MALUGOD na tinanggap ng Valenzuela City ang bagong upong hepe ng pulisya ng lungsod na si P/Col. Allan B Umipig sa isinagawang turnover ceremony na ginanap sa Valenzuela City Police Station (VCPS) Headquarters noong May 9, 2024.

Si Col. Umipig ay itinalaga bilang bagong officer-in-charge ng Valenzuela City Police, kapalit ni out-going Chief P/Col. Salvador S Destura Jr. na nagsilbi sa lungsod ng halos dalawang taon.

Pinangunahan ni Northern Police District (NPD) Director P/BGen Rizalito G Gapas ang isinagawang turn-over ceremony.

Nagpasalamat naman si Col. Destura kay Mayor WES Gatchalian sa lahat ng suporta nito sa lokal na puwersa ng pulisya.

“Ang buong suporta na ipinakita ng lokal na pamahalaan, ano pa ang magagawa natin bilang kapalit, kundi ang magbigay ng pantay na serbisyo sa mga mamamayan ng Valenzuela City,” pahayag niya.

Samantala, pinaalalahanan naman ng bagong acting chief of police na si Col. Umipig ang kanyang bagong team ng local police na kailangan niya ang kanilang suporta.

Aniya, priority niya ang kapakanan ng kanyang mga tauhan, “pero hindi ko kukunsintihin ang mga seryosong maling gawain ng aking mga tauhan, siyempre.”

“Susuportahan ko ang internal disciplinary mechanism gayundin ang internal cleansing effort ng Philippine National Police. Paiigtingin ko ang pagsasagawa ng intelligence operation,” sabi ni Col. Umipig.

Present sa seremonya sina Atty. Jaime De Veyra, Valenzuela City Government Administrator, P/Col. Benliner L Capili, DDDO, P/Col. Edelberto B Pitallano, CDDS, P/Col. Renato B Ocampo, Chief, DPRMD, P/Col. Ruben Lacuesta, hepe ng Caloocan City Police Station, P/Col. Jay Baybayan, hepe ng Malabon City Police Station, P/Col. Mario C Cortes, hepe ng Navotas City Police Station at ang mga tauhan ng Valenzuela police. (Richard Mesa)

NALAMBAT ng mga tauhan ng Maritime police ang apat na wildlife traders sa magkakahiwalay na entrapment operation sa loob at labas ng National Capital Region (NCR), kaugnay ng ‘All Hands Full Ahead’ campaign.

Ayon kay Northern NCR Maritime Police Station (MARPSTA) Chief P/Major John Stephanie Gammad, dakong alas-10:02 ng gabi noong May 9 nang maaresto si alyas “Joseph” ng kanyang mga tauhan sa ikinasang entrapment operation sa Masaya Street, Barangay Old Capitol Side, Quezon City at nakumpiska sa kanya ang apat Indian Ring Neck Parrots.

Bandang alas-4:46 ng hapon, noong May 7 nang matimbog naman ng kabilang team ng Maritime police sa naganap na entrapment operation sa Barangay Salvacion, Quezon City, si alyas “John” at nakuha sa kanya ang isang Sun Conure.

Sa Calumpit Bulacan, nalambat naman ng isa pang team ng Maritime police sa isinagawang entrapment operation sa MacArthur Highway, Purok 1, Brgy., Gatbuca, alas-8:33 ng gabi noong May 6, si alyas “Jacob” at nasamsam sa kanya ang dalawang Green Cheek Conures.

Habang nakumpiska naman kay alyas “Jonathan” ang isang Bearded Dragon matapos siyang madakip ng mga tauhan ni Major Gammad sa entrapment operation noong May 6, sa kahabaan ng MacArthur Highway, Brgy., Santa Cruz, Guiguinto, Bulacan, dakong alas-10:37 ng gabi.

Mahahrap ang mga suspek sa mga kasong paglabag sa Sec. 27 “Trading of Wildlife” at “Possession of Wildlife Species” of R.A. 9147 (Wildlife Resources Conservation Protection Act) in relation to Sec. 6 of R.A. 10175 (Cybercrime Prevention Act of 2012). (Richard Mesa)

NAKATAKDANG mag-deploy ang Department of Social Welfare and Development (DSWD) ng mga validators para sa rehistrasyon at balidasyon ng 300,000 target na pamilya bilang paghahanda sa ‘full-scale implementation’ ng ‘Walang Gutom 2027: Food Stamp Program” sa darating na Hulyo.

