2025 March 03 Archive - People's Balita

Archive for March 3rd, 2025

Stephen Curry, muling gumawa ng record matapos magbuhos 56 pts at 12 3-pointers sa panalo ng GSW kontra Magic

Posted on: March 3rd, 2025 by Peoples Balita No Comments

MULING gumawa ng record si NBA Superstar Stephen Curry sa panalo ng Golden State Warriors laban sa Orlando Magic, 121 – 115.

Nagawa ni Steph na magbuhos ng 56 points sa panalo ng GS at naipasok ang 12 3-pointers mula sa labingsiyam (19) na kaniyang pinakawalan sa kabuuan ng laban. Ito na ang ikatlong pagkakataon na nagawa ito ni Curry sa kaniyang karera.

Maliban sa impresibong tres, naipasok din ni Curry ang lahat ng 12 free throws na iginawad sa kaniya.

Batay sa record ng NBA, ito na ang ika-45 laro sa karera ni Curry na nakagawa siya ng siyam na 3-pointers o higit pa. Ang naturang record ang pinakamataas sa buong liga. Sumunod sa kaniya ang shooter na si Damian Lillard na mayroon lamang 14 games.

Ayon kay Curry, nagawa niya ang naturang performance dahil na rin sa tiwala sa kaniya ng mga teammate. Marami sa kanila aniya ang kampanteng ibigay sa kaniya ang bola upang siya ang magbuslo nito. Sumabay lamang umano siya sa kaniyang mga kapwa-Warriors hanggang sa tuluyang kumamada ng 56 points

Samantala, sa naging laban ng dalawang team ay nagawa ni Curry na buhatin ang GS sa halos kabuuan ng laban. Sa 3rd quarter, pinangunahan niya ang comeback effort ng koponan mula sa 15-deficit at na-outscore ang lahat ng Magic players.

Nagbuhos kasi si Curry ng 22 points sa naturang quarter habang 21 points lamang ang naisagot ng lahat na ng players ng Orlando. Sa kabuuan ng 3rd quarter, nagbuhos ang GS ng 40 points at ibinulsa pa ang 4-point lead.

Kinalaunan, napanatili na ng Warriors ang lead at tuluyang naipanalo, 121 – 115.

Sa panalo ng GS, nag-ambag si Draymond Green ng 12 points at sampung rebound habang 18 points naman ang ipinoste ng sentrong si Quinten Post.

Nasayang naman ang 40 points ni Magic star Paolo Banchero sa pagkatalo ng Orlando.

Alex Eala bigong makausad sa torneo sa Slovakia

Posted on: March 3rd, 2025 by Peoples Balita No Comments

NATAPOS na ang kampanya ni Pinay tennis star Alex Eala sa ITF 1st Empire Women’s Indoor 2025 na ginanap sa Trnava, Slovakia.

Tinalo siya sa ikalawang round ni Celine Naef ng Switzerland sa score na 4-6, 6-2, 6-3.

Naging pamilyar na sa isa’t-isa ang dalawa dahil nagkaharap na sila sa 2023 WTA Canberra Challenger qualifying round.

Sa unang set ay nakuha ni Eala ang panalo subalit pagpasok ng ikalawang round at ikatlong round ay mas pinalakas ng Swiss tennis player ang kanilang serve at hindi na nakabawi pa si Eala.

Ito na ang pangatlong pagkakataon na pagkatalo ng 19-anyos na Pinay tennis star ngayon 2025.

90% ng mga Pinoy iboboto ang mga kandidatong may adbokasiya para sa food security, healthcare

Posted on: March 3rd, 2025 by Peoples Balita No Comments

TINATAYANG 90% ng mga Filipino ang nagpahayag ng kanilang suporta para sa mga kandidatong magiging tagapagtaguyod o may adbokasiya para sa food security at makapagpapalakas sa health care system.

Ito ang lumabas sa pinakabagong survey ng Social Weather Stations (SWS).

