2020 July Archive - People's Balita

Archive for July, 2020

Japeth Aguilar, Adrian Wong ipinatatawag ng PBA hinggil sa video ng 5-on-5 game

Posted on: July 6th, 2020 by @peoplesbalita No Comments

Ipinatatawag ngayon sa PBA Commissioner’s Office sina Japeth Aguilar ng Barangay Ginebra at Adrian Wong ng Rain or Shine upang makuha ang kanilang panig tungkol sa umano’y paglabag sa umiiral na quarantine protocols.

Ayon kay PBA Commissioner Willie Marcial, nakatakda niyang pulungin sina Aguilar at Wong sa darating na Lunes matapos kumalat sa online ang mga videos kung saan makikitang naglalaro ang mga ito ng five-on-five basketball.

Maaalalang batay sa direktiba ng Inter-Agency Task Force (IATF), bawal ang pagsasagawa ng mga contact sports, maging ang mga practice at scrimmage.

Sinabi pa ni Marcial, nakausap na raw nito ang special draft pick na si Isaac Go, isa pa sa mga players na nakita sa video, tungkol sa nasabing insidente.

Maliban kina Aguilar at Go, nakita rin na naglalaro sa isang full-court game si Thirdy Ravena sa Ronac Gym sa San Juan.

Habang si Wong ay namataan naman sa ibang mga larawan at video na ipinost sa Instagram ng isang basketball trainer.

Ani Marcial, kanya raw rerebyuhin ang lahat ng mga videos na nakalap ng kanyang tanggapan bago makipagpulong sa mga players.

Umaasa naman ito na hindi parurusahan ng IATF ang mga sangkot na manlalaro.

Negosyo sa Maynila mas yumabong kahit may pandemya

Posted on: July 6th, 2020 by @peoplesbalita No Comments

Ipinagmalaki kahapon ni Manila City Mayor Isko Moreno sa kaniyang State of the City Address (SOCA) ang patuloy na pagiging matatag ng lungsod ngunit nagbabala na mararamdaman ang epekto ng tatlong buwang lockdown sa ekonomiya sa mga darating pang buwan.

Sa kabila nito, sinabi ni Moreno na handa ang Maynila makaraang lumago pa ang kita ng lungsod sa P12.441 bilyon mula Hulyo 2019 hanggang Mayo 2020 sa kabila ng implementasyon ng tax amnesty.

Mas marami rin umanong negosyo ang nagbukas sa lungsod kahit na may pandemya nang 8,665 bagong negosyo ang nagparehistro at nasa 51,022 ang nag-renew ng kanilang mga permits.

Ipinagmalaki rin ng alkalde ang kampanya niya sa kalinisan upang hindi na sabihan na “dugyot” ang Maynila. Umaabot umano sa 217 kilometro na ang haba ng kalsada ang dinaanan ng kanilang ‘flushing operations’ sa loob ng 311 araw.

Umaabot naman sa 566,904 tonelada ng basura ang nahakot ng Department of Public Service (DPS) na may katumbas na 112,981 trak. Nasa 1,119 tonelada ang nahakot buhat sa Manila Bay.

Dahil dito, patuloy na nanawagan si Domagoso sa mga Manilenyo ng ibayong disiplina at tigilan na ang pagtatapon ng mga basura sa dagat, ilog at mga estero.

Sa kriminalidad, nasa 898 wanted persons ang nadakip ng Manila Police District. Nasa 173 sa kanila ay mga Most Wanted at 25 ang nadakip ng pulisya habang nasa lockdown ang Maynila. (Gene Adsuara)

25 NBA players at 10 staff nagpositibo sa COVID-19

Posted on: July 6th, 2020 by @peoplesbalita No Comments

Pumalo na sa 25 NBA players ang nagpositibo ng COVID-19 mula ng magsimula ang malawakang testing noong nakaraang linggo.