Sinabi ni DSWD Undersecretary for Innovations Eduardo Punay na ang programa ay mayroong three- to four-year run kung saan ang gobyerno ay magbibigay ng karagdagang pagkain para sa mga tinukoy na isang milyong food-poor families, o limang milyong indibiduwal.

“We already hired the needed staff in our areas of implementation, 10 regions po ‘yun and 21 provinces na 300,000 ‘yung families ang ating target,” anito.

Sinabi pa ni Punay na ang ahensiya ay mag ha-hire ng mas mababa sa 1,000 validators sa mga pangunahing lugar.

Aniya pa, ang pilot implementation, kabilang ang 3,000 na pamilya ay nagsimula noong nakaraang Disyembre at nakatakdang tapusin ngayong buwan.

Ang pondo sa pamamagitan ng $3-million grant ay mula sa Asian Development Bank (ADB), ang programa na magbibigay ng electronic benefit transfer (EBT) cards na may kargang food credits na nagkakahalaga ng P3,000 kada buwan para pambili ng piling nakalista na food commodities mula DSWD-registered o accredited retailers.

Ang bulto ng food credits ay nakalaan sa carbohydrate-rich foods ghaya ng bigas na P1,500, 30% para sa protina gaya ng kartne na P900, at 20% para sa prutas at gulay, oil, asin, at magingcondiments na P600.

Sa kabilang dako, tatakbo ang programa ng hanggang 2027 at nangangailangan ng P40 billion, target kasi nito ang isang milyon na food-poor families o iyong mga kuimikita na mas mababa sa P8,000 kada buwan.

Samantala, unti-unti namang itataas ng DSWD ang bilang ng mga benepisaryo mula 300,000 sa unang taon hanggang 300,000 sa pangalawang taon at 400,000 sa pangatlong pagkakataon, may kabuuang isang milyon na food-poor household beneficiaries.  (Daris Jose)

SISIMULAN na sa plenaryo ng Mababang Kapulungan ng Kongreso ngayong linggo ang panukalang pag-amyenda sa Rice Tariffication Law na naglalayong maibaba ang presyo ng bigas.

Tiniyak din ni Speaker Ferdinand Martin G.  Romualdez ang masusi at mabilis na pagtalakay ng Kamara upang mapagtibay ang panukala sa ikalawang pagbasa sa Miyekules.

Ayon kay Romualdez, ang hakbang ay upang mabawasan ang halaga ng bigas na malaking tulong sa mamayang Pilipino.

Inaasahan ang agad na pagsisimula ng debate sa oras na iendorso na ng Committee on Agriculture and Food, na pinamumunuan ni Quezon 1st District Rep. Mark Enverga ang pag-asa ng panukalang mag-aamyenda sa RTL.

Noong nakaraang Martes inaprubahan ng komite ni Enverga ang pinal na bersyon ng House Bill (HB) Nos. 212, 405, 1562, 9030, 9547, at  House Resolution (HR) No. 1614.

Layunin ng substitute bill na palakasin ang kompetisyon at kakayahan ng rice industry na matiyak na may mabibiling bigas ang mga Filipino sa abot kayang halaga.

Kasabay ng pag-apruba ng komite ay pahayag ng Pangulong Ferdinand “Bongbong” R. Marcos Jr., na isertipika bilang ‘urgent’ ang panukalang pag-amyenda ng RTL.

Hinahangad ni Speaker Romualdez na maisabatas ang amyenda sa RTL sa Hulyo, at maibaba ng hanggang sa P30 ang kada kilo ng presyo ng bigas.

Sa kasalukuyan, nagkakahalaga ng P40-45 o higit pa sa P50 ang kada kilo ng bigas sa pamilihan.

Kabilang din sa layunin ng substitute bill ang maibalik ang mandato ng National Food Authority’s (NFA) na makapagbenta ng murang bigas sa publiko.

Upang mapanatili ang buffer stock ng bigas, bibigyan ng kapagayrihan ang NFA na bumili ng bigas sa mga lokal na magsasaka batay sa pangangailangan ng bansa.