Makikita rin sa SWS survey, isinagawa mula Pebrero 15 hanggang 19 at kinomisyon ng Stratbase Group, na 89% ang boboto para sa mga taong itutulak na itaas ang job opportunities at patas na access sa edukasyon.

May 88% ng mga respondent ang boboto para sa kanilang mga ‘manok’ na paninindigan ang karapatan at kapakanan ng mga Overseas Filipino Workers (OFWs).

Sa kabilang dako, ang iba pang adbokasiya at kani-kanilang porsiyento sa SWS survey results ay:

*bawasan ang kahirapan at kagutuman ng mga Filipino-— 83%

*kontrolin ang presyo ng mga pangunahing bilihin at serbisyo — 81%

tugunan ang epekto ng climate change at palakasin ang disaster preparedness — 79%

*ipagtanggol ang national security at soberanya sa West Philippine Sea — 77%

*labanan ang ilegal na droga — 77%

*mapagtagumpayan ang energy security at paggamit ng renewable energy — 75%

*paglaban sa krimen na bumibiktima sa ordinaryong mamamayan gaya ng pagpatay, holdup, mga pagnanakaw, pisikal na karahasan at iba pa— 72%

*pagpuksa sa graft and corruption sa gobyerno — 70%

pagsasabatas ng batas laban sa political dynasties — 63%

*patas na impeachment trial ni Vice President Sara Duterte sa Senado — 53%

Samantala, gumamit ang SWS survey ng face-to-face interviews na may 1,800 registered voters sa buong bansa na may edad na 18 taong gulang at pataas.

Sa nasabing bilang, 300 ang sa Metro Manila, 900 sa Balance Luzon (mga lugar sa Luzon sa labas ng Metro Manila), 300 sa Visayas, at 300 sa Mindanao.

Ang sampling error margins ay ±2.31% para sa national percentages, ±3.27% para sa Balance Luzon, at ±5.66% each para sa Metro Manila, Visayas, at Mindanao.

Nakatakda ang 2025 midterm polls sa May 12. (Daris Jose)

PBBM sa mga botante, pumili ng kandidato na patuloy na magtatrabaho para sa Pinas

Posted on: March 3rd, 2025 by Peoples Balita No Comments

NANAWAGAN si Pangulong Ferdinand Marcos Jr. sa mga botante na pumili ng kandidato na ipagpapatuloy ang trabaho at serbisyo para sa bansa.

“Magkaisa po tayo at mamili po tayo ng alam natin na tuloy-tuloy magtratrabaho,” ang sinabi ni Pangulong Marcos sa kanyang naging talumpati sa campaign rally ng Alyansa Para Sa Bagong Pilipinas.

Sinabi ng Pangulo na ang mga kandidato na kanyang sinusuportahan sa nalalapit na halalan ay batid at may kaalaman sa trabaho sa gobyerno.

Ito aniya ang mahalaga sa public service.

“Alam na po nila, makita mo – pagka titingnan niyo po, maliwanag na maliwanag alam na po nila ang pala – ang trabaho sa gobyerno. Alam na alam nila ‘yan. Wala ng – ito ‘yung mga klaseng tao, mga klaseng nasa serbisyo publiko na hindi basta’t… Kung minsan hindi na lang nagsasalita at basta’t ginagawa na lang ang trabaho. ‘Yan po ang mahalaga,” ang winika ni Pangulong Marcos.

Nanawagan din ang Chief Executive sa mga botante na huwag makinig sa mga kandidato na walang ginawa kundi ang dumada.

“Huwag tayong – nakikinig ng mga puro dada nang dada. Dapat ang hinahalal natin ay puro gawa,” diing pahayag ng Pangulo.

Aniya, ang kanyang mga kandidato ay pupunta ng Senado para makatrabaho ang ibang mga mambabatas at itulak ang mga batas na mapakikinabangan ng publiko.

“Pupunta sila sa Senado hindi upang manggulo, hindi upang magtalunan doon sa kanilang kapwa senador, kung kani-kanino pa,” pagtiyak ng Pangulo.

