2020 February Archive - People's Balita

Archive for February, 2020

Sangley Airport, pinasinayanan ni Duterte

Posted on: February 19th, 2020 by @peoplesbalita No Comments

PINASINAYANAN ni President Rodrigo Duterte ang Sangley Airport development project na may layuning maibsan ang flight delays at air traffic congestion sa Ninoy Aquino International Airport (NAIA) na sa ngayon ay ongoing pa rin ang construction ng bagong commercial airport kung saan ito ay nakikitang magiging isang international hub.

“I vowed to ride my lastflight as President via Sangley to Davao. I am optimistic that the hub will be finished by the time I end my term ni 2022,” wika ni President Duterte.

Ayon sa report, ang mga team mula sa Macro Asia at China Communications Construction Corp., ay siyang sole bidder upang itayo ang $10 billion na Sangley Point International Airport.

Ang 1,500-hectare na master-planned international airport hub ay magkakaroon ng apat na runways, airside at landside facilities na makapagsasakay ng hanggang 130 million na pasahero kada taon.

Itatayo ang bagong terminal building na magbibigay serbisyo sa may 160 na pasahero na mayroong flight information display system, closed circuit television, x-ray, at baggage handling at weight conveyor. Ang runway ng airport ay mas pinaganda at mayroon na itong precision approach path indicator lights at air ground lighting system.

Isa ito sa mga Build, Build, Build project ng administration ni Duterte sa ilalim ng infrastructure program ng pamahalaan.

Sa taong ito, ang Department of Transportation (DOTr) ay nag-allot ng P500 million upang gumanda pa ang drainage system nito, ililipat sa Sangley airport ang NAIA’s General Aviation Area (Gen-Av) at ang hangars nito na sa ngayon ay nakalagay sa NAIA upang ma-decongest ito.

Sa ngayon, ang airport ay 100 percent operational na ginagamit para sa general aviation. Ang nasabing paglilipat ng general aviation ay binigyan ng suporta ng Philippine Airlines (PAL).

“Owners of Gen-Av aircraft have agreed that they will transfer to Sangley as soon as the hangar facilities exclusively for them are built,” sabi ni DOTr Secretary ArthurTugade.

Sa kanyang inaugural speech, binalaan ni Duterte ang mga business groups at individuals na may dealing sa pamahalaan na huwag mag-corrupt ng officials dahil mawawalan sila ng businesses.

Samantala, ang Cavite provincial government ang nag-award para sa initial phase ng project para sa construction ng Sangley Airport sa consortium ng China Communications Construction Co. Ltd at Macro Asia Corp.

Ang MacroAsia Corp., ay isang conglomerate sa ilalim ng kumpanya ni Lucio Tan.

Ayon sa MacroAsia, kanilang dadalahin ang kanilang comprehensive expertise at best practices sa pagtatayo at operasyon ng Sangley Airport. (LASACMAR)

Tuneup game, sineryoso ng NLEX vs SMB

Posted on: February 19th, 2020 by @peoplesbalita No Comments

MASKI na tuneup game lang ang Phoenix Super Basketball Tournament, dadambahin ni Joseller ‘Yeng’ Guiao ang panalo ng kanyang North Luzon Expressway laban sa San Miguel Beer.

Sa mga ganitong tagpo aniya masisilip ang progreso ng team, sa chemistry at sa focus sa laro patungo sa 45th Philippine Basketball Association Philippine Cup 2020 sa parating na Marso 8.

Nagmaneho ang apat Road Warriors ng mga dobleng pigura para lasingin ang Beermen 103-97 nitong Lunes sa Upper Deck Gymn sa Pasig City.

Pabibo sa Road Warriors ang 14 points ni Joseph Ronald Quinahan, may 11 markers sina Kiefer Isaac Ravena at Bong Galanza. May 10 pts. pa si veteran Paul Asi Taulava.

“Any win is a good win, even if it’s in practice,” suma ni Guiao. “Scrimmages like this is basically trying to feel out ‘yung progress as a team, so it’s a good win to beat San Miguel.

Nag-amuyan lang muna ang magkatunggali, magkatrintas sa 45-45 nang pumasok sa break at nasa unahan ang Beermen 76-74 pagtiklop ng three.

Sinalpak ni Kris Porter ang isang three-pointer para iagwat sa 99-96 ang NLEX 1:17 pa, bago sinigurado ni Ken Ighalo ang panalo para sa isa pang basket 101-95, 22 tikada na lang.

