sa Rizal Shrine sa Lungsod ng Calamba, Laguna na siyang lugar ng kapanganakan ni Rizal; sa Rizal Shrine sa Lungsod ng Dapitan, Zamboanga del Norte; at sa iba’t ibang monumento ni Rizal sa buong bansa.
Ayon sa NHCP, ang paggunita ngayong taon na may temang “RIZAL: Sa Pagbangon ng mga Mamamayan, Aral at Diwa Mo ang Tunay na Gabay,” ay nagbabalik-tanaw sa mga walang kamatayang aral mula sa buhay at mga akda ng pambansang bayani sa pagharap ng bansa at mamamayan sa mga bagong hamon.
Bilang tanda ng pagluluksa, nakataas sa kalahating-mast ang mga watawat sa buong bansa, bilang pag-alala sa isa sa pinakatanyag at pinakamahalagang bayani ng lahing Malay.
Nang barilin si Rizal noong araw na iyon ng Disyembre 1896, tuluyan nang sumiklab ang rebolusyon, na nagpasimula ng sunod-sunod na pangyayari na humantong sa kalayaan ng bansa mula sa 333 taong pananakop ng mga Kastila, ayon sa NHCP. ( Daris Jose)

HINIMOK ni Pangulong Ferdinand R. Marcos Jr., araw ng Martes ang mga Pilipino na humugot ng inspirasyon mula sa pambansang bayani na si Dr. Jose Rizal sa pamamagitan ng pagpapanatili ng pagmamahal sa bayan, katotohanan, at responsableng pagkamamamayan, habang ginugunita ng bansa ang Araw ni Rizal.

“Nawa’y lalong patibayin ng ating pagdiriwang ang ating paninindigan na isabuhay ang mga halagang kanyang ipinakita: pagmamahal sa bayan, paggalang sa katotohanan, walang pagod na paghahangad ng makatarungang reporma, at ang tapang na magsalita at kumilos para sa tama,” ang bahagi ng mensahe ng Pangulo.

“Nawa’y magsilbing inspirasyon ang paggunita na ito sa bawat Pilipino—lalo na sa kabataan na lubos na minahal ni Rizal—na ipares ang pagmamahal sa bayan sa responsableng pagkamamamayan upang mas makapaglingkod tayo sa bansa,” aniya pa rin.

Ayon kay Pangulong Marcos, sa pamamagitan ng kanyang mga sulatin at sakripisyo, ginising ni Rizal ang kamalayan ng mamamayan at ipinakita na ang mga Pilipino ay karapat-dapat sa dignidad, kalayaan, at kapangyarihang magtakda ng sariling kinabukasan.

“Today, as Filipinos demand integrity and accountability from its leaders, we look up to his life to provide us with guidance and strength,” sinabi ng Punong Ehekutibo.

“Sa kasalukuyan, habang hinihingi ng mga Pilipino ang integridad at pananagutan mula sa kanilang mga pinuno, tinitingala natin ang kanyang buhay upang magsilbing gabay at lakas,” aniya pa rin.

Dagdag pa ng Pangulo, sa lahat ng larangan ng buhay, pampubliko man o pribado, nawa’y gabayan ng mga prinsipyo ni Rizal ang ating pamumuhay at pagtatrabaho para sa bayan upang sa anumang ating ginagawa, palaging piliin ang malasakit kaysa sa kawalang-pakialam at ang bayan kaysa sa pansariling interes.

“Bumuo tayo ng isang bansa kung saan ang katarungang ipinaglaban niya ay maisakatuparan sa pang-araw-araw na buhay ng lahat ng Pilipino,” ang sinabi ni Pangulong Marcos.

“Sapagkat sa bawat gawa ng integridad at bawat paninindigan para sa katotohanan, binubuhay natin ang mga pangarap ni Dr. Rizal at inilalapit ang ating sama-samang pangitain ng isang Bagong Pilipinas sa realidad,” dagdag na wika nito. ( Daris Jose)

SINABI ni Executive Secretary Ralph Recto na nagsasagawa na ang Executive Branch ng masusing pagsusuri at pagrerepaso sa ratipikadong 2026 General Appropriations Act (GAA) upang masiguro na ang public funds ay maaayos na nakalaan at tumutugon sa pangangailangan ng mga mamamayang Filipino.
Sa isang kalatas, sinabi ni Recto na natanggap na ng Malakanyang ang ratified 2026 GAA , araw ng Lunes, Dec. 29 at kagyat na sinimulan ang “a thorough review to ensure its integrity and effective execution.”
Ani Recto, masusi at maingat na sinusuri at nirerepaso ni Pangulong Marcos at kanyang economic team ang budget upang matukoy ang anumang pagbabago mula sa orihinal na isinumiteng National Expenditure Program (NEP).
Ani Recto, ang pagsusuri, inaasahang tatagal ng isang linggo, naglalayon na tiyakin na ang spending bill ay makatutugon sa legal requirements at public needs.
“We will ensure that the 2026 GAA will satisfy not only the legal and technical requirements but, more importantly, the needs of the Filipino people,” aniya pa rin.
Siniguro pa rin ni Recto sa publiko na ang maikling panahon sa ilalim ng reenacted budget ay hindi makaaapekto sa operasyon ng gobyerno.
“The public is assured that a brief period under a reenacted budget will not disrupt government operations,” ang sinabi ni Recto, idagdag pa na ang review process ay naglalayong pangalagaan ang fiscal discipline at tiyakin na ang taxpayers’ money ay “spent wisely” at mata-translate sa konkretong benepisyo para sa mga Filipino. (Daris Jose)