Nagkaron ng inagurasyon ang bagong pinalaki at pinalawak na taxiway at building ng Civil Aviation Authority of the Philippines (CAAP) sa Mactan-Cebu International Airport (MCIA) na nasa Lapu-lapu City noong nakaraang April 5, 2021.

Ang nasabing inagurasyon ay isang hudyat na ang pamahalaan ay sinusulong ang pagkakaron ng growth at development sa Visayas kahit na panahon ng pandemya.

Si Department of Transportation (DOTr) Secretary Arthur Tugade ang siyang namuno sa inagurasyon ng pinalaking taxiway at building ng CAAP kung saan ito ay magkakaron ng mas madaming aircraft parking capacity mula sa 40 na ngayon ay 50 slots na.

“Likewise, maximum aircraft movement capacity at the taxiway is now increased from the previous 35 aircraft per hour to 40 per hour,” ayon kay Tugade.

Dahil sa upgraded na taxiway, inaasahang mas dadami pa ang mabibigyan ng trabaho dahil sa pagbubukas ng mga locators at bagong concessionaires lalo na ngayon na mas maraming malalaking aircraft ang maaring gumamit ng expanded taxiway.

Pinasiyanan rin ni Tugade ang bagong dalawang-palapag na CAAP Administration Building na nasa loob ng MCIA complex na mayroon ibat-ibang facilities upang ang CAAP ay makapagbigay ng magandang serbisyo sa kanilang mga stakeholders.

Dagdap pa ni Tugade na marami pa na mga bagong facilities sa loob ng MCIA ang gagawin na ayon sa programa ng Build, Build, Build ng pamahalaan.

Ang iba pa na kanyang tiningnan ay ang ginagawang pagtatayo ng pasilidad ng MCIA Terminal 2 at ang MCIA Corporate Building na inaasahang magkakaron ng inagurasyon sa darating na July 31.

Sinabi naman ni presidential assistant for the Visayas Michael Dino na utang na loob nila kay Tugade at sa kanyang team ang pagsusulong na magkaron ang Cebu ng isang makabagong airport na kanilang kailangan upang ang Visayas region ay makabangon at magbukas ng ekonomiya.

Si Mactan-Cebu International Airport Authority (MCIAA) officer-in-charge Glen Napuli ang nagsabi na dahil sa pagdalaw ni Tugade sa MCIA Terminal 2, ito ang nagbigay ng moral booster sa aviation at airport frontliners na nagtratrabaho kahit na panahon ng pandemya.

“I never get tired of these programs that provide happiness and convenience to the nation, especially for Cebu… Cebu is important to us. President Duterte loves Cebu,” dagdag pa ni Tugade.

Binigyan pansin din ni Tugade ang suporta at tulong ng CAAP sa pangunguna ni director general Jim Sydiongco at ng MCIAA na pinapagpatuloy ang mga airport development projects na makakaganda sa pagunlad ng air connectivity, job opportunities at tourism sa Visayas.

Hindi lamang MCIA ang inaayos, kasama na rin ang Bantayan airport sa Visayas na ngayon ay may 94.67 percent ng tapos at inaashang magkakaron ng inagurasyon sa second quarter ng taon.

Samantala, ang DOTr at Cebu Port Authority (CPA) ay natapos na rin ang mga seaport projects sa Pilar, Malapascua at Maya. May apat pa na projects ang ngayon ay ginagawa sa Bantayan, Consolacion, Cebu Baseport at San Fernando.

Noong nakaraan buwan naman ay nagkaron din ng inagurasyon ang development project sa Calbayog airport sa Samar.  (LASACMAR)

Naniniwala ang Department of Health (DOH) na handa na ang mga lugar na sakop ng National Capital Region (NCR) Plus na bumalik sa estado ng general community quarantine (GCQ).

Kasunod ito ng anunsyo ng Malacanang nitong Huwebes ng gabi na isasailalim na sa “GCQ with heightened restriction” ang NCR, Cavite, Laguna, Rizal, at Bulacan simula bukas, May 15.

“Base sa mga indicators na mayroon tayo, at pag-aaral ng iba’t-ibang ahensya at mga eksperto, nakikita natin na kakayanin natin kung tayo ay magkakaroon ng GCQ with heightened restrictions,” ani Health Usec. Maria Rosario Vergeire.

Ayon sa opisyal, bumaba na ang “average daily attack rate” o tinatayang bilang ng mga nahahawaan ng COVID-19 kada araw sa NCR Plus, pati na ang “growth rate.”

Bukod dito, nakita rin daw ng DOH at mga eksperto na lumuwag na ang sitwasyon sa mga ospital o ang “healthcare utilization rate” ng rehiyon at mga lalawigan.

“Dati mayroon tayong ICU bed utilization as high as 88%, ngayon 67% na lang. Its an improvement pero di natin sinasabi na ligtas na tayong lahat and we can be complacent.”

“This is to balance off yung ating economic losses, dahil marami na tayong kababayang nagugutom.”

Nilinaw ni Vergeire na bagamat niluwagan ng pamahalaan ang quarantine classification sa NCR Plus, may mga panuntunan pa rin dapat sundin ang publiko.

Sa paraang ito raw makakasiguro ang pamahalaan na kontrolado ang sitwasyon ng pandemya.

“Kaya nilagyan ng “heighted restrictions” dahil ang pinapayagan ay unti-unti nating bubuksan ang mga industrya para magkaroon ng trabaho ang mga kababayan natin, pero restricted ang non-essential activities.”

Dagdag pa ng Health spokesperson, may malaking papel din na gagampanan ang local government units para hindi na muling lumobo ang hawaan ng COVID-19.