“Sila ay nandiyan sa Senado upang magkaisa at ipagbuo ang magagandang batas na kinakailangan ng taumbayan. ‘Yan po ang istilo ng ating mga kandidato,” dagdag na pahayag nito.

Samantala, ayon sa Commission on Elections, ang Bulacan ay kinokonsidera bilang vote-rich province na may 2,173,026 registered voters.

Present naman sa nasabing campaign rally sina dating Interior Secretary Benhur Abalos, Makati City Mayor Abby Binay, Senator Pia Cayetano, Senator Lito Lapid, Senator Ramon “Bong” Revilla Jr., former Senate President Vicente “Tito” Sotto III, Senator Francis Tolentino, mga dating Senador Panfilo “Ping” Lacson at Manny Pacquiao, at House Deputy Speaker Camille Villar.

Hindi naman nakadalo sa Bulacan sortie sina Senator Imee Marcos at ACT-CIS Representative Erwin Tulfo. (Daris Jose)

NHA namahagi ng Certificate of Lot Allocation sa mga benepisyaryo sa Batasan Hills

Posted on: March 3rd, 2025 by Peoples Balita No Comments

GUMAWA ng mahalagang hakbang ang National Housing Authority (NHA) upang matiyak ang pagmamay-ari ng lupa para sa mga miyembro ng Lakatan Bayanihan Dolor Estate Homeowners Association sa pamamagitan ng paggawad ng 85 Certificate of Lot Allocation.

Sa isang seremonya na kamakailan lang sa SB Park, Brgy. Batasan Hills, Lungsod Quezon, natanggap ng mga benepisyaryo ang kanilang mga sertipiko sa presensya ng NCR East Sector Officer-in-Charge na si Ar. Monn Alexander Ong, na kumatawan kay NHA General Manager Joeben Tai. Dumalo rin sa kaganapan ang mga opisyal ng lokal na pamahalaan ng Quezon City at mga miyembro ng samahan ng mga may-ari ng bahay.

Isa sa mga benepisyaryo, si Rene Cornita, ay nagpahayag ng kanyang pasasalamat sa pagtanggap ng katibayan ng lot allocation, na aniya ay isang hakbang patungo sa seguridad ng kanyang pamilya na magkaroon ng tahanan.

“Sobrang saya po kasi isa ako sa mga awardee ng NHA at nabiyayaan ng Certificate of Lot Allocation. Wala na masyadong kaba sa kinatitirikan ng aming munting tahanan. Nagpapasalamat din ako sa mga taong nasa likod nito, lalo na sa ating gobyerno, na nagbibigay ng pabahay at lupa para sa mga nangangailangan.”

Ang Dolor Estate Socialized Housing Project ay bahagi ng Settlements Upgrading Program ng NHA, na naglalayong magbigay ng seguridad sa paninirahan at pagbutihin ang imprastraktura sa mga informal settlements na matatagpuan sa mga lupang pag-aari ng gobyerno na inilaan para sa pabahay. Ang 5,400 sqm na lupa sa Lakatan St., Brgy. Batasan Hills, Lungsod Quezon, ay nakuha ng NHA noong 1989 upang suportahan ang mga layuning ito. (PAUL JOHN REYES)

PBBM, nakatuon sa pagtugon sa tumataas na presyo ng bigas- Malakanyang

Posted on: March 3rd, 2025 by Peoples Balita No Comments

NANANATILING committed si Pangulong Ferdinand Marcos Jr., sa pagtugon sa tumataas na presyo ng mga pangunahing bilihin lalo na ang bigas.

Sinabi ni Presidential Communications Office Undersecretary at Palace Press Officer Claire Castro na kasalukuyang tinitingnan ni Pangulong Marcos ang posibleng ugat ng dahilan ng pagsirit ng presyo ng bigas.

“Sa food security, tinututukan iyan ng Pangulo. At inaalam din kung saan ba dapat ang magandang paraan para ito ay ma-lessen kung may problema man diyan. ‘Yun naman ang laging ginagawa ng Pangulo,” ang sinabi ni Castro.

