SA kulungan ang bagsak ng dalawang drug suspects matapos makuhanan ng mahigit P.1 milyon halaga ng droga nang kumagat sa ikinasang buy bust operation ng pulisya sa Caloocan City, Biyernes ng madaling araw.

          Kinilala ni Caloocan police chief P/Col. Ruben Lacuesta ang naarestong mga suspek na sina alyas “Demonyo” at alyas “Jeng-Jeng”, kapwa residente ng lungsod.

          Sa kanyang ulat kay Northern Police District (NPD) Director P/BGen. Rizalito Gapas, sinabi ni Col. Lacuesta na nakatanggap ng impormasyon ang mga operatiba ng Station Drug Enforcement Unit (SDEU) hinggil sa umano’y ilegal drug activities ni ‘Demonyo’ kaya isinailalim nila ito sa validation.

          Nang makumpirma na positibo ang report, ikinasa ng SDEU ang buy bust operation na nagresulta sa pagkakaaresto sa mga suspek dakong alas-3:02 ng madaling araw sa Salmon St., Brgy. 8 matapos magsabwatan na bintahan ng P6,500 halaga ng droga ang isang pulis na nagpanggap na buyer.

Ani Col. Lacuesta, nakumpiska sa mga suspek ang humigi’t kumulang 16.32 grams ng hinihinalang shabu na may katumbas na halagang P110,976.00 at buy bust money na isang P500 bill, kasama ang anim na P1,000 bododle money.

          Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

HINDI na nakalabas ng kulungan ang isang babaeng dadalaw lang sana sa nakakulong niyang kinakasama matapos mabisto ng babaeng jail officer ang shabu na itinago niya sa kanyang maselang parte ng katawan sa Caloocan City.

Ayon kay Caloocan City Jail (CCJ) Warden J/Supt. Jerome Verbo, alas-3:30 ng hapon nang dumating ang suspek na si alyas “Jezyl” sa CCJ sa Talimusak corner Tanigue St., Kaunlaran Village, Dagat-Dagatan para dalawin ang kinakasamang si alyas “Samya” na nakakulong sa naturang kulungan dahil sa kasong paglabag sa R.A 10591.

Inakala ng suspek na maipupuslit niya para sa kinakasama ang mga kontrabandong itinago niya sa kanyang maselang parte ng katawan subalit, napansin ni JO1 Eme Rose Bautista ang kakaiba niyang paglalakad na inihalintulad sa paglalakad ng isang pato.

Dahil dito, isinailalim sa pribadong pagrerekisa ng jail officer ang ginang at dito natuklasan ang nakapasok na 60-stick ng sigarilyo, anim na plastic sachets na naglalaman ng hinihinalang shabu, at dalawang alluminum foil sa kanyang ari na nakasilid sa parang-condom na lalagyan.

Dinakip ang ginang na sinampahan ng kasong paglabag sa R.A. 9165 o ang Comprehensive Dangerous Drug Act of 2002 sa Caloocan City Prosecutor’s Office. (Richard Mesa)

NANAWAGAN si Pangulong Ferdinand ‘Marcos Jr. sa lahat ng stakeholders na tukuyin ang mga karagdagang lokasyon para sa energy storage systems sa Visayas region.

Ito ang bahagi ng naging talumpati ng Pangulo sa ceremonial energization ng Cebu-Negros-Panay 230KV Backbone Project sa Bacolod City, Negros Occidental.

”I implore all our stakeholders in the Visayas to strategically identify suitable locations that will host new baseload generation plans as well as renewable energy and energy storage systems,” ayon kay Pangulong Marcos.

”This will bolster energy sufficiency and sustainability in Negros and Panay,” dagdag na wika nito.

Hinikayat din ng Pangulo ang mga private generators ”to invest in Negros and Panay sub-grids so that the region can meet its energy demands and ensure self-sufficiency in the long run.”

Matatandaang, sa unang bahagi ng taon ay nakaranas ng power outage ang Panay na nauwi sa P3.8 bilyong halaga ng pagkalugi sa ekonomiya.

Sinabi ng National Grid Corporation of the Philippines na ang Cebu-Negros-Panay Backbone, kinabibilangan ng Negros-Panay Interconnection Project Line 2, ay naglagay ng tatlong stages at ang huli ay nakompleto nito lamang Marso 27, 2024.

Sinabi ng NGCP na napunan nito ang umiiral na Amlan-Samboan submarine cable na kasalukuyang ginagamit para makakonekta sa Cebu at Negros islands.

Ang unang stage ng CNP Project ay nagdagdag ng bagong 230kV transmission line mula Bacolod tungong E.B Magalona, habang ang 2nd stage ay in-upgrade ang Cebu Substation sa 230kV level.

Idinagdag pa nito na ang CNP ay naglagay ng 670 transmission towers saklaw ang 442 circuit kilometro ng overhead lines, 98.9 circuit kilometro ng submarine cables na may 10 bagong substations at ang pinalawig na 2 umiiral na pangunahing substations.