“For our LGUs to work on shortening the period from the time a person is detected with COVID-19 or with symptoms to the time they are isolated… kung maibaba natin ng 5 and a half days na bababa ang mga kaso natin in two-thirds.”

Ayon sa opisyal, dumaan naman sa konsultasyon at pag-aaral ng mga health experts at National Economic and Development Authority (NEDA) ang rekomendasyon bago inaprubahan ng Inter-Agency Task Force.

PINALAGAN ng Malakanyang ang paratang ng mga kritiko ng Duterte administration na kulelat ang Pilipinas pagdating sa dami ng mga nabigyan na ng Covid-19 vaccines.

Sinabi ni Presidential Spokesperson Harry Roque, kung pagbabasehan ang datos ukol sa bilang ng mga naturukan na ng bakuna kontra Covid-19 ay pumapangalawa na aniya  ang bansa sa Asean region.

Bukod dito, hindi naman nakikipag-unahan o nakikipagkompetensya ang Pilipinas sa ibang mga bansa sa rehiyon subalit kailangan lamang aniya na sabihin ang totoong estado ng vaccination program para patunayan sa mga kritiko na mali ang kanilang mga paratang.

Sa kasalukuyan, inuuna aniyang pinagtutuunan ng pansin ng gobyerno ang pagkakamit ng herd immunity sa NCR plus Bubble hanggang sa umabot na ito sa buong bansa.

Pero kahit sa Metro Manila at mga karatig lalawigan lamang muna aniya magkaroon ng herd immunity  ay napakalaking bagay na nito dahil alam naman natin na lahat na ang bulto ng mga kaso ng COVID-19 ay nasa NCR plus areas.

Sa ulat, pumangalawa na ang Pilipinas sa ASEAN region sa usapin ng dami ng mga nabakunahan laban sa COVID-19.
Dahil dito, naungusan pa ng Pilipinas ang Singapore sa usapin ng vaccination rollout.

Matatandaan kasi noong nakaraang linggo, kung saan nasa ikatlong pwesto lamang ang Pilipinas, kasunod ang Singapore, habang nangunguna naman ang Indonesia.

Batay sa datos na iprinisenta Ni Vaccine Czar Secretary Carlito Galvez Jr., lumalabas na nasa mahigit 2,409,235 na ang bilang ng mga Pilipinong nabakunahan kontra COVID-19.

Mula sa nabanggit na bilang, 451,270 dito ang nabakunahan na ng dalawang dose habang 1,957,965 naman ang naghihintay pa na mabakunahan ng ikalawang dose.

Samantala, ika-15 pwesto naman ang Pilipinas sa buong Asya, habang ika-apatnaput isa naman sa buong mundo. (Bishop Jesus “Jemba” M. Basco)

Nakatanggap ang Lawyers for Commuters Safety and Protection (LCSP) ng ilang sumbong buhat sa mga Transport Network Vehicle Serviceso TNVS providers laban sa isang Transport Network Company o TNC na may come-on na “Drive to Own”at “Kill Switch”program na pang-akit nila sa mga providers.

Talaga naman mae-enganyo ka sa scheme ng TNC na ito.  Ayon sa mga sumbong ganito ang sistema ng TNC – sa halagang twenty thousand pesos ay lalakarin nila na magkaroon ka ng kotse, sila ang maglalakad ng provisional authority at prangkisa para maging TNVS ka at may technology na tinatawag nilang “kill switch” kung saan ay maaari nilang ma-disable ang sasakyan at hindi umandar ang makina.

Proteksyon daw ito ng mga drivers at may ari ng sasakyan laban sa mga carnappers dahil hindi nila mapapaandar ang sasakyan.  Dahil sa ganda ng offer at pahirapan maka-apply ng prangkisa bilang TNVS at marami ang pumatol sa ‘DRIVE TO OWN, KILL SWITCH OFFER’ ng TNC.

Ayon sa mga pumatol sa offer ay madali nga silang nagkaroon ng sasakyan pero hindi naman agad nakakuha ng provisional authority o kaya franchise ang TNC.  Ang sabi ng mga tauhan ng TNC ay basta nasa platform sila ay maaari na silang mamasada at “bahala na sila sa huli”.

Lumalabas kasing colorum ang mga ito dahil walang PA o prangkisa. Pero dahil may monthly na babayaran na ang mga may ari ng sasakyan ay napipilitan sila na mangolorum.  Pero dahil hindi naman kalakasan ang pasada ng TNC ngayon ay hindi nakakabayad ng monthly payment ang kumuha ng sasakyan.  At heto ang malupit – maaari na i-disable o patayin ng ‘Kill Switch Program’ ng TNC ang makina ng sasakyan. Ibig sabihin ay hindi na ito aandar.

At nangyari nga ito sa maraming providers na hindi makabayad ng monthly payment ng sasakyan.  Ibig sabihin hindi sa carnapping invented ang ‘Kill Switch’ ng mga sasakyan kundi para kung hindi makabayad ang kumuha ng sasakyan ay madali sila ma-disable.

Ang tanong – ligal ba itong ‘kill switch’ na ito?   May pahintulot ba ang mga car dealers sa technology na ito? Alam ba ng LTFRB ito? Ito ang tututukan ng LCSP at ipararating natin sa LTFRB ang bagay na ito.  Sisilipin natin kung accredited pa ng LTFB ang TNC na ito at kung may aplikasyon pa lang ay kailangan harangin ito.  Kung mayroon pong nabiktima ng TNC na tinutukoy dito ipaalam po sa amin sa LCSP at gagawa po tayo ng hakbang laban dito. (Atty. Ariel Enrile-Inton, Jr.)