“Tututukan ito mabuti ng Pangulo kung ano ang nagiging problema kung bakit hindi pa yata bumababa sobra ang presyo ng bigas,” ang dagdag na pahayag ni Castro.

Nagbabala naman siya ng mabigat na parusa laban sa mga economic saboteur, lalo na sa mga smugglers at hoarders, na nagmamanipula sa presyo ng mga agricultural products.

“Behind our back, may gumagawa ng ganiyang mga krimen. Hindi iyan makakalagpas sa Pangulo kaya iisa-isahin natin iyan,” ang sinabi pa rin ni Castro.

Sa isang sectoral meeting sa Palasyo ng Malakanyang noong Pebrero 18, sinabi ni Pangulong Marcos na hangad niya ang “unified” approach para maging matatag ang presyo ng pagkain at maging bagong polisiya para maging pananggalang ng mga consumers mula sa market volatility.

Sa nasabing pulong, tinalakay din nina Pangulong Marcos at ang implementing agencies ng Anti-Agricultural Economic Sabotage Act na putulin ang smuggling at patatagin ang presyo ng mga food products.

Samantala, idinkelara naman ng Department of Agriculture (DA) noong Pebrero 4 ang food security emergency para sa bigas para tugunan ang “extraordinary price increase ” sa retail price.

Araw ng Miyerkules, inanunsyo ng DA ang pagbabawas sa maximum suggested retail price (MSRP) ng 5-percent broken imported rice sa P49 per kg. simula Marso 1. Ang MSRP ay unang itinakda sa P52 per kg., bumaba mula sa P55 per kg. noong Pebrero 15. (Daris Jose)

POGO ban na utos ni PBBM, ‘malaking factor’ sa pagkakaalis ng Pinas mula sa FATF grey list –Malakanyang

Posted on: March 3rd, 2025 by Peoples Balita No Comments

NAKATULONG ang naging desisyon ni Pangulong Ferdinand Marcos Jr. na ipatupad ang total ban sa lahat ng Philippine Offshore Gaming Operators (POGO) sa bansa para maalis ang Pilipinas mula sa Financial Action Task Force (FATF) grey list.

Kung matatandaan, ipinag-utos ni Pangulong Marcos, sa kanyang State of the Nation Address noong July 2024, na ipagbawal ang lahat ng POGO sa bansa matapos ang ilan dito ay masangkot sa krimen kabilang na ang human trafficking, serious illegal detention, at money scams.

“Opo, napakalaki pong naging factor ito (POGO ban) para makita ng FATF ‘yung improvement,” ang sinabi ni Palace Press Officer Undersecretary Claire Castro sa isang panayam.

“At lalong-lalo na po, mayroon kasing Executive Order No. 33. Talagang inutos ni Pangulong Marcos na dapat maiayos lahat, kung anuman ang rekomendasyon, lahat ng dapat na gawin ay gawin para po matanggal tayo sa grey list kasi malaki pong bagay ito lalong-lalo na sa mga OFWs at sa mga investors,” dagdag na wika nito.

Sa ulat, ipinalabas ang EO 33 noong 2023, itinatag ang anti-money laundering, counter-terrorism financing, at counter-proliferation financing strategy ng bansa para sa 2023-2027.

Nauna rito, sinabi ni Castro na ang pagsisikap ng pamahalaan at reporma sa paglaban sa money laundering at terrorism financing ay nagresulta rin ng pag-alis ng Pilipinas mula sa FATF grey list.

Ang desisyon ng FATF na alisin ang bansa sa grey list nito ay matapos ang isang onsite visit mula January 20 hanggang 22, kung saan naging matagumpay na maipakita ang pagsunod sa action plan nito.

Ang FATF, isang independent organization na may 39 miyemro, kabilang ang Pilipinas sa ilalim ng tumaas na monitoring o grey list noong 2021 sa panahon ng administrasyong Duterte, matapos tukuyin ng international anti-dirty money watchdog ang 18 pagkukulang na dapat na tugunan ng gobyerno para labanan ang money laundering at terrorism financing.

