NATANGGAP ni Senior Citizens Partylist Cong. Rodolfo Ompong Ordanes ang Lingkod Bayan Award mula sa Gawad Pilipino sa nagdaang pagdaraos ng parangal sa AFP Commissioned Officers Club House sa Quezon City. Binigyang pugay si Cong. Ordanes sa hindi matatawarang serbisyo at dedikasyon sa pagsusulong ng mga batas para sa pag angat ng kapakanan at karapatan ng mga nakatatanda, pag protekta sa mga naaaping seniors at pagpapalawak ng medical missions sa buong bansa.
(PAUL JOHN REYES)

SA isinagawang Ulat sa Malabueno 2026, isa-isang tinalakay ni Malabon City Mayor Jeannie Sandoval ang mga pag-unlad at nakamit na tagumpay ng siyudad na bahagi ng kanyang Lucky 9-Point Agenda na ginanap sa Malabon City Sports Complex, Martes ng hapon.

Kabilang sa mga inihayag ni Mayor Jeannie, na sinuportahan ng video presentation, ang gumandang ekonomiya, negosyo at oportunidad na patunay sa patuloy na pag-ahon ng lungsod na kanyang sinimulan nang mahalal bilang Punong Lungsod noong 2022.

Pinangasiwaan din ng alkalde ang maayos na pamamahala, pagseserbisyo, edukasyon, proyektong pang-imprastraktura at pag-unlad ng turismo para sa mas maganda, malawak, at mas kilala para sa makabagong Malabon. Patunay ang paggawad ng Guinness World Record bilang “Longest Line of Bowls of Noodles” lalu’t bantog ang siyudad sa Pancit Malabon.

Sinabi pa ng alkalde na napanatili rin ng kanyang administrasyon ang pagkakaloob ng de-kalidad na serbisyong pang-kalusugan at suporta sa mga natatanging nagtataguyod sa kanilang pamilya, kabilang ang libreng serbisyo sa Ospital ng Malabon, Serbiyo Caravan, libreng bakuna at pagtatayo ng Animal Bite Treatment Center.

“Taos-pusong pasasalamat sa ating mga kababayang Malabueno, sa kanilang patuloy na suporta sa ating pamumuno at mga layunin. Ang Ulat sa Malabueno ay ang ating pagkakataon upang ilahad ang ating mga naging tagumpay, mga pagsubok na hinarap, na ating nakamit at nalampasan dahil sa pagkakaisa at tiwala,” pahayag ni Mayor Sandoval.

“Kayo ang aming inspirasyon sa patuloy na pagbangon at pagbibigay ng dekalidad na serbisyo sa araw-araw. Kaya naman po kayo ay aking hinihikayat na mas makilahok sa ating mga programa para sa patuloy na pag-unlad,” dagdag niya.

Sa pamamagitan ng Lucky 9-Point Agenda, nakatanggap ang Malabon ng maraming parangal, kabilang ang ISO 9001:2015 certification, ang Guiness World Record para sa Longest Line of Bowls of Noodles, media, health, environmental, at good governance recognitions, na nagpapatunay na ang mga serbisyo nito ay sumusunod sa mga internasyonal na pamantayan.
(Richard Mesa)

NAGLABAS ng Show Cause Order (SCO) ang Land Transportation Franchising and Regulatory Board (LTFRB), sa ilalim ng pamumuno ni Kalihim Giovanni Z. Lopez ng Department of Transportation (DOTr), laban sa apat (4)na kumpanya ng bus dahil sa hindi maayos na kalagayan ng kanilang mga terminal.

Ipinaliwanag ni LTFRB Chairperson Atty. Vigor D. Mendoza II na ang naturang hakbang ay bunga ng isinagawang biglaang inspeksyon sa iba’t ibang bus terminal sa Lungsod Quezon.

“Patunay ito na seryoso kami sa aming sinabi na hahabulin namin ang mga hindi sumusunod sa batayang pamantayan ng mga terminal at pampublikong transportasyon,” diin ni Chairperson Mendoza.

Batay sa ulat ng inspeksyon, bawat isa sa mga kompanya ay nakapagtala ng hindi bababa sa 10 paglabag sa mga alituntunin ng LTFRB kaugnay ng wastong pamamahala ng mga terminal. Kabilang sa mga karaniwang paglabag ang:

• Kakulangan ng bubong upang maprotektahan ang mga pasahero mula sa araw at ulan
• Kawalan ng disenteng hiwalay na palikuran para sa lalaki, babae, at PWDs
• Kakulangan sa mga panseguridad gaya ng CCTV at baggage inspection
• Kawalan ng rampa at pasilidad para sa PWDs

Nauna nang ipinahayag ni Chairperson Mendoza ang mas pinaigting na kampanya laban sa mga ilegal at hindi maayos na terminal na nagiging kanlungan ng mga kolorum na sasakyan. Aniya, pangunahing layunin ng LTFRB na ipagtanggol ang karapatan ng mga pasahero sa ligtas at kumportableng biyahe.

Ang hakbang na ito ay bahagi rin ng plano ng LTFRB na bumuo ng bagong polisiya upang hindi na ma-renew ang prangkisa ng mga bulok na pampublikong sasakyan.

“Ang paglalabas ng SCO laban sa apat na kompanya ng bus ay simula pa lamang. Asahan ng mga mananakay ang araw-araw na pagbabantay at mabilis na aksyon mula sa LTFRB para sa kanilang karapatan sa ligtas at maayos na paglalakbay,” dagdag ni Mendoza.

Sa apat na magkakahiwalay na SCO, inatasan ang mga koumpanya ng bus na magsumite ng nakasulat na paliwanag kung bakit hindi dapat bawiin ang kanilang Certificate of Public Conveyance (CPC) na nagbibigay sa kanila ng karapatang mag-operate ng pampublikong transportasyon.

Ang unang pinagsamang pagdinig para sa apat na kompanya ay nakatakda sa Pebrero 11, 2026.

Hinimok ni Chairperson Mendoza ang lahat ng kumpanya ng bus, transport groups, at mga kooperatiba na ayusin at tiyakin na ang mga terminal na kanilang pinamamahalaan ay sumusunod sa mga regulasyon ng LTFRB. (PAUL JOHN REYES)

BUMUWELTA si Navotas City Representative Toby Tiangco matapos ang naging pasaring na pahayag sa kanya ni Congressman Benny Abante.
“Obvious naman na attack crocodile ni Martin Romualdez si Benny Abante and it’s my pleasure and honor to be criticized by those protecting, defending and praising Martin Romualdez,” pahayag ni Tiangco.
“Pilit nating binubuhay ang isyu dahil hanggang ngayon wala pang big fish na napapanagot pagdating sa mga bogus na flood control projects at maanomalyang insertions na nangyari sa 2025 budget,” dagdag niya.
Nauna rito, pinasaringan ni Abante si Cong. Tiangco. “Gusto mo bang ikaw na ang susunod na meow-meow?”
“Kung may ebidensiya, ilabas. Kung wala, tigilan na ang paninira at ang paghahasik ng pagkakawatak-watak. Paulit-ulit siya, parang sirang plaka,” dagdag niya. (Richard Mesa)