INANUNSIYO ng Bureau of Immigration (BI) na ang mga dayuhang magulang at anak nilang Filipino ay maaari nang pumasok ng bansa kahit walang entry exemption document (EED) mula sa Department of Foreign Affairs (DFA).

Sinabi ni BI Commissioner Jaime Morente na bagama’t knakailangang magpakita ng EEDs ang nasabing mga dayuhan sa kanilang pagdating sa airport, pero kinakailangan pa rin nila kumuha ng visa sa alinmang embahada sa Pilipinas o konsulado.

Paliwanag ni Morente na ang nasabing polisiya ay alinsunod sa resolusyon na inisyu ng Inter-Agency Task Force for the Management of Emerging Infectious Diseases (IATF-EID) na inamyendahan ang unang resolusyon na hindi isinasama ang kanilang dayuhang Filipino na asawa sa pagkuha ng EED bago pumasok ng bansa.

Gayunman, ayon sa BI Chief na kinakailangang may nakalagay na “notation” sa visa ng mga dayuhang magulang at anak ng isang Filipino citizens na “Foreign Spouse/Parent/Child not covered by IATF Resolution 160-B; No EED Required.”

Nabatid na sa sulat na ibinigay kay Morente noong February 17, hiniling ng DFA sa BI na payagan ang isang may hawak na valid visa na may nakalagay sa nasabing “notation” na payagang pumasok sa bansa kahit walang EED.

Sinabihan din ng DFA ang BI na inutusan ang lahat ng Philippine Foreign Service post na gamitin ang notation sa pag-iisyu ng visa sa mga dayuhang asawa , magulang at anak na Filipino.

“We welcome the IATF’s move to relax the travel guidelines for foreigners who are immediate relatives of our Kababayans. It will allow families to reunite, and will also attract more foreign tourists to come here, helping hasten the recovery of our economy which has been badly hit by the pandemic,” ayon kay  Morente. (GENE ADSUARA)

HINAMON  ni Comelec Spokesperson James Jimenez na ituloy ng mga kandidato ang kanilang unang naging pahayag na magsampa ng kaso  sa Comelec ukol sa nangyaring  pagbabaklas ng mga campaign posters sa loob ng bakuran ng  kanilang tagasuporta.

Ayon sa Comelec, dito umano magkakaroon ng linaw ang isyu.

“Bukas ang Comelec,sa pagrere-evaluate ng guidelines na ‘yan, sa pagtitingin ulit ng mga polisiya at mga prinsipyo na sinusunod natin”, pahayag ni Jimenez.

Pero of course kung gusto niyong magkaso that is perfectly well within their rights”, anang tagapagsalita ng Comelec.

Sa ngayon ayon sa Comelec ay wala pa namang naghahainan ng kaso laban sa mga ilegal poster materials.

Samantala, nanindigan naman ang Comelec na ipatutupad pa rin ang resolution no.10732 hanggang walang nagsasampa ng reklamo laban sa panuntunan kaugnay sa in person campaign. (GENE ADSUARA)

NABISTO ang dalang mahigit P.2 milyon halaga ng shabu ng isang construction worker matapos tangkain takasan ang mga pulis na sumita sa kanya dahil sa hindi pagsuot ng face mask sa Caloocan City, kamakalawa ng gabi.

Kinilala ni Caloocan police chief Col. Samuel Mina Jr, ang naarestong suspek na si Roldan Magluyan, 27 ng Wood Craft St., Bayanihan Baesa, Brgy., 159 ng naturang lungsod.

Ayon kay Col. Mina, dakong alas-10:30 ng gabi, nagsasagawa ng Oplan Galugad ang mga tauhan ng Caloocan Police Sub-Station 6 sa pangunguna ni PLT Mel Soniega sa kahabaan ng Bayabas St., Brgy. 164 nang mapansin nila si Magluyan na gumagala sa lugar at walang suot na face mask.

Nang tawagin ng mga pulis para alamin ang kanyang pagkakilanlan at ipaalam sa kanya ang kanyang paglabag ay hindi sila pinansin ng suspek at sa halip ay tinangka nitong tumakas.

Hinabol siya nina PCpl Jemuel Pule at Pat Joclark Cea hanggang sa maaresto at nang kapkapan ay nakuha sa suspek ang walong pirasong medium transparent plastic sachets na naglalaman ng tinatayang nasa 36.37 grams ng hinihinalang shabu na may standard drug price P247, 316.00.

Nahaharap ang suspek sa kasong paglabag sa Art 151 of RPC at RA 9165 o ang Comprehensive Dangerous Drug Act of 2002. (Richard Mesa)