Ito mismo ang ibinunyag ng NBA at National Basketball Players Association kung saan mula noong Hunyo 23 ay nasa 351 na mga manlalaro ang kanilang sinuri.

Siyam ang nagpositibo dito ng COVID-19 mula sa naunang 344 players na nasuri mula June 24-29.

Umabot naman sa 10 team staff members ang nagpositibo rin sa coronavirus.

Ang nasabing bilang ay mula sa 884 team staff members na sinuri mula June 23-29.

Agad namang inilagay sa quarantine ang mga nagpositibong players at staff.

Magugunitang mula noong Marso ay natigil ang mga laro sa NBA dahil sa pagpositibo ng ilang manlalaro kung saan nakatakda silang magbalik sa paglalaro sa Hulyo 30 sa Orlando, Florida.

Pinoy athletes, kanya-kanya ring diskarte sa gitna ng COVID pandemic

Posted on: July 3rd, 2020 by @peoplesbalita No Comments

Pumapatok ang mga negosyo ng Filipino athletes na kanilang paraan sa gitna ng Coronavirus Disease 2019 (COVID-19) pandemic.

Tulad nalang ng Philippine Basketball Association (PBA) players na sina Blackwater Elite forward Carl Bryan Cruz at ng kanyang girl friend na nagtitinda ng cleaning and disinfectant tools tulad ng alcohol, dishwashing liquid at iba pa.

Sinamantala naman ng PBA player na si Bambam Gamalinda ang pagiging fan niya ng Sinugba o mga pagkaing luto sa uling.

Ilan sa mga suki niya ay mga katulad ding basketbolistang sina Arwind Santos, Marc Pingris, Junemar Fajardo, Rome Dela Rosa, at Jio Jalalon.

Habang ang 2016 Rio Olympian na si Mary Joy Tabal ay kinagiliwan ang pagbi-bake na bumibenta rin naman.

”Now I’m staying at home while doing my at home workout and learning some baking, cooking at iba pa. I’ve been into anxiety, stress and worried but as days passed by parang na realize ko overthinking won’t help me and won’t help everyone lalo na sa family ko na magiging affected din pag hindi ako okay,’‘ ani Tabal.

‘Man in black’ sa CCTV footage ng Jolo shooting, iniimbestigahan na ng NBI

Posted on: July 3rd, 2020 by @peoplesbalita No Comments

Kwestiyonable ngayon ang nasaksihan sa CCTV footage na umano’y may ‘man in black’ na gumalaw sa katawan ng isang sundalong napatay sa pamamaril sa Jolo, Sulu.

Sa ulat, iniimbestigahan na ng National Bureau of Investigation (NBI) ang naturang CCTV footage ng insidente.

Makikita sa video ang lalaking nakaitim na nakasuot ng sumblero na tila may inilagay siyang kung ano sa bangkay at inililipat ang pwesto ng kinabagsakan nito.

Nakita rin na binuksan niya ang SUV ng sundalo na umano’y may ginagalaw sa loob bago may ilagay sa kanyang bag.

Sa ulat ay isa sa apat na sundalong nasawi ay nasa loob ng SUV.

Kasalukuyan pa ngayong tinitingnan ang bawat anggulo ng footage at tinagurian din ng mga militar na ‘rubout’ ang insidente. (Daris Jose)

Publiko walang dapat ikabahala sa financial system ng mga bangko sa PH – BAP

Posted on: July 3rd, 2020 by @peoplesbalita No Comments

Tiniyak din ng Bankers Association of the Philippines (BAP) na walang dapat ikabahala ang publiko sa mga bangko dahil matibay umano ang financial system sa bansa.

Ginawa ng mga grupo ng mga bangko ang pahayag kasunod nang nabulgar na pamemeke ng ilang junior officer kung saan nakaladkad ang BDO Unibank at Bank of the Philippine Islands.

Una nang nadamay ang naturang dalawang bangko sa tinaguriang pinakamalaking accounting scandal sa Germany na kinasangkutan ng Wirecard.

