PORMAL nang binuo ng Kamara ang Impeachment Secretariat upang siyang maglalaan ng technical at administrative support sa public prosecutors na siyang hahawak sa impeachment trial ni Vice President Sara Duterte, na nakapaloob sa Memorandum Order No. 19-1006 (SG) na inisyu ni House Secretary General Reginald Velasco.

“The House Secretariat plays a vital role in ensuring the orderly conduct of legislative proceedings, including impeachment trials. This directive ensures that the prosecution team has access to essential logistical, research, and documentation support to facilitate a smooth and efficient trial process,” ani Velasco.

Ang Impeachment Secretariat ay bubuuin ng mga personnel mula sa iba’t ibang opisina ng Kongreso, kabilang na ang Office of the Secretary General, Office of the Sergeant-at-Arms, Legislative Operations Department, Legal Affairs Department, at iba pang units.

Bahagi ng kanilang tungkulin ay ang pagbibigay ng plenary support, legal research, records management, stenographic transcription, information technology, security, at administrative coordination.

“This is a routine function aligned with our constitutional duty. The House Secretariat remains neutral and professional in fulfilling its mandate,” dagdag ni Velasco.

Upang masiguro ang accountability, ang lahat ng personnel na nakatalaga sa senado ay magtatala ng kanilang attendance sa pamamagitan ng designated HousePass monitoring system, at ang kanilang schedules ay pangangasiwaan ng kani-kanilang kaukulang opisina.

“As the impeachment process moves forward, the Impeachment Secretariat will continue to provide the necessary support to uphold the integrity of the proceedings,” pahayag ni Velasco. (Vina de Guzman)

INARESTO ng mga tauhan ng National Bureau of Investigation (NBI) sa Muntinlupa City ang isang Korean national na nahaharap sa kaso  sa kanilang bansa .

Ayon sa NBI, nahaharap ang banyaga  sa mga kaso dahil sa umano’y paglabag sa mga batas ng Korea, katulad ng Korean National Sports Promotion Act, Criminal Act, at Act on the Regulation of Punishment for Concealment of Criminal Proceeds.

Batay sa provisional arrest warrant na inilabas ng Manila Regional Trial Court (RTC) Branch 173, sinabi ng NBI na pumunta ang mga ahente nito sa Bureau of Immigration Warden Facility sa Taguig City kasunod ng pagkakaaresto sa dayuhan.

Sinabi ng NBI na ang dayuhan ay dinala sa NBI-International Operations Division para sa standard booking procedures.

Kalaunan ay inilipat siya sa NBI Detention Center sa Muntinlupa City. (Gene Adsuara)

MAAGA pa para pag-usapan kung sino ipapalit kay Vice President Sara Duterte kung sakaling tuluyan siyang matanggal sa puwesto sa pamamagitan ng impeachment.

Ayon kay House Assistant Majority Leader Jil Bongalon ng Ako Bicol Party-list at miyembro ng House prosecution panel, hindi napag-usapan ng mga mambabatas na sumuporta sa impeachment ang usapin ukol sa succession.

Iginiit nito na mas pinagtuunan ng pansin ng mga mambabatas ang impeachment trial sa halip na anumang potensiyal na political gains.

“I guess for me that is a premature issue that has to be tackled kasi wala pa nga tayo dun sa impeachment trial. So siguro we’ll cross the bridge when we get there once we are able to prosecute and secure a conviction of the Vice President,” ani Bongalon.

Aniya, wala sa naging talakayan nila na nasambit ang isyu kung sino ang ipapalit sa vp kung sakaling ma-convict ito sa impeachment case.

“And then sa pag-iikot din namin sa pakikipagkwentuhan sa mga kasamahan, wala nag-signify. No one is volunteering himself or herself to be the successor or to become the Vice President,” dagdag niya.

Ang pahayag na ito ni Bongalon ay bilang reaksyon sa sinabi ni Senate President Francis “Chiz” Escudero na tatanggihan niya ang posisyon ng vp kung sakaling ialok sa kanya ang posisyon kapag napatalsik si Duterte.

Inamon din ni Escudero ang mga miyembro ng House of Representatives na sumuporta sa na gawin din ang ganitong commitment.

Iginiit naman ng Kongresista na sa ilalim ng konstitusyon, nasa pangulo ang prerogative na mag-nominate ng bagong Vice President, na aaprubahan naman ng dalawang kapulungan ng kongreso, a magkahiwalay na botohan.

Una nang ini-impeach ng kamara si Duterte dahil sa iba’t ibang akusasyon kabilang na ang umano’y misuse of confidential funds at pagbabanta sa ilang mataas na opisyal kabilang na kay Presidente Bongbong Marcos.

(Vina de Guzman)

 DALAWANG Russian national ang narekober ng Coast Guard Batangas na namatay sa kanilang diving session malapit sa Verde Island, Batangas City noong Huwebes.

Ayon sa inisyal na ulat, isa sa biktima ang agad na dinala sa St.Patrick Hospital sa Batangas City ngunit idineklarang dead on arrival.

Ang isa pang dayuhang biktima ay huling natagpuan na wala nang kanang braso.

Hinihinalang inatake ng pating ang mga biktimang diver na nagresulta ng kanilang pagkamatay.

Wala pang inilalabas na karagdagang impormasyon at detalye ang Philippine Coast Guard (PCG) hinggil dito. (Gene Adsuara)