“These include deficiencies in regulatory supervision in gambling operations related to POGOs, weaknesses in the implementation of targeted financial sanctions despite obvious anomalies, and delays in implementing the Anti-Terrorism Act of 2020 despite huge intelligence confidential funds,” ang litaniya ng Presidential Communications Office (PCO). (Daris Jose)

Teodoro, nanawagan sa ASEAN na magkaisa sa gitna ng mga pagbabanta sa West PH Sea

Posted on: March 3rd, 2025 by Peoples Balita No Comments

HINIKAYAT ni Defense Secretary Gilberto Teodoro Jr. ang mga member-states ng Association of Southeast Asian Nations (ASEAN) na magkaisa sa gitna ng nagpapatuloy na pagbabanta sa West Philippine Sea.

Sinabi ng Department of National Defense (DND) na ginawa ni Teodoro ang panawagan sa ASEAN Defense Ministers’ Meeting (ADMM) Retreat sa Penang, Malaysia.

“ASEAN has ensured the longest period of peace in any region since World War II. However, this peace is now under threat—not due to our incapacity to preserve it, but because of the absence of unanimity on key issues,” ang sinabi ng Kalihim.

Ani Teodoro, ang mga pagbabanta sa Philippine sovereignty, sovereign rights, at hurisdiksyon sa WPS ay hindi lamang domestic o regional concern, kundi isang “global issue” na makaaapekto sa ‘international stability.’

“The ASEAN needs to remain cohesive and proactive in upholding regional stability,” ayon kay Teodoro at maging ang ipagtanggol ang ‘international law and norms.’

Hinikayat din ni Teodoro ang ASEAN na paigtingin ang operational cooperation sa pamamagitan ng pagpapalawig ng joint patrols, exercises, at intelligence-sharing para makabuo ng ‘trust’ sa hanay ng defense forces.

Nagbabala rin ang Kalihim laban sa external attempts na maghahasik ng pagkakahati sa loob ng Southeast Asia at pinayuhan ang mga member-states na ibasura ang external influences na nais lamang na wasakin ang rehiyon.

Para kay Teodoro, dapat na mapanatili ng ASEAN ang kalayaan at strategic autonomy.

Tinukoy naman ni Teodoro ang criminal activities na isang malaking banta sa rehiyon.

“We should resist coercion in whatever form and exchange information on foreign activities that are inimical to our national interests, such as online scams, trafficking in persons, illegal migration, which destroy the fabric of our respective societies,” ang winika ng Kalihim.

“We may not always agree, but the spirit of ASEAN compels us to cooperate where we can, consult where necessary, and act when we must,” aniya pa rin.

(Daris Jose)

Higit P.7M shabu, nasamsam sa 4 drug suspects sa Valenzuela

Posted on: March 3rd, 2025 by Peoples Balita No Comments

KALABOSO ang apat drug suspects, kabilang ang isang High Value Individual (HVI) matapos makuhanan ng mahigit P.7 milyong halaga ng shabu nang maaresto ng pulisya sa buy bust operation sa Valenzuela City.

Kinilala ni P/Lt. Col. Timothy Aniway Jr, hepe ng Northern Police District – District Drug Enforcement Unit (NPD-DDEU) ang mga suspek na sina alyas “Bossy”, 20, alyas Johaira, 38, alyas “CJ”, 22, at alyas “John”, 20.

Ayon kay Lt. Col. Aniway, ikinasa nila ang buy bust operation sa pangunguna ni P/Capt. Regie Pobadora, sa koordinasyon sa PDEA at sa tulong ng Valenzuela Police Sub-Station 3 matapos magpositibo ang natanggap nilang ulat hinggil sa umano’y pagbebenta ng shabu ni alyas Bossy.

Dakong alas-1:20 ng madaling araw nang dambahin ng mga tauhan ng DDEU si alyas Bossy at ‘Johaira’ nang magsabwatan umano na bintahan ng shabu ang isang pulis na nagpanggap na buyer sa No. 30 Espiritu St., Brgy. Marulas habang naaktuhan naman ang dalawa pang suspek na sumisinghot ng shabu.