Sa mga pagkakataon namang hindi sapat ang supply sa loob ng bansa, maaaring bumili ang NFA ng bigas mula sa mga accredited importer sa isang itinakdang bahagi ng CIF (cost, insurance, and freight) landed price.

At panghuli, maaari ding direktang umangkat ng bigas ang NFA, kung may authorization mula sa Pangulo, para lamang mapanatili ang supply at presyo ng bigas.

Saklaw din ng panukala ang pagbibigay ng pansamantalang kapangyarihan sa NFA sa pagkakataon ng biglang pagtaas ng presyo o matinding kakulangan ng suplay.

Pinalalakas din nito ang Bureau of Plant Industry upang tiyakin ang pagpapatupad ng mga pamantayan sa kalinisan at phytosanitary.

Inirerekomenda rin ng panukala ang mga pag-aayos sa alokasyon ng pondo at ang pagtatatag ng Rice Industry Development Program Management Office. (Vina de Guzman)

NAGPAHAYAG ng pasasalamat si Pangulong Ferdinand R. Marcos Jr. sa lahat ng mga ina, kabilang ang Unang Ginang Liza Araneta-Marcos, sa kanilang  sakripisyo ngayong Araw ng mga Ina.

Sa isang post sa social media nitong Linggo, pinarangalan ni Marcos ang lahat ng mga ina sa kanilang mga sakripisyo na nagpatibay sa pamilya at sa lipunan sa kabuuan.

“Sa ating mga kahanga-hangang ina, mga single mom, mga tatay na ginagampanan ang papel ng ina, at sa bawat isa na tumatayong ina, nais kong iparating ang inyong walang sawang pagmamahal at mga sakripisyo ay siyang nagbibigay liwanag sa ating buhay at nagpapatibay sa ating lipunan,” ani Marcos.

“Ngayon, ipinagdiriwang natin ang bawat isa sa inyo,” dagdag ng Pangulo.

Sa isang hiwalay na post, kinilala at pinasalamatan ng Pangulo ang kanyang asawa sa kanyang lakas at compassion, gayundin ang kanyang dedikasyon sa pagtatanggol sa kanilang pamilya.

Sinabi rin ng Pangulo na maswerte ang kanilang pamilya na nasa kanilang tabi ang Unang Ginang.

“To this dear lady, who not only fills our home with love but stands ready to defend her family at any turn — happy Mother’s Day! We are incredibly lucky to have you on our side,” anang Chief Executive.

“Your strength and compassion not only safeguard our family but also uplift our entire nation,” dagdag ng Pangulo. (Daris Jose)

BINITBIT ng pulisya sa selda ang isang lalaki na nasa top 7 most wanted person ng Caloocan City matapos matimbog sa ikinasang manhunt operation sa naturang lungsod.

Ayon kay Caloocan police chief P/Col. Ruben Lacuesta, nakatanggap ng impormasyon ang mga tauhan ng Warrant and Subpoena Section (WSS) ng Caloocan police hinggil sa kinaroroonan ng akusadong si alyas “Rudy”.

Bumuo ng team ang WSS, katuwang ang mga tauhan ng NDIT RIUNCR at Police Sub-Station 6 saka ikinasa ang joint manhunt operation na nagresulta sa pagkakadakip sa akusado dakong ala-1:20 ng madaling araw sa Kaunlaran Village, Libis Baesa, Barangay 160 Sta. Quiteria.

Ani Col. Lacuesta, inaresto ng kanyang mga tauhan ang akusado sa bisa ng warrant of arrest na inisyu ni Presiding Judge Barbara Aleli Hernandez-Briones ng FC Branch 1, Caloocan City noong 12, 2024, para sa kasong Sexual Abuse under Sec. 5(b) of R.A 7610.

Pansamantalang nakapiit ang akusado sa costudial facility unit ng Caloocan police habang hinihintay ang pagpapalabas ng commitment order mula sa korte.

Pinuri naman ni Gen. Gapas ang Caloocan police dahil sa kanilang pagsisikap para tugusin ang mga taong wanted na pinaghahanap ng batas na nagresulta sa pagkakaaresto sa akusado. (Richard Mesa)