Maging ang Bangko Sentral ng Pilipinas ay nagsabi na rin na hindi pumasok sa Pilipinas ang sinasabing nawawalang $2.1 billion at ginawang cover-up lamang ang naturang mga bangko.

Ayon sa BAP meron mang mga personalidad na magtatangkang mag-falsify ng mga dukumento pero hindi sila basta-basta makakalusot bunsod nang nakalatag na mabusising beripikasyon o tinatawag na due diligence ng mga bangko.

Binigyang diin pa ng Bankers Association na walang dapat ipag-alala ang publiko dahil sa mahigpit ang mga patakaran na kanilang ipinapatupad sa mga bank certifications.

“The BAP assures the public that the country’s financial system is sound and that very strict rules regarding the issuance of bank certifications are in place,” bahagi pa ng statement ng BAP. “Some individuals may try to forge or falsify these documents, but their authenticity can be readily ascertained through careful scrutiny or verification by the appropriate institutions.”

ABS-CBN nagbayad ng P71.5-B buwis sa loob ng 17 taon – exec

Posted on: July 3rd, 2020 by @peoplesbalita No Comments

Aabot ng ilang bilyong piso na buwis ang ibinayad ng ABS-CBN sa pamahalaan sa loob ng 17 taon, ayon sa isang opisyal ng kompanya.

Sa pagdinig sa Kamara, sinabi ni ABS-CBN Group chief financial officer Ricardo Tan na mula 2003 hanggang 2019, aabot ng P71.5 billion ang buwis na ibinayad ng kompanya sa pamahalaan.

Dahil dito nagbabala si Bayan Muna party-list Rep. Carlos Isagani Zarate sa epekto ng pagpapasara sa ABS-CBN pagdating sa ekonomiya ng bansa.

“Sa panahon ngayon na grabe po ang krisis na dinadaanan natin, na pinalala pa ng pandemya ng COVID, ito yung bilyon na pwede mawala rin in the next 10 or 25 years, na supposedly na papasok sa ating pambansang ekonomiya,” ani Zarate.

Samantala, nanindigan naman si BIR commissioner Manuel Mapoy na regular na nagbabayad ng kanilang corporate taxes ang ABS-CBN.

Sa katunayan, sa pagitan ng 2016 hanggang 2019 ay aabot ng P15 billion ang buwis na ibinayad ng kompanya sa pamahalaan. (Daris Jose)

DPWH, DOH hinimok na simulan na ang paghahanda para sa quarantine facilities sa mga rehiyon

Posted on: July 3rd, 2020 by @peoplesbalita No Comments

Hinimok ni Cagayan de Oro Rep. Rufus Rodriguez ang DPWH at DOH na ihanda ang mga plano para sa pagtayo ng quarantine facilities sa lahat ng rehiyon sa bansa.

Nagpahayag ng kanyang suporta si Rodriguez sa panukalang inihain ni Deputy Speaker LRay Villafuerte para sa establishment ng quarantine facilities sa iba’t ibang rehiyon sa bansa, sa pagsasabi na mahalaga ito sa panahon ngayon gayong problema pa rin ang COVID-19 pandemic.

Karamihan kasi aniya sa mga isolation at treatment facilities sa bansa ay pawang makikita sa Metro Manila.

“Since there is now an increase in COVID-19 cases in the provinces, we need these regional quarantine facilities to serve our people in the countryside,” ani Rodriguez.

“In Region 10, which includes Cagayan de Oro City, there is a marked increase of Covid-19 patients. Region 10 has no dedicated quarantine building with complete equipment and the required number of trained medical personnel for these kinds of pandemic,” dagdag pa nito.

