NAGULAT ang buong entertainment industry sa biglaang pagpanaw ng award-winning actress na si Ms. Jaclyn Jose sa edad na 60.

Linggo ng gabi (March 3) nang kumalat ang balitang pumanaw ang aktres. Bagama’t walang nabanggit na cause of death ng aktres, may mga lumabas na balitang nahulog daw ito sa hagdan sa kanyang tahanan da Loyola Grand Villas in Quezon City.

Natagpuan na lang walang buhay na si Jaclyn. Wala raw kasama sa kanyang bahay ang aktres.

Huling napanood si Jaclyn sa Kapamilya series na ‘FPJ’s Batang Quiapo’. Huling teleserye niya sa GMA ay ‘Bolera’.

Sa official statement ng anak ni Jaclyn na si Andi Eigenmann na nanggaling sa Siargao, kasama kapatid na si Gabby Eigenmann, kinumpirma nito ang naging dahilan ng biglaan pagpanaw ng premyadong aktres.

Sa naging pahayag ni Andi noong Lunes ng hapon, namatay ang kanyang ina noong umaga ng March 2 dahil sa myocardial infarction na mas kilalang heart attack.

Hinihingi niya sa publiko na irespeto ang privacy ng pamilya sa kanilang pagdadalamhati. Umaasa rin siya na pamamagitan ng kanyang statement ay matigil na ang mga haka-haka tungkol sa pagpanaw ng aktres.

“Her undeniable legacy will definitely forever live on through her work, through her children, through her grandchildren, and the many lives she’s touched. She herself, her life itself, was her greatest obra maestra,” dagdag pa ni Andi.

Nasa Amerika naman ang anak na lalake na si Gwen, na anytime ay darating na rin sa bansa.

Born on October 21, 1963, in Angeles City, Pampanga, ang tunay na pangalan ni Jaclyn ay Mary Jane Guck. Nakakatandang kapatid nito ay ang 80’s sexy actress na si Veronica Jones.

Na-introduce sa 1984 sex-comedy film na Chikas si Jaclyn kasabay sina Lovely Rivero, Tanya Gomez, Rachel Anne Wolfe, at Karla Kalua.

Sa pelikula ni Lino Brocka na White Slavery in 1985 napansin ang husay ni Jaclyn. Sunod ay ginawa niya ang Private Show under Chito Roño at naipalabas ito sa ilang film festivals abroad. Nagwagi rito si Jaclyn bilang best actress sa Gawad Urian.

Ang ilan pang awards ni Jaclyn na mula sa Gawad Urian ay para sa mga pelikulang Takaw-Tukso, Itanong Mo Sa Buwan, Macho Dancer, The Flor Contemplacion Story, Mulanay, at Sarong Banggi.

Nanalo rin si Jaclyn ng awards mula sa FAMAS (Mulanay, A Secret Affair); Film Academy of the Philippines (The Flor Contemplacion Story, Naglalayag); Star Awards (The Flor Contemplacion Story, Ma’ Rosa); Metro Manila Film Festival (Bubbles: Ativan Queen); at Manila Film Festival (Naglalayag).

Si Jaclyn ang pinakaunang Asian actress na mapanalunan ang best actress award mula sa Cannes International Film Festival para sa Ma’ Rosa in 2017.

Nakatrabaho rin ni Jaclyn ang mga mahuhusay na direktor na pumanaw na tulad nila Lino Brocka (White Slavery, Macho Dancer), Ishmael Bernal (Working Girls 2, Maynila TV series), Eddie Garcia (Magdusa Ka, Imortal), Danny Zialcita (Paano Ang Ngayon Kung Wala Ang Kahapon), Marilou Diaz-Abaya (May Nagmamahal Sa ‘Yo), Leroy Salvador (Alabok sa Ulap), Maryo J. Delos Reyes (Naglalayag), Peque Gallaga and Lorenzo Reyes (Puso Ng Pasko) at Celso Ad Castillo (666).

Ilang beses naman niyang nakatrabaho sina Chito Rono (Private Show, Olongapo: The Great American Dream, Itanong Mo Sa Buwan, Curacha: Ang Babaeng Walang Pahinga) at Joel Lamangan (The Flor Contemplacion Story, Pacquaio: The Movie, Aishite Imasu 1941, Deathrow, Mano Po 5, Felix Manalo).

Nakatrabaho rin niya sa ilang projects sina Jose Javier Reyes (Minsan May Isang Puso), Lupita Kashiwahara (Hati Tayo sa Magdamag), Carlitos Siguion Reyna (Misis Mo, Misis Ko), at Jeffrey Jeturian (Tuhog).

Huling pelikula ni Jaclyn ay ang ‘Broken Hearts Trip’ at ‘Pieta’ na parehong pinalabas noong December 2023.