Samantala, sinabi ni Pangulong Marcos na magtutulungan naman ang national government, local government units, at pribadong sektor na pabilisin ang permit issuance sa energy projects at pagkuha ng right of way para sa transmission lines. (Daris Jose)

SUPORTADO ni Assistant Minority Leader at Gabriela Women’s Party Rep. Arlene Brosas ang panawagan ng mga manggagawa sa pamahalaan na magpatupad ng special o unscheduled breaks sa trabaho tuwing panahon ng sobrang init sa bansa.

“Both the government and employers share responsibility for ensuring the health and safety of workers. As temperatures soar across various regions in the country, reaching potentially dangerous levels, workers are at heightened risk of heat-related illnesses and fatalities,” ani Brosa.

Habang nakapaloob sa Labor Advisory 08, series of 2023, na ipinalabas ng Department of Labor and Employment (DOLE), ang mga guidelines para sa sitwasyon nang sobrang init ng, iginiit ni Brosas na kailangan ng mas malawak na hakbang na sasakop sa lahat ng mga manggagawa kahit ano pa man ang estado ng trabaho nito.

Bigo aniya ang Labor Advisory 08-23 na protektahan ang mga outdoor workers at informal workers, kabilang na yaong nasa agrikultura, daungan, construction, delivery riders, at iba pang platform workers.

Sinabi ng mambabatas na mas bukas ang mga ito sa heat stress at posibilidad na heat strokes.

Hinikayat nito ang pamahalaan na magpalabas ng isang executive order na magmamandato para sa pagapatupad ng heat breaks, at iba pang kinakailangang safety measures, upang maprotektahan ang mga manggagawa sa lahat ng sektor. (Vina de Guzman)

LAGLAG sa kamay ng mga awtoridad ang Top 5 at 7 Most Wanted Person ng Northern Police District (NPD) matapos malambat sa magkahiwalay na manhunt operations Caloocan at Valenzuela Cities.

Ipinag-utos ni Caloocan police chief P/Col. Ruben Lacuesta ang pagpapaigting sa pagtugis kay alyas “Boy Manyak” upang mabigyang katarungan ang sinapit ng dalagitang kanyang pinagsamantalahan noong nagdaang taon hanggang sa makatanggap ng impormasyon ang mga operatiba ng Station Intelligence Section (SIS) hinggil sa kinaroroonan ng akusado.

Katuwang ang mga tauhan ng Warrant and Subpoena Section (WSS), Investigation and Detective Management Section (IDMS), Northern Maritime Police Station at RIU-NCR, kaagad nagsagawa ng joint manhunt operation ang SIS na nagresulta sa pagkakaaresto sa akusado, dakong alas-5 ng hapon sa Phase 8a, Block 89, Lot 28, Brgy. 17 Bagong Silang.

Ani Col. Lacuesta, binitbit ang akusado sa bisa ng inilabas na warrant of arrest ni Caloocan Regional Trial Court (RTC) Presiding Judge Ma. Teresa De Guzman Alvarez ng Branch 131 na may petsang Disyembre 28, 2023 para sa kasong Statutory Rape at Lascivious Conduct sa ilalim ng R.A. 7610 o Special Protection Against Chile Abuse, Exploitation and Discrimination Act.

Sa Valenzuela, natimbog naman ng mga tauhan ng SIS ng Valenzuela police sa manhunt operation sa harap ng isang gas station sa Mac Arthur Hi-way, Brgy. Malinta bandang alas-11:15 ng gabi ang isa pang akusado na nasa top 5 MWP naman ng NPD na si alyas “Dodong”.

          Ayon kay Valenbzuela police chief P/Col. Salvador Destura Jr., dinakip ng kanyang mga tauhan ang akusado sa bisa ng warrant of arrest na inisyu ni Presiding Judge Evangeline S Mendoza-Francisco ng RTCt, Branch 270, Valenzuela City noong August 23, 2021, para sa kasong Sec. 2. Par. 2 of the RPC as amended by R.A. 8353 of RPC Art 266-A (Rape) and Sec. 2, Par 1(B) of the RPC as amended by RA 8353 of RPC Art. V266-A (2 counts of Rape).

          Pinuri naman ni NPD Director P/BGen, Rizalito Gapas ang Caloocan at Valenzuela police sa kanilang pagsisikap para tugisin ang mga taong wanted na pinaghahanap ng batas na nagresulta sa pagkakaaresto sa dalawang akusado. (Richard Mesa)

TIMBOG ang isang American national na wanted sa kanilang bansa dahil sa fraud.

Kinilala ang pugante na si Paul David Cardwell, 57, na nagtangkang palawigin ang kanyang temporary visitor’s visa gamit ang BI online services noong Marso 27.

Sinabi ni BI visa section Raymond Remigio na ang rekord ni Cardwell ay isinailalim sa secondary check matapos malaman sa Sistema na siya ay convicted US felon.

Siya ay iniulat na pugante na wanted para sa muling panloloko ng $850,000 o higit pa sa P48M mula sa ospital sa Wyoming, USA.

Isinagawa ang manhunt at natagpuan siya ng intelligence operatives sa Cebu noong Abril 3 habang nagtatanong tungkol sa proseso para sa pag-appky ng permanent residence visa.

Matapos maaresto, nanatili sa BI facility si Cardwell bago ang kanyang deportation sa Amerika. GENE ADSUARA