Nakahanda ang labor department na tulungan na muling makabangon ang mga persons with disabilities (PWDs) na nawalan ng trabaho dulot ng pandemyang Covid-19.

Ganito ang kaso ng 20 PWDs sa General Santos City na nakatanggap ng DOLE Integrated Livelihood Program (DILP) rice retailing starter kits na nagkakahalaga ng P400,867 mula sa General Santos City DOLE Field Office.

“Ang ating tulong ay bahagi ng mandato ng kagawaran na suportahan ang mga nasa marginalized sector para maiangat ang kanilang kabuhayan,” pahayag ni DOLE Region XII Director Raymundo Agravante.

Karamihan sa 20 PWD benepisaryo ay may kapansanan sa paningin at nawalan ng trabaho bilang spa attendants, masahista sa iba’t ibang health and wellness establishment sa lungsod sanhi ng pagbagsak ng ekonomiya dulot ng pandemyang Covid-19.

“Lisod kaayo para sa amuang PWDs nga madulaan ug trabaho lalo na karong pandemya, pasalamat kami sa DOLE sa ilang tabang para sa amuang kabuhayan,” saad ni Junard Gines, isa sa mga benepisaryo.

(Napakahirap para sa aming mga PWDs na mawalan ng trabaho ngayong panahon ng pandemya, gayunpaman nagpapasalamat kami sa DOLE dahil tinulungan nila kaming simulan ang aming pangkabuhayan.)

Pinangasiwaan nina DOLE General Santos Field Office head and chief labor and employment officer Conrado Artatez, Labor and Employment Officer II Rodilyn Pastor, at ng Barangay Local Government Unit ng Calumpang ang pamamahagi ng tulong.

Tiniyak ni Artatez sa mga benepisaryo na ang Kagawaran ay may sapat na kakayahan upang mapalakas at mapagbuti ang kanilang proyektong pangkabuhayan.

Hinikayat ni Regional Director Agravante ang lahat ng mga manggagawa sa SOCCSKSARGEN na nawalan ng trabaho na gamitin ang mga programa at serbisyo ng DOLE upang punan ang nawala nilang kita sa pamamagitan ng mga oportunidad na pangkabuhayan.

“Patuloy na nanawagan ang Kagawaran sa ating mga manggagawa sa pormal at impormal na sektor na samantalahin ang tulong na ito. Sama-sama tayong magtulungan para muling makabawi ang ekonomiya ng ating bansa sa pamamagitan ng pagnenegosyo,” dagdag ni RD Agravante. CDGamboa/SMDumalay

Binakunahan si Labor Secretary Silvestre Bello III ng AstraZeneca COVID-19 vaccine sa Ilagan City, Isabela nitong Sabado, ulat ng DOLE regional office 2.

Ang bakuna ay pinangasiwaan ng kawani mula sa Cagayan Valley Medical Center (CVMC), na siyang tumulong sa labor secretary sa paghahanda at aktwal na pangangasiwa ng bakuna.

Kabilang si Bello sa priority group batay sa listahan ng Inter-Agency Task Force for the Management of Emerging Infectious Diseases (IATF) sa ilalim ng National Immunization Technical Advisory Group (NITAG) prioritization framework and criteria, kabilang sa grupo ng mga senior citizens.

Ang prioritization framework ng IATF ay upang tiyakin na ang mga may pinakamataas na peligro na mahawaan at mamatay ay maprotektahan mula sa sakit.

Matapos mabakunahan, hinikayat ni Bello ang mga nasa priority group na magpabakuna upang kahit paano ay mabawasan ang pagkagambala sa pag-unlad ng lipunan at ekonomiya sanhi ng pandemya.

“Hinihikayat ko ang aking mga kapwa manggagawa at iba pang nasa priority group na magpabakuna. Samantalahin natin ang libreng programa sa pagbabakuna upang tuluyan na nating malampasan ang pandemyang ating dinadanas,” pahayag ni Bello. (Bishop Jesus “Jemba” M. Basco)

Ang truck ban sa Metro Manila ay muling binalik simula noong nakarang May 17 ng Metropolitan Manila Development Authority (MMDA) matapos sumailalim ang rehiyon sa mas di mahigpit na community quarantine hanggang sa katapusan ng buwan.

Sa isang pahayag ng MMDA na nakalagay sa kanilang Facebook page, sinabi ng MMDA na ang mga trucks ay bawal dumaan sa mga pangunahing lansangan sa Metro Manila simula Lunes hanggang Sabado mula 6:00 hanggang ika 10:00 ng umaga at mula 5:00 hanggang 10:00 ng gabi.

“Along EDSA, trucks are totally banned from the Magallanes interchange in the city of Makati to North Avenue in Quezon City daily,” ayon sa MMDA.

Subalit ang mga trucks na may kargamentong madaling masira at mga agricultural products ay hindi kasali sa truck ban.

Samantala, ang lungsod ng pamahalaan ng Makati ay muling binalik ang kanilang modified number coding sa mga lansangan sa Makati.

Ang number coding scheme ay ipapatupad sa buong linggo maliban lamang kung holidays. Subalit ang mga sasakyan ng may sakay na dalawa o mas madami pa ay exempted sa nasabing modified number coding.

Ang buong Metro Manila sa ngayon ay wala pa rin number coding scheme at suspendido hanggang walang pang abisa sa publiko.

Sa kabilang dako naman, ang mga motorista na gumagamit ng North Luzon Expressway (NLEX) ay kinakilangan ng magbayad ng mas mataas ng toll fee simula noong nakaraang Martes.

Pinayagan ng Toll Regulatory Board (TRB) ang NLEX Corp. na magkolekta ng karagdagang P2 para sa Class 1 na sasakyan, P3 sa Class 2 o buses at maliliit na commercial trucks at habang P4 naman sa Class 3 o malalaking trucks at trailers sa “open system.”

Ang open system ay kung saan ang flat rate ay pinapataw kada pasok kasama ang Quezon City, Caloocan City, Valenzuela City, Malabon City, Navotas City, Meycauayan City at Marilao, Bulacan.

Samantalang ang closed system naman ay sa pagitan ng Bocaue sa Bulacan at Mabalacat sa Pampanga.

Habang ang end-to-end travel ay mula sa Metro Manila hanggang Mabalacat ay magbabayad ng karagdagang P6 para sa Class 1. Ang Class 2 at Class 3 naman ay magbabayad ng karagdagang P14 at P16, ayon sa pagkakabangit.

“The increase is part of the approved periodic adjustments due in 2012 ang 2014,” ayon sa NLEX.  (LASACMAR)