Nawalang saysay ang angas na 15 points ni Moala Tautuaa sa San Miguel, at 14 pts. bawat isa nina Terrence, Arwind Santos at Alex Cabagnot. (REC)

‘Pastillas Scheme’, paiimbestigahan ng Immigration

Posted on: February 19th, 2020 by @peoplesbalita No Comments

IPINAUBAYA na ng Malakanyang kay Bureau o Immigration commissioner Jaime Morente ang responsibilidad na alamin ang katotohanan sa sumbong sa senado na diumano, may umiiral na Pastillas scheme sa immigration sa airport.

Lumabas kasi sa pagdinig ng senado na diumano, ang mga Chinese national na pawang mga pogo worker ay binibigyan ng special treatment ng bid personnel kapag dumarating sa paliparan ng bansa, kapalit nito ay ang pakimkim o halagang 10 libong pisong nakabilot sa papel na tila pastillas.

Ayon kay Presidential spokesperson Salvador Panelo na dapat ay hindi lamang ang regular na trabaho ni commissioner Morente ang ginagawa nito, kundi dapat ay inaalam din nito ang mga sumbong ng anomalya o iregularidad sa kanyang mga nasasakupan.

Walang pwedeng gawin sa ngayon ang palasyo hinggil dito dahil wala namang reklamong idinudulog sa kanila.
Kailangan kasing may basehan munang panghawakan ang palasyo bago sila mag imbestiga.

Nakatitiyak naman si Panelo na malamang ay pinagpaliwanag na ni justice secretary Menardo Guevarra si commissioner Morente hinggil sa bagay na ito.

Hindi naman masiguro ni Panelo kung ang mga report ng iregularidad sa bureau of immigration sa airport ay nakarating na sa Pangulo.

Pero sa ngayon, sinabi ni panelo na wala namang sinasabi pa si pangulong Rodrigo Duterte na wala na itong tiwala kay Morente. (Daris Jose)

Siklista ng GFG, papadyak sa 10th Ronda Pilipinas 2020

Posted on: February 18th, 2020 by @peoplesbalita No Comments

MASISILAYAN ang tikas ng Go for Gold Cycling Team sa pagpedal sa LBC Ronda Pilipinas 10th Anniversary Race na magsisimula sa Pebero 23 sa Sorsogon at matatapos sa Marso 4 sa Vigan, Ilocos Sur.

Irarrampa ng GFG ang mga batang siklista upang harapin ang hamon ng mga beterano buhat sa mga tigasing kaponan katulad ng Standard Insurance Navy at 7Eleven Cliqq-Air21 by Roadbike Philippines.

Gagabay sa ‘Go ..’ si skipper at veteran cyclist Ronnel Hualda kasama ang mga batang sina Daniel Ven Carino, Jonel Carcueva, Isamel Grospe, Jr., Jericho Jay Lucero, Marc Ryan Lago, Ronnilan Quita at Rex Luis Krog.

“The guys have improved since we first took them and while our target is modest this year, I will not be surprised if we will give the favored teams serious challenge,” sambit sa OD ni Go For Gold coach at team manager Eds Hualda.
Ayon kay Hualda, nakapokus ang team sa misyong makatuklas at makahubog ng mga bagong talento na maaring maging parte ng national cycling team sa hinaharap.

“That has been the goal by GFG since the team was first formed. And we will never stop until we find and make them champions,” wakas na pahayag ani Hualda.

Ihahatid ang 10-stage race ng LBC at sa mga pagsuporta ng Manuel V. Pangilinan Sports Foundation, Versa, 8A Performance, Print2Go, Petron, Green Planet, Bike Xtreme, Standard Insurance, Spyder, CCN, Lightwater, Prolite, Guerciotti, Black Mamba, Boy Kanin, Vitamin Boost, NLEX/SCTEX, Maynilad, 3Q Sports Event Management Inc., LBC Foundation at PhilCycling. (REC)

Nierba sasakmal, pangil ng NU Lady Bulldogs

Posted on: February 18th, 2020 by @peoplesbalita No Comments

HANDA na ang National University Lady Bulldogs sa pagtrangka nina Jennifer Nierva at Ivy Lacsina sa UAAP Season 82 Women’s Indoor Volleyball Tournament na nakatakda na sanang nagsimula nitong Sabado pero naatras sanhi nang panganib ng Coronavirus Disease 2019 o COVID-19.

Magiging lider na ang dalawang veteran volleybelle na nahasa na sa mga naging karanasan sa larangan ng ilang taon at nakasungkit na rin ng kampeonato nang nasa junior team pa lang sa liga.

May kislap ang rotation ng team ngayong taon, pero namemeligrong maudlot dahil sa pagliban ni setter Joyme Cagande sa ACL tear. Natengga na siya sa nakaraang edisyon sa high-grade ACL.