Ani Cappt. Pobadota, nakumpiska nila sa mga suspek ang humigi’t kumulang 110 grams ng hinihinalang shabu na may standard drug price na P748,000.00, buy bust money, at drug paraphernalias.

Mahaharap ang mga suspek sa kasong paglabag sa RA 9165 o ang Comprehensive Dangerous Drugs Act of 2002.

Pinuri ni PCOL Josefino Ligan, Acting District Director ng NPD ang mga operatiba ng DDEU sa kanilang dedikadong pagsisikap at pangako sa pagpuksa sa ilegal na droga at pagprotekta sa komunidad. (Richard Mesa)

Malabon LGU, PRC nagkaisa sa pagpapatupad ng insurance coverage program para sa mga empleyado

Posted on: March 3rd, 2025 by Peoples Balita No Comments

NAKIPAGTULUNGAN ang Pamahalaang Lungsod ng Malabon sa Philippine Red Cross (PRC) upang ipatupad ang Membership Accident Assistance Benefits (MAAB) Program para sa mga empleyado at miyembro ng iba pang sektor sa lungsod.

Pormal na nilagdaan ni Mayor Jeannie Sandoval ang memorandum of agreement na naglulunsad ng programa, kasama sina PRC Secretary General Dr. Gwendolyn Pang, PRC-Malabon Chapter Chairman Ricky Sandoval, City Administrator Dr. Alexander T. Rosete, PRC-Malabon Fund Generation Committee Chairperson Ms. Flerida Marcelo, at PRC-Malabon Officer-in-Charge Marcelo.

“Sinisikap po ng ating lokal na pamahalaan na bawat isa sa atin ay magkaroon ng seguridad at kasiguruhan sa kanilang kalusugan at kaligtasan ano man ang panahon. Kaya ikinagagalak ko po ang ating pakikipagtulungan sa Philippine Red Cross para sa isang napakahalaga at napakagandang programang ipatutupad sa ating lungsod. Ngayon, mas mapapabuti pa natin ang mga serbisyong pangkalusugan hindi lang para sa mga regular na mga empleyado ng lungsod, kundi sa lahat ng mga kawani at mga sektor sa ating lipunan na may mahahalagang ambag sa ating pag-unlad,” ani Mayor Jeannie.

Ang MAAB Program ay naglalayong mag-enroll ng mahigit 3,000 kaswal at kontraktwal na empleyado, job order employees, aktibong miyembro ng Jeepney Operators and Drivers Association (JODA), miyembro ng Tricycle Operators and Drivers Association (TODA), miyembro ng ETRIKE Association, at aktibong Rescue and Fire Volunteer Groups sa Malabon, lahat ay nasa ilalim ng komprehensibong insurance coverage. Kasama sa saklaw ng proteksyon ang accidental death, disablement, dismemberment, daily allowance sa ospital sakaling magkasakit at burial assistance.

Ang mga benepisyaryo ay makakatanggap ng identification card, na maaari nilang iharap sa PRC para sa kanilang insurance coverage.

Ang lokal na pamahalaan ay patuloy na makikipagtulungan sa PRC, lalo na sa pag-oorganisa ng mga pagsasanay, blood donation drive, at iba pang serbisyo para sa kapakinabangan ng mga Malabueno sa oras ng pangangailangan.

“Sa paraang ito, mas maipapadama natin sa ating kapwa Malabueno na tayo ay handang tumulong at umalalay sa panahon na kinakailangan nila, katuwang ang Philippine Red Cross. Ang paglada ng kasunduang ito ay isang simbolo ng pagtutulungan para sa pagpapabuti ng mga programang pangkalusugan at kaligtasan. Makakaasa kayo na patuloy ang pamahalaang lungsod, sa pangunguna ni Mayor Jeannie, sa pagsasagawa ng mga programa na nagbibigay prayoridad sa bawat indibidwal para sa kanilang kinabukasan,”. Pahayag ni City Administrator Dr. Alexander T. Rosete. (Richard Mesa)