(RUEL J. MENDOZA)

HINDI raw nagsasawa si Sheryl Cruz sa pagganap bilang kontrabida kahit na 18 years na niya itong ginagawa.

Kahit daw minsan nakapapagod ang magalit at magtaray, lagi raw handa si Sheryl lalo na kung first time niya makatrabaho ang isang artista tulad ni Jo Berry sa ‘Lilet Matias: Attorney-At-Law’.

“I guess, isa sa mga requirements ng pagiging isang artista, hindi lang ng isang beteranang artista, ay maging parang militar. ‘Pag tinawag ka on a moment’s notice, dapat ready ka. Actually, doing the same stuff every time or every now and again does get tiring, and it makes you burnout.

“Before, nakasanayan ko kasi when I do other projects na mayroong tarayan, usually ka-height ko, ka-weight ko, ka-size ko. Ang pinakiusap ko before is ayokong tarayan ‘yung bata, ayokong tarayan ‘yung mas maliliit.

“But then, when this project came to do, by chance naman, it was a blessing in disguise,” sey ni Sheryl.

Kuwento ni Sheryl, ang pinsan niyang si Sunshine Cruz ang nagsabi sa kanya na matutuwa siya kay Jo: “I learned a lot from my cousin, si Sunshine Cruz, na, ‘Ate, panoorin mo ‘to si Jo, ang galing. Matutuwa ka sa kanya, mae-entertain ka sa kanya.’

“Ever since, I look forward to watching and actually doing scenes with her. By luck, thank you kay Lord, na binigay sa akin ‘tong pagkakataon na to na makatrabaho ko si Jo.”

Inamin naman ni Jo na sobra siyang na-starstruck kay Sheryl. Hindi raw niya akalain na one day ay makakasama niya sa isang teleserye si Sheryl.

“Starstrucked po talaga ako. Noong kunan yung unang eksena namin, talagang nakatitig lang ako kay Ms. Sheryl. Parang nanaginip ako na may eksena kami.

“Kaya kahit na tinarayan at sinigawan niya ako sa eksena, natuwa pa rin ako kasi si Sheryl Cruz ang kaeksena ko!” sey pa ni Jo Berry.

***

NA-MISS ni Jason Abalos ang pag-arte kaya kahit nagsisilbi siyang board member sa Nueva Ecija, tinanggap niya ang teleserye na ‘Lilet Matias, Attorney-At-Law’ kunsaan isang abogado ang role niya.

Huling napanood si Jason ay sa guest role niya sa ‘Love Before Sunrise.’

“Mahirap ang gumanap na isang abogado kasi hindi po gaya ng mga una kong ginagawa na labas na labas ‘yung emosyon. Dito, bilang abogado ka, wala ka dapat kinakampihan, dapat makita ng tao na neutral talaga, nandoon ka lang sa katotohanan, nandoon ka lang sa panig ng batas,” sey ni Jason.

Wala raw pinagkaiba ang pagganap niya bilang abogado sa ginagawa niya ngayon bilang board member: “May pagkakaparehas po. Ang goal ng mga lawyer is to serve and to protect. So, parehas lang, parehas lang na nasa panig kami ng katotoohanan at para sa tao.”

Isa pa raw sa pinagkakaabalahan ni Jason ay ang baby boy nila ni Vicki Rushton na si Knoa Alexander. Hindi raw napapagod si Jason na alagaan ito kahit na galing pa siya sa trabaho. Excited din daw umuwi ito agad after ng taping dahil gusto niyang maabutan ito na gising pa para makapaglaro sila.

***

NA-DIAGNOSE ang former talk show host na si Wendy Williams with primary progressive aphasia and frontotemporal dementia.

Pareho sila ng sakit ng aktor na si Bruce Willis.

Ayon Mayo Clinic: “Aphasia is a condition affecting language and communication abilities, and frontotemporal dementia, a progressive disorder impacting behavior and cognitive functions.”

Tulad ni Bruce Willis, hirap nang makipag-communicate ng husto ang 59-year old former TV host since 2023. Hindi na raw ito masyadong nakakakilos at kailangan na ng tulong ng isang caregiver.

Bukod sa mga sakit na nabanggit, na-diagnose din siya with Graves’ disease and lymphedema.

Sumikat si Williams bilang isang radio DJ hanggang sa magkaroon siya ng sarili niyang daytime talk show na The Wendy Williams Show na umere from 2008 hanggang 2021. Pinasikat niya ang opening phrase na “And How Are You Doin’?”

Nagkaroon din ng sariling reality show si Wendy na The Wendy Williams Experience noong 2006 sa VH1. Nagkaroon din siya ng sariling line of jewelry and wigs. Na-induct din siya sa National Radio Hall of Fame noong 2009.

Pumasok sa isang treatment facility si Wendy noong 2023 dahil sa pagiging alcoholic.

(RUEL J. MENDOZA)