May butas man ang koponan, puwedeng pasakan nang nagbabalik na beteranang si Risa Sato bakanteng posisyon ni Roselyn Doria. Puntos din sa koponan ang Fil-Japanese middle blocker sa pagiging isang high-caliber player.

Bukod dito’y sariwa pa siya sa mga sinalihang volleyball club gaya ng BaliPure Purest Water Defenders at Creamline Cool Smashers sa nakaraang Nobyembre sa 3rd Premier Volleyball League Open Conference.

“With the NU women’s volleyball team naman we’re very excited to play the second day of UAAP,” reaksyon ni NU assistant coach Regine Diego. “Na-experience na ng mga rookie namin last year iyong laro, so hopefully they play better now specially they have a 14th-man line-up.”

“Also we just want to enjoy this eh kasi hindi naman kami nag-eexpect a lot, kung saan kami abutin at kung saan iyong prinactice namin at naghanda – dun sana kami umabot,” wakas niya. (REC)

Social Services One-Stop Shop, binuksan sa Navotas

Posted on: February 18th, 2020 by @peoplesbalita No Comments

PARA mapadali ang pagkuha at pagbibigay ng social services o mga serbisyong tumutugon sa kapakanan ng publiko, pinasinayaan ng pamahalaang lungsod ng Navotas ang social services one-stop shop sa Navotas City Hall compound.

Pinangunahan ni Mayor Toby Tiangco, kasama sina Congressman John Rey Tiangco at iba pang opisyal ng lungsod at barangay, ang pagbabasbas at ribbon-cutting ng NavoServe sa Navotas City Hall Annex.

“Ang mga taong dumudulog sa city hall at kumukuha ng social services ay mula sa mahihirap na sektor ng ating komunidad. Upang maibsan kahit kaunti ang kanilang mga pasanin, kailangan nating siguruhin na nakukuha nila ang tulong na kanilang kailangan sa komportable, madali at maginahawang paraan,” ani Mayor Tiangco.

Sa kabilang banda, pinaalalahanan ni Cong. Tiangco ang mga kawani ng pamahalaang lungsod na palagiang maglingkod nang may pagmamalasakit at pagkalinga.

“Karaniwan sa mga taong pumupunta dito upang humingi ng tulong ay hirap sa buhay. Sikapin natin na mapaglingkuran sila nang may respeto at pagkalinga,” aniya.

Sa NavoServe pinoproseso ang mga dokumentong kailangan sa pagkuha ng tulong mula sa pamahalaan, kasama dito ang sertipikasyon mula sa City Information and Communications Technology Office (ICTO), certificate of indigency, at social case study.

Makukuha din dito ang mga serbisyong tulad ng Navotas Hospitalization Program (NHP); medical assistance mula kay Mayor Tiangco; Commission on Higher Education (CHED) educational assistance and medical assistance mula kay Cong. Tiangco; pagproseso ng senior citizens and persons with disability (PWD) ID at booklet; at burial assistance.

Ang one-stop shop ay tumutugon din sa mga senior citizen na kumukuha ng kanilang P500 NavoRegalo at sa mga PWD na mag-aaral na kumukuha ng kanilang educational assistance. (Richard Mesa)

KAHIRAPAN, MALALA SA VIRUS

Posted on: February 18th, 2020 by @peoplesbalita No Comments

MAHIGIT limang milyong manggagawa sa bansa ang apektado ng coronavirus disease (COVID-19), kabilang sila sa mga nagtatrabaho sa in-dustriya ng turismo.

Napag-alaman na marami na ang nagkansela ng hotel bookings sa iba’t ibang tourism destination sa Pilipinas. Pinakamatinding apektado ang isla ng Boracay kung saan aabot nang hanggang 60 porsiyento sa mga hotel booking ang kinansela ng mga turista.

Pumapangalawa ang Bohol, na isa sa mga lugar na binisita ng ikalawang confirmed case ng COVID-19 sa bansa.
Ang mga hotel naman sa Cebu ay lugi na umano ng P100 milyon mula nang ipinatupad ang travel ban sa China, Hong Kong, Macau at Taiwan.

Samantala, may mga kumpanyang specialized sa China markets ang pansamantalang hindi muna nag-o-operate habang may ilan naman na tuluyan nang nagsara.

At sa mahigit limang milyong manggagawa, isipin na lang natin kung gaano pa karami ang pamilyang apektado. Paano na ang pang-araw-araw na pagkain, gastos sa eskuwela at iba pang pangangailangan?

Malinaw na hindi lang COVID-19 ang dapat nating labanan kundi maging ang banta ng kahirapan.

