PBBM sa mga Pinoy ngayong Rizal Day: Piliin ang bansa kaysa sa pansariling interest

NANAWAGAN si Pangulong Ferdinand R. Marcos Jr. sa mga Filipino na mas piliin ang interest ng bayan at pagiging maging mahabagin kaysa sa pansariling kapakinabangan, isang pamana ng pambansang bayani na si Dr. Jose Rizal sa gitna ng muling pampublikong panawagan para sa integridad at pananagutan sa gobyerno.
Sa kanyang Rizal Day message, araw ng Martes, sinabi ng Pangulo na ang buhay ni Rizal at pagiging martir ay patuloy na nagsisilbi bilang isang moral na gabay para sa mga Filipino habang ang bansa ay nahaharap sa iba’t ibang usapin na sumusubok sa tiwala ng publiko kabilang na ang korapsyon at maling paggamit ng public funds.
“Today, as Filipinos demand integrity and accountability from its leaders, we look up to his life to provide us with guidance and strength,” ayon sa Pangulo.
Binigyang diin ng Chief Executive na ang prinsipyo ni Rizal ay dapat na maging gabay ng mga Filipino sa kanilang pampubliko at pribadong buhay, hinikayat ang mga ito na piliin ang ‘common good’ kaysa sa ‘personal o vested interests.’
“Across all spheres in life, both public and private, may we allow Rizal’s principles to guide the way we live and work for our nation so that in whatever we do, we always choose compassion over indifference and country over personal interests,” ang sinabi pa rin ng Pangulo.
Winika pa ng Pangulo na ang kahalagahan at kasaysayan ni Rizal ay mahalaga habang isinusulong ng gobyerno ang pananagutan partikular na sa mga sektor na direktang nakaaapekto sa kapakanan ng publiko gaya ng imprastraktura at disaster mitigation.
“Let our celebration deepen our resolve to live by the values he embodied: love of country, respect for truth, a tireless pursuit of just reform, and the courage to speak and act for what is right,”ayon sa Pangulo.
Idinagdag pa nito na ang pagdakila kay Rizal ay nangangahulugan na pagtiyak na ang katarungan ay mararamdaman sa pang-araw-araw na buhay lalo na ng mga ordinaryong mamamayan.
“Let us build a nation where the justice he fought for is realized in the everyday lives of all Filipinos,” ani Pangulong Marcos.
Samantala, hangad naman ng Pangulo sa lahat ng mga Filipino ay isang makabuluhang Rizal Day o Araw ni Rizal at nanawagan sa mga kabataan na bitbitin pasulong ang mga mithiin ni Rizal sa pamamagitan ng pagiging isang responsableng mamamayan.
( Daris Jose)