Sinabi ni Rodriguez na dapat handa na sa ngayon ang DPWH sa planong pagtayo ng mga pasilidad na ito, habang ang DOH naman ay dapat na magsimula nang mag-train ng kanilang mga kawani na mamando sa mga establisimyento na ito. (Bishop Jesus “Jemba” M. Basco)

Paghahanap sa 14 Pinoy sa OccMin boat collision, patuloy pa rin

Posted on: July 3rd, 2020 by @peoplesbalita No Comments

Nagpapatuloy pa rin ang search and rescue operation ng Philippine Coast Guard o PCG sa mga nawawalang mangingisda at pasahero ng isang fishing boat sa Occidental Mindoro.

Katuwang ngayon ng PCG sa paghahanap ang tauhan ng Philippine Navy at Bureau of Fisheries and Aquatic Resources o BFAR maging ang Bureau of Fire Protection o BFP ay tumulong na rin sa operasyon.

Ayon kay Commodore Armand Balilo, tagapagsalita ng PCG, malakas ang alon pero base aniya sa ground commander ay kaya-kaya namang magsagawa ng SAR.

Linggo ng madaling araw nang makabanggaan ng Liberty 5 ang MV Vienna Wood sa Occidental Mindoro.

Umaasa naman ang PCG na may makikita pa ring survivor kaya nagpapatuloy pa ang kanilang operasyon.

PBA may banta sa mga player

Posted on: July 3rd, 2020 by @peoplesbalita No Comments

Binantaan ng Philippine Basketball Association (PBA) ang mga manlalaro na sikretong nakikipag-usap at nakikipagnegosasyon sa mga foreign clubs matapos ang balitang maraming manlalaro ang target kuhanin ng Japanese B.League squads bilang Asian import.

Kahapon, pinaalalahanan ni Commissioner Willie Marcial ang mga player kaugnay na kanilang live contracts sa kani-kanilang mga PBA ballclub kaya hindi sila dapat nakikipagnegosasyon sa mga foreign team.

Binalaan din ni Marcial ang mga player sa pagpasok nito sa sikretong negosasyon sa kahit anong Japanese club lalo pa at nakakontrata pa sila sa kanilang mother team.

Pero sinabi ni Marcial na ang mga manlalarong may expired na kontrata ay pwedeng pumasok sa B.League at ibang pang liga sa Asya basta may consent ng kanilang mother teams at PBA board.

“Expired ka na, ayaw mo na sa team mo, mag-paalam ka sa team mo tapos pag-uusapan namin sa board kung okay,” ani Marcial.

Ayon kay Marcial, sa ganitong kaso, titimbangin ng board kung dapat pa bang panatiliin ng mother team ang karapatan sa manlalaro sakaling i-release ito at ng manlalaro na maglaro sa ibang PBA team o sa liga abroad.

Ayon sa ulat, isa ang Japanese league na potensiyal destinasyon ng mga Filipino players kungsaan may salary na aabot sa 16.1 million yen o P7.4 million para sa 2018-19 season.

Mula nang pumirma sa Japanese league si amateur Thirdy Ravena, napabalitang sinimulan na rin ng Japanese league ang paghahanap ng Asian imports at isa ang mga PBA player sa kanilang tinatarget.

Ayon sa ulat, maging ang suspendidong Phoenix forward na si Calvin Abueva ay tinatarget ng Japanese league.

Isiniwalat ni Marcial na wala pa silang nababalitaan o natatanggap na opisyal report mula sa offer kay Abueva o kahit sinong PBA player o maging sa offer na ibinigay kay Terrence Romeo ng San Miguel Beer.

Matatandaang nag-post si Abueva sa kanyang Instagram account ng offer sa kanya ng mga interested na foreign B.League team.

Pero sinabi ni Phoenix coach Louie Alas na ayon kay Abueva ay mas gusto nitong maglaro sa PBA.

Inamin din ni Raymond Almazan ng Meralco na tumanggap siya ng direktang mensahe kay Japanese American-Japanese guard Samuel Sawaji ng Tokyo Cinq Rêves noong isang buwan pero magalang umano niya itong tinanggihan.