Kailangan nang makaisip ng mga alternatibong mapag-kakakitaan. Hindi naman problema ang abilidad dahil likas sa ating mga Pinoy ang pagiging madiskarte. Ang kailangan lang sa ngayon ay oportunidad at suporta mula sa ating gobyerno.

Babae binastos ng manyak, nilamas ang dibdib sa bus

Posted on: February 18th, 2020 by @peoplesbalita No Comments

Pinatunayan ng video na kuha ng isang netizen na kahit anong suot ng isang babae ay hindi ito ligtas sa mga manyak na naglipana sa mga public vehicle.

Sa tweet ni @tabanats, ipinakita nito ang panghihipo ng isang lalaking nakatabi niya sa bus habang binabagtas ang kalsada sa Pala-Pala, Dasmariñas, Cavite.

Papunta ng Tagaytay ang babae nang biglang tumabi sa kanya ang isang lalaki kahit maluwag ang mga upuan sa likuran.

Dito na niya naramdaman na sinasanggi ng manyak ang kanyang kaliwang dibdib, na pilit iniwasan ng babae, ngunit hindi rin nagpapigil ang lalaki na hinawakan na ang dibdib nito.

Kaya naman niya ito binidyuhan at pinakita sa konduktor na sasapakin na sana ang manyak ngunit napigilan.
“…so dun nagsisigaw na ako and pinahiya ko na siya sa bus with my cracky voice. Pinanood ko sa konduktor yung video,, at ayun muntikan na siyang bugbugin nung konduktor at nung mga lalaki don sa loob, pero napigilan,” ayon sa biktima.

Dinala ang babae kasama ang manyak sa police station sa Dasmariñas, at habang nasa mobile ay nagmamakaawa ang lalaki dahil may anak daw ito na may sakit at hindi siya pwedeng makulong.

“VINERIFY DIN NAMIN KUNG MAY SAKIT BA TALAGA ANAK NIYA AND YES MERON NGA. Tinanong ako nung pulis kung ano gusto kong mangyari sabi ko wag na ikulong, ipa-blotter nalang,” saad pa ng netizen.
Hindi naman matanggap ng biktima kung papaano siya tingnan ng asawa ng manyak na tila siya pa umano ang may nagawa na mali.

7 sasakyan karambola sa NLEX

Posted on: February 18th, 2020 by @peoplesbalita No Comments

Nagkabanggaan ang pitong sasakyan sa North Luzon Expressway (NLEX) nitong Linggo ng hapon. Nangyari ang banggaan sa Southbound lane patungong Metro Manila sa Mexico, Pampangan section ng NLEX.

Ayon kay NLEX traffic manager Robin Ignacio, nangyari umano ang karambola matapos na prumeno ang isang motorista dahilan para magkabangaan ang nakasunod dito.

Isang bus ang nadawit sa insidente, na naging dahilan ng kilometrong trapiko sa nasabing parte ng NLEX.

Makikitang yupi ang isang sasakyan na pumatong pa sa isang kotse dahil sa lakas ng impact.

Hindi pa batid kung ilan ang sugatan sa nasabing insidente. (Daris Jose)

Romano, 3 pabibo sa LGBA series

Posted on: February 18th, 2020 by @peoplesbalita No Comments

WALANG pang bahid ang kartada (3-0) ng apat na sabungero sa pagbubukas ng 2020 Luzon Gamecock Breeder Association Cocker of the Year series nitong Biyernes sa Pasay City Cockpit.

Mga miyembro naman ng LGBA ang pupupog sa round two sa darating na Biyernes, Pebrero 21 samantalang sa Pebrero 28 ang grand finals ng pasabong na ito.

Ipinahayag nitong Linggo ni LGBA president Nick Crisostomo, na isang seven-cock derby ang opening leg na mga inaayudahan ng Sagupaan Superfeeds at Complexor 3000.

Namamayagpag sina Mayor Rommel Romano ng RVR GF, Hector Magpantay ng Hammer Dewormer, Boy Tanyag ng CRB at Jimmy Junsay/Dennis Reyes/Ed Ladores/ ng Team Jared Guadalupe.

Humihinga sa batok nila sa 2.5 pts. ang RM San Vicente entry at may 2.0 markers naman sina Tony Antonio, Joseph Chua, Rey Magbuhos, Jimmy Junsay, Jimmy Gosiaco, Jun Sevilla, Doc Ayong Lorenzo, KMC brothers, Wilson Go, Bok de Jesus, Gerry Escalona at Rep. JB Bernos.

Makipag-ugnayan kina Erica at Ace sa 0945 4917474, 0939 4724206, 8843 1746 at sa 8816 6750 para sa iba pang mga detalye. (REC)